https://www.facebook.com/111576937866172/

ILoveCambodia, Phnom Penh (2026)

25/08/2025

ឯកឧត្តម Pen Kosal ប៉ែន កុសល្យ អភិបាល នៃគណៈអភិបាលខេត្តត្បូងឃ្មុំ អញ្ជើញចូលរួមក្នុងពិធីប្រគល់អំពូលភ្លើងសូឡា ចំនួន ៦១៤ដើម ជូនប្រជាពលរដ្ឋ ក្នុងស្រុកអូររាំងឪ ខេត្តត្បូងឃ្មុំ នាព្រឹកថ្ងៃទី២៤ ខែសីហា ឆ្នាំ២០២៥ ដែលជាអំណោយដ៏ថ្លៃថ្លារបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា និងលោកជំទាវបណ្ឌិត ពេជ ចន្ទមុនី ហ៊ុនម៉ាណែត ក្រោមអធិបតីភាព ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តត្បូងឃ្មុំ។

ប្រភព ៖ រដ្ឋបាលខេត្តត្បូងឃ្មុំ

25/08/2025

ថ្ងៃអាទិត្យ ១កើត ខែភទ្របទ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី២៤ ខែសីហា ឆ្នាំ២០២៥ វេលាម៉ោង ០៧:០០នាទីព្រឹក៖
ឯកឧត្តម វ៉ី សំណាង អភិបាល នៃគណៈអភិបាលខេត្តតាកែវ និង ឯកឧត្តម សរ ភមរ៉ា អគ្គនាយករង នៃអគ្គនាយកដ្ឋាន ធនធានមនុស្ស នៃក្រសួងមហាផ្ទៃ បានអញ្ជើញកាត់ស្រោមវិញ្ញាសារប្រឡងប្រជែង ជ្រើសរើសបេក្ខជន ឱ្យចូលបម្រើការងារ ក្នុងក្របខ័ណ្ឌមន្រ្តីពន្ធនាគារ ក្រសួងមហាផ្ទៃ សម្រាប់ឆ្នាំ២០២៥ នៅខេត្តតាកែវ ដែលបានរៀបចំនាព្រឹកថ្ងៃអាទិត្យ ទី២៤ ខែសីហា ឆ្នាំ២០២៥ នៅមណ្ឌលប្រឡងនៅវិទ្យាល័យជាស៊ីមតាកែវ ស្ថិតក្នុងក្រុងដូនកែវ ខេត្តតាកែវ ។
សូមជម្រាបជូនដែរថា បេក្ខជនដែលបានដាក់ពាក្យចូលរួមប្រឡងប្រជែង ជ្រើសរើសក្របខ័ណ្ឌមន្រ្តីពន្ធនាគារ សម្រាប់ឆ្នាំ ២០២៥ នៅខេត្តតាកែវ មានសរុបចំនួន ៦៣៧នាក់ មកពីបណ្ដាខេត្តកំពង់ស្ពឺ ខេត្តកំពត និងខេត្តតាកែវ។

