Hewal ھەواڵ, Sulaimanieh (2025)

10/10/2022

سەرۆک بەرهەم پێشوازیکرد لە نوێنەری نەتەوە یەکگرتووەکان لە عێراق

د. بەرهەم ساڵح، سەرۆک کۆماری عێراق ئەمڕۆ دووشەممە 10 ی تشرینی یەکەمی 2022 لە بەغدا پێشوازیکرد لە خاتوو جینین هێنیس پلاسخارت، نوێنەری تایبەتی سکرتێری گشتی نەتەوە یەکگرتووەکان لە عێراق.

لەدیدارەکەدا گفتوگۆکرا لەبارەی پێشهات و گۆڕانکارییەکانی وڵات و دووپاتکرایەوە لە گرنگی کۆتایی هێنان بە قەیرانی سیاسی دوای تێپەربوونی ساڵێک بە سەر ئەنجامدانی هەڵبژادردنەکان لەرێگەی گفتوگۆ و دیالۆگ بە ئاڕاستەی هێنانەئاراوەی بەرکەوتە نیشتیمانییەکان و رووبەڕووبوونەوەی ئاستەنگەکان و بەرقەرارکردنی ئاسایش و سەقامگیری وڵات و پاراستنی سەلامەتی هاووڵاتیان و هێنانەدی داوا رەواکانی خەڵک بۆ ژیانێکی باشتر.

07/10/2022

پەیامی سەرۆک بەرھەم بەبۆنەی یادی لەدایکبوونی پێشەوای موسڵمانان و سەروەری مرۆڤایەتی

بسم الله الرحمن الرحيم

(لَقَدْ كَانَ لَكُمْ فِي رَسُولِ اللَّهِ أُسْوَةٌ حَسَنَةٌ لِمَنْ كَانَ يَرْجُو اللَّهَ وَالْيَوْمَ الْآخِرَ وَذَكَرَ اللَّهَ كَثِيرًا) صدق الله العظيم

بەڕێزان زانایان و پێشەوایانی پایەبەرز..
ئامادەبووانی بەڕێز..
سڵاوی خودای گەورەتان لێ بێت..

جێگەی شانازیمە کە ئەمڕۆ بەشدار دەبم لەگەڵتان لە یادی لەدایکبوونی پێشەوای موسڵمانان و سەروەری مرۆڤایەتی حەزرەتی محەممەد (د.خ)، لە مزگەوتی ئیمامی ئەعزەم ئەبو حەنیفەی نوعمان (خودای گەورە لێی رازی بێت)، لە بەغدای پایتەختی شارستانیەتی ئیسلامیی، لە بەغدای رەسەنایەتی و مەڵبەندی كەلتووری مرۆڤایەتی و جوامێریی، لە بەغدای خۆشەویستی و ئاشتی، ئومێد دەكەم ئەم شارە بگەڕێتەوە سەر رۆڵە شارستانییەتەكەی خۆی و تەنگژە و قەیرانەکان تێپەڕێنێت و درەوشاوەتر لە جاران باوەش بۆ جیهانی مرۆڤایەتی بکاتەوە.

ئەمە بە رێككەوت نییە كە ھەردوو مەڵبەندی ئاینیی ئەعزەمیە و كازمیە دراوسێی یەكترن، ئەوان دووانەیەكی لێكدانەبڕاوی بەغدای پایتەختن، مەڵبەندی لەگۆڕنانی فیتنە و ئاشوب و پشێویین، لانکە و مەڵبەندی بەهاكانی خۆشەویستی و پێكەوەژیانن، ھێمای یەكڕیزی و برایەتی و تەبایی عێراقییەكانن، فاكتەری یەكسانی و لێبوردەیی نێوان پێكهاتەكانی گەلەكەمانن.

خوشك و برایان..

لەم بۆنە گەورەیەدا كە یادی لەدایکبوونی پێشەوای موسڵمانانە (د.خ)، پێویستە پەند و ئامۆژگاریی وەرگرین و ئەم یادە بکەینە بنەمایەك بۆ لێبوردەیی و پێكەوەژیان.. پێغەمبەری مەزن (د.خ) دەوڵەتی دامەزراند، لەو دەوڵەتەدا توانی کۆتایی بە ستەم و گەندەڵی بھێنێت و دادپەروەریی بچەسپێنێت و بەھا مرۆڤایەتییەکان بەرز راگرێت، لە ئاکاری جوان و هێزی ئیرادە و دادپەروەری و بەزەیی و، ئاشتیخوازیی كردە دروشمی خۆی كە سەرچاوەكەی ئەم ئایەتەی قورئانی پیرۆزە كە دەفەرموێت (وَمَا أَرْسَلْنَاكَ إِلاّ رَحْمَةً لِلْعَالَمِينَ).

رۆژی لەدایکبوونی پێشەوای موسڵمانان (د.خ) بۆنەیەکی گەورە و گرنگ و پەیامبەخشە بۆ بەرجەستەکردنی ئاشتی و خۆشەویستی و پێکەوەژیان لە نێوان سەرجەم مرۆڤایەتی، ھەربۆیە ئەمڕۆ لە ھەمووکات زیاتر پێویستمان بە چەسپاندنی بەھا و رەفتارە جوان و بەرزەکانی پێشەوای موسڵمانانە، تاوەکو بەھا بەرزەکانی ئاینی پیرۆزی ئیسلام بەرز راگرین، با لە پێغەمبەری خودا (د.خ) فێری چاکەخوازیی بین.

ئیسلام بەهاكانی لێبوردەیی و پێكەوەهەڵكردن و ئاشتی بۆ گەلانی جیهان هێنایەئاراوە، تەنانەت سڵاوكردنیشی بە وشەی ئاشتی دەست پێكرد، بەهای پێکەوەژیانی ئاشتییانە و میانەڕەویی چەسپاند، هەروەك خودای گەورە لە قورئانی پیرۆزدا دەفەرموێت: (وَجَعَلْنَاكُمْ شُعُوبًا وَقَبَائِلَ لِتَعَارَفُوا.. إِنَّ أَكْرَمَكُمْ عِندَ اللَّهِ أَتْقَاكُمْ).

