25/04/2025
, Ciidankii dhawaan ay keentay dowladda Turkey magaaladda Muqdisho ayaa iskugu jira laba qaybood sida ay ku warantay majalada caanka ah ee Meddle East Eye ee ka soo baxda dalka Turkey kuwaas oo kala ah 300 askari oo ka tirsan ciidamada gaarka ah ee Turkiga (commandos) iyo 200 oo isku jira macalimiin bixiya tababaro iyo Injireero ciidanka Soomaaliya ka caawinaya adeegsiga diyaaradaha aan duuliyaha lahayn ee Droneska.
Sababta ciidanka loo geeyay ayay saraakiisha Turkey ku sheegeen in ay ilaaliyaan xarumaha Turkiga iyo inay tababar siiyaan ciidamada Soomaaliya.
Inkastoo diyaaradaha TB2 Bayraktar ay h**ey u shaqeynayeen gudaha Soomaaliya, Ankara ayaa dhawaan u soo wareejisay dalka laba diyaaradood oo nooca Akinci ah.
Diyaaradaha Akinci oo awood u leh inay ku duulaan joog sare in ay howlgal ka soo fuliyaan goobaha fog fog, ayaa la rumeysan yahay inay si gaar ah ugu habboon yihiin la dagaalanka AS, maadaama ay leeyihiin aragti habeenkii ah oo horumarsan iyo awood ay hawada ku sii jiri karaan 24 saac.
Saraakiisha Amaanka Turkey ayaa wargaysa u sheegay in Turkigu uusan hadda qorsheynin in si toos ah uga barbar dagaalamo ciidanka Soomaaliya, maadaama taasi ay u baahan tahay oggolaansho rasmi ah oo ka timaada baarlamaanka Turkiga.
“Ciidamada Turkiga waxay halkaas u joogaan oo keliya ilaalinta danaha Turkey iyo inay tababar iyo talo siiyaan ciidamada Soomaaliya. Waxay dagaal la gali doonaan AS oo keliya haddii ay xaalad degdeg ah oo is-difaac ah ku qasbeyso,” ayuu yiri sarkaal Turkey ah.
“Mareykanku mararka qaar wuxuu naga codsadaa inaan ka qeyb qaadanno weerarada bartilmaameedka ah,” ayuu yiri sarkaalka, isagoo iska fogeeyay wararka sheegaya in khilaaf ka dhex jiro Ankara iyo Washington oo la xiriira howlgalkooda Soomaaliya.
Inkastoo warar sheegayaan in Turkigu uu Soomaaliya ku wareejiyay diyaaradaha weerarka ee T-129, ilo xog ogaal ah ayaa sheegay in duuliyeyaashii Soomaaliyeed ay weli tababar ku qaataan gudaha Turkiga, taasoo beenineysa in diyaaradahaasi lagu wareejiyay ciidanka Soomaaliya.
Si kastaba ha ahaatee, warbixinti waxa ay intaas ku dartay in tababarkoodu la filayo inuu dhamaado laba bilood ee soo socota, taasoo fursad u siineysa ciidamada Soomaaliya inay helaan diyaarado ay si toos ah u wadaan dhammaadka sanadkan.
Dowladda Turkey ayaa sheegtay in Ankara ay qorsheyneyso inay sii waddo dhisida ciidamada Soomaaliyeed ee lagu tababaro magaalooyinka Isparta iyo Izmir ee Turkiga.
Todobaadkan, diyaarad Qadari ah ayaa Muqdisho keentay rasaas dheeraad ah oo loogu talagalay ciidanka Soomaaliyeed.
“Turkigu wuxuu la filayaa inuu keeno diyaarado dheeraad ah oo drone ah, isla markaana uu bixiyo taageero madaafiic ah haddii loo baahdo,” ayay sheegeen saraakiisha Turkey ee Muqdisho ku sugan.
Isha aan warka ka xiganayno:
Ankara sends drones, ammunition, commandos but still avoids directly engaging the armed Somali group on the ground