ប្រភព ៖ រដ្ឋបាលខេត្តតាកែវ

25/08/2025

ឯកឧត្តមអភិបាលខេត្តស្វាយរៀង អញ្ជេីញសួរសុខទុក្ខ លោកវរសេនីយ៍ឯក ហ៊ុល វុទ្ធី កងវិស្វកម្មកងទ័ពជើងគោក វីរកងទ័ពជួរមុខប្រចាំទិសប្រាសាទតាក្របីដែលរងគ្រោះត្រូវផ្សែងពុលរបស់ថៃ
នាព្រឹកថ្ងៃសៅរ៍ ១៤រោច ចែស្រាពណ៍ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី២៣ ខែសីហា ឆ្នាំ២០២៥នេះ ឯកឧត្តម ប៉េង ពោធិ៍សា អភិបាលនៃគណៈអភិបាលខេត្តស្វាយរៀង បានអញ្ជេីញចុះសួរសុខទុក្ខ លោកវរសេនីយ៍ឯក ហ៊ុល វុទ្ធី កងវិស្វកម្មកងទ័ពជើងគោក វីរកងទ័ពជួរមុខប្រចាំនៅទិសប្រាសាទតាក្របី ដែលត្រូវផ្សែងពុលកាលពីថ្ងៃទី១៣ ខែសីហា ឆ្នាំ២០២៥ និងបានចូលសម្រាកព្យាបាលនៅមន្ទីរពេទ្យបង្អែកខេត្តសៀមរាប នាថ្ងៃទី១៤ ខែសីហា ឆ្នាំ២០២៥ បច្ចុប្បន្នកំពុងសម្រាកនៅគេហដ្ឋាន ស្ថិតនៅក្នុងភូមិចុងព្រែក សង្កាត់ស្វាយរៀង ក្រុងស្វាយរៀង។
អញ្ជេីញចូលរួមក្នុងឱកាសនោះដែររួមមាន លោកអភិបាលរងខេត្ត លោក លោកស្រី ប្រធានមន្ទីរ/អង្គភាពនានាក្នុងខេត្ត លោកអភិបាលក្រុងស្វាយរៀង លោកស្រីចៅសង្កាត់ ព្រមទាំងអាជ្ញាធរជាច្រេីនរូបទៀត។
ឯកឧត្តមអភិបាលខេត្តនិងសហការីបាននាំមកនូវសម្ភារជាគ្រឿងឧបភោគ បរិភោគ និងថវិការបស់សម្តេចកិ្តសង្គហបណ្ឌិត ម៉ែន សំអន ចំនួន១លានរៀល .ថវិការបស់រដ្ឋបាលខេត្តចំនួន១លានរៀល និងថវិការបស់មន្ទីរ/អង្គភាពដែលបានចូលរួមដោយផ្ទាល់មួយចំនួនទៀតផងដែរ៕

ប្រភព ៖ រដ្ឋបាលខេត្តស្វាយរៀង

25/08/2025

ឯកឧត្តម សរ សុពុត្រា - Sor Soputra បានអញ្ជើញបើកវិញ្ញាសា ដំណើរការសំណេរប្រឡងប្រជែងជ្រើសរើសក្របខ័ណ្ឌមន្ត្រីពន្ធនាគារ សម្រាប់ឆ្នាំ២០២៥
ខេត្តស្ទឹងត្រែង៖ នាព្រឹកថ្ងៃទី២៤ ខែសីហា ឆ្នាំ២០២៥ នៅមណ្ឌលប្រឡងវិទ្យាល័យព្រះរាជបូជនីយកិច្ច ក្រុងស្ទឹងត្រែង ខេត្តស្ទឹងត្រែង ឯកឧត្តម សរ សុពុត្រា អភិបាល នៃគណៈអភិបាលខេត្តស្ទឹងត្រែង បានអញ្ជើញបើកវិញ្ញាសាដំណើរការសំណេរប្រឡងប្រជែងជ្រើសរើសក្របខ័ណ្ឌមន្ត្រីពន្ធនាគារ សម្រាប់ឆ្នាំ២០២៥ ឱ្យចូលបម្រើការនៅពន្ធនាគារខេត្តស្ទឹងត្រែង ខេត្តរតនគិរី ខេត្តមណ្ឌលគិរី និងខេត្តព្រះវិហារ។ សម្រាប់ដំណើរការប្រឡងនេះដែលគឺមានបេក្ខជនមកពី៤ខេត្តនៃភូមិភាគឦសាន ចំនួន២២៣រូប។
សូមបញ្ជាក់ដែរថា ការប្រលងជ្រើសរើសមន្រ្តីពន្ធនាគារឆ្នាំ២០២៥នេះ តាមប្រកាសស្តីពីបែងចែកក្របខ័ណ្ឌសំរាប់ការប្រឡងប្រជែងជ្រើសរើសបេក្ខជនសិស្សនិស្សិតឱ្យចូលបំរើការងារនៅក្នុងក្របខ័ណ្ឌមន្រ្តីពន្ធនាគារក្រសួងមហាផ្ទៃសម្រាប់ ឆ្នាំ២០២៥ នៅតាមមណ្ឌលអប់រំ កែប្រែនៅពន្ធាគាររាជធានីខេត្តនានាចំនួន៣០០នាក់ដែលមានស្រ្តី៤០នាក់។
ឯកឧត្តម សរ សុពុត្រា បានមានប្រសាសន៍លើកឡើងថា បេក្ខជនដែលនឹងប្រឡងជាប់ជាមន្រ្តីពន្ធនាគារ គឺពឹងផ្អែកទាំងស្រុងលើសមត្ថភាពផ្ទាល់ខ្លួន ដោយគ្មានការអន្តរាគមន៍ ឬការប្រើប្រាស់ខ្សែខ្នងណាមួយឡើយ។