پەیامی ئەم ئایەتە پیرۆزە بۆ خەڵكی ئەوەیە كە مرۆڤەكان ھەموو لە یەك بنەچەوە ھاتوون و لە سەریان پێویستە کە زەوی ئاوەدان بكەنەوە و یەكتربناسن و لە پێناو چاكەخوازی و خواپەرستیدا هاریكاریی یەكتر بكەن و خۆشیان لە ستەمكاری و دوژمنكاری و پەرتەوازەیی بەدوور بگرن.

گرووپە توندڕەوەكان لەوەدا شكستیان هێنا كە خۆیان بكەنە دەمڕاستی ئاین و بە ناوی ئاینی پیرۆزی ئیسلامەوە پاساو بۆ كار و كردەوەكانیان بھێننەوە و ھەوڵە نەزۆکەکانیان لەبارچوون، كە ویستیان لەکەی تیرۆر و توندڕەوی بدەنە پاڵ موسڵمانان.

گرووپە توندڕەوەكان، موسڵمان و غەیرە موسڵمانی ئەم جیهانەیان كردنە ئامانج، ئەگەر ئاوڕێکیش بدەینەوە، دەبینین کە زیاتر موسڵمانان بوونەتە قوربانیی تاوانە قێزەونەكانیان.

لە بەرەنگاربوونەوەی تیرۆردا و توندڕەوییشدا، موسوڵمانان پشكی شێریان بەركەوتووە، بەمەش دەیسەلمێنن كە ھەموو پابەندی بنەما جوانەكانی ئیسلامن بۆ رەتكردنەوەی ستەمكاری و كوشتنی خەڵكی بێتاوان، لەم بارەیەشەوە خودای کاربەجێ فەرموویەتی: (مَن قَتَلَ نَفْسًا بِغَيْرِ نَفْسٍ أَوْ فَسَادٍ فِي الْأَرْضِ فَكَأَنَّمَا قَتَلَ النَّاسَ جَمِيعًا).

ئامادەبوانی بەڕێز...

لە کاتێکدا كە یادی ئەم بۆنە گرنگە دەكەینەوە، وڵاتەكەمان بە دۆخێكی ناهەمواردا تێدەپەڕێت و لە لێواری هەڵدێراندایە.. یان دەبێت بگەڕێینەوە ناو بازنەی پەرتەوازەیی و ململانێ ناوخۆییەكانمان، یاخود بە ویستێكی پۆڵایینی یەكگرتووەوە رووبەڕووی ئاڵینگارییەكانمان ببینەوە و خزمەتی هاووڵاتییان بكەین.

ناسەقامگیریی؛ نیشتمان و گەلەکەمان بێهێز و لاواز دەكات، دەرگای دەستوەردانی دەرەكی واڵا دەكات، عێراق دەكاتە گۆڕەپانێك بۆ ململانێی ئەوانی دیكە، عیراقییەكانیش بە گیان و سامانی خۆیان باجی ئەو ململانێیە دەدەن.

گومان لەوەدا نییە كە پێویستە کەموکورتی و هەڵەكانی رابردوومان تێپەڕێنین، چونکە ئەم دۆخەی ئێستا چیتر مایەی قەبوڵكردن نییە، سیستەمی حوكمڕانی لە ناو خولگە و بازنەی تەنگژەكاندا دەخولێتەوە، هاووڵاتیانی ناڕازی لە بەسڕە و زیقاڕ و ئەنبار و بەغدا و موسڵ و ھەرێمی كوردستان، بە روون و راشكاوی دژ بەم دۆخە ناهەموارە هاتوونەتە دەنگ.

تاكە بژاردە و چارەسەریش ئەوەیە چاكسازیی بونیاتنەر لە سیستەمی حوكمڕانییدا بكەین، پێكهێنانی حكومەت زۆر دوا کەوتووە، ماددە دەستوورییەکان پەك خراون، بژێوی ژیانی هاووڵاتییان و خزمەتگوزارییەكان تا دێت خراپتر دەبن، ھەربۆیە ناكرێت چی دیكە گرەو لەسەر دانبەخۆداگرتنی هاووڵاتییان بكەین، عێراقییەكان لەم دۆخەی ئێستا رازیی نین و شایستەی ژیانێكی باشترن.

بەردەوامیدانیش بە هەڵەكانی رابردوومان هەنگاوەكانی چاكسازیی پەك دەخات، ھەربۆیە پێویستە هەموو لایەك پابەندی گفتوگۆ و دانوستان بن، تاوەكو بتوانین دۆخی سیاسی و ئابووری و كۆمەڵایەتیی وڵات باشتر بكەین، پێویستە برەو بە بەشداریی سیاسی و كیبڕكێی شەریفانە بدەین و هەموو لایەنە سیاسییەكان تیایدا بەشدار بن بە ئاڕاستەی پێكهێنانی حكومەتێك كە خزمەتكاری هاووڵاتییان و پارێزەری سەروەریی نیشتمان بێت.

نابێت چی دیكە هەل و دەرفەتەكان لەدەست بدەین، كاتی ئەوە هاتووە لەگەڵ خۆمان و گەلەكەمان راستگۆ و راشكاو بین، ھەروەک چۆن پێویستیشە گرێبەستێکی سیاسی و کۆمەڵاتیی تازە بێتەئاراوە کە مسۆگەری پاراستنی ئاشتیی کۆمەڵایەتی و تێپەڕاندنی ھەڵە و ئەزموونە شکستخوارووەکانی رابردوو بکات، ئەمەش بۆتە پێداویستییەكی حەتمی و دەبێت جێبەجێی بكەین.

