23/09/2025
کەمی ڕێژەی دەرچون لە پۆلی دوازدەیەمی ئامادەیی, "هۆکار و چارەسەر"..
پەروەردە یەکێکە لە کەرتە گرنگەکانی دەوڵەت. ئاستی پێشکەوتنی هەر نەتەوە و دەوڵەتێک بەندە بە بوونی سیستەمێکی پەروەردەی سەرکەوتوو. بەداخەوە لەم چەند ساڵەی دوایدا درک بەوە دەکرێ ئاستی زانستی خوێندکار و ڕێژەی دەرچوون لەپۆلەکانی دوازدەی ئامادەیی لە ئاست خواستی مامۆستایان و کەسوکاری خوێندکاران نیە. بێگومان دابەزینی ئاستی زانستی و ڕێژەی دەرچوون لە قۆناغی دوازدەی ئامادەیی بێ هۆکار نیە و هەمووان بەئەندازەی بەرپرسیاریەتیمان بەشدارین لەم ئەنجامانەی ساڵانە لە قۆناغی دوازدەی ئامادەیی ڕادەگەیەنرێت.
چەندین هۆکار هەن لەوانە:
1ـ کەمتەرخەمی و بێ پلانی حکومەت لە دابینیکردن و دۆزینەوەی هەلی کار بۆ دەرچووانی زانکۆ و پەیمانگاکان، چ لە کەرتی حکومی بێت یا کەرتی تایبەت، جۆرێک لە بێ هیوایی لای خوێندکاری ئامادەیی دروستکردووە بەتایبەت کاتێک دەبینێت هاورێ و برا و خوشکەکانی زانکۆ و پەیمانگایان تەواو کردووە و لەماڵەوە بێ کار دانیشتوون. لەلایەکی تر دواکەوتنی مووچە و شایستەی دارایی مامۆستایان مانگانە لەکاتی خۆی لەچەند ساڵی ڕابردوو تا ئێستا هۆکاری سەرەکی بوو بۆ بایکۆت کردنی هۆڵەکانی خوێندن، ئەمەش بوو بە هۆکاری دابڕانی خوێندکار لە خوێندن و دابەزینی ئاستی زانستی و ڕێژەی دەرچوون.
2ـ بڵاوبوونەوەی پەتای ڤایرۆسی کۆرۆنا: کاتێک بە هۆی ئەو پەتایەوە پرۆسەی خوێندن ڕاگیرا تەنها وەرزێک دەوام کرا و بە هەردوو وەرز ئەژمارکراو زۆربەی خوێندکاران دەرچووێنران و هەموویان لە پۆلی 12 کۆبوونەوە
3ـ گۆڕینی شێوازی تاقیکردنەوەکان بەتایبەت نەمانی تاقیکردنەوەی وزاری قۆناغی شەشەمی بنەڕەتی و نۆیەمی بنەڕەتی.
4- خراپ بەکارهێنانی تەکنەلۆجیا و پەیوەستبوونی خوێندکار بە تۆڕەکۆمەڵایەتییەکان، هۆکارن بۆ دابڕینی خوێندکار لە خوێندن و دابەزینی ئاستی زانستیان.
5- کەس و کاری خوێندکار کەمتەرخەمن لە بەدواداچوونی ڕۆڵەکانیان لە خوێندن و چۆنیەتی دابەشکردن و بەسەربردنی کاتەکانیان. بەتایبەت ئێستا لە زۆربەی ماڵەکان ئینتەرنێت وای فای بەردەستە و خوێندکار کاتێکی زۆر بەدیار تۆڕەکۆمەڵایەتیەکان بەسەر دەبات.
ــــ چارەسەر
1ـ گرنگی دانی حکومەت و وەزارەتی پەروەردە بە پڕۆسەی پەروەردە و فێرکردن لە ڕوویی بیناو کەل و پەل و هۆیەکانی فێرکردن، دۆزینەوی هەلی کار بۆ دەرچووانی زانکۆ و پەیمانگاکان،
، کردنەوەی خولی پێگەیاندن، پێشخستنی ئاستی مامۆستایان، گەڕانەوەی تاقیکردنەوەی نیشتیمانی بۆ پۆلەکانی شەشەمی بنەڕەتی و نۆیەمی بنەڕەتی.
2- پێویستە مامۆستا بە گرینگی یەوە لە پیشەی مامۆستا بڕوانێت لە هەوڵی بەردەوام بێت بۆ کۆکردنەوەی زانیاری لەسەر بواری پسپۆری خۆی و شێوازی وانەوتنەوەی نوێ.
3- پێویستە لەسەر خێزانەکان گرنگی زیاتر بدەن بە چاودێری کردن ڕۆڵەکانیان و بە گرینگی یەوە لە ئاستی زانستی و ئایندەی خوێندکارەکانیان بڕوانن.
4ـ بڵاوکردنەوەی ڕۆشنبیری پەروەردەیی و گرنگی زانست و زانیاری لە ناو کۆمەڵگا لە ڕێگەی کەناڵەکان و تۆڕە کۆمەڵایەتیەکان و ڕۆژنامەکان.
مامۆستا یاقوب ناظر نجیم، بەڕێوەبەری ئامادەیی تەق تەقی کوڕان
