08/09/2025
ឯកឧត្តមអភិសន្តិបណ្ឌិត ស សុខា ប្រាប់ពលរដ្ឋភៀសសឹក នៅជំរុំវត្តពោធិ៍ ៥ពាន់ដើម អំពីយុទ្ធសាស្ត្រដឹកនាំជាតិដ៏អង់អាចឈ្លាសវៃរបស់សម្ដេចធិបតី ហ៊ុន ម៉ាណែត!
ភាពអង់អាចឈ្លាសវៃនៃការដឹកនាំរាជរដ្ឋាភិបាលបន្តវេន នីតិកាលទី៧ នៃរដ្ឋសភា របស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ក្នុងរយៈពេល២ឆ្នាំមកនេះ ជាពិសេសយុទ្ធសាស្ត្រនៃការទប់ទល់អំពើឈ្លានពានរបស់ថៃ ត្រូវបានឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ មានប្រសាសន៍ជម្រាបជូនប្រជាពលរដ្ឋភៀសសឹក ដែលកំពុងស្នាក់នៅ មណ្ឌលសុវត្ថិភាព វត្តពោធិ៍ ៥ ០០០ដើម ស្ថិតនៅស្រុកគូលែន ខេត្តព្រះវិហារ នាព្រឹកថ្ងៃទី៨ ខែកញ្ញា ឆ្នាំ២០២៥។
បើតាមឯកឧត្តមអភិសន្តិបណ្ឌិត ចាប់តាំងពីដើមនីតិកាលមក សម្ដេចមហាបវរធិបតី ហ៊ុន ម៉ាណែត បានដឹកនាំរាជរដ្ឋាភិបាលបន្តវេន ឈានទៅសម្រេចបានសមិទ្ធផលធំៗជូនជាតិនិងប្រជាជន ជាបន្តបន្ទាប់ ដោយឈរលើមូលដ្ឋាននៃមរតកដឹកនាំនយោបាយប្រកបដោយគតិបណ្ឌិតរបស់សម្ដេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី ខណៈចុងក្រោយនេះ សម្ដេចធិបតី បានបន្តដឹកនាំជាតិ រួបរួមសាមគ្គីគ្នា យកប្រៀបឈ្នះប្រកបដោយកិត្តិយសពីអំពើឈ្លានពានទឹកដីយ៉ាងកម្រោលពីសំណាក់កងទ័ពថៃ។
ឯកឧត្តមអភិសន្តិបណ្ឌិត ស សុខា បានគូសបញ្ជាក់ថា ក្រោមបទបញ្ជាដឹកនាំដ៏ម៉ឺងម៉ាត់របស់សម្ដេចធិបតី យុទ្ធជនជួរមុខរបស់ជាតិ ទាំងកម្លាំងកងយោធពលខេមរភូមិន្ទ និងនគរបាលការពារព្រំដែន បានប្រយុទ្ធទប់ទល់សត្រូវឈ្លានពានប្រកបដោយភាពអង់អាចក្លាហាន ការពារបានយ៉ាងរឹងមាំបូរណភាពទឹកដីនិងអធិបតេយ្យភាពជាតិ ខណៈនយោបាយការទូត ក៏ត្រូវបានអនុវត្តយ៉ាងសកម្ម និងប្រកបដោយប្រសិទ្ធភាពខ្ពស់បំផុត។ ឯកឧត្តម បន្ថែមថា ស្នាដៃនេះ ត្រូវបានប្រជាពលរដ្ឋខ្មែរ ទាំងក្នុងនិងក្រៅប្រទេស ព្រមទាំងសហគមន៍អន្តរជាតិ ទទួលស្គាល់ គាំទ្រ និងផ្ដល់កិត្តិយស ដោយចាត់ទុកកម្ពុជា មានភាពចាស់ទុំ ប្រកបដោយបទពិសោធ និងជារដ្ឋគម្រូ ដែលផ្ដល់តម្លៃខ្ពស់ដល់សន្តិភាព និងច្បាប់អន្តរជាតិ។
