02/12/2025
یادەوری وێنەیەک…
ئێمەش لە محمد مراد قادر ماشکانیمان وەرگرت
پێمۆشە ئەو مێژووە بزرکراوە باسکەم
وێنەکە ساڵی ١٩٩٩یە. یاریگای چۆمان، دەگەڵ هاوڕێیانی قوتابخانە. راوەستاوەکان لای راست:( د. سەلمان. م.رێباز قانع، نایناسمەوە، م. حەمید، هێڵە سوورەکەی سەر فانیلە خۆم) دانیشتووەکان لای راست:( م. جەلال، کاک عەبدولوەهاب مەحمود، م. عالی، م. سەعدون). پێمخۆشە ئەو مێژووە بزرکراوە بۆ یەکەمجار باسکەم. چۆمان یاریگای سەردەمی بەعسی نەمابوو، پاش راپەڕین خەڵکی بە زێدەڕۆیی خانووی لەسەر دروستکرد. لە گەڕەکی لیوا گۆڕەپانێک هەبوو یاری تێدا دەکرا، بەڵام ناڕێک و خوار و پڕ بەرد. ساڵی ١٩٩٨ دەگەڵ کاک تەیفور گوندەژۆری ئێستا پەیامنێری k24 و کاک عزەت حسێن ئێستا لە ئەوروپایە، دانیشتم. پلانێکمان دانا و بڕیارماندا کارتێک چاپکەین و کۆمەک لەبۆ دروستکردنی یاریگا و پێداویستتیەکانی خڕکەینەوە. پاشتر کۆچکردوو کاک مزەفەر عەزیز کە بیرم نییە لە ئاسایش چ پلەیەکی هەبوو، ئەویش پشتیوانی کردین. کارتەکەمان دەدا بە بەرپرسی حزبەکان و فەرمانگە و کەسایەتی و بازرگانەکان، تاقە کەسێک دەستی بەڕوودا نەهێناین. پارەیەکی چاک کۆکرایەوە. بە شۆفڵ و گرێدەر یاریگای لیوامان تەخت و خۆش کرد، ستوونمان داچەقاند. دواتر دەگەڵ کاک عزەت پێکەوە هاتینە هەولێر و جلکی زیاتر لە دە تیپ و چەندین تۆپ و تۆڕ و پێداویستی دیمان کڕی. ئیدی خولی تۆپی پێ کرایەوە، وەرزش لەو ناوچەیە، کە بەهۆی شەڕی ناوخۆ و پەراوێزخستنی تا ئاستی مردن مردبوو، رۆحی وەبەردا کرایەوە. جێی دڵخۆشیمە ئێستا لە بەرزایی و جوانترین شوێنی چۆمان یاریگا دروستکراوە. شوێن پەنجەیەکم لە مێژووی وەرزشی ئەو شارەدا هەیە، وەلێ داخم کەس پێی نازانێ. نەمبینی کەسێک باسی بکات، یان رۆژێک بە سوپاس و پێزانینێک بەسەرکرێمەوە. ئەقڵی حزبایەتی بەرتەسک، زۆر شتی ناشرینکرد و زۆر هەقیقەت و دیوی مێژووی دیزەبەدەرخۆنە کرد.
✪ وێنەکەم لە واڵی م. عالی وەرگرتییە.