ئامادەبوانی ئازیز..

ساڵێكە هەڵبژاردنمان ئەنجام داوە، هێشتا نەمانتوانیوە پێداویستییە دەستوورییەكان لە وادەی خۆیاندا جێبەجێ بكەین، ئەمەش هەرگیز جێگای قبوڵکردن نییە.

لەم مینبەرەوە داوایەكی دڵسۆزانە ئاڕاستەی سەرجەم لایەنە سیاسییەكان دەكەم كە گفتوگۆی جددیی دەست پێبكەن و ئامانجیشیان پاراستنی بەرژەوەندیی نیشتمان و هاووڵاتییان و دۆزینەوەی رێگەچارەی گونجاو بێت بۆ ئەو قەیرانەی بەرۆکی گرتووین... ئەمەش كارێكی مەحاڵ نییە و پێویستی بەوەیە لە چوارچێوەی ئەجێندایەكی نیشتمانیدا یەكڕیز و یەكدەنگ بین، حكومەتێك پێكبێنین كە دەسەڵاتی تەواوی هەبێت و بتوانێت بودجە پەسەند بكات و كاروباری هاووڵاتییان رایی بكات و ئیدارەی قۆناغی ئایندەش بكات.

گەلەكەمان شایستەی ئەوەیە خزمەتگوزاریی باشتری پێشكەش بكەین، دەمێكە چاوەڕێی پێكهێنانی حكومەتێكە كە گوزارشت لە بڕیاری نیشتمانی و خواست و ئیرادەی سەربەخۆی وڵات بكات لەوەی ژیانێكی شایستە بۆ هاووڵاتییان دەستەبەر بكات و كاروانی چاكسازییش بگەیەنێتە مەنزڵ.

یەكەم هەنگاوی چاكسازییش بەرەنگاربوونەوەی گەندەڵییە، ئەم ئافاتە مەترسیدارە جەستەی دەوڵەتی ھەنجن ھەنجن كردووە و قەوارەكەشی خستووەتە مەترسییەوە، ھاوکات رێگرە لە بەردەم گەنج و لاوەكانمان كە بە هیوا و ئاواتەكانیان بگەن و نیشتمانەكەیان بنیات بنێن، گەندەڵی تەنها سامانی وڵات بەفیڕۆ نادات، بەڵكو رێگەش بۆ هەڵكشانی گیانی دووبەرەكی و تێكدانی ئاشتەوایی كۆمەڵایەتی و نایەكسانی خۆش دەكات.

گەنج و لاوەكانمان لە باشوور و ناوەڕاست و كوردستان خاوەن هەمان هیوا و ئاواتن و داوا دەکەن ژیانێكی شكۆمەندانە بژین، پێویستە ھەموو هاووڵاتییەکی عێراقی خاوەن رێز و پێگەی شیاوی خۆی بێت لە نیشتمانەکەماندا.

پێگەی وڵاتەكەمان لە ناوچەكەدا گرنگ و ستراتیژییە، بۆیە پێویستە بیكەینە پردێك بۆ بەیەكگەیشتنی نێوان وڵاتانی ناوچەكە و مەڵبەندێكی ئابووری و بازرگانی و رۆشنبیریی گەورە، نەك ببێتە گۆڕەپانی یەكلاییكردنەوەی ململانێی ئەوانی دیكە.

سەرباری ئەو ئاستەنگ و بەربەستانەی رووبەڕووی وڵاتەكەمان دەبنەوە، هێشتا عێراقییەكان سوورن لەسەر ئەوەی ببنەوە خاوەن نیشتمانی خۆیان، نیشتمانێكی خاوەن سەروەریی تەواو، دەوڵەتێك بنیات بنێن كە لەگەڵ هاونیشتمانییەكانی خۆی و دەوڵەتانی دەوروبەریشدا بە ئاشتی و ئارامی بژێت... نیشتمانێك پێگە شارستانییەتەكەی جارانی خۆی لە ناوچەكە و جیهاندا بۆ بگێڕێتەوە.

ئامادەبوانی بەڕێز..

با یادی لەدایکبوونی پێشەوای موسڵمانان و سەروەری مرۆڤایەتی حەزرەتی محەممەد (د.خ) بكەینە بۆنەیەك بۆ پتەوكردنی یەکڕیزی و یەکھەڵوێستی و یەكخستنی هەوڵ و كۆششەكانمان لە پێناو ئەنجامدانی چاكسازییەكی راستەقینە و ئاوەدانكردنەوەی وڵات و راستكردنەوەی هەڵە و كەموكورتییەكانی رابردوومان... عێراقییەكان شایستەی ژیانێكی باشترن، جگە لە ژیانێكی شكۆدارانە و مافە رەواكانی خۆیان و تێپەڕاندنی شكستەكان، بە هیچ شتێكی دیكە رازیی نابن.

(وَقُلِ اعْمَلُوا فَسَيَرَى اللَّهُ عَمَلَكُمْ وَرَسُولُهُ وَالْمُؤْمِنُونَ..).

دووبارە سڵاوی خودای گەورەتان لێ بێت

د. بەرهەم ساڵح
سەرۆك كۆماری عێراق

06/10/2022

د. بەرهەم ساڵح، سەرۆک کۆماری عێراق: "گەرمترین پیرۆزبایی ئاڕاستەی ئێزیدیان دەکەم بەبۆنەی چەژنی جەما و هیوادارم هەمیشە لەجەژن و خۆشیدا بن، لەم بۆنەیەدا قوربانییەکانی ئەم پێکهاتە رەسەنە بەبیردەهێنینەوە کە چۆکیان نەدا لەبەرامبەر تیرۆرو سەرسەختانە بەرگریان کرد لەمانەوەیان، دووپاتدەکەینەوە لەپاراستنی تەواوی مافەکانیان".

