08/05/2025
🙏🌹សូមអនុមោទនាបុណ្យវិសាខបូជា ថ្ងៃ១៥កើត ខែវិសាខ🌹🙏
👉បុណ្យវិសាខបូជា ប្រារព្ធធ្វើនៅថ្ងៃ១៥កើតពេញបូណមី ខែវិសាខ រំលឹកដល់អភិលក្ខិតសម័យទាំងបីរបស់ ព្រះសម្មាសម្ពុទ្ធជាម្ចាស់គឺ៖ -ទី១ ថ្ងៃទ្រង់ប្រសូត -ទី២ ថ្ងៃទ្រង់ត្រាស់ដឹង នូវ អនុត្តរសម្មាសម្មោធិញ្ញាណ -ទី៣ ថ្ងៃទ្រង់យាង ចូលបរិនិព្វាន ។ សូមពុទ្ធបរិស័ទញ៉ាំងចិត្តជ្រះថ្លាបំពេញកុសល មាន ការថ្វាយទាន រក្សាសីល ចម្រើនភាវនារំលឹកគុណព្រះរតនត្រៃ ស្តាប់ព្រះធម៌ បូជាប្រទីបជាដើម ដោយសេចក្តីជ្រះថ្លារីករាយ ។
🙏វិសាខបុណ្ណមី គឺថ្ងៃវិសេស យើងបានចាំចេះថ្ងៃព្រះភគវា ប្រាំពីរប្រការជ្រះថ្លាវន្ទា វិសាខបូជាឫកពាសែនល្អ។
🙏ទីមួយ៖ គឺថ្ងៃសុមេធបណ្ឌិត ពោធិសត្វពិតមានឫទ្ធិបវរ ចាប់ផ្តើមទទួលព្រះពុទ្ធព្យាករណ៍ លោកធាតុញាប់ញ័រសាទរពេកក្រៃ ។
🙏ទីពីរ៖ គឺថ្ងៃក្សត្រថ្លៃប្រសូត្រ អស្ចារ្យរហូតសម្ពោធព្រឹក្សព្រៃ កំណើតចុងក្រោយជាប់ដោយអត្ថន័យ ផុតចាកភពត្រៃលែងភ័យលែងព្រួយ ។
🙏ទីបី៖ គឺថ្ងៃព្រះស្រីមហាពោធិ៍ ដុះចេញលេចធ្លោពោធិ៍ពិតមានត្រួយ ថ្ងៃព្រះប្រសូតស្រូតដុះជាមួយ ជំនួយឲ្យចិត្តបរិស័ទជ្រះថ្លា ។
🙏ទីបួន៖ គឺថ្ងៃចមត្រៃត្រាស់ដឹង ថ្ងៃមានទីពឹងពំនឹងលោកា ជាថ្ងៃព្រះពុទ្ធបរិសុទ្ធអស្ចារ្យ ពួកជនជ្រះថ្លាចិន្តាល្អស្អាត ។
🙏ទីប្រាំ៖ គឺថ្ងៃអង្គថ្លៃនិព្វាន ថ្ងៃព្រះទ្រង់ញាណមានពុទ្ធោវាទ បច្ឆិមវាចាថាកុំប្រមាទ ឱវាទពិសិដ្ឋស្ថិតនៅជាគ្រូ ។
🙏ប្រាំមួយ៖ គឺថ្ងៃប្រល័យព្រះធាតុ ចេតិយលោកនាថនៅទៀតមិនយូរ ព្រះធាតុទាំងអស់ហោះមកគល់ពោធិ៍ តេជោរំលាយរលត់ពុទ្ធសាសន៍ ។
🙏ប្រាំពីរ៖ គឺថ្ងៃជោគជ័យពុទ្ធា គ្រប់ព្រះភគវាឈ្នះមារបានត្រាស់ នាំមកនូវសុខវិសេសខ្លាំងណាស់ គ្រប់អង្គទ្រង់ត្រាស់ព្រះធម៌ទេសនា ។
🙏🌸 វិសាខបុណ្ណមីថ្ងៃប្រពៃពិត យើងខ្ញុំមានចិត្តនឹងធឹងជ្រះថ្លា វន្ទាសំពះអង្គព្រះសាស្តា សូត្រធម៌ថ្វាយផ្កាបូជាប្រទីប ។
🌹🙏❤️🙏🌹
(ដេាយ៖ លោកគ្រូអគ្គបណ្ឌិត ប៊ុត សាវង្ស)