ប្រភព ៖ រដ្ឋបាលខេត្តស្ទឹងត្រែង Stung Treng Provincial Administration

25/08/2025

ព្រឹកថ្ងៃទី២៣ ខែសីហាឆ្នាំ២០២៥ ឯកឧត្តម ញ៉ែម សំអឿន - Nhem Samoeun អភិបាលនៃគណៈអភិបាលខេត្តរតនគិរីបានដឹកនាំប្រតិភូខេត្តរតនគិរីនាំយកស្បៀងអាហារនិងថវិកា ដែលជាអំណោយដែលបានមកពីប្រជាពលរដ្ឋនិងសម្បុរសជនក្នុងខេត្តរតនគិរីជូនវីរៈកងទ័ពសមរភូមិមុខទិសព្រះវិហារ។
ស្បៀងអាហារនិងថវិកាទាំងនេះប្រគល់ជូននៅកងពលធំ អន្តរាគមន៍លេខ៣ សមរភូមិមុខនិងកងពលលេខ១២៨ ភូមិភាគ១ និងទីបញ្ជាការស្រាលភូមិភាគ១ ទិសព្រះវិហារ។ អំណោយទាំងនោះរួមមានដូចជា ម៉ូតូហុងដាវេវចំនួន ២គ្រឿង ថវិការសរុបចំនួន៩០.០០០.០០០រៀល អង្ករសរុប១២,៩តោន ទឹកសុទ្ធ៣០០កេស មីកេះធំ ១២០កេះ មីកេះតូច៦៧៥កេះ ទឹកផ្លែឈេី ១៨៧កេះ ត្រីខកំប៉ុងកេះធំ ១៣កេះ និងគ្រឿងឧបភោគបរិភោគ សម្ភារៈប្រេីប្រាស់មួយចំនួនទៀត។
ឯកឧត្តមអភិបាលក៏បានអញ្ជេីញចុះសួរសុខទុក្ខកងកម្លាំងដែលសម្រាកព្យាបាលនៅមន្ទីរពេទ្យខេត្តព្រះវិហារ សរុប ១១០នាក់ ដោយក្នុងម្នាក់ៗទទួលបានថវិកា៥០.០០០រៀល និងឧបត្ថម្ភថវិកាជូនមន្ទីរពេទ្យខេត្តព្រះវិហារ ថវិកាចំនួន ៥.០០០.០០០រៀល។