04/10/2022

سەرۆک بەرهەم پێشوازیکرد لە باڵیۆزی میسر لە عێراق

د. بەرهەم ساڵح، سەرۆک کۆماری عێراق ئەمڕۆ سێشەممە 4 ی تشرینی یەکەمی 2022 لە کۆشکی سەلام لە بەغدا پێشوازیکرد لە وەلید محەممەد ئیسماعیل، باڵیۆزی میسر لە عێراق.

لەدیدارەکەدا گفتوگۆکرا لەبارەی پەیوەندییە دووقۆڵییەکانی نێوان هەردوو وڵات و گەلی دۆست و کارکردن بۆ پتەوکردنی هەماهەنگی هاوبەش لەبوارە جۆراوجۆرەکانی سیاسی و ئابووری و ژینگەیی، بەشێوەیەک خزمەت بە بەرژەوەندییە هاوبەشەکان و بەهێزکردنی ئاسایش و سەقامگیری ناوچەکە بکات.

03/10/2022

سەرۆک بەرهەم پەیامێکی پیرۆزبایی لە سەرۆکی فەرەنسا پێگەیشت

د. بەرهەم ساڵح، سەرۆک کۆماری عێراق بەبۆنەی رۆژی نیشتمانی عێراق پەیامێکی پیرۆزبایی لە ئیمانوێل ماکرۆن، سەرۆکی فەرەنسا پێگەیشت و پشتیوانی فەرەنسای بۆ چەسپاندنی ئاسایش و سەقامگیری عێراق و کارکردن بۆ پتەوکردنی پەیوەندییەکانی نێوان هەردوو وڵات دووپاتکردەوە، بە ئاڕاستەی خزمەتکردنی هەردوو گەلی دۆست.

03/10/2022

سەرۆک بەرهەم پەیامێکی پیرۆزبایی لە پادشای بەریتانیا پێگەیشت

د. بەرهەم ساڵح، سەرۆک کۆماری عێراق بەبۆنەی رۆژی نیشتمانی عێراق پەیامێکی پیرۆزبایی لە شا چارلسی سێیەم، پادشای بەریتانیا پێگەیشت.

03/10/2022

پەیامی د. بەرهەم ساڵح، سەرۆک کۆماری عێراق لە مەراسیمی پێنجەمین ساڵڕۆژی ماڵئاوایی سەرۆک مام جەلال لە شاری هەولێر

بەناوی خوای گەورە

مەرگ و ژین میثلی سێبەر و تاوە ئەوەی باقی بمێنێ ھەر ناوە

ناوی مام جەلال پێگەی لەمێژوو یادەوەری لە دڵی گەل هەمیشە زیندوو شەکاوەیە.

بەڕێز سەرۆکی ئەنجومەنی وەزیرانی عێراق کاک مستەفا کازمی

بەڕێز سەرۆکی هەرێمی کوردستان کاک نێچیرڤان بارزانی

بەڕێز سەرۆکی ئەنجومەنی وەزیرانی حکومەتی هەرێمی کوردستان کاک مەسرور بارزانی

بەڕێز کاک بافڵ مام جەلال تاڵەبانی سەرۆکی یەکێتیی نیشتمانیی کوردستان

بەڕێز کاکە قوباد

ئامادەبووانی خۆشەویست، نوێنەرانی حزب و لایەنە سیاسییەکان، هەڤاڵانی بەڕێز و خۆشەویستی یەکێتیی نیشتمانیی کوردستان.

تێکۆشەرانی دێرین، مایەی سەربەرزیمانە ئەمڕۆ پێکەوە لە حزوری ڕۆحی بەرزەفڕی ئەو سەرکردە مەزنەی گەلەکەمان کۆبووینەتەوە.

لە ڕاستیدا مام جەلال بەتەنھا سەرۆک و بیرمەندێکی سیاسی نەبوو بەڵکو ڕێبەرێکی ھەرە درەوشاوەی داهێنەری شۆڕشی نوێ و لەھەمانکاتدا پێشمەرگەیەکی دێرین و دانەبڕاوی بزوتنەوەی ڕزگاریخوازی کوردستان و دیموکراتیخوازێکی ھەرە ڕاسگۆی ناو بزوتنەوەی ئازادیخوازی عێراقیش بوو.

مام جەلال بۆ خوێندکارەکانی مامۆستاو بۆ ھاوڕێکانی سایە و سێبەری وەفا بوو، لەگەڵ شۆڕشگێڕەکان پێشمەرگە بوو، لەگەڵ نوسەران و ڕوناکبیران داکۆکیکارێکی نەگۆڕی ڕای سەربەست و ئازادی بیرکردنەوە و بیروباوەڕ بوو، نمونەیەکی ھەرە باڵابوو کە نەریتی وشە بە وشە و نوسین بە نوسین وەڵام دەدرێتەوەی کە لەم ڤیدیۆیەدا بینیتان چۆن باسی دەکات.

خەسڵەتە کۆمەڵایەتی و سیاسیەکانی مام جەلال، لێبوردەیی و دادپەروەری، جوامێری و مرۆڤدۆستی، بەھاناوە چوونی ھەژاران و بێ نەوایان و داڵدەدانی ئاوارە و دەربەدەران، خەسڵتگەلێکی زیندون کە وەک سەرمایەیەکی گەورەی ڕەمزی بەجێماوەن بۆمان، سەرمایەک مایەی شانازی و شاھیدی دۆست و دوژمنن.

ئەم کۆبوونەوەیەش ئامادەبووانی خۆشەویست لە کاتێکدا دەبەستین کە کوردستان و عێراق بەدۆخێکی ئێجگار ھەستیار و پڕ کێشمەکێشدا تێدەپەڕێ، دۆخێک کە لەھەر کات و ساتێک زیاتر پێویستی بە وردبینی لە بڕیار و ھۆشمەندی لە ھەنگاونان ھەیە، پێویستی بە یەکھەڵوێستی و یەکئیرادەیی و ھەماھەنگی ھێزە سیاسی و نیشتیمانییەکان و تەواوی رۆڵەکانی گەلەکەمان ھەیە.

