19/09/2025
ចាក់ដីចូលលុបច្រាំងទន្លេ បុកគ្រឹះសាងសង់សំណង់រឹង ស្ថិតនៅភូមិទួលរកា សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ តើមានច្បាប់សាងសង់ដែរឬទេ? តើរងផលប៉ះពាល់អ្វីខ្លះ នៅពេលដែលម្ចាស់ទីតាំងមានសិទ្ធិអំណាចអាចចាក់រំលោភ លុបច្រាំងទន្លេបាន! សូមស្ថាប័នពាក់ព័ន្ធចុះត្រួតពិនិត្យ!
(ភ្នំពេញ) : នៅថ្ងៃទី១៤ ១៧ ១៨ ខែកញ្ញា ឆ្នាំ២០២៥ ក្រុមការងារសារព័ត៌មាន បានចុះទៅពិនិត្យនិងតាមដានព័ត៌មាន បានឃើញករណីចាក់ដីចូលលុបច្រាំងទន្លេ និងសាងសង់សំណង់រឹងមួយកន្លែង ស្ថិតនៅភូមិទួលរកា សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ដោយមិនទាន់ដឹងថា មានលិខិតអនុញាតដែរឬទេ! សូមថ្នាក់ដឹកនាំគ្រប់ជាន់ថ្នាក់ មេត្តាត្រួតពិនិត្យដោយក្តីអនុគ្រោះ ។
សំណង់រឹងមួយកន្លែងនេះបុកគ្រឹះយ៉ាងរឹងមាំ មិនដឹងថាជារបស់ឯកឧត្តមរូបណានោះទេ បច្ចេកទេសសាងសង់ដ៏ប្រណិត ចាក់ដីចូលលុបច្រាំងទន្លេ ដែលធ្វើឲ្យទន្លេរួមតូច ដែលអាចរងផលប៉ះពាល់អ្វីខ្លះទៅថ្ងៃមុខ! មន្ត្រី ភូមិបាលខណ្ឌ ក្រុង ហាក់បីដូចជាមិនអើរពើ ឬមួយក៏ត្រូវថ្នាំសណ្តំអស់ទៅហើយ ។
យោងច្បាប់ស្តីពីសំណង់, មាត្រា២៦ សាងសង់ដោយពុំមានលិខិតអនុញ្ញាតសាងសង់ ពីអាជ្ញាធរមានសមត្ថកិច្ច, មាត្រា៣៨ សាងសង់ដោយពុំមានលិខិតអនុញ្ញាតបើកការដ្ឋានសាងសង់ពីអាជ្ញាធរមានសមត្ថកិច្ច ។
យោងអនុក្រឹត្យលេខ ២២៤ អនក្រ.បក ចុះថ្ងៃទី៣០ ខែធ្នូ ឆ្នាំ២០២០ ស្តីពីលិខិតអនុញ្ញាតសាងសង់, មាត្រា៨ សាងសង់ដោយពុំមានលិខិតអនុញ្ញាតសាងសង់ ពីអាជ្ញាធរមានសមត្ថកិច្ច, មាត្រា៣៧ សាងសង់ដោយពុំមានលិខិតអនុញ្ញាតបើកការដ្ឋានសាងសង់ ពីអាជ្ញាធរមានសមត្ថកិច្ច យោង អនុក្រឹត្យ លេខ ៩៨ អនក្រ.បក ចុះថ្ងៃទី ២៤ ខែកក្កដា ឆ្នាំ២០១៥ស្តីពីការគ្រប់គ្រងអាងទន្លេ, មាត្រា៨ ដោយបានសាងសង់រំលោភលើដីចំណីមាត់ច្រាំងទន្លេ ។
អង្គភាពអ្នកសារព័ត៌មានយើង សូមធ្វើសេចក្តីរាយការណ៍ជូន និងស្នើសុំដល់ ឯកឧត្តម ឃួង ស្រេង អភិបាលនៃគណៈអភិបាលក្រុងភ្នំពេញ សូមមេត្តាចាត់មន្ត្រីជំនាញចុះត្រួតពិនិត្យករណី ចាក់ដីចូលលុបច្រាំងទន្លេបុកគ្រឹះសាងសង់សំណង់រឹង ដោយក្តីអនុគ្រោះ ។
អង្គភាពអ្នកសារព័ត៌មានយើងសូមស្នើរសុំ ឯកឧត្តម រដ្ឋមន្ត្រី ក្រសួងធនធានទឹកនិងឧតុនិយមនិងឯកឧត្តមរដ្ឋមន្ត្រីក្រសួងរ៉ែនិងថាមពល សូមមេត្តាចាត់មន្ត្រីជំនាញចុះអធិការកិច្ច្ ដោយក្តីអនុគ្រោះ ។
អង្គភាពសារព័ត៌មានយើង ស្នើសុំ ដល់ឯកឧត្តម សាយសំអាល់ រដ្ឋមន្ត្រី ក្រសួងរៀបចំដែនដី នគរូបនីយកម្ម និងសំណង់ សូមមេត្តាចាត់មន្ត្រីជំនាញ ចុះអធិការកិច្ច ចំពោះសំណង់រឹងចាក់ដីចូលច្រាំងទន្លេ ដែលបានធ្វើសេចក្តីរាយការណ៍ខាងលើ ថាតើមានលិខិត អនុញាតឬមួយយ៉ាងណា ស្របតាមលក្ខខណ្ឌរបស់ក្រសួងដែលឬទេ ដោយក្តីអនុគ្រោះ ។
អង្គភាពអ្នកសារព័ត៌មានយើងគ្រាន់តែជាកញ្ចក់ឆ្លុះបញ្ចាំងរិះគន់ក្នុងន័យស្ថាបនា និងសូមរង់ចាំការឆ្លើយបំភ្លឺគ្រប់ស្ថាប័នពាក់ព័ន្ធគ្រប់ពេលម៉ោងធ្វើការតាមរបបអ្នកសារព័ត៌មានសូមអរគុណ ។ (រាយការណ៍ នៅថ្ងៃទី១៨ ខែកញ្ញា ឆ្នាំ២០២៥)
