https://www.facebook.com/NewBrightSides

الوجه الآخر, Salhiya, Baghdad (2025)

21/06/2025

خذ الحكمة من كتابات السيارات ...

(( لاتركع لمن اراد الرحيل .. فصلاة الميت لاركوع فيها. )) ..

31/05/2025

كبدبد ...

ب 2012 شفت اغنية كبدبد اول مرة وكلش حبيتهة .. شفتهة بالكليب اللبناني مال شارع الحمراااا ..
اكثر شي عجبني هو الرقص امام بناية كلش حلوة .. بعدين سالت وتطقست وعرفت لاحقا انه هاي بناية المصرف اللبناني ..

صارت بية دودة لازم اروح اشوف هاي البناية واصورهة واتصور وياهة ..
سافرت لاحقا باخر اسبوع من ايار 2012 للبنان .. وكان اهم فقرة مخططلهة هو العثور ع البناية واخذ الصور .. يعني بالضبط قبل 13 سنة بالتمام والكمال ..

برنامجي كان مضغوط . .ماحصلت فرصة الا اخر يوم العصر .. رحت للبناية ولانه دنية العصر او المغرب فالمنطقة خالية ناس قليلين .. ولانه اول سفرة الية للبنان وياغريب كن اديب فما اعرف الوضع وهل مسموح التصوير يم البناية لو لا ..
كان اكو شرطي واگف وترددت اخذ صور تخيلت الامور مثلنة بالعراق والتصوير ممنوع في بعض الاماكن هههههه ..

المهم .. بسرعة وبدون تركيز وتلويز اخذت صورتين يمكن سيلفي ووحدة واحد فايت اخذلياهة .. وفاخت الدودة مالتي ..
لكن تبقة اغنية كبدبد من احلة الاغاني واجملهة اللي ترفع الايجابية وتنطي احاسيس حلوة كلش من الانطلاق والحلم والسفر والجنون.

13 سنة مرت كرمشة عين .. ااااه .. اااه .. الدنية تركض .. واحلامنة واگفة لا اتدحدح ولا اتبحبح ولا حت اتنحنح.

30/05/2025

ريوگ في يوم عطلة ...

اتمنى لو كانت الحياة كلها عبارة عن ( ريوگ في يوم عطلة ).
الاحساس الرهيب بالراحة والمتعة وحلاوة الحياة وكثير من الايجابية والانطلاق هو عندي فقط في تلك اللحظات .. الريوگ بيوم عطلة.

مرة في البيت مرة في سفرة مرة في مطعم مرة مع حبيبة مرة مع صديقة مرات مع الاهل والعائلة .. من تگعد براحتك وتاكل براحتك وانت مطمأن عندك وقت طويل للاستمتاع بالريوگ والچاي مع او بعد الريوگ.

بيض وطماطة وبصل وجرجير وزيتون وجبن وكيمر وكاهي وعسل .. بس اهم شي بيوم العطلة كون بيض وخضرة جرجير او غيره.
اما بالسفر فأكيد الريوگ بحد ذاته متعة وقصة لايمكن وصف لحظاتها اللذيذة.

تخيلوا .. ان تختصر كل لذات الحياة بريوگ في يوم عطلة وراسك بارد ماوراك طلعة .. واعتقد هي حلاتهة انك بالبيت ريلاكس مستمتع بالوقت الصباحي الطويل.

بلبنان عدهم شي مشهور اسمة (كبيس) .. ماعون مقبلات بيه جرجير وفجل احمر وطرشي بيه بس الشلغم الوردي ومرات بربينيا ونعناع .. شوفة الكبيس ترد الروح وتصعد الايجابية للسقف .. هذا الشلغم الوردي كلش اعشقة .. شگد اتمنة كل يوم الصبح الگة كبيس ع الريوگ مالتي .. للاسف امنية لاتتحقق الا نادرا.