کێشەکانی ئەمڕۆ کە بەرۆکی یەک بەیەکی ھێزەکان و تاک بەتاکی خەڵکی ئەم وڵاتەی گرتووە پێویستیان بە ھەنگاویی کردەیی و ھاتنە مەیدانی دەمودەست ھەیە بۆ چارەسەرکردنیان وە دابینکردنی ماف و چاوەڕوانییەکانی خەڵکە.

لەم مینبەرەوە و لە حزروی ڕوحی زیندوی مامی ڕێبەر و مامۆستاماندا و بەئەوپەری ھەستکردن بە بەرپرسیارێتیەوە دووپاتی دەکەینەوە، کە ئەم دۆخە دژوارە و ئەگەری باھۆزی گۆڕانکارییەکان پێویست ئەکات چاوەڕوانی گەلەکەمان بە ئەمڕۆو سبەینێ نەسپێرین، ناکرێت ھەر لەڕوانگەی بەژەوەندی ئاراستەکراوی ئەمڕۆوە لەگەڵ پێویستییەکانی گۆڕانکاری سەرانسەری کۆمەڵگاکەمان مامەڵە بکەین وە پێویستمان بە هاوکاری و هەماهەنگی نێوانمان هەیە.

دەبا پێنجەمین ساڵیادی مامی مەزنمان کەیادی چەند دەیەیەکە لەخەباتی سیاسی و تێکۆشانی ھەمەچەشنەی ڕاست و ڕەوا تۆماری پڕ سەروەری گەلێکە، یادەوەری سەرکردایەتیکردنی پڕ لە حیکمەتی گیانبازی ڕووبارێک خوێنی شەھیدانە، یادی گەورە ڕێبەرێکە کە لەڕەوتی خەباتێکی سەخت و جیاوازدا سەردەمی مەحاڵ و سەختییەکانی شۆڕشی گۆڕی بۆ سەردەمی سەرکەوتن و ئازادی و سەرۆکایەتییەکی مێژوویی، با ئەمە ھاندەرمان بێت بۆ بەبەدیھێنانی حوکمڕانیەکی باشتر و دادپەروەر، ئیلھامبەخشمان بێت بۆ ھێنانەدی خەونی لاوەکانمان، دەرفەتێکی دیکەی نوێکردنەوەی پەیمان و دەستەبەری ھیوای یەکێتی و هێزە نیشتمانییەکانی تر بۆ ڕەواندنەوەی دڵەڕاوکێی رۆڵەکانی گەل لە ئایندەی خۆیان و نیشتیمانەکەیان هەیانبێت.

سڵاو لە ڕوحی بێگەردی مامی گەورەمان،
سڵاو لە تێکۆشەرانی دێرینی یەکێتیی نیشتمانیی کوردستان گشت هێزە شۆڕشگێڕەکانی تری کوردستان و هێزە دیموکرات خوازەکانی عێراق.

وە هیوادارم هەموومان بە یەکڕیزی هەموو هێزە دڵسۆزو پەرۆشەکانی وڵاتەکەمان ئەرکەکانی ئەم قۆناغەمان بەجێبهێنین.

03/10/2022

پەیامی د. بەرهەم ساڵح، سەرۆک کۆماری عێراق لە مەراسیمی پێنجەمین ساڵیادی ماڵئاوایی سەرۆک مام جەلال.

02/10/2022

سەرۆک بەرهەم نامەیەکی دەستنووسی لە سەرۆکی فەرەنساوە پيگەیشت

د. بەرهەم ساڵح، سەرۆک کۆماری عێراق نامەیەکی دەستنووسی لە ئیمانوێل ماکرۆن، سەرۆکی فەرەنسا پێگەیشت.

سەرۆک بەرهەم ساڵح ئەمڕۆ یەکشەممە 2 ی تشرینی یەکەمی 2022 لە کۆشکی سەلام لە بەغدا پێشوازیکرد لە ئەریک شۆڤاڵییە، باڵیۆزی فەرەنسا لە عێراق و سڵاو و رێز و نامەیەکی دەستنووسی ئیمانوێل ماکرۆن، سەرۆکی فەرەنسای گەیاندە سەرۆک کۆمار، کە پەیوەست بوو بە بەهێزکردنی پەیوەندییە هاوبەشەکانی نێوان هەردوو وڵاتی دۆست لە سەرجەم بوارە جیاجیاکان و پاراستنی بەرژەوەندییە هاوبەشەکان و سەروەری عێراق و پشتیوانی فەرەنسا بۆ چەسپاندی ئاسایش و سەقامگیری عێراق، هاوکات سەرۆک بەرهەم سڵاو و رێزی خۆی بە باڵیۆزی فەرەنسا ئاڕاستەی سەرۆک ماکرۆن کرد.

هەر لەمیانی دیدارەکەدا باس لە پەیوەندییە دووقۆڵییەکان و رێکارەکانی بەرزکردنەوەی ئاستی هاوکاری و هەماهەنگی هاوبەش لە بوارە جیاوازەکان کرا و جەختکرایەوە لە گرنگی پتەوکردنی هاوکاری لەپێناو رووبەڕووبوونەوەی ئاستەنگە جیاوازەکانی جیهان و ناوچەکە، بە تایبەتی بەگژاچوونەوەی تیرۆر و هاوکاری سیاسی و ئابووری و بازرگانی و کولتووری و پاراستنی ژینگەیی.

