03/09/2026
Viongozi wa biashara nchini Kenya wanaendelea kuwa na matumaini kuhusu ukuaji wa biashara na uchumi katika kipindi cha miezi 12 ijayo, kulingana na utafiti wa hivi karibuni wa Wakurugenzi Wakuu (CEO Survey) uliofanywa na Benki Kuu ya Kenya (CBK).
Biashara nyingi ziliripoti kuwa katika robo ya pili ya mwaka kulikuwa na ongezeko la mahitaji ya bidhaa na huduma, uzalishaji pamoja na mauzo ikilinganishwa na robo ya kwanza. Pia, kampuni nyingi zinatarajia shughuli za biashara kuendelea kuimarika au kubaki tulivu katika robo ya tatu ya mwaka.
Utafiti huo pia unaonyesha hali ya upatikanaji wa mikopo imeanza kuboreka. Takribani asilimia 58 ya Wakurugenzi Wakuu walisema kupata mikopo ni rahisi kwa kiwango cha wastani, huku asilimia 15.7 wakisema ni rahisi kabisa. Aidha, asilimia 46 ya kampuni zilisema riba za mikopo ya benki zimepungua tangu Agosti 2024.
Kwa upande wa teknolojia, asilimia 71 ya kampuni zimeanza kutumia teknolojia, mifumo ya kiotomatiki (automation) na huduma za kidijitali ili kuongeza ufanisi, kuboresha huduma kwa wateja na kupunguza gharama za uendeshaji.
Hata hivyo, wafanyabiashara bado wanakabiliwa na changamoto kadhaa. Wakurugenzi Wakuu wanaiomba serikali kupunguza gharama za uendeshaji wa biashara, kufanya mikopo iwe nafuu zaidi, kuweka sera za kodi na kanuni zinazotabirika, pamoja na kulipa kwa wakati madeni ambayo serikali inadaiwa na wafanyabiashara.
