03/11/2025
يخوان طلعت مع شوفير تكسي قبل فترة
المهم واحنا بالطريق رن تلفونه رد عليه
إلا هي مرته بتقوله الحقني أنا بدي أولد وهيني على باب مستشفى المواساة
ومعاي مصاري العملية بس ناقص علي ٢٥
حكالها اعطيني الشب الي عندك على الريسبشن
وآخذه وصار يحكي معه ويقوله بالله عليك يابني هاذ اول ابن الي بعد ٣٠ سنة جواز
مشيها وبالليل بكون لميت ٢٥ دينار وبجيبلك اياهم بس لا توقفها
المهم الشب ما برضى وبحكيله لازم تدفع
الشوفير بحكيله تمام اعطيني رقم الكليك هسا بحولك
شوفير التكسى فصل التلفون ورن على واحد اسمه ابو محمد جاره
وحكاله ابو محمد بالله عليك حولي ٢٥ بس على هالرقم
المهم ابو محمد بحكيله والله ما اشتغلت اليوم خليها على الله
الشوفير ملامحه بتبلش تتحول من ملامح فرح وبهجة لملامح حزن
هون اخوكم حاتم الطائي الي هو أنا
بدخل عليه الفيلم الهندي وبحكي للشوفير خلص يا عمي أنا بدفعلك اياهم
وحولتله والله وقلتله إذا بدك ترجعهم رجعهم براحتك
صار يشكر فيه ويسلمو ايديكِ يابني وراح اسمي الولد على اسمك
وحياة امي بمثل احسن من توم كروز
وراحت القصة لغاية مبارح
شاءت الصدفة اني اطلع مع نفس شوفير التكسي بس شكله هو مش عارفني
المهم لسا بدي احكيله طمني عن المدام وابنك كيف صاروا واذكره فيه
إلا هو تلفونه برن
رد عليه طلعت مرته
بتحكيله هيني عند العيادة ابنك مريض ومخطر والعيادة بدهم فحصوات بـ٢٥ دينار وما معي
اول سمعت هالجملة
اقسم بالله ضحكت ضحكة داخلية دين ما الها
المهم ما عملت معه اشي واستعوضت ربنا خير
والزلمة شكله ماخد التكسي للنصب وبستغل الهبايل الي زييي
فديروا بالكم