02/10/2022

سەرۆک بەرهەم: عێراق بەگرنگییەوە دەڕوانێتە پەیوەندییە هاوسەنگەکانی لەگەڵ وڵاتان بەئاڕاستەی هاوکاری هاوبەش بۆ رووبەڕووبوونەوەی تیرۆر و هەڵاوسانی ئابووری و گۆڕانی کەشوهەوا

د. بەرهەم ساڵح، سەرۆک کۆماری عێراق ئەمڕۆ یەکشەممە 2 ی تشرینی یەکەمی 2022 لە کۆشکی سەلام لە بەغدا کارنامەی تارق عەبدوڵا فەرج، باڵیۆزی کوەیت و کریستیان تۆرنینگ، باڵیۆزی دانیمارک و یۆهانیس لیندیرت ساندی، باڵیۆزی هۆڵەندای وەرگرت.

لەمیانی پێشوازیکردنی لە باڵیۆزان بەجیا سەرۆک بەرهەم جەختیکردەوە عێراق بەگرنگییەوە دەڕوانێتە پشتیوانی کۆمەڵگەی نێودەوڵەتی و دامەزراندنی پەیوەندی هاوسەنگ لەگەڵ وڵاتان لەسەر بنەمای پاراستنی بەرژەوەندی هاوبەش و بەهێزکردنی هاوکاری سیاسی و ئابووری و بازرگانی و تێپەڕاندنی جیاوازییەکان لە رێگەی دیالۆگ.

لە بەشێکی دیکەی دیدارەکەدا سەرۆک کۆمار ئاماژەی بە ئاستەنگەکانی جیهان و ناوچەکە کرد و دووپاتیکردەوە لە پێویستی پتەوکردنی هاوکاری و هەماهەنگی هاوبەش لەپێناو تێپەڕاندی ئاستەنگەکان، بەتایبەتی بەگژاچوونەوەی تیرۆر و توندڕەوی و چارەسەرکردنی هەڵاوسانی ئابووری و قەیرانە تەندروستییەکان و رووبەڕووبوونەوەی گۆڕانی کەشوهەوا.

هاوکات سەرۆک بەرهەم ھیوای سەرکەوتنی بۆ باڵیۆزانی نوێی خواست لە جێبەجێکردنی ئەرکەکانیاندا، بەجۆرێک ببێتە مایەی بەھێزکردنی پەیوەندی دۆستانە و ھەماھەنگی زیاتری نێوان عێراق و وڵاتەکانیان.

لەلای خۆیانەوە باڵیۆزانی نوێی سوپاس و رێزی خۆیان ئاڕاستەی سەرۆک بەرهەم کرد و جەختیانکردەوە لە گرنگی پەرەپێدانی پەیوەندی وڵاتەکانیان لەگەڵ عێراق لە سەرجەم بوارەکاندا، بەجۆرێک ببێتە مایەیی بەهێزکردنی بەرژەوەندییە هاوبەش.

02/10/2022

سەرۆک بەرهەم پێشوازیکرد لە نوێنەری نەتەوە یەکگرتووەکان لە عێراق

د. بەرهەم ساڵح، سەرۆک کۆماری عێراق ئەمڕۆ یەکشەممە 2 ی تشرینی یەکەمی 2022 لە کۆشکی سەلام لە بەغدا پێشوازیکرد لە خاتوو جینین هێنیس پلاسخارت، نوێنەری تایبەتی سکرتێری گشتی نەتەوە یەکگرتووەکان لە عێراق.

لەدیدارەکەدا گفتوگۆکرا لەبارەی پێشهات و گۆڕانکارییەکانی وڵات، بەتایبەتی دۆخی ئەمنی و سیاسی و دووپاتکرایەوە لە گرنگی کۆتایی هێنان بە قەیرانی سیاسی لە رێگەی گفتوگۆ و دیالۆگ بە ئاڕاستەی تێپەڕاندنی ئەو ئاستەنگە جددیانەی کە رووبەڕووی وڵات بووەتەوە و هێنانەکایەوەی بەرکەوتە نیشتیمانییەکان رووەو بەرقەرارکردنی ئاسایش و سەقامگیری وڵات و پاراستنی سەلامەتی هاووڵاتیان و جێبەجێکردنی داوا رەواکانی خەڵک.

01/10/2022

سەرۆک بەرهەم پێشوازیکرد لە جێگری یەکەمی سەرۆکی ئەنجومەنی نوێنەران

د. بەرهەم ساڵح، سەرۆک کۆماری عێراق ئەمڕۆ شەممە 1 ی تشرینی یەکەمی 2022 پێشوازیکرد محسن مەندەلاوی، جێگری یەکەمی سەرۆکی ئەنجومەنی نوێنەرانی عێراق.

لە سەرەتای دیدارەکەدا سەرۆک بەرهەم پیرۆزبایی لە محسن مەندەلاوی کرد بەبۆنەی هەڵبژاردنی وەک جێگری یەکەمی سەرۆکی ئەنجومەنی نوێنەران و هیوای سەرکەوتنی بۆ خواست لە ئەرکەکانیدا.

هەر لەدیدارەکەدا گفتوگۆکرا لەبارەی بارودۆخی گشتی وڵات و پێشهاتە سیاسییەکان و دووپاتکرایەوە لەگرنگی یەکریزی و یەکهەڵویستی نیشتمانی و پێشخستنی بەرژەوەندی وڵات و هێنانەئاراوەی پێداویستییەکانی قۆناغەکە و بەرکەوتە نیشتمانییەکان و داوا رەواکانی خەڵک بۆ ژیانێکی باشتر.

01/10/2022

سەرۆک بەرهەم پێشوازیکرد لە وەزیری سەرچاوەئاوییەکان و وەزیری کشتوکاڵ و سەرچاوەئاوییەکانی هەرێمی کوردستان

د. بەرهەم ساڵح، سەرۆک کۆماری عێراق ئەمڕۆ شەممە 1 ی تشرینی یەکەمی 2022 لە سلێمانی پێشوازیکرد لە مەهدی رەشید، وەزیری سەرچاوەئاوییەکانی عێراق بەئامادەبوونی بێگەرد تاڵەبانی، وەزیری کشتوکاڵ و سەرچاوە ئاوییەکانی حکومەتی هەرێمی کوردستان و لە بارەی ئاسایشی ئاو و کێشەکانی ئاو کە رووبەڕووی عێراق و هەرێمی کوردستان دەبێتەوە گفتوگۆکرا.