ប្រភព ៖ រដ្ឋបាលខេត្តរតនគិរី-Ratanakiri Administration

25/08/2025

ឯកឧត្តម ខូយ រីដា Khoy Rida អភិបាល នៃគណៈអភិបាលខេត្តពោធិ៍សាត់ នារសៀលថ្ងៃទី២៣ ខែសីហា ឆ្នាំ២០២៥ នៅសាលប្រជុំសាលាខេត្ត បានទទួលថវិកា ចំនួន៨ម៉ឺនដុល្លារ តាមរយៈសន្តានចិត្តសប្បុរសធម៌ របស់លោកសាស្ត្រាចារ្យ គួច វណ្ណលី និងលោកស្រីសាស្ត្រាចារ្យ ហែ ឈឹងរន អតីតសាស្ត្រាចារ្យភាសាបារាំង និងអង់គ្លេស នៅវិទ្យាល័យពោធិ៍សាត់ កាលពីឆ្នាំ១៩៦៥-១៩៧៥ និងជាមន្ត្រីនៅទីស្តីការគណៈរដ្ឋមន្ត្រី និងក្រសួងទេសចរណ៍ រហូតចូលនិវត្តន៍ ដែលបានបរិច្ចាគថវិកា សម្រាប់ចូលរួមចំណែកសាងសង់អគារពហុព្យាបាល និងសង្គ្រោះបន្ទាន់ នៃមន្ទីរពេទ្យបង្អែកខេត្តពោធិ៍សាត់។
ឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់ បានជម្រាបជូនថា មូលនិធិសាងសង់អគារពហុព្យាបាល និងសង្គ្រោះបន្ទាន់ នៃមន្ទីរពេទ្យបង្អែកខេត្តពោធិ៍សាត់ ជាគំនិតផ្តួចផ្តើមរបស់ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល និងជាប្រធានក្រុមការងាររាជរដ្ឋាភិបាល ចុះជួយមូលដ្ឋានខេត្តពោធិ៍សាត់ និងព្រះតេជគុណ ឥន្ទត្ថេរោ នៅ សុគន្ធថៃ ព្រះចៅអធិការវត្តហង្សាបីតិ (ហៅវត្តព្រែកស្តី) រួមទាំងរូបលោកផ្ទាល់ ដោយបានបើកការដ្ឋានសាងសង់ កាលពីល្ងាចថ្ងៃទី១១ ខែមិថុនា ឆ្នាំ២០២៥កន្លងទៅ មកដល់ពេលនេ សម្រេចបាន១២%ហើយ។
ឯកឧត្តមបន្តថា ការសាងសង់អគារនេះ ក្នុងគោលបំណងបម្រើវិស័យសុខភាពសាធារណៈ ជូនប្រជាពលរដ្ឋឱ្យកាន់តែប្រសើរឡើងជាបន្តបន្ទាប់។ ឯកឧត្តមសូមថ្លែងអំណរគុណដ៏ជ្រាលជ្រៅបំផុត នូវទឹកចិត្តសប្បុរសធម៌ មហាប្រសើររបស់ លោកសាស្ត្រាចារ្យ គួច វណ្ណលី និងលោកស្រីសាស្ត្រាចារ្យ ហែ ឈឹងរន អតីតសាស្ត្រាចារ្យ ភាសាអង់គ្លេស និងបារាំង នៅវិទ្យាល័យពោធិ៍សាត់ កាលពីឆ្នាំ១៩៦៥-១៩៧៥ និងជាមន្ត្រីនៅទីស្តីការគណៈរដ្ឋមន្ត្រី និងក្រសួងទេសចរណ៍ រហូតចូលនិវត្តន៍ ដែលមានសន្តានចិត្តសប្បុរសធម៌ បានបរិច្ចាគថវិកាផ្ទាល់ខ្លួនចំនួន៨ម៉ឺនដុល្លារ និងបានបំពាក់នូវគ្រឿងឥស្សរិយយស ព្រះរាជាណាចក្រកម្ពុជា ថ្នាក់មហាសេនា និងលិខិតថ្លែងអំណរគុណ។
ឯកឧត្តមបានគូសបញ្ជាក់ថា ការចូលរួមបរិច្ចាគហិរញ្ញវត្ថុ សាងសង់ អគារពហុព្យាបាល និងសង្គ្រោះបន្ទាន់ ដែលមានបណ្តោយ៥៤ម៉ែត្រ និងទទឹង២២ម៉ែត្រ កម្ពស់៥ជាន់ ក្នុងបរិវេណមន្ទីរពេទ្យបង្អែកខេត្តពោធិ៍សាត់នាពេលនេះ ក៏ដូចនាពេលកន្លងមក សបញ្ជាក់ឱ្យឃើញ ពីកម្លាំងមហាសាមគ្គី និងគុណតម្លៃដ៏ធំធេង ក្នុងការអភិវឌ្ឍន៍វិស័យសុខាភិបាលខេត្តពោធិ៍សាត់យើង ឱ្យកាន់តែប្រសើរ និងមានលក្ខណៈទំនើបឈានឡើង ព្រមទាំងបានបង្ហាញនូវទឹកចិត្តសប្បុរសធម៌ដ៏ថ្លៃថ្លាបំផុត របស់សប្បុរសជន ក្នុងការចូលរួមគាំទ្រយ៉ាងសកម្ម ដល់ការថែទាំសុខភាព និងព្យាបាល ជូនប្រជាពលរដ្ឋទូទៅ ដែលបានមកទទួលសេវានៅមន្ទីរពេទ្យបង្អែកខេត្ត កាន់តែមានភាពងាយស្រួល ប្រកប ដោយប្រសិទ្ធភាពខ្ពស់ និងលើកកម្ពស់សុខុមាលភាពប្រជាពលរដ្ឋ តាមរយៈការកាត់បន្ថយការធ្វើដំណើរ និងចំណាយផ្សេងៗ។ កត្តាទាំងនេះ បានជួយលើកកម្ពស់សេដ្ឋកិច្ចជាតិ ព្រមទាំងជួយកាត់បន្ថយនូវភាពក្រីក្រ ជាផ្នែកមួយសំខាន់ ក្នុងការអភិវឌ្ឍន៍ប្រទេសជាតិ ស្របតាមគោលនយោបាយ របស់រាជរដ្ឋាភិបាល ក្រោមការដឹកនាំដ៏ត្រឹមត្រូវប្រកបដោយគតិបណ្ឌិត របស់សម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងជាកុលបុត្រដ៏ឆ្នើមរបស់កម្ពុជា នាយុគសម័យនេះ។
ជាការពិតណាស់ថា ការចូលរួមបរិច្ចាគធនធនរបស់សប្បុរសជន ដែលកើតចេញពីបេះដូងពិត គឺជាគម្រូដ៏ល្អ និងមានតម្លៃណាស់ ក្នុងការអភិវឌ្ឍន៍ខេត្ត និងវិស័យសុខាភិបាលក្នុងខេត្តរបស់យើង ឱ្យកាត់តែមានលក្ខណៈទំនើប និងស្រស់បំព្រងឈានឡើង និងសូមប្រសិទ្ធិពរជ័យ បវរសួស្តី មហាប្រសើរគ្រប់ប្រការ ជូនចំពោះ លោក លោកស្រី សូមមានសុខភាពល្អបរិបូរណ៌ កម្លាំងមាំមួន និងទទួលបាននូវពុទ្ធពរទាំងបួនប្រការគឺ៖ អាយុ វណ្ណៈសុខៈ និងពលៈ កុំបីឃ្លៀងឃ្លាតឡើយ។

