ПолитКлиника

04/11/2025

‼️Токмокто ооруканада дарыгерге кол көтөргөн жаран кармалды

Токмокто 2-ноябрга караган түнү медициналык кароого алынып келинген айдоочу аймактык оорукананын тез жардам бөлүмүндө ызы-чуу салып, дарыгерге кол көтөргөн.

Жол кайгуул кызматкерлери алкоголдук жана баңгизатын текшерүү үчүн жаранды медициналык мекемеге алып барышкан.
Процедуранын жүрүшүндө айдоочу өтө агрессивдүү болуп, адепсиз сөздөрдү айтып, дарыгерлердин бирине кол көтөргөн. Андан соң тез жардам бөлмөсүнүн терезесин талкалап салган.

Социалдык түйүндөрдө жарыяланган видеодо ал киши «жогорку даражалуу байланыштарым бар» деп айтып, коркутканын көрүүгө болот.

Чүй облустук милициясы айдоочу кармалганын 4-ноябрда кабарлады. Ал 1993-жылы туулган Ж.А. аттуу жаран. «Токмок- Кошой» автожолунда Toyota Ipsum үлгүсүндөгү унааны мас абалында айдап жүргөнү аныкталган.

Текшерүү учурунда денесинен жаракат алган дарыгер К.А. арыз жазуудан баш тарткан.

Учурда бул факты боюнча текшерүү иштери улантылып, анын жыйынтыгына ылайык мыйзам чегинде чечим кабыл алынат.

Мындан тышкары, бул окуяга жол берген Чүй ОИИББ боюнча ЖКККБнын кызматкерлерине карата кызматтык иликтөө дайындалды.

04/11/2025

‼️Коңшусун атуу менен коркуткан жаран кармалды

Ички иштер министрлиги Бишкектин “Жумушчулар шаарчасы” конушунда болгон окуянын чоо-жайы боюнча маалымат берди.

30-октябрь күнү саат 14:50 чамасында милицияга жашоочулардын бири аны коңшусу мас абалында атып салам деп коркутканын айткан. Ал көчөдө эки жолу ок чыгарган.

Окуя болгон жерге Ленин райондук ички иштер бөлүмүнүн ыкчам-тергөө тобу барган.

Бул факты Кылмыш-жаза кодексинин 280-беренеси («Бейбаштык») менен катталган.

Милиция кызматкерлери тарабынан кылмышка шектүү катары 1974-жылы туулган Д.Н., кармалып, убактылуу кармоочу жайга киргизилди.

Ошондой эле кармалган жарандан белгисиз маркадагы аңчылык мылтыгы, пневматикалык мылтык жана 2 иштен чыккан гильза алынган.

04/11/2025

5-ноябрда түнкүсүн жана күндүз көпчүлүк аймакта жаан, кар жаайт.

Батыштан келген шамалдын ылдамдыгы секундасына 4-9 метрден, айрым жерлерде 15-20 метрге, Ысык-Көлдүн батыш тарабында 19-24 метрге жетет.

АБАНЫН ТЕМПЕРАТУРАСЫ:

Чүйдө түнкүсүн 0…+5, күндүз -1…+4;

Таласта түнкүсүн -1…-6, күндүз -2…+3;

Баткен, Ош, Жалал-Абадда түнкүсүн 0…+5, күндүз +1…+6;

Ысык-Көлдө түнкүсүн -4…+1, күндүз 0…+5;

Нарында түнкүсүн -5…-10, күндүз -1…+4;

Бишкекте жаан, кар жаайт. Түнкүсүн -1…-3, күндүз -1…+1.

04/11/2025

‼️КЫШКЫ ДӨҢГӨЛӨК БОЛБОСО, ТӨӨ-АШУУДАН ӨТӨ АЛБАЙСЫЗ

4–5-ноябрь күндөрү өлкө аймагында жаан, кар жаайт. Андыктан жайкы дөңгөлөктүү унаалар “Сосновка” жана “Арал” постторунан өткөрүлбөйт.

* унааңыздын дөңгөлөгүн кышкыга алмаштырыңыз;
* алыскы жолго чыксаңыз дары-дармек, суу, тамак-аш, күрөк жана дөңгөлөк чынжырчасын салып алыңыз;
* унаалардын ортосундагы аралыкты (500 метрге чейин) сактаңыз;
* зарылчылык болбосо, алыскы жолго чыкпай туруңуз;
* кырсык болгондо күнү-түнү иштөөчү 112 номерине чалыңыз (чалуу акысыз).