وانتوا .. هم عدكم كل هاي الاحاسيس عن الريوگ في يوم العطلة ؟.
احچولنة عن تجربتكم وترتيباتكم الصباحية مع الريوگ.

21/05/2025

الزغيرة ابد مغلطانة ...

تلث اخوات متزوجات زعلانات اجني يم اهلهن.
ابوهن شايب گاضي عوچيتة بيدة گعدهن وسألهن خيرچن احچن شنو سالفتچن وليش زعلانات.

الچبيرة گالت يابة اني رجلي يشتغل تاجر .. جاب وجبة مال صابون رگي .. گمت اني شفتة هواي گلت خل اطبگ البيت منة بدل الكاشي .. اجة رجلي تزحلگ ووگع وبسطني ودزني عليك .. گولولي هذا هم ذنب يستوجب انطرد من البيت.
اخواتهة گللهة لايابة لا سالفة عادية مو زين وفرتي عليه فلوس الكاشي.

الوسطانية گالت واني رجلي هم تاجر مال غذائية وعدنة مكومة بالبيت اكياس التمن والشكر .. رجع من الشغل گلي مشتهي حلاوة مال تمن .. جبت كيس تمن وكيس شكر وشفت الشمس حارة برة گمت وذبيتهن بالبير بدال مااشعل الغاز واحرم قنينة .. ظليت اخوط بالبير للعصر ومااستوت الحلاوة ورجلي كل شوية يسألني ها مخلصت .. تالي اجة علية لگاني ع البير اخوط لزمني وبسطني ودزني لاهلي .. بالله بشرفكم استاهل اني هيچ.
خواتهة گللهة لا وين شنو فوگ موفرتيلة الغاز انوب يبسطچ.

الزغيرة گلتلهم اني وابو الجهال قررنة نطهر الولد .. ف بالليل حنيتهم ولبستهم وگلت عليمن جايبين مطهرچي وخسرانين فلوس خل اني اطهرهم گمت قطعتلهم ونومتهم .. اجة ابوهم الصبح لگاهم ميتين بسطني وطردني .. بالله هذا هم ذنب استاهل انطرد عليه وانبسط.
خواتهة گللهة لا يابة شنو هاي لعد احسن متطون فلوس للمطهرچي.

ابوهن سمع كلامهن وگف علة حيلة وگللهن تعالن ابطحني وطهرني اذا اخلي وحدة منچن بالبيت بنات الكذا والكذا علة هاي الدگة.

رباط السالفة :
ماكو امرأة تعترف بغلطهة .. ولا اگو مرأة تنطي بصويحبتهة.
احنة تعودنة كلنة على عدم الاعتراف بالخطأ ونبقى مكابرين .. والنساء بالذات تغلط وماتعترف بغلطهة .. ومن اتسولف لأمرأة ثانية من حبايبهة ابدا متطي بيهة وتگللهة انتي غلطانة .. بالعكس تأيدهة ع الغلط وتذب الصوچ ع الطرف المقابل ..

مو .. اعترفن بنات حوااا ههه صحيح ؟.

17/05/2025

حرامي الگاردينيا ...

في اول سفرة الية لبيروت .. ع الروشة كان اكو محل حلويات مشهور ومعروف اعتقد اسمة (غازي).
گعدت وطلبت بقلاوة بوكتهة .. المكان حلو والگعدة حلوة والحلويات حلوة والوجوه الموجودة هم حلوة.

چان اكو سيدة او امرأة اجنبية گاعدة تاكل .. خلصت فجابولهة بطاسة كبيرة حلوة ورد ابيض .. من گامت دفعت الحساب استخدمت
الماستركارد .. بوكتهة اني حيل انعجبت وتعجبت علة شغلة الكارد لان بعدهة ماواصلتنة (كلش مساكين احنة) ههههه.

ظليت افكر بالورد الابيض اللي جابولهياه .. گلت اني هسة هم راح يجيبولي .. انتظرت انتظرت محد عبرني ولا جابلي ورد بطاسة مثل هاي الاجنبية .. گلت يلة هم حقهم اجنبية وحلوة وتدفع بالكارت اكيد يداروهة ويجوز زبونة دائمة فخففت شوية من الخيبة بداخلي.

