07/01/2026
Dowladda Mareykanka ayaa ku hanjabtay inay qaadi karto talaabo milatari si ay u qabsato Greenland,
Madaxweyne Trump iyo maamulkiisu ayaa kawada hadley fursadaha lagu heli karo Greenland, waxayna isla eegeen dhowr ikhtiyaar oo ay ku jirto talaabo milatari sida lagu sheegay bayaan kasoo baxay Aqalka Cad, kaas oo lagu yidhi "Isticmaalka milatariga Mareykanka mar walba waa ikhtiyaar uu heli karo Taliyaha guud." waana xili uu Trump sheegay in Greenland ay mudnaan istaraatiiji ah u leedahay ammniga qaranka Mareykanka.
Hanjabaada Mareykanka ayaa timid saacado kadib markii ay hogaamiyeyaasha Yurub soo saareen bayaan wadajira oo ay ku taageerayaan Wadanka Denmark ee iska leh Greenland.
Hogaamiyeyaasha Dalalka Faransiiska, Jarmalka, Ingiriiska, Talyaaniga, Poland, iyo Spain ayaa bayaankooda wadajirka ah ku yidhi "Greenland waxaa iska leh dadkeeda, sidaas darteed Denmark iyo Greenland ayaa go'aan ka gaadhi kara arrimaha khuseeya xidhiidhkooda."
Hogaamiyeyaasha Yurub waxay dhanka kale ku baaqeen in la ilaaliyo madax banaanida, jiritaanka dhuleed iyo xuduudaha lama taabtaanka ah ee dalalka sida ay qeexayaan mabaa'diida aasaasiga ah ee axdiga Qaramada Midoobay.
Ra'iisul Wasaaraha Denmark, Mette Frederiksen ayaa iyaduna ka digtay in weerar kasta oo Mareykanku ku qaado Greenland ay horseedi doono dhammaadka gaashaaanbuurta milatari ee NATO.
Xiisada Greenland ayaa dib u soo laabatay ka dib markii uu Mareykanka faragelin ciidan ku sameeyay Dalka Venezuela, Isla markaana ay ciidamada sida gaarka ah u tababaran ee Delta soo qabteen Madaxweynihii dalkaasi Nicolas Maduro oo Mareykanku u haysto dacwad ku saabsan daroogo iyo hub.
Maalin ka dib weerarkaasi, mid kamid ah xaaska Kaaliyeyaasha sare ee Trump oo lagu magacaabo Katie Miller ayaa baraha bulshada soo dhigtay khariirada Greenland oo midabkeeda laga dhigay calanka Mareykanka, iyada oo kusoo dul qortay erayga "Soon" Intaasi kadib ninkeeda Stephen Miller ayaaba si cad u sheegay in mawqifka rasmi ah ee dowlada Mareykanku uu yahay in Greenland ay qayb ka noqoto dhulka Mareykanka.
