27/06/2025
من، #مەسیحیم...
بەهیوام سەرەتا نوسینەکە بخوێننەوە …
هاوینێكی گەرم بوو، بەڵام هێندەی گەرمی ئێستا نا، گەرمی ئێستا بارتەقای دووهێندی گەرمی ئەوسایە، چوونكە ئێستا مرۆڤەكانیش دەروونیان گەرمە و خۆشەویستی نابەخشن.
هەرئەوەندەی كە بیستم لە (سەنتەری گەنجان) چەند خولێكی هاوینە و بەبێ بەرامبەر كراونەتەوە، بە تامەزرۆییەوە خۆم گەیاندێ..
خولەكان سادەبوون، بەڵام سوودبەخش.
من، چووم بۆ بەشی (كۆمپیوتەر)، چەند بەرنامە و سەرەتایەك بۆناساندنی بەشە ساكارەكانی.
هۆڵێكی دوورودرێژی شێوەی كۆستەری، مێزێكی درێژ لەمسەر بۆ ئەمسەر و بەقەراغ مێزەكەشەوە كوورسی پلاستیك كە پشتی كوورسییەكان چەند كونێكی بچووكی تێدابوو و ڕەنگیان سۆربوو، ڕێزكرابوون.
لەبەرامبەریشدا تەختەیەكی سپی، وەختێك مامۆستا بابەتەكەی بۆ بەیان دەكرین، ئیتر دەبوو هەموومان ملمان ڕوەو ئەو تەختەیە بسوڕاندبا، پاش ئەوە بەشێوەی كردارەكی هەوڵماندەدا تاوەكو ئەوەی مامۆستا بەزووبان پێیوتوین، لەسەر كۆمپیوتەرەكان ئەنجامی بدەین.
چەند كۆمپیوتەرێكی ڕەنگ شیری، شێوەیان لە تەلەفزیۆنە كۆنەكانی زوو دەچوو، بەڵام كەمێك بچوكتر.
ڕێژەی بەژداربووان زۆر بوو، ڕۆژانە دووكاتژمێر بەردەوام دەبوو.
بەهەرحاڵ;
فێرخوازە كچەكان بەڕیز بەدوای یەك و كوڕەكانیش بەهەمان شێوە دادەنیشتین، لەبەرامبەر من، كچێك دادەنیشت، قژێكی لوولی پڕ، برۆیەكی كەمەك ئەستووری دەستكاری نەكراو، لووتێكی باریك، دوولێوی كەمێك تۆخ بەلای ڕەنگی كەكاوی، دووچاوی ڕەشی تۆخ، باڵایەكی بەرزی درێژ، ڕەنگی پێستی كەمێك ئەسمەر...
زۆر بەكەمی قسەی دەكرد، وەختێكیش قسەی كردبا، بەكوردییەكی كەمێك قورس قسەی دەكرد، وەك ئەوەی نەتوانێ بەئاسانی پیتەكان بەئاسانی بەیەكەوە بلكێنێ و وشەیەكی تەواو دوورستبكا..
دوای نزیكەی هەشت بۆ دەڕۆژی یەكەم، زمانی چاوی هەردووكمان كەمێك ڕاز و نیازیان بەیەكتری گەیاند، بەڵام ڕاستییەكەی نەمدەزانی ئەو ڕازە چیە و چۆنە، چوونكە تەمەنی ئەوكات و ساكاریی و پاكی دڵ و دەروونی مرۆڤەكان دووربو لە حەز و ئارەزوو و شەهوەتی پیسی ئێستا...
تەنها ئەوەندەم هەستدەكرد كە بەبینینی هەستم بە ئاسوودەیی تەواوی دڵ و دەرونم دەكرد، بەجۆرێك ئارەزومبوو كاتژمێرەكانی وانەوتنەوەكە زۆر زیاتر و درێژتربێ لەوەی كە هەیە.
ئەویش هەروابوو، وەختێك كە لەپڕ و لەناكاو چاوەكانم دەكەوتە سەری و دەمبینی لەژێر پەرچەمە لوولەكەیەوە سەیرم دەكا، ئیتر یەكسەری لەشەرمان ڕووی وەردەگێڕا و بەپەنجە باریكەكانی قەڵەمەكەی لەناو قامكەكانیدا دەهێنا و دەبرد...
دوای تێپەڕبوونی چەند هەفتەیەك، بەشێوەیەكی زۆر ئەستەم توانیم لە دەرفەتێكی چەند چركەییدا خۆمی بگەیەنمێ و چەند وشەیەكی ساكار و تێكئاڵاوی پڕ لەشەرم و لەرزی پێبڵێم، ئاخر بەڕاستی ئەوێ ڕۆژێ سەردەمی شكۆ و بەها و شەرم بوو، تا قسەیەكت بە بەرامبەرەكەت دەگەیاندن لەناخی خۆتدا وەك كۆنە دیوارێكی درز تێكەوتوو سەدجار بەسەر یەكەوە بەسەرخۆتا تل دەبویتیەوە و دادەڕومایت، دوور لەئێستا كە هەموو شتێك بێ بەها و كەم بایەخ بووە..
(چۆنی باشی، دەمەوێ قسەت لەگەڵ بكەم)
وەك ئەوەی كەسێك لە قوڵای خەودا یەك سولاحی پڕ لەئاو و بەفری پیادا بڕژێنیت، بە سەرسامییەوە سەیری كردم و وتی (ئێ)!!.
نەمزانی چی بڵێم، تەنها ووتم (وەڵا نازانم)...
هەر ئەوەندەم وت، ئیتر ئەو ڕۆیشت..
