14/05/2026
जापानको हिरोशिमा प्रान्तस्थित कुरे सहरको जहाज भत्काउने क्षेत्रमा आगलागी भएपछि स्थानीय बासिन्दाहरूलाई सुरक्षित स्थानमा जान आदेश जारी गरिएको छ। जापानी सञ्चारमाध्यमहरूका अनुसार बुधबार दिउँसो करिब १२:५० बजे “ठूलो मात्रामा कालो धुवाँ उठिरहेको” भन्दै प्रहरी र दमकल विभागमा धेरै सूचना पुगेका थिए।
प्रहरीका अनुसार घटनास्थलमा परित्यक्त जहाज र विभिन्न फोहोर पदार्थमा आगो लागेको छ। दमकलकर्मीहरूले आगो नियन्त्रणमा लिन प्रयास जारी राखेका छन्।
आगलागीबाट निस्किएको बाक्लो धुवाँ आसपास फैलिन थालेपछि कुरे सहर प्रशासनले सुरक्षाका लागि वरपरका ३५६ घरपरिवारका करिब ६५० जनालाई स्थान खाली गर्न निर्देशन दिएको छ।
हालसम्म मानवीय क्षतिको विवरण सार्वजनिक गरिएको छैन। आगलागीको कारणबारे अनुसन्धान भइरहेको प्रहरीले जनाएको छ।