المهم گمت دفعت الحساب .. قبل الخروج من الباب كان اكو هناك مكان بيه من هاي الورود البيضة اي شخص يگدر ياخذ منهم.
اخذتلي كمشة وشميتهة .. حسيت راحت روحي وياهة ماعرف وين .. عطر يجنن .. كلش حبيتة وظليت امشي ع البحر واشمشم بيه ..
كانت هاي اول ذكرى واول تعارف الية مع الگاردينيا .. ومن يومهة واني عاشق مجنون بيهة.

اخوية بالبيت مالتة عندة شجرة گاردينية وحدة كلنة نحبهة وهو هم مغرم بيهة ويداريهة بشكل حت لحم يوكلهة ههههه .. وقبل مدة نزلت بوست عنهة هذا الرابط مالتة :

https://www.facebook.com/story.php?story_fbid=122184561272125876&id=61553776306236

مثل متعرفون الگاردينيا تفتح شهر الخامس نهاية رابع والخامس وعمرهة قصير تقريبا شهر واحد يعني هسة هية علة وشك ينتهي عمر ورودهة السحرية .. لهذا لازم اشبع منهة بهذا الشهر بس.

كل ما الگة خملة او محد ماكو اگمز علة حديقة اخوية وابوگ كم وردة وارجع ركض واخليهة لو بجيبي وتفوح كل شوية .. لو اخليهة بماعون بالغرفة وهم كل شوية تجيني هبة منهة ..
كل ما اشتمهة احس روحي ردت الية ورجعت ذكريات لبنان والبحر والبقلاوة والبنية ام الماستركارد والگاردينيا اللي جابولهياه بطاسة زجاجية ..

من لم يعشق الگاردينيا ف عمرة خسارة وحاسة الشم عندة مضروبة من زمن كورونة خلي يراجع طبيب ههههه.

01/05/2025

اكبر عمرا .. اكثر انطواءا ...

دراسة بحثية اخيرة تكشف عن ان الكثير من الناس يصبحون اكثر انغلاقا او عزلة او انطواءا كلما تقدم بهم العمر.
بعبارة ادق تقل النشاطات الخارجية والحركة ويفضل الشخص قضاء الوقت في البيت بدلا من الخروج للمولات والمطاعم والكوفيهات.

الدراسة ترى ان الموضوع طبيعي جدا.
وان الفرد بعد سن الثلاثين تقل نشاطاته الخارجية ويميل للهدوء في حركته وطلعاته وهو ليس خللا او مشكلة بقدر ماهو تغير في النظرة والمفاهيم.

هذه الظاهرة يسميها العلماء النضج الذاتي .. وتعني ان شخصياتنا تصبح اكثر توازنا مع تقدم العمر.
بشكل عام يصبح الناس أكثر استقرار عاطفي وقناعة وضمير حي كلما ابتعدوا عن عمر الشباب .. كما يصبحون أكثر هدوءا وأكثر استقلالية .. ويحتاجون إلى قدر أقل من النشاطات الاجتماعية والإثارة ليكونوا سعداء.

على المستوى الشخصي اني من زمان ماحب الهوسة والازدحامات والتجمعات والمولات .. اتعقد من المولات.
لكن احب الاماكن الهادئة جدا الخالية من الازدحام والضجيج .. گعدة ع الشط او مي وخضار او كوفي تراثي هادئ .. هاي الاماكن المفضلة عندي ..

وانتوا .. عدكم هيچ احساس انه من كبرتوا صرتوا ماتحبون الطلعات وتفضلون البيت والهدوء على الخروج والهوسة ؟.
احكولنا تجاربكم واحاسيسكم .. خل نشوووف منو بعدة منفتح ع الدنيا .. ومنو بيكم مثلي انطوائي ومنغلق وبيتوتي.

