12/07/2025
ឯកឧត្ដម ហ៊ុយ វណ្ណៈ ៖ ខ្ញុំសូមចូលរួមអបអរសាទរចំពោះ ការចុះបញ្ជីបូជនីយដ្ឋានចងចាំនៃកម្ពុជា ក្នុងបញ្ជីបេតិកភណ្ឌពិភពលោករបស់អង្គការយូណេស្កូ នៅទីក្រុងប៉ារីស ប្រទេសបារាំង ក្នុងនោះរួមមាន៖ សារមន្ទីរឧក្រិដ្ឋកម្មប្រល័យពូជសាសន៍ទួលស្លែង, អតីតមន្ទីរឃុំឃាំង១៣, និងមជ្ឈមណ្ឌលឧក្រិដ្ឋកម្មប្រល័យពូជសាសន៍ជើងឯក។
ខ្ញុំក៏សូមចូលរួមកោតសរសើរនិងថ្លែងអំណរគុណ លោកជំទាវ ភឿង សកុណា រដ្ឋមន្ត្រីក្រសួងវប្បធម៌ក្នុងនាមជាសេនាធិការរាជរដ្ឋាភិបាល ដែលបានខិតខំរហូតសម្រេចជោគជ័យជាប្រវត្តិសាស្ត្រក្នុងចុះបញ្ជីបូជនីដ្ឋានខាងលើ ដើម្បីការចងចាំយូរអង្វែងរបស់មនុស្សជាតិ។
ខ្ញុំក្នុងនាមជាអ្នកដែលធ្លាប់ឆ្លងកាត់របបខ្មែរក្រហម ហើយក៏ជាអ្នកស្រាវជ្រាវលម្អិត និងបានសរសេរសៀវភៅអំពីបញ្ហាខ្មែរក្រហម សូមទាញការចាប់អារម្មណ៍បន្តិច។ មន្ទីរឃុំឃាំង១៣ ឬហៅថាគុកអមលាំង គឺស្ថិតក្នុងខេត្តកំពង់ស្ពឺ។ ខ្មែរក្រហម សម្លាប់មនុស្សតាំងពីឆ្នាំ១៩៧៣ មកម្ល៉េះ។
នៅពេលនិយាយពី អំពើប្រល័យពូជសាសន៍ខ្មែរក្រហម - ប៉ុល ពត ពិតណាស់ អ្វីដែលយើងឃើញនឹងមុខ ហើយចាប់អារម្មណ៍មុនគេគឺ សោនាដកម្មនៃអំពើឃោឃៅព្រៃផ្សៃយង់ឃ្នង។ នៅទីនេះ ខ្ញុំសូមឱ្យយើងដាក់សំណួរជាប្រចាំថា អ្វីជាមូលហេតុដែលនាំឱ្យកើតមានអំពើប្រល័យពូជសាសន៍? ហេតុអ្វីបានជាប្រជាជាតិមួយ ដែលមានការរីកចម្រើនខ្លាំងផ្នែកអារ្យធម៌ និងជាធ្លាប់ប្រទេសរីកចម្រើនខ្ពស់គួរសមនៅលើកំពូលតារាងក្នុងតំបន់ បែរជាក្លាយទៅជាទីដែលកើតមានអំពើឃោឃៅគ្មានភាពខ្មាសអៀនលើប្រជាជនឯង? តើនៅពេលនោះ មានបរិយាកាសយ៉ាងណា ទើបធ្វើឱ្យអ្នកចេះដឹងលែងធ្វើអ្វីកើតសម្រាប់ខ្លួនឯងនិងសង្គមជាតិខ្លួន ហើយបែរជាបណ្តោយឱ្យសង្គមមួយត្រូវស្ថិតក្រោមសម្ពាធនិងបរិយាកាសនៃអំពើយង់ឃ្នងរបស់ពួកឈាមរាវ និងពួកព្រៃ? ឫសគល់ចម្បងដែលនាំឱ្យមានអំពើព្រៃផ្សៃក្នុងសម័យ ប៉ុល ពត គឺ គំនុំ, ទំនាស់វណ្ណៈភាពសង្គមជ្រាលជ្រៅរវាង អ្នកថ្មី អ្នកចាស់, និងប្រព័ន្ធដឹកនាំរដ្ឋទន់ខ្សោយ។ ចំណុចឆ្លុះបញ្ចាំងនៅមានច្រើនទៀត ហើយនេះជាអ្វីដែលជាការរៀនសូត្រពីប្រវត្តិសាស្ត្រមនុស្សជាតិក្នុងដំណាក់កាលមួយ ដើម្បីកុំឱ្យវាជាន់ដាន និងកុំឱ្យវាកើតឡើងសារជាថ្មី។
#សសសក
#ហ៊ុយវណ្ណៈ #គណៈនាយក
