13/07/2025
ឧបនាយករដ្ឋមន្ត្រី សាយ សំអាល់ ជំរុញដល់សហគមន៍នេសាទទាំងអស់ត្រូវស្វែងយល់ពីតម្រូវការភ្ញៀវទេសចរដើម្បីរៀបចំអភិវឌ្ឍន៍សហគមន៍ឱ្យកាន់តែមានភាពទាក់ទាញ
ដើម្បីបង្កើនការទាក់ទាញភ្ញៀវទេសចរឱ្យមកលេងកម្សាន្តច្រើននៅសហគមន៍នេសាទនីមួយៗ ឧបនាយករដ្ឋមន្ត្រី សាយ សំអាល់ បានធ្វើការជំរុញដល់ប្រធានសហគមន៍នេសាទទាំងអស់ត្រូវស្វែងយល់អំពីតម្រូវការរបស់ភ្ញៀវទេសចរឱ្យបានច្បាស់ ក្នុងន័យដើម្បីរៀបចំអភិវឌ្ឍន៍តំបន់សហគមន៍របស់ខ្លួនឱ្យកាន់តែមានភាពទាក់ទាញ និងធ្វើឱ្យភ្ញៀវមកលេងហើយចង់មកលេងម្តងទៀត។
ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានជំរុញ និងលើកទឹកចិត្តដល់ខេត្តជាប់តំបន់ឆ្នេរទាំងអស់ ដែលមានសហគមន៍នេសាទត្រូវស្វែងយល់អំពីតម្រូវការចាំបាច់របស់ភ្ញៀវទេសចរដែលបានមកលេងកម្សាន្តក្នុងសហគមន៍នេសាទទាំងអស់ ថាតើពួកគាត់ចង់បានអ្វី សហគមន៍នៅខ្វះខាតអ្វី ដើម្បីធ្វើការរៀបចំ និងអភិវឌ្ឍន៍ហេដ្ឋារចនាសម្ព័ន្ធឱ្យបានស្អាតតាមតម្រូវការទេសចរ ដើម្បីបង្កើនការទាក់ទាញភ្ញៀវ។ ការជំរុញ និងលើកទឹកចិត្តនេះ ក្នុងឱកាស់ដែល ឯកឧត្តមឧបនាយករដ្ឋមន្ត្រី ដឹកនាំកិច្ចប្រជុំពិភាក្សាស្តីពីលទ្ធផលនៃការកសាងហេដ្ឋារចនាសម្ព័ន្ធគាំទ្រសេវាទេសចរណ៍ និងនេសាទលើជីវភាពរស់នៅរបស់សហគមន៍ត្រពាំងសង្កែ នៅសហគមន៍នេសាទត្រពាំងសង្កែ ស្រុកទឹកឈូ ខេត្តកំពត កាលពីព្រឹកថ្ងៃទី១៣ ខែកក្កដា ឆ្នាំ២០២៥ ដែលក្នុងកិច្ចប្រជុំនេះក៏មានការអញ្ជើញចូលរួមពីសំណាក់ ឯកឧត្តម ហួត ហាក់ រដ្ឋមន្រីក្រសួងទេសចរណ៍ ឯកឧត្តម ឆាយ ឬទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ និងឯកឧត្តម ម៉ៅ ធនិន អភិបាលខេត្តកំពត។
ក្នុងឱកាសនោះដែរ ឯកឧត្តមឧបនាយករដ្ឋមន្ត្រី សាយ សំអាល់ បានលើកឡើងថា កិច្ចប្រជុំពិភាក្សានេះធ្វើឡើងមានគោលបំណងត្រួតពិនិត្យលើវឌ្ឍនភាព និងទិដ្ឋភាពទូទៅនៃគម្រោងអភិវឌ្ឍន៍សហគមន៍នេសាទទាំង១២ ដោយក្នុងនោះខេត្តកំពត មាន ៥សហគមន៍, ខេត្តព្រះសីហនុមាន ៤សហគមន៍ និងខេត្តកែបមាន ៣សហគមន៍ ដើម្បីស្វែងយល់ពីតម្រូវការបន្ថែមសម្រាប់រៀបចំជាបណ្ដុំសេវាកម្មទេសចរណ៍ឱ្យមានភាពល្អប្រសើរ ក្នុងគោលដៅជួយឱ្យប្រជាពលរដ្ឋនៅក្នុងសហគមន៍ទាំងអស់មានប្រាក់ចំណូលកើនឡើង និងជីវភាពកាន់តែល្អប្រសើរ។
ក្នុងកិច្ចប្រជុំនេះដែរ ឯកឧត្តម ហួត ហាក់ រដ្ឋមន្រីក្រសួងទេសចរណ៍ បានលើកឡើងថា ខេត្តកំពតគឺជាខេត្តមួយដែលមានសក្តានុពលលើវិស័យទេសចរណ៍ជាច្រើន ហើយមានភាពទាក់ទាញជាងគេដែលតម្រូវឱ្យអាជ្ញាធរខេត្ត ក៏ដូចជាមន្ទីរជំនាញត្រូវមានការរៀបចំកែច្នៃតំបន់ដែលមានបន្ថែមទៀត។ ឯកឧត្តមរដ្ឋមន្ត្រីក៏បានកោតសរសើរចំពោះការអភិវឌ្ឍវិស័យទេសចរណ៍របស់ខេត្តកំពត ក្រោមការដឹកនាំរបស់ ឯកឧត្តម ម៉ៅ ធនិន អភិបាលខេត្ត ដែលបានធ្វើឱ្យកំណើនភ្ញៀវទេសចរមានការកើនឡើងជាលំដាប់។
ជាមួយគ្នានេះដែរ ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ ក៏បានបង្ហាញនូវជំហរគាំទ្រ និងចូលរួមជាសហថាមពលយ៉ាងពេញទំហឹង ក្នុងការអនុវត្តគម្រោងអភិវឌ្ឍន៍សហគមន៍នេះឱ្យទទួលបានជោគជ័យ និងឱ្យក្លាយជាសហគមន៍ជនបទគំរូ និងភូមិគំរូ ស្របតាមយុទ្ធសាស្ដ្របញ្ចកោណដំណាក់កាលទី១ របស់រាជរដ្ឋាភិបាល ក្រោមការបន្តវេនដឹកនាំប្រកបដោយគតិបណ្ឌិតរបស់ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃម្ពុជា និងស្របតាមផែនការយុទ្ធសាស្ដ្ររបស់ក្រសួងអភិវឌ្ឍន៍ជនបទ។
សូមជម្រាបជូនថា ក្នុងចំណោមសហគមន៍ទាំង១២ សហគមន៍នេសាទត្រពាំងសង្កែត្រូវបានបង្កើតឡើងនៅឆ្នាំ២០០៩ មានផ្ទៃដីទំហំ ៤១៥ហិកតា មានសមាជិកចំនួន ៨១៨គ្រួសារ មានហេដ្ឋារចនាសម្ព័ន្ធសំខាន់ៗដូចជា មានផ្លូវបេតុងចូលសហគមន៍ប្រវែងប្រមាណ ៥០០ម៉ែត្រ, មានចំណតរថយន្ដត្រឹមត្រូវ, បន្ទប់ទឹកស្អាត និងមានអនាម័យ, តូបលក់អាហារ ចំនួន ១០តូប, ព្រមទាំងមានសេវាសាលប្រជុំ, ម្ហូបអាហារ, ផ្ទះស្នាក់ និងសេវាទូកដឹកភ្ញៀវទេសចរណ៍ផងដែរ៕