04/11/2025

Ош шаарына караштуу Учар айылындагы Сатиев көчөсүнүн ачылышында жергиликтүү жашоочулардын бири калаа мэри Жеңишбек Токторбаевге ыраазычылык катары өзү жазган ырын окуп берди.

04/11/2025

Президент Садыр Жапаров "Кыргызстан улуттук электр тармагы" ишканасынын калкты "Чексиз тарифке" өтүү чакырыгына байланыштуу энергетика министри Таалайбек Ибраевди сындады.

Бул тууралуу президенттин маалымат катчысы Аскат Алагөзов билдирди.

Мамлекет башчы электр энергиясы тартыш болуп турганда мындай демилгелерге жол берилбеши керектигин айткан.

Президент бул коомдо социалдык бөлүнүүгө алып келиши мүмкүн деп эсептейт.

Жапаров "чексиз тарифин" тез арада токтотууну жана кыш мезгилинде жарандарга электр энергиясын калыс жеткидей чараларды көрүүнү тапшырды.

3-ноябрда "Кыргызстан улуттук электр тармагы" ишканасынын өкүлү Исабек Орозбаев каалаган жарандар үчүн “чексиз тариф” киргизилерин билдирген.

Бул тариф менен электр энергиясынын баасы 1 кВт/саат үчүн 3,81 сом болорун айткан.

04/11/2025

‼️"Көздүн микрохирургиясы" госпиталынын директору Алмазбек Исманкулов кармалды

Кылмыш иши чет өлкөлүк техникалык кредиттердин алкагында Кыргызстанга жеткирилген медициналык жабдууларды мыйзамсыз алуу жана ыйгарып алуу менен байланышкан коррупциялык схемалар боюнча козголгон.

Бул тууралуу ИИМдин басма сөз кызматы билдирди.

Учурда "Көздүн микрохирургиясы" госпиталынын директору Алмазбек Исманкуловго жана Жусуп Баласагын атындагы Кыргыз улуттук университетинин, Саламаттык сактоо министрлигинин, Билим берүү министрлигинин бир катар кызмат адамдарына карата кылмыш иши иликтенип жатат.

1997-жылы Жусуп Баласагын атындагы Кыргыз мамлекеттик улуттук университети тарабынан медициналык билим берүүнү өнүктүрүү максатында “КМУУнун медициналык борбору “ИнтерГоспиталь” ЖЧКсы түзүлүп, анын директору болуп Алмазбек Исманкулов дайындалган.

1998-жылы “Медисон Ко. ЛТД” кореялык компаниясы менен КМУУнун проректору Исманкуловдун ортосунда Кыргызстанга медициналык жабдууларды жеткирүү боюнча келишим түзүлгөн.

Кийинчерээк, коррупциялык схема боюнча “ИнтерГоспиталдын” негиздөөчүлөрүнүн жасалма жыйыны аркылуу университеттин мамлекеттик үлүшү жеке менчикке чыгарылган.

1999–2000-жылдары өлкөгө жалпы суммасы 9 миллион АКШ долларынан ашык акча каражатына медициналык жабдуулар келген. Бирок Исманкулов тарабынан иштелип чыккан схема боюнча КМУУнун, Саламаттык сактоо министрлигинин, Билим берүү министрлигинин жана башка ведомстволордун айрым кызмат адамдарынын көмөгү менен жабдуулар мыйзамсыз түрдө бөлүштүрүлүп, Исманкуловго таандык жеке менчик медициналык клиникаларга өткөрүлүп берилген.

Мында аталган жабдууларды сатып алууга алынган кредит азыркыга чейин төлөнө элек жана аны төлөө боюнча милдеттенмелер, соттун чечиминин негизинде мамлекетке жүктөлгөн. 2025-жылга карата карыздын суммасы 31 миллион АКШ долларын түзөт.

ИИМдин Кылмыш иликтөө башкы башкармалыгы тарабынан жүргүзүлгөн ыкчам-издөө иш-чараларынын жүрүшүндө Исманкулов кылмыш-жаза кодексинин 336-беренесинде (коррупция) каралган кылмышты жасоого шектелип кармалган.

Бишкек шаарынын Биринчи май райондук сотунун токтому менен Исманкуловго карата камакка алуу түрүндөгү бөгөт коюу чарасы тандалды.

Учурда бул фактыга тиешеси бар бардык адамдарды аныктоого багытталган кошумча ыкчам-тергөө иш-чаралары жүргүзүлүүдө.