لە دیدارەکەدا سەرۆک بەرهەم جەختیکردەوە لە پێویستی پاراستنی سەرچاوەئاوییەکان و کانیاو و بەنداوەکان و پەرەپێدانی پلانە ستراتیژییەکان بە بەشداری هەموو دامودەزگاکانی دەوڵەت و پتەوکردنی کار و هەماهەنگی لە نێوان حکومەتی فیدراڵ و حکومەتی هەرێمی کوردستان بە ئاڕاستەی رووبەڕووبوونەوەی قەیرانی وشکەساڵی و گۆڕانی کەشوهەوا، کە بووەتە قەیرانێکی جیهانی.

لە بەشێکی دیکەی دیدارەکەدا سەرۆک کۆمار ئاماژەی بەگرنگی پاراستنی پشکی ئاوی وڵات کرد لە رێگەی دیالۆگ لەگەڵ وڵاتانی دراوسێ لەسەر بنەمای دراوسێیەتی باش و لەبەرچاوگرتنی بەرژەوەندی هەمووان بەبێ زیانگەیاندن بە عێراق، هەروەها هەوڵەکانی حکومەت و وەزارەتی سەرچاوەئاوییەکانی بەرزنرخاند بۆ چارەسەرکردنی کێشەکانی ئاو، هاوکات دووپاتیکردەوە لە گرنگی پاراستنی هەردوو رووباری دجلە و فرات.

30/09/2022

سەرۆک بەرهەم پێشوازیکرد لە راوێژکاری ئاسایشی نیشتمانی و سەبارەت بە هێرشەکانی ئێران بۆ سەر هەرێمی کوردستان گفتوگۆیانکرد

سەرۆک بەرهەم: ئەم بۆردوومانەی ئێران پێشهاتێکی مەترسیدارە و مایەیی قبوڵکردن نییە و پێشێلکارییە بۆ سەر سەروەری و ئاسایش و سەقامگیری وڵات و سەلامەتی هاووڵاتیان.

د. بەرهەم ساڵح، سەرۆک کۆماری عێراق پێشوازیکرد لە قاسم ئەعرەجی، راوێژکاری ئاسایشی نیشتمانی و گفتوگۆکرا سەبارەت بە بارودۆخی ئەمنی وڵات و بەتایبەتی بۆردوومانەکانی ئێران بۆ سەر ناوچەکانی هەرێمی کوردستان، کە بەوهۆیەوە ژمارەیەک شەهید و برینداری لێکەوتەوە.

لە دیدارەکەدا سەرۆک کۆمار رایگەیاند، ئەم بۆردوومانەی ئێران پێشهاتێکی مەترسیدارە و مایەیی قبوڵکردن نییە و پێشێلکارییە بۆ سەر سەروەری و ئاسایش و سەقامگیری وڵات و سەلامەتی هاووڵاتیان.

هەر لەو چوارچێوەیەشدا سەرۆک بەرهەم رایگەیاند، بەردەوامبوونی تۆپبارانەکانی تورکیا بۆ سەر ناوچەکانی هەرێمی کوردستان جێگای قبوڵکردن نییە و پێشێلکردنی سەروەری وڵاتە و پێویستە کۆتایی پێ بهێنرێت.

لە بەشێکی دیکەی دیدارەکەدا دووپاتکرایەوە لە پێویستی چارەسەرکردنی کێشە و دۆسییە ئەمنییەکان لەگەڵ وڵاتانی دراوسێ لە رێگەی کەناڵە دیپلۆماسییەکان لەسەر بنەمای پاراستنی بەرژەوەندییە هاوبەشەکان و دراوسێیەتی باش و پەیماننامە نێودەوڵەتییەکان و رەتکردنەوەی چارەسەری یەکلایەنە بۆ کێشە هەڵپەسێردراوەکان و پێویستی رێزگرتن لە سەروەری عێراق.

هاوکات جەختکرایەوە بڕیاری فەرمی دەوڵەتی عێراق و سیاسەتی دەرەوەی یەکخراوە و بڕیاردراوە عێراق نەکرێتە گۆڕەپانی یەکلاییکردنەوەی ململانێ و کێشەکانی لایەنەکانی دیکە و دەستدرێژیکردنە سەر سەروەری و مەترسی خستنە سەر ئاسایشی ناوخۆیی، هەروەک چۆن عێراق رەتی دەکاتەوە ببێتە سەکۆیەک بۆ هێرشکردنە سەر هیچ لایەنێک، هەروەها دووپاتکرایەوە لە هاوبەشی ئاسایشی وڵاتانی دراوسێ و ئاسایشی عێراق، بۆیە گرنگە گفتوگۆ و دیالۆگ و رێککەوتنی لەبارەوە بکرێت و چارەسەری پێویستی بۆ بدۆزرێتەوە لەسەر بنەمای پاراستنی بەرژەوەندی هاوبەش و پارێزگاریکردن لە سەروەری عێراق و سەلامەتی خاک و خەڵکەکەی.

29/09/2022

پەیامی هاوخەمی سەرۆک بەرهەم بۆ خانه‌واده‌ و کەسوکاری د. جەمال فوئاد وەزیری پێشووتری كشتوكاڵ

بەرێزان / خانه‌واده‌ و کەسوکار و بنەماڵەی خوالێخۆشبوو د. جەمال فوئاد

به‌داخێکی زۆره‌وه‌ هه‌واڵی کۆچی دوایی خوالێخۆشبوو (د. جەمال فوئاد) کەسایەتی نیشتمانپەروەر و وەزیری پێشووتری كشتوكاڵی حكومەتی هەرێمی كوردستان مان پێگەیشت.