ប្រមុខក្រសួងមហាផ្ទៃ ក៏បានជម្រាបជូនដែរថា ការរួបរួមសាមគ្គីគ្នាជាធ្លុងមួយនៃជនរួមជាតិទាំងក្នុងនិងក្រៅប្រទេស ដូចដែលយើងគ្រប់គ្នាបាននិងកំពុងឃើញនិងចូលរួមនេះ គឺជាមនុញ្ញផលដែលកើតចេញពីទំនុកចិត្ត និងប្រសិទ្ធភាពនៃការដឹកនាំរបស់រាជរដ្ឋាភិបាលបន្តវេន ហើយទំនុកចិត្តនេះបានស្ដែងឡើង តាមរយៈការបញ្ចេញសារសម្លេងតែមួយរបស់ពលរដ្ឋខ្មែរ គាំទ្ររាជរដ្ឋាភិបាល ចូលរួមទាំងស្មារតីនិងជំនួយសម្ភារៈគ្រប់បែបយ៉ាងដល់កម្លាំងជួរមុខ និងដល់បងប្អូនប្រជាពលរដ្ឋជនភៀសសឹក ជាបន្តបន្ទាប់។
ជាក់ស្ដែងនាថ្ងៃនេះ ឯកឧត្តមអភិសន្តិបណ្ឌិត ស សុខា ដែលក៏ជាប្រធានក្រុមការងាររាជរដ្ឋាភិបាលចុះជួយមូលដ្ឋានខេត្តព្រៃវែង បានមានប្រសាសន៍ថា រដ្ឋបាលនិងប្រជាជនខេត្តព្រៃវែង ដែលនៅជាប់ព្រំដែនប្រទេសវៀតណាមឯណោះ បានបន្តរួបរួមគ្នាផ្ដល់ការគាំទ្រនៅជំនួយផ្សេងៗជាច្រើន ដោយជំនួយអស់ទាំងនោះ ត្រូវបានដឹករាប់រយគីឡូម៉ែត្រ មកកាន់តំបន់ព្រំដែន ដើម្បីជួយដល់យុទ្ធជនជួរមុខ និងជួយជនរួមជាតិ ដែលបានភៀសសឹក បន្ថែមលើសកម្មភាពដើរដង្ហែរក្បួនគាំទ្ររាជរដ្ឋាភិបាល ដោះស្រាយជម្លោះព្រំដែនប្រកបដោយសន្តិភាព។
ក្នុងឱកាសនោះដែរ ឯកឧត្តមអភិសន្តិបណ្ឌិត ស សុខា ក៏បានអំពាវនាវដល់បងប្អូនប្រជាពលរដ្ឋភៀសសឹកទាំងអស់ សូមថែរក្សាសុខភាព ត្រៀមលក្ខណៈវិលទៅលំនៅដ្ឋានជាបន្តបន្ទាប់តាមការសម្របសម្រួលរបស់អាជ្ញាធរ ចាប់ផ្ដើមបន្តសកម្មភាពប្រកបរបរចិញ្ចឹមជីវិត ជាពិសេសចៀសវាងធ្វើដំណើរឆ្លងដែនទៅប្រទេសថៃ ដែលប្រឈមគ្រោះថ្នាក់ និងការប្រមាថមាក់ងាយ។ ឯកឧត្តម បានបន្ថែមទៀតថា សម្ដេចធិបតី ដោយមានក្រសួងស្ថាប័នពាក់ព័ន្ធជាសេនាធិការ បាននិងកំពុងយកចិត្តទុកដាក់អនុវត្ត និងត្រៀមដាក់ចេញផែនការថ្មីៗជាបន្តបន្ទាប់ដើម្បីគាំទ្រដល់ការកសាងជីវភាពថ្មីជូនពលរដ្ឋវិលពីប្រទេសថៃ ដែលមកដល់ពេលនេះមានប្រមាណជាង ៩០ម៉ឺននាក់។