25/04/2025

مشااااتل ...

الشي الوحيد اللي يبهرني ويسحرني بالعراق واتمنة اشتغلة واتواجد بيه هو المشاتل.
كلش ترفع معنوياتي وروحيتي ونفسيتي .. وتخلي الايجابية عالية والحياة بمبي واحس اني انسان فعلا ..

حلمي وامنيتي يكون عندي مشتل واني المالك او المدير مالتة .. يعني بس اباوع واستمتع والتيم همة اللي يشتغلون .. ويوما ما اذا طلعت تقاعد يمكن هذا اول شي يخطر علة بالي اسويه.

اللي ضايج وطالعة الدنية من عينهة خل يروح لأقرب مشتل يفتر بيه ويتذكرني ويدعيلي.

18/04/2025

مندي ومرگة ...

قبل كم سنة كانت مطاعم المندي قليلة في بغداد وعلة اصابع اليد .. اثنين منهم كانوا في بداية شارع ال 62 من جهة ساحة الواثق ..

بوحدة من ذيك السنين برمضان گلت خل اروح افطر مندي .. بعد مامنهة چارة .. النداء الداخلي للمعدة كان قوي ولايمكن مقاومته .. وعصرا قبل الفطور وطأت قدماي ارض المطعم اللي كان عندة گعدة ارضية في غرفة خاصة تراثية كلش كان يعجبني اكل بيهة .. وبقية المكان ميوزة وكراسي ..

گعدت علة احد الميوزة بانتظار المندي اللذيذ المنتظر بعد ان اجتي المينيو وحجزت وكان الحجز بوكتهة ع الوزن ربع نص كيلو لحم وهكذا .. وبانتظار المدفع والمندي كانت الدقائق تمر بطيئة كالعادة بمثل هيك حالات ..

اخيرا وصل المندي .. صينية متوسطة وبيهة تمن وفوگاه مايقارب نص كيلو لحم زند علة ما اتذكر ووياه كاسة زغيرة مرگة ماعرفت مالتيش بس كلش تعجبت وظل مخي يودي ويجيب ليش المرگة بكاسة زغيرة مو متوسطة او كبيرة كما هو المعتاد .. بس حسمتهة اخيرا وگلت شسوي بالمرگة والتمن راح يجي بيه الطعم والبهارات الرهيبة و و و احلام وخيالات شخص جائع جدا ..

مع طگة المدفع بلشت .. وبالخمسة اضرب تمن ولحم .. التمن كان ملون اصفر وبرتقالي لكن العجبني انه بس تمن يعني مابيه تشكيلات النكهات او الاضافات اللي كنت احلم بيهة .. كنت متخيل اضافات ونكهات وحبشكلات مع التمن لكن! ..
اللحمة كانت ناشفة وهذا كلش فرحني لانه حسيت فعلا اكو فرق بين اللحم المطبوخ وبين المندي ..

بعد ان كسرتهة للجوعة رفعت راسي التفتت يسرة يمنة انتبهت للدنية للناس الگاعدة للمطعم للمكان للاجواااا هههه .. وانتبهت ايضا للمرگة مال البخل اللي خاليهة بكاسة زغيرة .. گلت خل اخذلي همشة منهة دا اشوف مالتيش .. مديت الخاشوگة ع الكاسة الزغيرة واخذتلي لگمة وسمطتهة مباشرة للمعدة ..

في ثواني شعر راسي وگف .. عيوني جمدن .. وجهي احمر .. وعرگت كلش عرگت .. وحسيت اكو نار ابطني اشتعلت من نص البطن والصدر .. ثواني واحس عيوني غوشن .. وطلعت الدنية من عيني .. خررررب بهبل شنو هاي ؟.
مو مرگة .. هاي شطة حارة .. كلش حارة .. حاطيهة بكاسة ماتبين شطة وانما مرگة لان لونهة احمر مثل المرگة .. والكاسة محيرة لازغيرة وتفتهمهة مو مرگة ولا چبيرة وتترس عينك مال كرم .. متوسطة وسميتهة مرگة البخلااااا ..

