19/05/2026
😳 (၇) နှစ် သမီးလေးကို ပြန်ပေးဆွဲ သ-တ်ဖြတ်ခဲ့တဲ့ FedEx ကားမောင်းသမားကို ဆေးထိုး ကွပ်မျက်ရမယ့် သေဒဏ်ချမှတ်
အမေရိကန်မှာ (၇) နှစ်အရွယ် မိန်းကလေးငယ်လေး Athena Strand ကို ပြန်ပေးဆွဲပြီး သ-တ်ပစ်ခဲ့တဲ့ FedEx ကားမောင်းသမား Tanner Horner ကို ယမန်နေ့ (မေလ ၅ ရက်) မှာ တရားရုံးက ဆေးထိုး ကွပ်မျက်ရမယ့်ေ/သ ဒဏ်အမိန့် ချမှတ်လိုက်ပါတယ်။
ဒီအမှုဟာ ၂၀၂၂ ခုနှစ် နိုဝင်ဘာလအတွင်း တက္ကဆက်ပြည်နယ် ပါရာဒိုက်စ်မြို့လေးမှာ ဖြစ်ပွားခဲ့ပြီး လူထုကြား ဒေါသထွက်စရာ အမှုတစ်ခုလည်း ဖြစ်ခဲ့ပါတယ်။
Athena ဟာ သူမအတွက် ခရစ္စမတ်လက်ဆောင် လာပို့တဲ့ FedEx ကားမောင်းသမားရဲ့ ပြန်ပေးဆွဲခံရပြီး ပျောက်ဆုံးသွားကာ (၂) ရက်အကြာမှာ သူမရဲ့ ရုပ်အလောင်းကို ပြန်တွေ့ခဲ့ရပါတယ်။
အသက် (၃၄) နှစ်အရွယ် Horner က ဖမ်းဆီးခံရပြီးနောက် သူဟာ Athena ကို ကားနဲ့ မတော်တဆ တိုက်မိသွားလို့ လူမသိအောင် ကားပေါ် တင်သွားခဲ့တာလို့ ကနဦး ထွက်ဆိုခဲ့ပါတယ်။
ဒါပေမဲ့ နောက်ပိုင်းမှာ ဒီကလေးမလေးက တစ်စုံတစ်ဦးကို ကားတိုက်ခံရတဲ့အကြောင်း ပြန်ပြောပြမှာ စိုးရိမ်တာကြောင့် လည်ပင်းညှစ်သတ်လိုက်တာလို့ ဝန်ခံခဲ့ပါတယ်။
ခရိုင်ရှေ့နေ James Stainton ကတော့ Athena လေးဟာ ပြန်ပေးဆွဲခံရပြီးနောက် ဒဏ်ရာရရှိထားပုံ မရဘဲ FedEx ကားပေါ်မှာ အကောင်းအတိုင်းရှိနေတဲ့ ဗီဒီယိုမှတ်တမ်းကို တရားရုံးမှာ သက်သေပြခဲ့ပါတယ်။
Horner က ကလေးမလေးကို "မအော်နဲ့၊ အော်ရင် မင်းကို နာအောင်လုပ်မယ်" လို့ ခြိမ်းခြောက်ခဲ့တယ်လို့လည်း သိရပါတယ်။
ယခု အမှုကို သီတင်း (၂) ပတ်ကြာ ကြားနာစစ်ဆေးပြီးနောက် ဂျူရီအဖွဲ့က Horner ကို ထောင်ဒဏ် တစ်သက်တစ်ကျွန်းအစား ဆေးထိုး ကွပ်မျက်ရမယ့် သေဒဏ်ပေးဖို့ ဆုံးဖြတ်ခဲ့ကြပါတယ်။
ဂျူရီအဖွဲ့ရဲ့ ဒီစီရင်ချက်အပေါ် Athena ရဲ့ မိခင် Maitlyn Gandy ကလည်း ထောက်ခံခဲ့ပါတယ်။
"သူ အသက်ရှူနေတဲ့ အချိန်တိုင်းဟာ ကျွန်မသမီးလေး ဆုံးရှုံးသွားတဲ့ အသက်ရှူသံတွေပဲ" လို့ Gandy က ကြေကွဲစွာ ပြောခဲ့ပါတယ်။
ရှေ့နေ Stainton က Horner ရဲ့ DNA တွေကို (၇) နှစ် သမီးလေးရဲ့ ကိုယ်ပေါ်မှာ တွေ့ခဲ့ရတယ်လို့ ပြောပါတယ်။
ကားနဲ့ တိုက်မိလို့ ကားပေါ်တင်သွားတယ်ဆိုတဲ့ Horner ရဲ့ ပြောကြားမှုဟာ လိမ်ညာထွက်ဆိုမှုသာ ဖြစ်ကြောင်း၊ Athena ဟာ Horner ကို အသည်းအသန် ပြန်လည် ခုခံခဲ့တာကြောင့် သူမရဲ့ လက်သည်းတွေထဲမှာ Horner ရဲ့ DNA ကို တွေ့ရှိခဲ့ရတာဖြစ်ကြောင်း ရှေ့နေ တရားရုံးမှာ သက်သေပြခဲ့ပါတယ်။
Horner ရဲ့ ရှေ့နေကတော့ သူ့အမှုသည်မှာ ရုပ်ပိုင်းဆိုင်ရာနဲ့ စိတ်ပိုင်းဆိုင်ရာ ဝေဒနာတွေ ရှိနေကြောင်း၊ သူ့မိခင်က ကိုယ်ဝန်ဆောင်စဉ်မှာ အရက်သောက်ခဲ့ပြီး Horner ကိုယ်တိုင်ကလည်း အော်တစ်ဇင် (autism) ဝေဒနာရှင် ဖြစ်တာကြောင့် ယခုလို ဖြစ်ရတာလို့ ခုခံလျှောက်လှဲခဲ့ပေမဲ့ တရားရုံးက လက်မခံခဲ့ပါဘူး။
#အမေရိကန်
MEDIA
