01/10/2023
بالتوفيق لجميع الطلاب بالموسم الدراسي الجديد
مع بداية العام الدراسي الجديد أكو [ 5] شغلات ، كون الطلبة يسووها ... حتى تكون سنة متميزة :
1 - انوي أن تكون دراستك بهاي السنة #قربة لله تعالى ، وتمهيدًا لصاحب الزمان (عجل الله فرجه) ، وخدمة لوطنك فانت - بأي مرحلة دراسية - رقم بمعادلة التقدم ... اخلص لله وتوكل عليه ، وحاول تصير بلسما لجراحات الغيبة .
2 - نام من وكت ! ... إي إي نام من وكت ، حاول تنام قبل ( 11:13 م ) قدر إمكانك ، حتى تگعد من وكت ، ومو تخلي موبايلك يمك ، ابعده عنك ، وحاول أن تكون #ريفيًا في ذلك [ إضبط ساعتك البايلوجيَّة ] .
3 - خلي لك برنامج يومي للقراءة - بدون ما تضغط على نفسك - وعينك على النظام الغذائي ، والإستقرار النفسي ، وابتعد عن المُشتتات ، والاستخدام الزايد للنت ، وغادر الگروبات الما بيها فايدة ، وكومة الافلام والمسلسلات ، والگعدات غير الهادفة ، والطلايب .
4 - من تگعد الصبح اقرأ آية الكرسي 5 مرات ، واعتن بكثرة الصلاة على محمد وآل محمد ، وآية التسهيل : ( رَبِّ اشْرَحْ لِي صَدْرِي * وَ يَسِّرْ لِي أَمْرِي * وَ احْلُلْ عُقْدَةً مِنْ لِسانِي * يَفْقَهُوا قَوْلِي ) واذا تگدر اقرأ القرآن ، وصلاتك بوكتها .
5 - إفتح باب هاي السنة #بمحبة وتعال لايامها برغبة ، مو من ورى خشمك ، ومتضايق ، ومالك خلگ ، تعال للدراسة باريحية ، وطيب خاطر ، واعتبر التفوق جزء من تكليفك تجاه دينك ، ونفسك ، والي يحبوك !
[ الهي بحق محمد و آل محمد ، تتوفقون ، وتتفوقون ، وتتخرجون ، وتتعينون ، وتبنون بيت ، وتتزوجون ، وتخلفون ] ويجي الدوام وتگلولهم ( مع بداية العام الدراسي الجديد أكو [ 5] شغلات ، كون الطلبة يسووها ... حتى تكون سنة متميزة : ... يلگوهن فوگ 👆🏻 ... 🌹
📝 د.الشيخ علي المياحي
https://t.me/ali11041