25/09/2025
پەیامی پیرۆزبایی دکتۆر کەمال کەرکووکی لە هەشتەمین ساڵیادی ڕیفراندۆمی گەلی کوردستان
٢٥ی ٩ی ٢٠١٧، ڕۆژێکی پرشنگدار و گرینگە و، بە دەنگدانی گەل سەرکەوتنی ڕیفراندۆمی کوردستانی باشوور تۆمار کرا و، بوو بە بەڵگەیەکی مێژوویی گەلی كوردستان بە پێی یاسا و بڕیارەکانی نەتەوە یەکگرتووەکان و یاسای نێودەوڵەتی. ڕیفراندۆمی ٢٥-٩-٢٠١٧ باشووری کوردستان ڕیفراندۆمێکی سەرکەوتووی گەلی کوستان بوو و، بۆ ھەمیشە بە درەوشاوەیی و سەرکەوتوویی لە بەرزی ئاسمانی كوردستان و جیهانی دیموکراسیدا دەگەشێتەوە و، ئەو ڕۆژەش هەر دێت کە گەلی كوردستان لە سایەی بڕیاری خۆی بۆ سەربەخۆیی لە (٢٥-٩-٢٠١٧)دا، بۆ ھەمیشە وەکو گەلانی دیکەی ئازادی جیھان سەربەرز و سەربەخۆ لە سەر خاکی خۆیدا فەرمانڕەوایی خۆی دەکات.
تۆمارکردنی ئەم سەروەرییە بەرهەمی سێ ئەستێرەی پرشنگداری درەوشاوەی ئاسمانی کوردستانە (ڕێزدار سەرۆك و پێشمەرگە کاک مسعود بارزانی و ڕیفراندۆم لە ٢٥-٩-٢٠١٧ و گەلی سەربەرزی کوردستان) بوو، کە سێ سەروەری و ڕووداوی درەوشاوەی بەرهەمدار و لەبیرنەکراوی مێژوویی گەلی کوردستانن، ڕێزدار سەرۆك مسعود بارزانی زۆر بە دڵسۆزی ھەوڵی دا ڕیفراندوم ئەنجام بدرێت و، ڕیفراندۆم ئەنجام درا تاکو گەلی کوردستان لە کەشێکی ئازاددا خۆی بڕیاری دیاریکردنی چارەنووسی خۆی بدات و بزانرێت گەلی کوردستان سەربەخۆیی دەوێت و، گەلی کوردستانی سەربەرزیش بە بەشداریکردنی لە ڕیفراندوم و بە دەنگی (٩٢.٧٣٪)ی بەشداربووان گوتی بەڵێ سەربەخۆییمان دەوێت و ڕیفراندۆمەکەی بە سەربەرزی و سەرکەوتوویی تۆمار کرد.
هەشت ساڵ پێش ئێستا، لە ڕۆژیكی وەکو ئەمڕۆدا كوردستانی باشوور لەنێو دژایەتی و لایەنگیریی، یاساییبوون و نایاساییبوون، باوەڕبەخۆیی و ناباوەڕی، نیشتمانپەروەری و نیشتمانفرۆشی، بە ھیمەت و ئیرادەی پۆڵایینی دڵسۆزانی گەلی کوردستان و بیرپاکی و دووربینی و دڵسۆزیی ڕێزدار کاك (مسعود بارزانی) پرۆسەی ڕێفراندۆمی باشووری كوردستان، بە ئاشتی و ئارامی و سەرکەوتوویی لە کوردستانی باشوور، بە ناوچە کوردستانییەکانی دەرەوەی ئیدارەی ھەرێمی کوردستان و بە کەرکووکی دڵی کوردستانیشەوە بەڕێوە چوو و، بە ڕێژەی (٩٢.٧٣٪) بە دەنگی بەڵێ بۆ سەربەخۆیی سەرکەوتنی بەدەست ھێنا.
هەشتەمین ساڵیادی ڕیفراندۆمی کوردستان لە پێشمەرگە قارەمانەکان و خانەوادەی شەهیدە سەربەرزەکانی کوردستان و گشت خانەوادەی شەهیدانی ئەنفالکراو و کیمیاباران و بێسەروشوینکراوان پیرۆز بێت .
ڕیفراندۆم لە سەرۆکی سەربەرز کاك مسعود بارزانی پیرۆز بێت.
دکتۆر کەمال کەرکووکی
ئەندامی مەکتەبی سیاسی و بەرپرسی بەشی پەیوەندی گشتی پارتی دیموکراتی کوردستان
٢٥-٩-٢٠٢٥
