06/07/2025
مناشدة من الفلاحين المظلومين من أهل الحويجة وكركوك
إلـي معالي وزير التخطيط الدكتور محمد تميم
و الى النائب مهيمن الحمداني
وإلـى النائب ساهرة الغرب
وإلـى النائب منى السبيل
وإلـي الشيخ وصفي العاصي
وإلـي السيد محافظ كركوك الأستاذ ريبوار
وكل مسؤول بيه نخوة وغيرة على أهل كركوك
السلام عليكم ورحمة الله وبركاته
احنا يا جماعة الخير، فلاحين، زرعنا وتعبنا وسهرنا ليالينا، ونطينا للأرض من دَمنا قبل ما ننطيها من جيبنا، وكلنا أمل إنو نرجّع تعبنا بموسم الحصاد.
بس اليوم نسمع إنو سايلوات الحنطة راح تسد أبوابها بعد يومين بـيوم الثلاثاء المصادف٨_٧-٢٠٢٥
، واحنه بعدنا ما مخلصين تسليم، وعدنه حنطة نريد نوديها، وعدنه ديون لازم نسددها، وعدنه أهل نسترهم بها الخير.
تره والله عيب، وحرام، وتعب سنة كاملة يروح هيچ!
الفلاح مديون، ومكسور، ومقهور، وإذا السايلوات تنسد بهالسرعة، ما عدنه غير نبيع المحصول بأبخس الأثمان، وما راح يسد خسايرنة
نناشدكم بالله تمددون فترة استلام الحنطة، حتى لو عشرة ايام او أسبوع واحد، حتى نلحك نسلم ونوفي ديوننا.
معالي الوزير، سعادة النواب، سيادة المحافظ، تره ما نريد غير حقنا، لا نطلب لا فضل ولا منّة، بس انطونا وقت، وساعدونا، لا تخلون تعبنا يضيع.
والله تعبنا... والله ملينا... بس بعد عدنه أمل بيكم.