ប្រភព ៖ រដ្ឋបាលខេត្តពោធិ៍សាត់

25/08/2025

ព្រឹកថ្ងៃទី២៤ ខែសីហា ឆ្នាំ២០២៥ លោក សាមុត សុធារិទ្ធ អភិបាលរង នៃគណៈអភិបាលខេត្តព្រះសីហនុ អញ្ជើញសំណេះសំណាល និងនាំយកថវិការបស់សម្តេចធិបតី ហ៊ុន ម៉ាណែត និងលោកជំទាវបណ្ឌិតឧបត្ថម្ភជូនពលករ ដែលវិលត្រឡប់មកពីប្រទេសថៃចំនួន ៨៩នាក់ នៅផ្សារសាមគ្គីកោះគ្រួស ភូមិបឹងតាស្រី សង្កាត់បឹងតាព្រហ្ម ក្រុងកំពង់សោម ខេត្តព្រះសីហនុ។
លោក នួន ប៊ុនថុល អភិបាលក្រុងកំពង់សោម បានធ្វើរបាយការណ៍សង្ខេប ស្តីពីពលករខ្មែរដែលវិល ត្រឡប់មកពីប្រទេសថៃ ចាប់ពីថ្ងៃទី២៤ ខែមិថុនា រហូតដល់ថ្ងៃទី២៣ ខែសីហា ឆ្នាំ២០២៥ រដ្ឋបាលក្រុងទទួលពលករចំណាកស្រុកមកពីប្រទេសថៃមានចំនួន ១១៣នាក់ ស្រី ៤៧នាក់ ក្នុងនោះ ១.សង្កាត់បិតត្រាំងមានចំនួន ២៦នាក់ ស្រី ១១នាក់ ២.សង្កាត់រាម ចំនួន ៤៨នាក់ ស្រី ២២នាក់ ៣.សង្កាត់អូរឧកញ៉ាហេង ១៩នាក់ ស្រី ០៩នាក់ ៤.សង្កាត់បឹងតាព្រហ្មចំនួន ០៦នាក់ ស្រី ០១នាក់ ៥.សង្កាត់អូរជ្រៅចំនួន ១៤នាក់ ស្រី ០៤នាក់។
លោកអភិបាលក្រុងកំពង់សោមបានបញ្ជាក់ថា ក្នុងចំណោមពលករចំណាកស្រុកមកពីប្រទេសថៃទាំង ១១៣នាក់ ពួកគាត់ប្រកបមុខរបរផ្ទាល់ចំនួន ១៦នាក់ ស្រី ០៥នាក់ មានការងារធ្វើចំនួន ៥១នាក់ ស្រី ២០នាក់ មិនទាន់មានការងារ ០៤នាក់ ស្រី ០១នាក់ សុំសម្រាក ០៦នាក់ ហើយអ្នកកំពង់ស្វែងរកការងារ ១១នាក់ ស្រី ០៦នាក់ និងពលករធ្វើដំណើរទៅកាន់ខេត្តផ្សេងចំនួន ០៥នាក់ ។
លោក សាមុត សុធារិទ្ធ អភិបាលរងខេត្តព្រះសីហនុ បានធ្វើការសំណេះសំណាល និងពាំនាំការផ្តាំផ្ញើសួសុខទុក្ខ និងសេចក្តីនឹករលឹកពីសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងលោកជំទាវបណ្ឌិត ជូនចំពោះបងប្អូនពលករដែលបានវិលត្រឡប់មកពីប្រទេសថៃនាពេលនេះ ជាពិសេសការយកចិត្តទុកដាក់ពីឯកឧត្តម ម៉ាង ស៊ីណេត អភិបាលខេត្តព្រះសីហនុ បានចាត់ឱ្យកម្លាំងយកឡានទៅទទួលបងប្អូនពលករខ្មែរនៅតាមច្រកព្រំដែនកម្ពុជា ថៃ ដឹកជញ្ជូនមកកាន់ស្រុកកំណើតវិញ ទន្ទឹមនោះឯកឧត្តម អភិបាល ខេត្ត ក៏បានធ្វើការណែនាំដល់អាជ្ញាធរក្រុង ស្រុក ក៏ដូចជាមន្ទីរជំនាញពាក់ព័ន្ធនានាជួយសម្របសម្រួលនូវឯកសារពាក់ព័ន្ធនានា ដើម្បីឱ្យបងប្អូនចូលបំរើការងារនៅតាមរោងចក្រ សហគ្រាសនានាក្នុងខេត្តព្រះសីហនុ ព្រោះខេត្តព្រះសីហនុ នៅមានកន្លែងការងារជាង ៦ ០០០កន្លែងនៅរង់ចាំទទួលបងប្អូន។
