08/09/2026
फुकुओकामा नेपाली युवती लक्ष्मी राजवंशीको हत्या प्रकरणमा ठूलो अपडेट: ३ नेपाली पक्राउ
जापानको फुकुओका सहरमा गत अगस्टमा मृत अवस्थामा फेला परेकी २५ वर्षीया नेपाली युवती लक्ष्मी राजवंशी (ラジバンシ・ラクスミ) को हत्या प्रकरणमा फुकुओका प्रहरीले आज सेप्टेम्बर ८ मा तीन जना नेपाली नागरिकलाई हत्या आरोपमा पक्राउ गरेको छ।
पक्राउ पर्नेहरूमा फुकुओका सहरमा बस्ने २८ वर्षीया व्यावसायिक विद्यालयकी विद्यार्थी टामाङ सन्जु (タマン・サンズ), सागा प्रिफेक्चरको तोसु सहरमा बस्ने २५ वर्षीया टामाङ अस्मिता (タマン・アスミタ) र २२ वर्षीय विद्यार्थी लामा प्रवीण (ラマ・プラビン) रहेका छन्।
प्रहरीका अनुसार तीनै जनाले मिलेमतो गरेको आशंकामा अनुसन्धान भइरहेको छ।
घटना कसरी भएको थियो?
प्रहरीको अनुसन्धानअनुसार अगस्ट १८ को रातिदेखि १९ तारिख बिहान सबेरैसम्म फुकुओका सहरको चुओ-कु, कियोखावास्थित लक्ष्मीको आफ्नै कोठामा घटना भएको थियो।
प्रहरीले लक्ष्मीको टाउकोमा भाँडोले पटक-पटक प्रहार गरिएको, त्यसपछि डोरीले घाँटी कसिएको र अन्ततः उनको कोठाको बाल्कोनीबाट तल रहेको नदीतर्फ खसालिएको आशंका गरेको छ।
लक्ष्मीको मृत्युको कारण डुबेर मृत्यु (溺死) भएको पुष्टि भएको छ।
अगस्ट १९ को बिहान लक्ष्मीको शव उनको घरबाट करिब २ किलोमिटर तल फुकुओकाको नाका नदी (那珂川) मा फेला परेको थियो। उनको टाउकोमा धेरै चोट थिए भने हातमा आफूलाई बचाउने क्रममा लागेको हुनसक्ने घाउहरू पनि भेटिएका थिए। उनको कोठामा रगत र झगडा भएको जस्तो प्रमाण भेटिएपछि प्रहरीले हत्या भएको निष्कर्ष निकालेर अनुसन्धान अघि बढाएको थियो।
प्रहरीले ‘प्रेम सम्बन्धको विवाद’ हुनसक्ने आशंका गरेको छ
फुकुओका प्रहरीका अनुसार मुख्य आरोपी मानिएकी सन्जु हाल लक्ष्मीका प्रेमी भनिएका पुरुषसँग एउटै घरमा बसिरहेको अवस्था थियो।
प्रहरीले लक्ष्मी, उनका प्रेमी भनिएका पुरुष र सन्जुबीचको सम्बन्धलाई लिएर समस्या भएको हुनसक्ने र यही विषय घटनाको पृष्ठभूमिसँग जोडिएको हुनसक्ने अनुमान गरेको छ।
यसअघि सन् २०२६ जनवरीको अन्त्यतिर पनि लक्ष्मी, ती पुरुष र सन्जुबीच छलफल हुँदा विवाद भएको र त्यस क्रममा सन्जुले लक्ष्मीको कपाल तानेको घटना भएको प्रहरीले जनाएको छ।
तर प्रहरीले अहिलेसम्म हत्याको ठ्याक्कै कारण (motive) पुष्टि भइसकेको छैन भन्दै अनुसन्धान जारी रहेको स्पष्ट पारेको छ।
तीन जनाको भूमिका के थियो?
फुकुओका प्रहरीको आजको पत्रकार सम्मेलनमा दिइएको जानकारीअनुसार लक्ष्मीमाथि प्रत्यक्ष आक्रमण गर्ने र नदीमा खसाल्ने कार्य २८ वर्षीया सन्जुले एक्लैले गरेको हुनसक्ने प्रहरीको हालसम्मको अनुसन्धानले देखाएको छ।
अस्मिता र प्रवीणलाई भने उक्त अपराधमा मिलेमतो गरेको (共謀共同正犯) आशंकामा पक्राउ गरिएको हो।
प्रहरीका अनुसार सन्जु र अस्मिता नेपालदेखि नै एकअर्कालाई चिन्थे र जापानमा पहिले एउटै कार्यस्थलमा काम गरेको सम्बन्ध पनि थियो। सन्जु र प्रवीण पनि नेपालदेखि बाल्यकालबाटै परिचित रहेको बताइएको छ। अस्मिता र प्रवीण भने एकअर्कासँग प्रेम सम्बन्धमा रहेको उनीहरूले प्रहरीलाई बताएका छन्।
प्रहरीले पक्राउ परेका तीनै जनाले हत्या आरोप स्वीकार गरेका छन् वा अस्वीकार गरेका छन् भन्ने कुरा भने हाल सार्वजनिक गरेको छैन।
लक्ष्मी सन् २०२३ मा जापान आएकी थिइन् र फुकुओकामा अन्तर्राष्ट्रिय व्यवसायलगायत विषय अध्ययन गर्दै रेस्टुरेन्टमा पार्टटाइम काम गर्दै आएकी थिइन्।
करिब तीन सातादेखि रहस्यमय बनेको यो घटनामा तीन जना पक्राउ परेसँगै अनुसन्धानले ठूलो मोड लिएको छ। यद्यपि पक्राउ परेका व्यक्तिहरू अहिले संदिग्ध/आरोपी हुन्; अदालतबाट दोषी ठहर भइसकेका व्यक्ति होइनन्।
फुकुओका प्रहरीले घटनाको वास्तविक कारण, तीनै जनाको संलग्नता र हत्या हुनुअघिका परिस्थितिबारे थप अनुसन्धान गरिरहेको छ।