ក្នុងឱកាសនោះ ឯកឧត្តមអភិសន្តិបណ្ឌិត បានផ្ដល់ជូនប្រជាពលរដ្ឋភៀសសឹកនៅខេត្តព្រះវិហារ និងឧត្តរមានជ័យ ចំនួន ២.០០០គ្រួសារ ដោយក្នុងមួយគ្រួសារទទួលបានទឹកបរិសុទ្ធ កេស ភេសជ្ជៈ (Krud Ice) ១/២កេស មី ២០កញ្ចប់ អង្គរ ១០គីឡូក្រាម ត្រីងៀត ១គីឡូក្រាម ឃីត (មុង ភួយ ខ្នើយ កន្ទេល) ១កញ្ចប់ និងផ្តល់ជូនក្រុមការងារគ្រប់គ្រងមណ្ឌលសុវត្ថិភាព ចំនួន ២ក្រុម ក្នុងមួយក្រុមទទួលបាន អង្គរ ៥តោន និងតង់ ១០០តង់។
ឯកឧត្តមអភិសន្តិបណ្ឌិត ឧបនាយករដ្ឋមន្ត្រី ក៏បានបន្តផ្ដល់ជូនឯកឧត្តម ខេង សុមេធ អគ្គរងស្នងការនគរបាលជាតិ ដែលកំពុងឈរជើងប្រចាំទិសភូមិភាគ៣ ភូមិភាគ៤ និងភូមិភាគ៥ នូវអង្ករ ១០តោន មីកញ្ចប់ ៥០កេស ត្រីខកំប៉ុង ៥០កេស គុយទាវកញ្ចប់ ៥០កេស ទឹកសុទ្ធ ១០០កេស ថ្នាំបាញ់មូស ២.០០០ដប ម៉ាសសុវត្ថិភាពខ្នាតតូច ១.០០០ឈុត និងខ្នាតធំ ២៤០ឈុត កាសសុវត្ថិភាពការពារសំឡេង ៥០០គ្រឿង អំបុកសាច់ ២.៤៣២ថង់ នំធញ្ញជាតិ ១០០គីឡូក្រាម នំ UN ៩០០ ១០០កេស បាយក្ដាំង ២០០កញ្ចប់ តង់ពណ៌ស្លឹកឈើ ១០ម x ៣០ម ៥០សន្លឹក អាវស្លឹកឈើ ១៥០អាវ ពងមាន់រស់ជាតិខ ១០០កេស សាច់ហតដក ២០០កេស សាច់ជ្រូកកំប៉ុង (Spam) ២០០កេស ពងមាន់រសជាតិដើម ១០០កេស ទឹកដោះគោ ៥០កេស។
ឯកឧត្តមអភិសន្តិបណ្ឌិត ស សុខា ក៏បានផ្តល់ជូនឯកឧត្តមអភិបាល នៃគណៈអភិបាលខេត្តព្រះវិហារ ឧត្តរមានជ័យ និងខេត្តសៀមរាប ក្នុងមួយខេត្តទទួលបាន អង្គរ ៥តោន មីកញ្ចប់ ២៥កេស ត្រីខកំប៉ុង ២៥កេស គុយទាវកញ្ចប់ ២៥កេស ទឹកបរិសុទ្ធ ៥០កេស ថ្នាំបាញ់មូស ១.០០០ដប។ ជាមួយគ្នានោះ ស្នងការរដ្ឋាននគរបាលខេត្តព្រះវិហារ ស្នងការដ្ឋាននគរបាលខេត្តឧត្តរមានជ័យ និងស្នងការដ្ឋាននគរបាលខេត្តសៀមរាប ក្នុងមួយស្នងការដ្ឋាន ទទួលបានអង្គរ ៥តោន មីកញ្ចប់ ២៥កេស ត្រីខកំប៉ុង ២៥កេស គុយទាវកញ្ចប់ ២៥កេស ទឹកសុទ្ធ ៥០កេស បាញ់មូស ១.០០០ដប។
ឯកឧត្តមអភិសន្តិបណ្ឌិត ស សុខា ក៏បានផ្តល់ជូនពេទ្យនគរបាលនៃអគ្គនាយកដ្ឋានភស្តុភារនិងហិរញ្ញវត្ថុ រួមមាន៖ សេរ៉ូម NSS ២០កេស សេរ៉ូមD5% ២០កេស សេរ៉ូម Lactated Ringer Injection ២០កេស Betadine ចំណុះ៥លីត្រ ១០ធុង បង់រុំ ១០០ដុំ កំប្រេះ ២០ដុំ អាល់កុល ចំណុះ៣០លីត្រ ៤កាន ម៉ាស់ ៥កេស ស្មើ២៣៥០ប្រអប់ ស្រោមដៃ ៧កេស ថ្នាំប៉ារ៉ា ៥កេស ថ្នាំNanhexin-8 ២៧០ប្រអប់ អាវពេទ្យ ៦.៩៦០អាវ៕
