13/10/2024
👉SANTU ANNI de Quartu Sant'Aleni
➡️Unu lìburu po pipius e po mannus asuba de una festa antiga
Cenàbara su 25 de su mesi de ladàmini a is 5 de a merii, in s’Aposentu de is Pinturas (Sala degli Affreschi) de su chi fiat su Cumbentu de is paras Capucinus in bia Brigata Tàtari, est apariciada sa presentada de su lìburu e de su progetu dedicau a sa festa de Santu Anni de Quartu Sant’Aleni. Su lìburu, cunziminau de s’assòtziu LARAS – Suoni e parole di Sardegna APS, de Quartu Sant’Aleni, fait parti de su progetu prus mannu Sa lìngua in Quartu, fatu cun su dinai de sa L. 482/99 e de sa L.R. 22/18.
Sa festa de Santu Anni de Quartu Sant’Aleni est una festa chi si distinghit intra totu is festas de Sardìnnia e tenit sentidus culturalis, arreligiosus e para-arreligiosus chi si merescint de essi connotus de totus. Custu lìburu donat sa possbbilidadi de scoberri sa stòria, is ritus de su connotu e su grandu balori simbòlicu chi ddoi est apalas de cada momentu de sa festa. Est unu lìburu chi agiudat a cumprendi una festa chi tenit arrèxinis chi afungant in su prus coru antigu de sa tzitadi e de totu sa Sardìnnia.
Custu lìburu no est sceti unu cumbidu a pigai parti a una festa. Est un’ocasioni ùnica po s’acabussai in d-una stòria antiga. Dònnia pàgina de su lìburu est unu ponti chi aunit su connotu a sa dii de oi, scoviendi is sentidus de una festa chi sighit a bivi in su coru de sa genti e chi si merescit de essi sprorada, cumprèndia e cundrèxia.
Su lìburu est scritu de Giovanni Giuanni Spano , spertu de lìngua e de cultura sarda, visu-presidenti de Acadèmia de su Sardu APS , e est maginau po ecisai e po contai sa stòria de sa festa a is pipius prus piticus. Est un’òbera chi si scerat de is àteras no sceti po sa manera de contai simpli e frisca, in lìngua sarda campidanesa, ma finsas po sa bellesa stravanada de is pinturas de su pintori Leo Pes. Dònnia pàgina pigat forma gràtzias a is pinturas de Leo, chi arrennescint a aciapai de arrepenti s’atentzioni de is giòvunus ligidoris. Is scenas, prenas de piessìnnius e de coloris allutus no acumpàngiant sceti su testu, ma ddu cumprint, amostendi a is ogus is sentidus e is emotzionis chi ddoi funt aìnturu.
Sa fueddada de s’autori contat che a una poesia is ritus chi nci funt me is màginis. Is pipius ligidoris s’ant a acabussai me is pàginas de su lìburu e, incrosidaus, dd’ant a scrucullai totu finas a s’acabu.
Cun d-unu pinzellu chi ponit impari coìdu e lebiesa, Leo Pes arrennescit de arrepenti a amostai is ritus contaus in su lìburu, aciapendi s’atentzioni e spertendi sa maginatzioni. Gràtzias a sa manu sua, dònnia mòvida, dònnia sìmbulu est simpli a cumprendi finsas po is ogus pagu spertus de is pipius, chi arrennescint cun is pinturas a aciapai is sentidus, finsas cussus prus fundudus. Is tzirimònias de sa festa, càrrigas de stòria e sentidu, no funt sceti pintadas: funt interpretadas e amanniadas de s’artista, chi amantat dònnia pintura cun sentidus de spantu e de scoberta.
In custa manera custu lìburu no contat sceti una stòria, ma donat pròpiu sa possibbilidadi de fai una sperièntzia. Is pinturas funt una ghia muda chi acumpàngiat is ligidoris in d-unu biaxi peri sa pantasia e sa connoscèntzia, faendi de dònnia pàgina un’òbera stravanada de sprorai e de mirai po ogus e po ligidoris de dònnia edadi.
Custu progetu est fatu po is pipius de is scolas de sa pipiesa de Quartu Sant’Aleni. Dònnia pipiu de sa scola "dell'infanzia" at a arriciri a indonu una còpia de su lìburu.
Beni a ddu- scoberri!
E a scoberri Quartu. ❤️
Gràtzias a RAS - Regione Autonoma della Sardegna, Quartu Sant'Elena Comune Quartu Sant'Elena Sa Bertula Antiga Santu Anni