ئیتر لەوڕۆژەوە و بۆ ڕۆژانی دواتر، هەستم كرد چاوەكانمان زیاتر قسە دەكەن، چونكە ئەو ترس و دڵەڕاوكێیەی سەرەتام نەما.
شتەكان بەم شێوەیە و بەهەڵواسراوی و لەنێو قوڵایی چاوەكاندا مانەوە، وەك ئەوەی بەردێك فڕێبدەیتە ناو گومێكی مەنگەوە و چەندین بازنەی شەپۆل بەدوای یەكتریدا دوورست دەكەن، ئیتر نیگاكان بەو شێوەیە زنجیرەی شەپۆلەكانیان گەورەتربوو..
بەردەوام بەقوڵی سەیری دەكردم، بەبێ ئەوەی چاوەكانی بتروكێنێ!
ڕۆژێك مامۆستا هات و ئاسایی دوای وانە وتنەوە، ووتی پێویستە هەر یەكەتان وێنەیەكی بچووك لەگەڵ خۆیدا بهێنێت، چوونكە ئیدی خولەكە تەنها سبەی ماوە و دووسبەی بڕوانامەی بەژداربوونتان بۆدورست دەكەین!.
خوول تەواو دەبێت؟؟، ئەی ئێمە چی؟؟
تەواوبوونی خولەكە واتا تەواوبوونی دیداری ئێمەش!..
ئەو ڕۆژە تەواو، شتەكانمان پێچایەوە و هەریەكە لەسەر كورسیەكانی خۆی هەڵسا و بوو بە خش و تەپ و دەنگەدەنگی جووڵەی كورسی و ژاوە ژاوەی قسە و...، هەموو وردە وردە پەرتەی لێكرد، ئێمەش بێگومان هەر وەك ئەوانی تر.
ڕۆژی دواتر بەڕاكردن چوومەوە و ڕەسمێكی بچوكیشم لەگەل خۆمدا خستبووە ناو باغەڵە بچوكەكەی سەر سینگی كراسەكەم، هێواش هێواش هاوپۆلانم پەیدا بوون، ئەویش هات.
بیرمە ئەوڕۆژە شتێكی لەبەربوو، ئەوسا نەمدەزانی چییە، بەڵام لەئێستادا پێیدەڵێن ( #عەزییە)، عاردی عەزیەكە سپی بوو، وردە گووڵی سۆری تێدابوو، پرچی كردبووە كەزیی، كەزیەكی ئەستووری پڕ، بە قرتێلەیەكی ڕەش تووند گرێیدابوو..
ئاسایی وەك ڕۆژانی پێشوو دانیشتین، بەڵام دەرسمان نەخوێند، بەڵكو مامۆستا خەریكی كۆكردنەوەی وێنەكان بوو، ئیتر لێرەو لەوێش هەریەكە لەگەڵ ئەوەی تردا خەریكی ئاخاوتن بوو، تەنها من و ئەو نەبێت.
ئەوڕۆژە بەهیچ جۆرێك سەیری نەكردم، تەنانەت لەسەر ئەو كورسیەش دانەنیشت كە ڕۆژانە لەبەرامبەر و لەسەریدادەنیشت!
وێنەكان كۆكرانەوە و كات تەواوبوو، وەك مێروولە یەك بەدوای یەكتری لە دەركە دارینەكەی هۆڵەكە چووینە دەرەوە.
ئەو لەپێش منەوە و چووە دەرەوە، دوای چەند خولەكێكیش منیش دەرچووم، ناو سەنتەر باخچەیەكی ڕوباعی هەبوو و فریزێكی تێدابوو، بەچواردەوریشیدا چەندین جامی شووشە لە شێوەی پەنجەرەی گەورە هەبوون، لەڕاستیدا نازانم ئێستا وەك خۆی ماوە یان نا.
بەهەرحاڵ،
لەودیوو شووشە گەورەكانەوە بینیم لەناو فریزەكە وەستابوو، هەر كەمنی بینی، هاتە دەرەوە و ڕوەو پیرمەوە هات، گەیشتە بەر دەمم و وەستا، سەری لووتی چەند دڵۆپێكی وردی ئارەقەی پێوەبوو، چاوەكانی كەمێك فرمێسكی تێزابوون، جا نەمزانی فرمێسكە یان لەگەرمان چاوەكانی ئاویان كردوە.
وەستا و ووتی (من #مەسیحیم)، هەر ئەوەندە و یەكسەری و وەك شینەشاهۆ بەخێرایی ڕۆیشت و تێپەڕبوو...
ڕۆژی دواتر و كاتی پێدانی بڕوانامەی بەژداربوونمان، چووم و ئەو نەهات...
بڕوانامەكانمان وەرگرتەوە و لەگەڵ خوێندنەوەی ناوەكان هەركەس هەڵدەستا و ئەوانی تر چەپڵەیان بۆدەكرد و بڕوانامەكەت وەردەگرتەوە، ناوی منیش خوێندرایەوە، بەڵام من گوێم لە چەپڵە نەبوو، چوونكە وامهەستدەكرد قوڕی هەموو دونیا گیراوەتەوە و خزێندراوەتە ناو هەردوو گوێچكەمەوە.
لەكۆتایدا، یەك بڕوانامە مایەوە، بڕوانامەی ( #لیسا)!
مامۆستا ووتی( لیسا خان، مەسیحی بوو و لەبەغداوە هاتبوون بۆ ئێرە و بۆگەشت بۆلای خزمەكانیان، بەداخەوە دوێنێ لە ئیدارە پێیووتم كە دەگەڕێتەوە و ناتوانێ لەكاتی وەرگرتنەوەی بڕوانامەكەی ئامادەبێت)....
هاوینی ٢٠٠٣..
