18/03/2026
වසන්ත ඍතුව කියන්නෙ කෙතරම් සතුටුදායක ලස්සන ඍතුවක්ද?... ගහකොල මල්වලින් පිරුනු, ඉර එළිය කිසිම ලෝබ කමක් නැතුව මහ පොළොවට පතිත වෙන හරිම ලස්සන කාලයක්. මම මේ කාලය එනකම් බලන් ඉන්නෙ මගේ ගෙදර කුඩා ඉඩකඩේ පුලුවන් විදියට වගාකරන්න. තවම එළවළු පැල ඉන්දන්න තරම් උණුසුමක් පරිසරයේ නැති නිසා මම හිතුවා මුලින්ම මල් පැල ඉන්දන්න ඕන කියලා. ඒ නිසා අපි මුලින්ම ගියා මල් පැල ගන්න. කලින් මම ගාව රෝස මල් පැල සහ පෝච්චි තිබුනත් අපි අලුත් නිවහනකට ආව නිසා ඒ ඔක්කොම ජපන් ආච්චි කෙනෙක්ට දීලයි ආවෙ. දැන් මට තියෙනවා විශාල දිගු බැල්කනියක් වගේම තවත් කුඩා එක් බැල්කනියක්. එනිසා ඒකට ගැලපෙන විදියට මම මුලින්ම අවශ්ය කරන පෝච්චි මිලදී ගත්තා.
මුලින්ම අපි ගියේ ගෙදර ලගම තියෙන cainz වෙළඳසලට. ඇතුලුවෙනකොටම තිබුන රෝස සහ සුදු මිශ්ර බයිකලර් ටියුලිප් මල් පදුරු වලින් නම් අපෙ ඇස් අහකට ගන්න බැරිඋනා. විශ්වාසකරන්න..ඒ මල් ප්ලාස්ටික් මල් වගේ හරිම ලස්සනයි.. ඉතින් අපි පදුරු තුනක්ම මිලදී ගත්තා..දෙවනුව අපි ගියේ අපේ ප්රියතම මල් කඩේට. මම ජපානයට ආදා ඉදන් අපි මල් ගන්නෙ මෙතනින්. අපි එතනින් රෝස වර්ග තුනක්, ඩේසි, ඩැෆඩිල්, ඇෆ්රිකන් ඩේසි වගේම නම නොදන්න රෝස පැහැති කුඩා මල් පදුරුදෙකක් වගේම ස්ට්රෝබෙරි පැළයකුත් ගත්තා. එක රෝස පදුරක් වැල් රෝස වර්ගයක්.
ගෙදර ආවගමන් මම ලෑස්ති උනා මේවා හිටවන්න. අදුරුවැටෙන්න ඔන්නමෙන්න තියෙද්දි මට පුලුවන් උනා ඔක්කොම මල් පැළ ටික ඉන්දන්න. ඉතින් එදා දවස මට සතුටින් පිරුන දවසක්..තමන් ආස ජීවිතේ ආස විදියට ගත කරන්න හැම ගෑණු ළමයෙක්ටම පුලුවන්කම ලැබෙන්න ඕන..ජීවිතේ සතුට ලැබෙන්නෙ එතකොට.. 🎀
