17/09/2026
بە ناوی کاری خۆبەخشییەوە، تاوان و چەوساندنەوە لە کوردستان دەکرێت
بڕێکی زۆر لە گەنجان، بەتایبەت دەرچووانی زانکۆ و پەیمانگاکان، ناچار کراون بە خۆبەخشی کار بۆ دامودەزگاکانی حکومەت بکەن، هەر لە نەخۆشخانەکانەوە تا دەگاتە فەرمانگە خزمەتگوزارییەکانی تر. ئەمە جگە لەوەی نەریتێکی نابەجێ و کەم وێنەی دروست کردووە، هاوکات بووەتە دەرفەتێک بۆ چەوساندنەوەی هەزاران گەنجی بەهرەمەند، پڕوزە و خوێنگەرم.
ئەم گەنجانە لە دۆخێکدان کە دەبێت کاری بەکرێ بکەن، نەک خۆبەخشی. دەبێت داهاتیان هەبێت بۆ ئەوەی ژیان و خێزانی خۆیانی پێ پێک بهێنن، نەک بێگاری بۆ حکومەتێک بکەن کە خۆی دەیان هەزار مووچەخۆری بندیواری هەیە.
ئەمە بەکارهێنانی نەریتی خۆبەخشییە بۆ تاوان، فێڵکردن و گەندەڵی.
لە هەموو دۆخێکدا، کارکردن دەبێت لەبەرامبەر مووچە و کرێیەکدا بێت کە ژیانێکی سەربەرزانە بۆ کارمەند/کرێکارەکە دابین بکات؛ لە دەرەوەی ئەمە، هەر شتێکی تر بسەپێندرێت تاوان و چەوساندنەوەیە.
من دەزانم گرفتەکە لە نەبوونی دەرفەتی کاری ڕاستەقینەدایە. هەر ئەو مافیا سیاسیانەی حکومەتیان داگیر کردووە، بازاڕ و کەرتی تایبەتیشیان قۆرغ کردووە. حکومەت هیچی پێ نەماوە بۆ ئەم گەنجانە، کەرتی تایبەت و بازاڕیش کێبڕکێی ئازادی تێدا نییە و دەستوپێوەندی مافیا سیاسییەکانی هەولێر و سلێمانی تا ڕادەیەک خنکاندوویانە.
بە گشتی ئابوورییەکە بەجۆرێک پۆکاوەتەوە کە توانای دروستکردنی کاری نییە بۆ ئەو گەنجانەی دێنە بازاڕی کارەوە، ئەمەش بە واتای بێکاری و هەژارییەکی سەختتر لەوەی کە ئامارەکانی حکومەت نیشانمان دەدەن.
ئەنجا حکومەت و هەندێک لە کۆمپانیا و خاوەنکارەکانیش ئەم بێکارییەیان قۆستووەتەوە بۆ چەوساندنەوەی گەنجان.
ئەندازیارێکی تازە دەرچووی زانکۆ دەناسم کە ناچاریان کردبوو بۆ ماوەی ٣ مانگ لە کۆمپانیایەکدا بە خۆبەخش کار بکات، بەمەبەستی ئەوەی دواتر گرێبەستی بۆ بکەن و مووچەی پێ بدەن. لە کۆتایی مانگی سێیەمدا لە سەر کارەکەی دەریان کرد و بە هەمان شێوە ئەندازیارێکی تری تازە دەرچوویان هێنا بە بەڵێنی گرێبەست دوای سێ مانگ، تا کاری خۆبەخشیی پێ بکەن. لە نەخۆشخانەیەکی ئەهلی و دەرمانخانەیەکیشدا بە هەمان جۆر فێڵ و تاوان بەرامبەر کارمەندانی گەنج کراوە.
کاری خۆبەخشی جێگەی ڕێز و بایەخە و لە زۆربەی وڵاتاندا هەیە، بەڵام ئەمە دەبێت کەسێک بیکات کە لە تەمەنی خانەنشینیدایە و هەموو پێداویستییەکانی ژیانی بۆ دابین کراوە و کاتێکی زۆری بەتاڵی هەیە، نەک گەنجێک کە تازە هاتووەتە بازاڕی کارەوە و خۆی دەست بۆ دایک و باوکی پان دەکاتەوە بۆ کرێی هاتووچۆ و باڵانسی مۆبایلەکەی.
هەروەها کاری خۆبەخشی دەبێت بۆ پاککردنەوەی ژینگە، ئاوڕدانەوە لە ئاژەڵە بێڵانەکان، و بەهاناوەچوونی خەڵکانی لێقەوماو، ئاوارە و گرفتار بە کێشەی درێژخایەن بێت، نەک بۆ حکومەتێک کە ٢٠٠ هەزار بندیواری هەیە، یان پروژه و کۆمپانیایەکی کەرتی تایبەت کە سەرمایەکەی ملیارەها دینارە بەڵام ئامادە نییە مووچەی کارمەندێکی خۆی بدات.
من دەزانم بێکاری، بێبازاڕی و نەبوونی دەرفەتی دامەزراندن لە حکومەتدا بووەتە هۆی ئەم نەریتە، بەڵام ئەمە لە کۆتاییدا زیان بە هەموو لایەک دەگەیەنێت. سەرەتا سەرچاوە مرۆییەکانمان دەپوکێنێتەوە. ئەگەر کارکردن بەخۆڕایی و بێ بەرامبەر بێت، ئیتر کچ و کوڕەکانمان بۆچی بچن بۆ زانکۆ و ٤ ساڵی تەمەنی گەنجییان تێدا بەفیڕۆ بدەن بۆ فێربوونی بەهرە و شارەزاییەک کە بژێوییان بۆ دابین نەکات؟
هەروەها ئەگەر دوای تەواوکردنی خوێندن، هەژاری و بێکاری دەرەنجامێکی حەتمییان بێت، چ هۆکارێک هەیە وایان لێ بکات لەم وڵاتەدا بمێننەوە؟
#محەمەدحسێن #ئابوری #دارایی #بازاڕ #خۆبەخش #دامەزراندن
وێنەکە: ئامێرێکی کاری دەستی و پیشە کۆنەکانی کوردستانە، بە سوپاسەوە لە سایتی فەرمی حکومەتی هەرێم وەرمگرتووە
