ترويج الاعلانات وصفحات الفيس بوك

بين الترويج .. والتبذير .. شعرة
حبايبي الكل يدري ماكو مشروع عمل نجح بدون دعاية واعلان صحيح
مو بس هاي
حتى المشاريع الناجحه ما استمرت بناجحها لوما استمرارها بالترويج الناجح
مثلا مطاعم ماكدونالد بعدما سيطرت عالسوگ مابطلت اعلانات
ولا شركة هونداي بطلت اعلانات
ولا شركة بيبسي ولا شامبو شولدرز ... ولا ولا ولا
بس اهم شي تعرف تحدد نوع العملاء التستهدفهم بمنتوجك لان اكو عميل مستهدف وعميل غير مستهدف
مثلا

اذا عندك شركة مقاولات ميصير تستهدف السياح الاجانب باعلانك
حتى العميل المستهدف اكو بيهم جديد عالسوگ ومامتعامل ويه منتوجك قبل واكو بيهم متعامل وي نوع منتوجك بس تلگاه زبون عند احد منافسيك ..
كل هاي تكدر تحيط بيها نوعا ما باعلانك من خلال الفيس بوك فقط
لان تكدر تحدد هواي اشياء منها الفئات العمرية ومناطق السكن البلد والمحافظه وغيرها
واعلان الفيس ينطيك جدولة بالعملاء اللي شافوا اعلانك باعمارهم وعددهم ومناطقهم وكيفية تفاعلهم سلبية او ايجابية
على عكس باقي اساليب الترويج مثل التلفزيون وشاشات العرض بالشوارع والبوسترات لان هاي الاساليب مبهمة النتائج واغلى من الفيس باضعاف .
مثلا من تصرف ١٠٠ دولار على بوستر بالشارع لمدة اسبوع شكد يجيب مشاهدات ؟
واذا تصرف ١٠٠ دولار بالفيس راح يجيبلك اكثر من 70 الف شخص الى 200 الف باليوم الواحد .
وهذول كلهم من شافوا اعلانك چانوا مكنكين ومسترخين مامستعجلين ..
النتيجة والمحصلة النهائية لاصحاب الاعمال التجارية كافة لا تنبهرون بقطعة عملاقة على سطح بناية ولا تنبهر بعشرين قطعة بالشوارع ليش ؟؟ لان احسب كل قطعة شكد تسجل مشاهدات .
تحياتي للجميع.