31/08/2025
پۆلیسی گەرمیان: وریای ئەم لینکە بن، هاکە!
بەڕێوبەرایەتی پۆلیسی گەرمیان بڵاویکردوەتەوە: لە دو رۆژی رابردودا لە تۆڕی کۆمەڵایەتی فەیسبوک لە چەندین گروپ و بە چەند هەژمارێک لینکێکی ساختەی هاککردن لەژێر ناوی پڕکردنەوەی فۆرمی هاوکاری (تەتەوا) لەڕێگەی حکومەتی عێراقی بۆ کەسانی کەمدەرامەت بڵاوبوەتەوە.
دەشڵێت: ئاگادارتان دەکەینەوە ئەم لینکە و زۆرێک لەو لینکانەی لەمجۆرەن کە لەلایەن هەژمارە ساختەکانەوە پۆست دەکرێن، دورن لەڕاستیەوە و سەرجەمیان بۆ هاککردنی هەژمارەکانتان یاخود داتاکانی ناو مۆبایل و کۆمپیوتەرەکان بەکاردەهێنرێن.
دەشڵێت: ئەم رێگایە لەئێستادا یەکێکە لە رێگا زۆر باوەکان کە بۆ هێرشی ئەلیکترۆنی و پرۆسەی هاککردنی هەژمارەکان و دزینی داتا بەکاردەهێنرێت لەلایەن کەسانی هاککەرەوە.
داواش لە سەرجەم هاوڵاتیان دەکات خۆیان لە بەکارهێنان و کردنەوەی ئەم جۆرە لینکانە بە دور بگرن و لە کاتی بونی هەر هەڕەشە و هێرشێکی ئەلیکترۆنیشدا سەردانی بەشی پۆلیسی نەهێشتنی تاوان/ نوسینگەی نەهێشتنی تاوانە ئەلیکرۆنییەکان بکەن .