الشطة شعلتني شعل .. نص ساعة لافاد تمن لافاد مي لافاد لبن لافاد لحم .. وجهي احمر وعرگان وكاره الدنية واحس كل متعة الاكل راحت والمشكلة وين .. الاحراج والفشلة ..
حسيت العراق كلة يباوعلي وخال عينة علية وعلة حالتي التي يرثى لها .. كلش فشلت واختزيت من وضعي .. نص ساعة قاسية جدا نفسيا ومعديا وشكليا كانت علية الى ان هدأت الاوضاع وبدت تتحسن ..

وراية كان اكو ميز .. عليه ولد وبنية .. شكلهم مخطوبين او عرسان جدد .. يعني شكلهة عزومة مميزة لشاب يحاول ان يكشخ گدام حبيبتة وبنية تحاول ان تظهر برستيجهة وفرحتهة بالخروج مع الرجل اللي اختارهة ..
ما اسمع الا گحة .. صوت گحة وخنگة وارتباك واكو شي مو طبيعي .. البنية كانت تگح .. گحة حيل مع اختناق وصارت ضغبرة وراية وهوسة .. طبعا مباوعت لانه عيب خاف احرجهم ومو لايقة واحد يصير فضولي وية هيچ ناس .. لكن الموقف تطور والبنية وگعدت من الكرسي ع الگاع وفقدت الوعي ..

هنا صار التدخل واجب انساني .. العالم گامت ع الولد والبنية .. رشوا مي علة وجهة .. والولد يگوم بيهة ويحرك ايديهة .. وهية مايلة براسهة وفاقدة الوعي ..
دقايق حرجة كلش مرت والناس حايرة شتسوي يلة گحت البنية انوب وبدت تگح وتتحرك .. فتحت عيونهة ودموع تنزل ولونهة احمر وهدومهة مبللة والبرستيج والميك والكحل والدموع كلهة نزلت علة وجهة وهدومهة .. الوضع كان كارثي ويقهر حيل اني حيل انقهرت ع البنية ..

گوة گومهة خطيبهة وگعدت ع الكرسي وصحت شوية .. وبدت تشوف الوادم والمكان .. هااا سلامات خير شنو صار .. ناس تشافيلهة وناس تواسيهة وناس تخفف عنهة بالمزاح .. المهم يابة شنو خير ليش هيچ ؟.
گالت اخذت شوية مرگة من هاي الكاسة الزغيرة وشربتهة بالخاشوگة رأسا واختنگت وحسيت مابية اتنفس وفقدت الوعي ..

اني ردتهة من الله احد يشاركني مأساتي .. رحنة علة ابو المطعم اني وخطيبهة وبعد ويانة جماعة صار وياهم نفس الفلم .. گنالة عمي هسة البنية لو صاير بيهة شي ؟.
ليش هيچ .. شطة حارة حطهة بماعون بصخام ومن تنزلهة گول عمي هاي شطة مو مرگة مو مرگة مو مرگة مو شعلت اجدادنة الوادم احترگت ابطونهة ورادت تموت ..

10/04/2025

ضياع المستمسكات ...

في العراق ماكو شئ مؤذي ومدمر نفسيا مثل ضياع المحفظة بما فيها من مستمسكات وهويات ومبالغ نقدية ..
وعادة من تضيع المحفظة الشخص يگول لنفسة وللاخرين عمي هسة الفلوس مو مشكلة فدوة بس كون ترجعلي المستمسكات ..

عملية اعادة الحصول على المستمسكات بالعراق كابوس اسود يبدأ بمراجعة مراكز الشرطة لاقامة ابلاغ او دعوة .. واحيانا يتطلب الامر نشر او اعلان في صحيفة .. ثم الذهاب للقاضي والمحكمة .. حت بالنهاية تحصل الموافقة على اصدار وثائق جديدة من الدائرة المعنية بعد دفع الغرامات طبعا .. وهذا سيناريو قاسي ومتعب ومزعج لابعد حد ممكن ..

