28/04/2026
پەیامی ماتەمینیی دەزگای ئایدیا بۆ کۆچی ناوادەی د. فاروق ڕەفیق
بە ناوی لێپرسراوی دەزگا و ئەنجوومەنی بەڕێوەبردن و ستافی دەزگای ئایدیا بۆ فیکر و لێکۆڵینەوە، پرسە و ماتەمینی بۆ کۆچی ناوەختی توێژەری بواری فەلسەفە (د. فاروق ڕەفیق) ڕادەگەیەنین.
ناوبراو یەکێک بوو لە توێژەرە بەناوبانگەکانی کورد لە بواری فەلسەفە، لە هەمان کاتدا ڕەخنەگرێکی قووڵی سیستمی سیاسی و کۆمەڵایەتیی هەرێمی کوردستان بوو. جگە لەوەی خاوەنی چەندین کتێبی نووسراو و وەرگێڕدراو بوو لە بواری فیکر، فەلسەفە و ڕەخنەی ئایینیدا، هاوکات گوتاربێژێکی لێهاتوو و قسەکەرێکی ڕەوانبێژ بوو، خاوەنی سەدان کاتژمێر بەرنامەی تەلەفزیۆنی و ڕادیۆیی، پۆدکاست و چاوپێکەوتن بوو.
بە درێژایی (40) ساڵی ڕابردوو، لە هەموو وێستگە سیاسی و کۆمەڵایەتییەکانی هەرێمی کوردستان و عێراق و ناوچەکەدا، خاوەنی ڕا و بۆچوونی سەنگینی خۆی بووە، هەر لە کارەساتی بەدناوی ئەنفال و ڕاپەڕینەوە، تا شەڕی ناوخۆ و داگیرکردنی عێراق و پێکهێنانەوەی دەوڵەتی نوێی عێراق، دواتریش ئەزموونی حکومڕانیی هەرێمی کوردستان و سەرهەڵدانی داعش، تا دەگات بە شۆڕشی ڕۆژاڤا و شۆڕشی ژینا و دوایین پێشهاتەکانی ناوچەکە. لە هەموو وێستگەکاندا ڕەخنەگری دابڕانی عەقڵ و سیاسەت بوو.
دواجار وەک دەزگای ئایدیا سوپاسی هاوکارییە مەعریفییەکانی دکتۆری کۆچکردوو دەکەین، کە لە چەندین وێستگەی جیاجیادا هاوکارمان بوو بە نووسین و وەرگێڕان و توێژینەوەکانی، سەرباری ئەوەی لە دیدی فیکر و بۆچوونە ئایدیۆلۆژییەکاندا، هەندێک جار جیاواز بوو لە ڕەوت و ستراتیژی دەزگاکە، بەڵام هەرگیز ئەوە نەببووە مایەی دژبەریی کەسی.
هیوای ئارامبەخشی بۆ خانەوادەکەی دەخوازین... یادی بەرز و بەڕێز ڕادەگرین
دەزگای ئایدیا بۆ فیکر و لێکۆڵینەوە
28/ 4/ 2026
