23/06/2026
عاشوورایە
ئەمشەو دڵێک
لەنێو نرکەو ناڵەو خەمی
زامی ئەم کاروانسەرایە
تەوقی قەسوەی شکاندووەو
مەستی سەمای
ئاهەنگی ڕووحی ئەوین و
خوێنی دەشتی کەربەلایە
ئەمشەو ئەو لە کۆڕی زیکرا
بۆتە پەروانەو لەدەوری
چرای سۆزی مستەفایە
ئەمشەو ئەو دڵە غەریبەم
چەپکێ گوڵی شارەزووری
ناوە بەسنگی خۆیەوە
بۆنی عەشقی
خاکی شەهادەتی لێ دێ
لە دەستیدا
دارعەساکەی کاک ئەحمەدەو
لە شانیشیا
شاڵی سەوزی مەولانایە
ئەمشەو ئەو نەک هەر موسافیر
گەڕیدەیەو
قەترە قەترە
وڵاتی خوێن ئەپشکنێ
تا شمشێری ڕەشی تاوان
بەڕەنگی وڵاتی بەفر
بشواتەوەو
بیخاتە بەردەم سەرنجی
تاقە سوارێ
سوارێ کە چاوێکی پڕە
لە زولفەققارەکەی عەلی و
چاوێکیشی
فرمێسکە مروارییەکانی
فاتیمەی لێ دێتە خوارێ
✍️ ئامانج ژاژڵەیی (سەفایی)