Медициналык жабдууларга берилген корей насыясынын айланасындагы талаш Кыргызстанды миллиондогон доллар карызга гана батырбай, андан башка дагы кесепетин тийгизгендигин «ПолитКлиника» медиасы иликтөөсүндө аныктап чыккан. Видеонун шилтемеси комментарийде. 👇

03/11/2025

Бишкек шаарынын мэриясы шаарды 2050-жылга чейин өнүктүрүүнүн “Башкы планын” жарыялады. Бул документте шаардын келечектеги өнүгүү стратегиясы, инфраструктурасы, социалдык жана экономикалык маселелерди чечүү жолдору көрсөтүлгөн.

“ПолитКлиника” медиасы бул документти талдап чыкты. Толугу менен ютуб каналыбыздан көрүңүз. Шилтеме төмөндө 👇

Бишкек шаарынын мэриясы шаарды 2050-жылга чейин өнүктүрүүнүн “Башкы планын” жарыялады. Бул документте шаардын келечектеги өнүгүү стратегиясы, инфраструктурас...

03/11/2025

4-ноябрга караган түнү Чүй, Талас, Ош, Жалал-Абад, Баткен облустарынын көпчүлүк аймактарында жаан, тоолуу райондордо кар жаайт.
Ысык-Көл, Нарын облустарында жаан-чачын күтүлбөйт.

Күндүз көпчүлүк аймактарда жаан жаап, карга айланат. Чүй, Талас, Ош, Жалал-Абад облустарынын кээ бир райондорунда жаан катуу жаайт.

Батыштан келген шамалдын ылдамдыгы секундасына 4-9 метр, айрым жерлерде 15-20 метрге чейин жетет.

АБАНЫН ТЕМПЕРАТУРАСЫ:

Чүйдө түнкүсүн -1…+4, күндүз +3…+8;

Таласта түнкүсүн -3…+2, күндүз +1…+6;

Баткен, Ош, Жалал-Абадда түнкүсүн +1…+6, күндүз +2…+7;

Ысык-Көлдө түнкүсүн -1…+4, күндүз +6…+11;

Нарында түнкүсүн -2…-7, күндүз +3…+8;

Бишкекте түнкүсүн жаан жаайт, күндүз жаан карга айланат. Түнкүсүн +1…+3, күндүз +3…+5.

03/11/2025

📌Кыргызстан жаңы үлгүдөгү паспортторду чыгарды

"Учкун" ишканасы билдиргендей, анда 30дан ашык коргоочу элементтери бар.

Инновациялык голограммалар жана кинеграммалар, УФ-басма жана криптографиялык чип, жеке маалыматтарды лазердик гравюра менен чегүү,
маалымат бетинде эки тунук терезе, анын ичинде кыргыз оюму түрүндөгү терезе, уникалдуу визуалдык-өзгөрмөлүү сүрөттөр бар.

Ар бир виза барагы Кыргызстандын бардык аймактарынын объекттерин жана жерлерин, ошондой эле тарыхый-маданий символдорду, Манастын образын, "Ынтымак Ордо" резиденциясын, Хан-Теңири чокусун жана башкаларды чагылдырат.

Булардын бардыгы коргоо элементтери болуп саналат.

Паспорттун тышкы мукабасы да жаңыланган: анын борбордук жеринде Кыргызстандын мамлекеттик герби жайгашкан.

03/11/2025

‼️Эртең менен жана кечинде электр энергиясына чектөө киргизилет

Кыргызстандын улуттук электр тармагы эртең менен жана кечкисин электр энергиясына убактылуу чектөө киргизет.

Бул убактарда электр энергиясын колдонуу көбөйүүсүнө байланыштуу көрүлүп жаткан чара экени айтылды.

Авариялык өчүрүүлөр болуп кетпеши үчүн "акылдуу эсептегичтерде" эртең мененки жана кечки убактарда 5 кВт кубаттуулук 3 кВтка чейин түшүрүлүп, чектөө киргизилди.

“3 кВт кубаттуулук үйгө жарык берүүчү лампаларга, телевизор, компьютер жана электр чайнигин иштетүүгө толук жетет. Бул — жалпы энергосистеманын туруктуу иштешин камсыздоо жана ар бир үйгө жарык үзгүлтүксүз жетиши үчүн көрүлүп жаткан чара”, - деп жазылган маалыматта.

Учурдагы тарифтерге ылайык, чексиз тариф менен 1 киловатт сааттын баасы 3,81 сом.
700 киловатт-саатка чейин колдонгондо 1,37 сом болот.
700 киловатт-сааттан ашык керектөө үчүн — 2,6 сом.