سيناريو مريت بيه سابقا من انسرق جوازي في احدى السفرات وعشت اتعس واسوء ذكريات لحد الان مسببتلي خوفة ورعب من اسافر .. ربما يوما ما اكتب بوست عن قصة سرقة جوازي المؤلمة.

كل هذا مر وخطر علة بالي البارحة بعد ان اتصل بية صديقي واخبرني ان ابنه قد سرقت منه المحفظة .. وبداخلهة مالذ وطاب من جميع انواع الهويات البطاقة الوطنية وسنوية السيارة والماستركارد وهوية حمل سلاح وهوية الدائرة وبعد ماعرف شنو .. تشكيلة رائعة كافية ان تودي اي شخص للطوارئ مباشرة او للشماعية هههه ..

يگول هو نازل مستعجل من السيارة لعيادة الطبيب علة شغلة سريعة وناسي الجامة مفتوحة والمحفظة بداخل السيارة اما ع الدشبول او بالچكمچة كما يسميها اهل السيارات قبل .. وانه خلال دقايق جاي حرامي وسارق المحفظة ..

وخلال ساعات من العصرية للمغربية ماكو نتيجة .. وبعد واسطات واتصالات وعلاقات تدخلت الجهات الامنية (بدون واسطات واتصالات محد يگولك الله بالخير وتبقة تفتر بمركز الشرطة حاير بزمانك) وشافوا تسجيل الكاميرات القريبة .. اللي اتضح من الكاميرات انه هو من نازل واگعة من جيبة .. وورة شوية فايت ابو تك تك وشايلهة .. يعني مو شغلة سرقة وانما العثور عليهة .. والظاهر ابو التك تك احمق شوية ومطفي او مراد يتعب نفسة .. والا لو منتظر دقايق او فار راسة شوية چان اجاه صاحب المحفظة وانحلت القضية ..

ليلا ومن خلال التواصل الاجتماعي (خلف الله عليه وعلة اللي سواه) نزلوا بالفيسبوك بوست عن العثور علة مستمسكات .. ووصل الخبر للولد وراح جابهن اليوم الصبح ..

صديقي ابو الولد خابرني قبل ساعة يبشرني .. گتلة هاي بركة دعواتي لانه الليل كلة ادعيلة .. وهذا الخبر يسوة طلي .. افتهمت يسوة طلي .. طگهة بضحكة مثل اللي يريد يتهزم گتلة طلي طلي .. هذا الخبر يسوة طلي .. وعاجلا غير آجل ..

احچولنة قصصكم الحزينة مع ضياع او فقدان او سرقة المستمسكات .. شتتذكرون ؟.

01/04/2025

النظارات ...

كيف نرى العالم .. بين وهم الإدراك وسلطة القوالب الاجتماعية.
في أحد الأفلام الأجنبية (Anna and the King) تقول البطلة لابنها :
"معظم الناس لا يرون العالم على حقيقته بل على حقيقتهم"

هذا ينسجم تماما مع ما قاله المفكر العراقي الدكتور علي الوردي الله يرحمة :
"إن الإنسان ليس حراً في تفكيره كما يتوهم، فهو ينظر إلى الأمور من خلال قوالب فكرية انطبعت في ذهنه منذ الصغر، وهذه القوالب أشبه بالنظارات التي لا يدري لابسها بوجودها، فهي جزء لا يتجزأ من تفكيره"
هذه الحقيقة الجوهرية تكشف أننا لا نرى الواقع كما هو بل كما تم تشكيله في عقولنا عبر التجربة والمعرفة والمجتمع.