លោកអភិបាលរងខេត្ត បានបញ្ជាក់ថា ខេត្តព្រះសីហនុ ត្រូវបានរាជរដ្ឋាភិបាលរៀបចំផែនការមេ ជាតំបន់សេដ្ឋកិច្ចពិសេសគំរូពហុបំណង ដែលមានតំបន់សេដ្ឋកិច្ចពិសេសចំនួន៥ ទន្ទឹមនោះរាជរដ្ឋាភិបាល បានបង្កើតសាលាបណ្តុះបណ្តាលបច្ចេកទេស ដើម្បីឱ្យយុវជនរបស់យើងបានចូលរៀនវគ្គបណ្តុះបណ្តាលឱ្យមានចំណេះ ជំនាញច្បាស់លាស់ ដើម្បីបង្កើនធនធានមនុស្ស ស្របទៅនឹងគោលនយោបាយបញ្ជកោណដំណាក់កាលទី១ នៃរដ្ឋសភា ដោយផ្តោតសំខាន់ទៅលើ ធនធានមនុស្ស ផ្លូវ ទឹក ភ្លើង និងបច្ចេកវិទ្យា។
លោក អភិបាលរងខេត្ត បានបន្តថា ខេត្តព្រះសីហនុ មានការងារជាង ៦ពាន់កន្លែងនៅរង់ចាំទទួលបងប្អូន ទន្ទឹមនោះរដ្ឋបាលខេត្តចង់ឱ្យបងប្អូនងាកមករកការងារធ្វើនៅស្រុក ដើម្បីបង្កើនសេដ្ឋកិច្ចសង្គមរបស់កម្ពុជា ហើយបច្ចុប្បន្នកម្ពុជានៅខ្វះកម្លាំងពលកម្មជាច្រើននៅតាមបណ្តារោងចក្រ ព្រោះទីផ្សារនៅស្រុកយើងនៅខ្វះកម្លាំងពលកម្មជាច្រើន ទន្ទឹមនោះរាជរដ្ឋាភិបាលបានដាក់ចេញនូវរបបសន្តិសុខសង្គម ប្រាក់សោធមននិវត្តន៍ជូនដល់បុគ្គលិក កម្មករដែលបំរើការងារនៅតាមរោងចក្រ សហគ្រាស និងការងារក្រៅប្រព័ន្ធទទួលបាននូវអត្ថប្រយោជន៍ ៣យ៉ាងមានដូចជា ១.អត្ថប្រយោជន៍ផ្នែកសុខភាព ២.អត្ថប្រយោជន៍គ្រោះថ្នាក់ការងារ ៣.ប្រាក់សោធននិវត្តន៍ ហើយកម្មករ និយោជិតទាំងអស់ទទួលបានអត្ថប្រយោជន៍ប្រាក់សោធននិវត្តន៍គ្រប់ៗគ្នាដូចមន្ត្រីរាជការដែរ។
ក្នុងឱកាសនោះ លោក អភិបាលរងខេត្ត នាំយកអំណោយរបស់សាខាកាកបាទក្រហមកម្ពុជា ខេត្តព្រះសីហនុ ចែកជូនពលករខ្មែរដែលវិលត្រឡប់មកពីប្រទេសថៃចំនួន ៨៩នាក់ ក្នុងម្នាក់ទទួលបាន អង្ករ ២៥គីឡូក្រាម មី ១កេស ទឹកត្រី ១យួរ កន្ទេល១ ឃីតមួយកញ្ចប់ ( ក្រមា១ សារុង១ មុង១ ភួយ១ ) និងថវិកាសម្តេចធិបតី ហ៊ុន ម៉ាណែត និងលោកជំទាវបណ្ឌិត ជូនពលករទាំង ៨៩នាក់ ក្នុងម្នាក់ទទួលបានថវិកា ១០ម៉ឺនរៀល៕

