02/08/2026
UMUNSI W'AMAKOMINE: Komine Kirundo yahimbarije uwo munsi mukuru muri Zone
Ku wa Gatandatu, igenekerezo rya 1 Myandagaro 2026, Komine Kirundo yarifadikanije n'izindi komine zo mu Burundi mu guhimbaza Umunsi Mukuru wahariwe Amakomine. Wari umwanya wo guhuriza hamwe imvukira za komine kugira ziganire ku migambi n'iterambere rya komine yazo.
Ibirori vyabereye muri Zone Vumbi ku mutumba wa vumbi nyene. Mu majambo yo kwakira abash*tsi, yashimiye abash*tsi bitavye uwo munsi mukuru, avuga ko Zone Vumbi irangwa n'amahoro, umutekano n'umwete mu bikorwa vy'iterambere.
Mu ijambo ryiwe, Musitanteri wa Komine NDIKURIYO, yashimiye cane imvukira za Komine Kirundo ku kuntu bitavye ari benshi. Yashimye kandi ko abenegihugu bitabira kandi bagashigikira imigambi y'iterambere ya komine.
Yaciye ashikiriza bimwe mu bikorwa biriko birarangurwa. Mu gisata c'amagara y'abantu, yavuze ko amavuriro matomato ariko arubakwa, amwe akaba yaraheze hasigaye gusa kuyugurura, anibutsa ko isuku n'isukura bikwiye kubandanya gushirwa imbere nkuko ico gikorwa kimaze iminsi caratangujwe.
Mu gisata c'indero, yavuze ko intebe z'amashure ziriko zirakorwa ku bwinshi kugira abana ntibazobure aho bicara mu kwiga. Mu gisata c'intwaro, yamenyesheje ko inzego zose zo ku rwego rwa Zone zamaze gukwizwa, harimwo abatware ba zone, abahanuzi babo, abajejwe ubutungane, umutekano n'izindi nzego agasaba abenegihugu kutajuragirika baja kure kandi barabegereje intwaro.
Ku bijanye n'iterambere ry'ingenzi, Musitanteri yavuze ko ivyigwa vyo kwubaka ibibanza bibiri vy'iratiro ku nkengera z'ikiyaga c'Inyoni (lac aux oiseaux) vyarangiye, kandi ko amafaranga ashika kuri umuriyaridi w'amafaranga y'Amarundi Reta yamaze kuyashikiriza komine mu gushigikira uwo mugambi ariko ariko mu vyigwa bakoze basanze bizotwara imiriyaridi 2 ariko agashikirizako ibikorwa bigire bitangure vuba.
Yongeye amenyesha ko umusozi wa Shinge, uzwi cane mu mateka y'Uburundi, uriko urategurirwa kwubakwako ikibanza kijanye n'ingenzi, kizoba kidondora abami n'intwari z'Uburundi, kirimwo kandi inzu z'amanama, ahantu h'imyidagaduro n'ibindi bikorwa bizofasha guteza imbere komine. Yongeye aragaruka cane kw’iyubakwa ry’ikibuga ca kijambere aho yashikirije ko komine yiteguye ko buca itangura kucubuka ngo na kare ko umushikiranganji muvyo bajejwe harimwo inkino bwemereye komine umusezero wa kijambere, yasozereye asaba abenegihugu kuadakora amasaha hubwo bakore ibikorwa kugira komine iterambere.
Musitanteri yasavye abenegihugu bose gukomeza gushigikira iyo migambi, asaba n'indongozi kuba aba mbere mu gutanga akarorero, umwe wese agafasha uko ubushobozi bwiwe bungana.
Umukuru w'Inama Mpanuzajambo ya Komine Kirundo, , yashimye intambwe komine iriko iratera n'ukuntu ishira ahabona imigambi yayo. Yagarutse ku kamaro ko gukorera hamwe, asaba ko ata n'umwe yobaho nka nyamwigendako, ahubwo bose bakunga ubumwe kugira Komine Kirundo irusheho gutera imbere. Ivyo yabishikirije abicishije mu bisokozo n'imigani ya kera.
Ibirori vyasozerewe no gusangira infungurwa za kera z'ikirundi hamwe n'ibinyobwa vya Kirundi vya kera, Ivyo vyose bikaba vyaranzwe n'umunezero werekana ubumwe, ubuvukanyi no gukunda igihugu.