يرى الناس العالم من خلال عدسة تشكلها خبراتهم ثقافاتهم ومحيطهم الاجتماعي .. كلما كانت هذه العدسة ضيقة كان الفهم محدودا وساذجا وكلما توسعت المعرفة أصبح الإدراك أكثر عمقا وواقعية. لكن المشكلة تكمن في أن القليل منا فقط يدرك أنه لا يرى الحقيقة وانما يراها مشوهة احيانا وفقا لنظرته الخاصة.

في علم النفس يسمون هاي الحالة "التحيز الإدراكي" ويقصد به هو ميل الإنسان إلى رؤية الواقع بطريقة تتفق مع قناعاته السابقة بدلا من أن يحكم عليه بموضوعية .. هذا التحيز ليس مجرد انحراف بسيط في التفكير بل هو منظومة كاملة تشكل نظرتنا إلى العالم بما في ذلك أحكامنا على الآخرين.

عندما يخرج الإنسان من محيطه الضيق سواء بالسفر أو بالاختلاط بثقافات مختلفة أو حتى بمجرد التعرض لأفكار جديدة يبدأ في إعادة تشكيل فهمه للعالم.
قديما كان الشاب الذي يغادر قريته الصغيرة إلى المدينة للخدمة العسكرية يعود بعقلية مختلفة لأنه واجه بيئات جديدة تعامل مع أنماط مختلفة من البشر واصطدم بواقع أكثر تعقيدا من عالمه المحدود.
التجربة المتنوعة هي المفتاح الأول لكسر القوالب الفكرية.

هذا الحچي كلة مقدمة للموضوع الاساسي وهو اصدار الاحكام على الاخرين بناءا علة تصوراتنة لا بناءا علة حقيقتهم الفعلية .. امثلة لتقريب الفكرة :

- نظرة المجتمع للمرأة المطلقة .. يتم الحكم عليها وفقا لصور نمطية كلاسيكية شعبية مسبقة دون الأخذ في الاعتبار ظروفهة الخاصة او انها إنسانة ولها حياتهة المستقلة.

- نظرة المجتمع للملابس القصيرة .. غالبا ما يُنظر إليها من زاوية مغلقة دون التساؤل عن الدوافع الفردية مثل حب الموضة أو الشعور بالراحة وكأن كل امرأة ترتدي تنورة قصيرة تفعل ذلك لسبب واحد فقط يتوافق مع قناعات المجتمع المسبقة.

لا يمكن لأي إنسان أن يكون موضوعيا تماما ويتخلص من القوالب النمطية للتفكير او الاحكام الجمعية الكلاسيكية التي تعمل احيانا مثل النظارت لكن يمكننا تقليل تأثير التحيزات الفكرية من خلال :
- التشكيك المستمر في قناعاتنة .. مو بس نسأل ماذا فكر وانما ليش فكر هيچ.

- محاولة تقبل وجهات نظر مختلفة : الانفتاح على أفكار الآخرين حتى لو كانت تتعارض مع قناعاتنة.

- فهم أن الحقيقة متعددة الأبعاد : لا يوجد تفسير وحيد لأي ظاهرة اجتماعية أو شخصية.

وعودة لما قاله الدكتور علي الوردي .. نحن لا نفكر بحرية كما نعتقد بل من خلال نظارات فكرية تشكلت عبر نشأتنا وتجاربنا .. إدراك هذه الحقيقة ليس مجرد تمرين فكري بل خطوة أولى نحو وعي أعمق يجعلنا أكثر قدرة على فهم العالم والآخرين كما هم وليس كما نريدهم أن يكونوا.

31/03/2025

ايباااااااه .. عدنا والعود احمدوووو ...

29/03/2025

تاهت عليكم مو .. لحد الان اربعة اثنين في اثنين هههه ...

الوجه الآخر

21/06/2025

31/05/2025

30/05/2025

21/05/2025

17/05/2025

01/05/2025

25/04/2025

18/04/2025

10/04/2025

01/04/2025

31/03/2025

29/03/2025

Address

Telephone

Website

Alerts

Shortcuts

Share

Category