28/07/2025
ئەندام پەرلەمانی، نەبوو
برزۆ ئیسماعیل مەنسور
جاران کاتێک دەتویست کەسێك تەنزیم بکەیت و لەناو بازنەکانی رێکخستن کاری لەگەڵ بکەیت، دەبوو هەڵسەنگاندنی تەواو بۆ کەسایەتی ئەو کەسە بکەیت و بزانی لەناو کۆمەڵگا چۆنە؟ کەمترین شت دەبوو، دەست و دەم و داوێن پاک بێت، هیچ لەکەیەك لەسەر ناوبانگی نەبێت، هۆشیار و زرینگ بێت، راستگۆ بێت ..... تد. زۆر مواسەفەتاتی تری هەبێت ئینجا قبوڵ بوو بێتە ناو رێکخستن.
لەبیرمە کاتێ یەکێ دەبووە پێشمەرگە و دەهاتە دەرەوە، دەبوو لە بنج و بنەوانی بکۆڵینەوە، بۆ ئەوەی قبوڵ بێت ببێتە پێشمەرگە یان نا، پاش لێکۆڵێنەوە ئینجا ئەو شەرەفە گەورەیەی پێدەبڕا لەتەنیشت تۆوە چەک لەشان بکات. خۆم شاهێدی ئەوەم چەندان کەسمان ناردۆتەوە ماڵەوە لەبەر ئەوەی سومعەی تەواو نەبووە یان بەکەڵکی پێشمەرگایەتی نەهاتووە. جاران لەدوای چۆنایەتی دەگەڕاین، ئێستا لەدوای چەندایەتی. ئیستا زۆر و بۆر باشترە لە کەم و پوخت.
ئێستا حیزبەکانی کوردستان بە پێچەوانەی ئەو نەزمەی پێشوو، کامە گەندە و کامە گەندەڵ و سوک و ریسوا و سوکە ئەوانە دەهێنە پێشەوە و ئەوان دەکەنە نوێنەری ئەو خەڵکە( لەگەڵ رێزم بۆ ئینسانە باشەکان). ئەگەر بەشێکی کەمی پاک، لەناو ئەوانە مابێت، مایەی گاڵتەجاری و پێڕابواردنن. چونکە لەگەڵ ئەولادی ئەو عەسرە یەکناگرنەوە. (ئەوە خراپی دیموکراتیەتە چونکە شێتێک و پرۆفیسۆرێک وەک یەک دەنگیان هەیە).
تۆ تەماشا بکە، پەرلەمان بەرزترین و شکۆدارترین دامەزراوەی ئەو وڵاتەیە،بەڵام سوک و چروک و درۆزن و گەندەڵ و ساختەچی وای تێدایە، ئینسان شەرم دەکات بە نوێنەری خۆی بزانێ و رێزی لێ بنێ. لەناو خەڵك سوکترین و بێ ئەرزشترین کەسن، کەچی نوێنەری میللەتێکن بۆ دارشتنی سیاسەت و یاساکان و حکومڕانی ئەو وڵاتە. بەئاشکرا درۆ دەکات و ساختەچیەتی دەکات، کەچی نەبای دیوە و نە باران. روویان ئەوەندە قایمە، شەڕ بەخەڵك دەفرۆشن و بائاشکرا قسە بەنەیارەکان و ئەو کەسانە دەڵێن کە لەگەڵیان هاوڕا نین، کەچی دەچن شکایەت دەکەن و خۆیان بە مەزلوم دەزانن.
ئەوانە ئەگەر تەزویر و لەجێدانان نەبێت، خێزانەکانی خۆشیان دەنگیان پێنادات، کەچی بەزۆر و زۆرداری بەهۆی هێزە چەکدارەکانەوە دەنگیان هێناوە و بونەتە نوێنەر. خەڵك دڵنیایە لەو هێزانە ئەگەر بە حەزی خۆیان بێت دەنگ بەکەسی ئاوا سوک نادەن ببێتە نوێنەریان.
ئەوە ماوەی چەندان مانگە پەرلەمان دەرگای داخراوە، کەچی مانگانە پارە دێتە سەر حسابی ( هەژماری من) یان و زۆر بێ شەرمانە حەپەلوشی دەکەن.
بونەتە فەیسبوکەوان و قسەی زل لەسەر سۆشیال میدیا دەکەن و رەخنە و گازاندەیان لەخەڵكی ئاسایی زۆر زیاترە. هەزاران کۆمینتی ناشیرینیان بۆ دێت، کەچی وەک سۆنە(مراوی) تەڕ نابن و هەر بەردەوامن. ئەوانە بەتەواوی داشۆراون.
ئیتر حەق نییە خەڵك رێزیان بگرێت و بەچاوی مرۆڤ سەیریان بکات.
وەرگیراوە
