18/09/2025
ម៉ូតូបុកម៉ូតូនៅក្រោមស្ពានអាកាសក្រុងតាខ្មៅ បណ្ដាលឲ្យរបួសមនុស្ស ៣នាក់ ក្នុងនោះ ២នាក់របួសធ្ងន់
មនុស្ស ៣នាក់បានរងរបួស ក្នុងនោះ ២នាក់របួសធ្ងន់ និង ១នាក់របួសស្រាល នៅក្នុងហេតុការណ៍បុកគ្នារវាងម៉ូតូ ២គ្រឿង នៅក្រោមស្ពានអាកាសសម្ដេចធិបតី ស្ថិតក្នុងក្រុងតាខ្មៅ។ ហេតុការណ៍នេះបានកើតឡើងនៅយប់ថ្ងៃទី១៧ កញ្ញា ២០២៥ នៅលើផ្លូវជាតិលេខ២ កែងមហាវិថីសម្ដេចតេជោ ក្នុងភូមិព្រែកហូរលិច១ សង្កាត់ព្រែកហូរ ខេត្តកណ្ដាល។
លោកវរសេនីយ៍ឯក យី វណ្ណដា អធិការនគរបាលក្រុងតាខ្មៅ បានឲ្យដឹងថា ករណីនេះបង្កឡើងដោយម៉ូតូ Honda Dream ពណ៌ខ្មៅ ពាក់ផ្លាកលេខ កណ្ដាល 1O-7412 បើកបរដោយឈ្មោះ ម៉ី ភ័ក្រ្ត (ប្រុស, ៣៥ឆ្នាំ) និងមានកូនប្រុសឈ្មោះ គីម ឡុង (ប្រុស, ៦ឆ្នាំ) រួមដំណើរជាមួយ។ ម៉ូតូនេះបានបើកបត់ឆ្វេងឆ្លងកាត់ផ្លូវ ក្នុងទិសដៅពីលិចទៅកើត។ ពេលបត់ ម៉ូតូបានបុកជាមួយម៉ូតូ Honda Scoopy ពណ៌ខ្មៅ ពាក់ផ្លាកលេខ កណ្ដាល 1Z-1977 បើកបរដោយឈ្មោះ រ៉ាន់ ណេត (ប្រុស, ២៨ឆ្នាំ) ដែលធ្វើដំណើរផ្ទុយទិសគ្នា។
លោកអធិការបានបន្តថា គ្រោះថ្នាក់នេះបណ្ដាលមកពីអ្នកបើកបរម៉ូតូ Honda Dream បត់ឆ្វេងដោយខ្វះការប្រុងប្រយ័ត្ន និងអ្នកបើកម៉ូតូ Honda Scoopy បើកបរលឿនខ្វះការប្រុងប្រយ័ត្នដូចគ្នា។
ក្នុងហេតុការណ៍នេះ អ្នកបើកបរម៉ូតូ Honda Dream ឈ្មោះ ម៉ី ភ័ក្រ្ត និងអ្នកបើកម៉ូតូ Honda Scoopy ឈ្មោះ រ៉ាន់ ណេត បានរងរបួសធ្ងន់ ចំណែកកូនប្រុសរបស់ឈ្មោះ ម៉ី ភ័ក្រ្ត ឈ្មោះ គីម ឡុង បានរងរបួសស្រាល។ អ្នករបួសទាំង ៣នាក់ត្រូវបានរថយន្តសង្គ្រោះដឹកយកទៅព្យាបាលនៅមន្ទីរពេទ្យខណ្ឌដង្កោ។ ចំពោះមធ្យោបាយពាក់ព័ន្ធទាំង ២គ្រឿង ត្រូវបានសមត្ថកិច្ចយកទៅរក្សាទុកនៅអធិការដ្ឋាននគរបាលក្រុងតាខ្មៅដើម្បីចាត់ការតាមនីតិវិធីច្បាប់៕