به‌م بۆنه‌ خه‌مباره‌وه‌ پرسه‌ و هاوخەمی قووڵی خۆم ئاڕاسته‌ی خانه‌واده‌ و كه‌سوكار و بنەماڵە تێکۆشەرەکەتان ده‌كه‌م و داواکارم له‌ خودای گه‌وره‌ به‌ر ره‌حمه‌تی خۆی بخات و به‌ به‌هه‌شتی به‌رینی شاد بكات و دوا کۆستی بنەماڵە بەرێزەکەتان بێت و سه‌بووری و دڵنەوایی هه‌موو لایه‌ك بدات.

ٳنــا لله وٳنــا ٳلــیــه راجــعــون

د. بەرھەم ساڵح
سەرۆک کۆماری عێراق

28/09/2022

سەرۆک بەرهەم پیرۆزبایی لە سەرۆک و جێگری یەکەمی ئەنجومەنی نوێنەرانی عێراق کرد

د. بەرهەم ساڵح، سەرۆک کۆماری عێراق ئەمڕۆ چوارشەممە 28ی ئەیلولی 2022 پیرۆزبایی لە محەممەد حەلبوسی کرد بەبۆنەی وەرگرتنەوەی متمانە وەک سەرۆکی ئەنجومەنی نوێنەران، هەروەها پیرۆزبایی لە محسن مەندەلاوی کرد بەبۆنەی هەڵبژاردنی وەک جێگری یەکەمی سەرۆکی ئەنجومەنی نوێنەران و هیوای سەرکەوتنی بۆ خواستن لە بەجێگەیاندنی ئەرکە نیشتمانی و دەستوورییەکان.

هاوکات سەرۆک کۆمار دووپاتیکردەوە لە پێویستی پتەوکردنی یەکریزی و یەکهەڵوێستی و یەکخستنی هەوڵەکان و پێشخستنی بەرژەوەندییە نیشتمانییەکان لەپێناو هێنانەئاراوەی پێداویستییەکانی قۆناغەکە و بەرکەوتە نیشتمانییەکان و داوا رەواکانی خەڵک بۆ ژیانێکی باشتر.

27/09/2022

سەرۆک بەرهەم پێشوازیکرد لە سەرۆکی ئەنجومەنی بازرگانی عێراق - بەریتانیا

د. بەرهەم ساڵح، سەرۆک کۆماری عێراق ئەمڕۆ سێشەممە 27ی ئەیلولی 2022 لە بەغدا پێشوازیکرد لە بارۆنە ئیما نیکۆلسۆن، سەرۆکی ئەنجومەنی بازرگانی عێراق - بەریتانیا.

لە دیدارەکەدا گفتوگۆکرا لە بارەی پەیوەندییە هاوبەشەکانی نێوان عێراق و بەریتانیا لەبوارە جیاجیاکان، بەتایبەتی لەبوارەکانی ئابووری و بازرگانی و پاڵپشتیکردن لە رەخساندنی هەلی وەبەرهێنان لە عێراق و بەشداریکردن لە پرۆژەکانی ئاوەدانکردنەوە و بوژاندنەوەی ژێرخانی ئابووری عێراق.

هەر لە دیدارەکەدا سەرۆک بەرهەم رایگەیاند، عێراق بەگرنگییەوە دەڕوانێتە پشتیوانی دۆستەکانی و کۆمەڵگەی نێودەوڵەتی لەبواری پەرەپێدان و بەرەوپێشبردنی ئابووری عێراق و پشتیوانیکردن لە پلانی بوژاندنەوەی ئابووری نیشتمانی بە ئاڕاستەی دووبارە بونیادنانەوە و گەشەپێدان و هەنگاونان رووەو چاکسازی پێویست و پشتیوانیکردن لە وەبەرهێنان و کەرتی تایبەت.

26/09/2022

سەرۆک بەرهەم پێشوازیکرد لە باڵیۆزی بەریتانیا لە عێراق

د. بەرهەم ساڵح، سەرۆک کۆماری عێراق ئەمڕۆ دووشەممە 26ی ئەیلولی 2022 لە کۆشکی سەلام لە بەغدا پێشوازیکرد لە مارک برایسۆن ریچاردسۆن، باڵیۆزی بەریتانیا لە عێراق.

لەدیدارەکەدا بە گرنگییەوە باس لە پەیوەندییە هاوبەشەکانی نێوان هەردوو وڵاتی دۆست و چۆنیەتی پەرەپێدانی پەیوەندییەکان لەبوارە جیاجیاکان کرا لە پێناو رووبەڕووبوونەوەی گرفتە هاوبەشەکان، بەتایبەتی بەگژاچوونەوەی تیرۆر و پتەوکردنی هاریکاری ئابووری و بازرگانی و کەلتووری، بەجۆرێک خزمەت بە پەرژەوەندییە هاوبەشەکان و ئاشتی و ئاسایشی ناوچەکە بکات.

لە بەشێکی دیکەی دیدارەکەدا باڵیۆزی بەریتانیا جەختی لە پەرۆشی وڵاتەکەی بۆ پتەوکردنی ئاسایش و سەقامگیری عێراق و سەلامەتی خەڵکی عێراق کردەوە، هەروەها پشتیوانیکردن لە دیالۆگ و لێکنزیکبوونەوە بۆ چارەسەرکردنی کێشە سیاسییەکان و هێنانەدی پێشکەوتن و خۆشگوزەرانی گەلی عێراق دووپاتکردەوە.

Hewal ھەواڵ

10/10/2022

07/10/2022

06/10/2022

04/10/2022

03/10/2022

03/10/2022

03/10/2022

03/10/2022

02/10/2022

02/10/2022

02/10/2022

01/10/2022

01/10/2022

30/09/2022

29/09/2022

28/09/2022

27/09/2022

26/09/2022

Address

Website

Alerts

Shortcuts

Share

Category