28/11/2025
🔻هەڤاڵ بێرون عومەر فەتاح سەبارەت بە بارودۆخی ئێستای کوردستان و عێراق وناوچەکە بە کات نیوزی ڕاگەیاند...
قۆناغی ئێستا، قۆناغێکی نوێی سیاسەتی جیهانی و ناوچەییە، بە تۆخکردنەوەی ئەو پڕۆژەیەی کە وڵاتانی زلهێز و دەستڕۆیشتوو، ڕەنگیان ڕێژاوە و لەو ڕەنگڕێژکردنەوەیەدا ناوچەکە بە عێراق و هەرێمی کوردستانیشەوە دەگرێتەوە، وەک دەزانرێت لە دوای ڕووداو و گۆڕانکارییەکانی ڕابردوو هەڵبژاردنەکانی عێراق ، هەموو لایەک خوێندنەوەیەکی نوێ بۆ ئەم قۆناغە و قۆناغی داهاتوو دەکەن ، پێکهاتە جیاوازەکانی عێراق بە تێڕوانینی چارەنووسسازانە لە قۆناغەکە دەڕوانن و بەرپرسیارێتی قۆناغەکە لە ئەستۆ دەگرن و بلۆکبەندی و بەرنامەی ستراتیژییان بۆ پاراستنی بەرژەوەندییەکانیان هەیە.
بەڵام تا ئێستا گەلی کورد و پارتە سیاسیەکان نەیانتوانیوە لە ڕێگەی گفتوگۆوە دۆخی نەسازان تێپەڕێنن و خۆیان بۆ داهاتوو ئامادە بکەن بۆ دەستەبەرکردنی مافە دەستوورییەکان و پێداگیری لەسەر جێبەجێکردنی خاڵە جەوهەرییەکانی چارەسەرکردنی کێشەکانی نێوان هەرێم و بەغداد کە خۆی لە جێبەجێکردنی مادەی ۱٤۰ و پاراستنی سەروەری هەرێم و سامانە سروشتییەکان و پاراستنی مافەکانی پێشمەرگە وەک هێزێکی یاساییدەبینێتەوە
چونکە یەکگرتنی هێز و لایەنە سیاسییە کوردستانییەکان لە ژێر ناونیشانی چەترێکی نیشتمانی گرنگە و کورد ڕۆڵی دەبێت (لە دانانی پاشا) لە عێراقدا و سیاسەتی وڵات دەخاتەوە ناوەڕاستی بڕیارە گرنگە فیدڕاڵییەکان، بەڵام بەبێ یەکگرتوویی و یەکهەڵوێستی مافەکان دەکەوێتە بەردەم مەترسییەوە، لەژێر کاریگەری ڕێکەوتنە فراوان و مەترسیدارەکانی نێوان لایەن و پێکهاتەکانی تر کە ڕەنگە ئامانجیان پشتگوێخستنی مافەڕەواکانی گەلی کورد بێت.
گەلی کوردبە یەکگرتویی لە عێراقی (۲۰۲٥)دا ڕۆڵێکی گرنگ و بەهێزیان دەبێت لە وەرگرتنەوەی پۆستی سەرۆککۆمار و پێکهێنانی حکومەتی نوێی عێراق و بڕیارەکانی پەرلەمان لە ڕێگەی فراکسیۆنی کوردی و بلۆکێکی بەهێزی پەرلەمانی،کە ڕۆڵێکی کاریگەر دەگێڕن لە دروستکردنی بڕیاردا، یان دروستکردن و ڕووخاندنی حکومەتەکانی داهاتوو، بەڵام دابەشبوونی لایەنە سەرەکییەکان کە یەکگرتووییەکی سیاسیان نیشان نەداوە تائێستا وەک ئەوەی کە لە بلۆکەکانی شیعە و سوننە بینراوە کاریگەری نەرێنی هەیە
بۆیە پێویستە کۆبوونەوەی هاوبەش بکرێت بۆ سازان و پاراستنی بەرژەوەندییە باڵاکانی هەرێمی کوردستان و پێکهێنانی حکومەتی نوێی هەرێمی کوردستان و دروستکردنی فراکسیۆنێکی یەکگرتووی کوردستانی لە پەرلەمانی عێراق و دروستکردنی هێزێکی نیشتمانی پتەو لەڕێگەی یەکخستنەوەی هێزی پێشمەرگەی کوردستان، هەروەها بەهێزکردنی پەیوەندییەکان لەگەڵ وڵاتانی دراوسێ ڕۆڵێکی ئارامکەرەوە لە ململانێکانی هەرێمدا دەگێڕن، وە بتوانرێت پشتگیری نێودەوڵەتی بۆ بەدەستهێنانی مافە دەستوورییەکان بەدەستبهێنرێت بۆ چارەسەکردنی ناوچەکێشەلەسەرەکان و دابینکردنی بودجەی هەرێم بەشێوەیەکی دادپەروەرانە و پاراستنی سیستەمی فیدڕاڵی کە ئەمانە هەمووی لە سایەی یەکهەڵوێستی گەلەکەمان و پێکهێنانی بەرەیەکی یەکگرتوی نیشتمانی و فراوان وفراکسیۆنێکی بەهێزی پەرلەمانی دێتەبوون، هەر بۆیە گەل و نیشتمان چاوەڕێی بڕیار و هەڵوێستێکی وایە لەپارت و لایەنە ساسییە تێکۆشەرەکان.