ប្រភព ៖ រដ្ឋបាលខេត្តព្រះសីហនុ

25/08/2025

ព្រឹកថ្ងៃទី២៣ ខែសីហា ឆ្នាំ២០២៥ ឯកឧត្តម សួន សុម៉ាលីន អភិបាល នៃគណៈអភិបាលខេត្តព្រៃវែង រួមជាមួយឯកឧត្តម លោកជំទាវ អភិបាលរងខេត្ត ព្រមទាំងក្រុមការងារ បានអញ្ជើញចូលរួមពិធីដង្ហែក្បួនថ្មើរជើងដើម្បីសន្តិភាព ដែលប្រព្រឹត្តទៅនៅស្រុកពាមរក៍ ខេត្តព្រៃវែង។ ការដង្ហែក្បួននេះ ធ្វើឡើងក្នុងគោលបំណង ជាការដឹងគុណយ៉ាងជ្រាលជ្រៅចំពោះវីរៈកងទ័ពជួរមុខដ៏អង់អាចក្លាហាន ដែលបានខិតខំយកចិត្តទុកដាក់បំពេញតួនាទីភារកិច្ចប្រកបដោយការទទួលខុសត្រូវ ក្នុងកិច្ចការរក្សាការពារបូរណភាពទឹកដី អធិបតេយ្យភាព និងដើម្បីបង្ហាញយ៉ាងច្បាស់នូវស្មារតីស្នេហាជាតិ សាមគ្គីឯកភាពជាតិ ជាពិសេសបង្ហាញពីឆន្ទៈមនសិកា ទៅកាន់ពិភពលោកទាំងមូលពីការស្រឡាញ់សន្តិភាពរបស់ប្រជាជនកម្ពុជា
ដោយមានការនិមន្ត អញ្ជើញចូលរួមពីសំណាក់៖ ព្រះសង្ឃ ឯកឧត្តម លោកជំទាវ អភិបាលរងខេត្ត និងក្រុមការងាររដ្ឋបាលសាលាខេត្ត ក្រុមប្រឹក្សាស្រុក អភិបាលនៃគណៈអភិបាលស្រុក និងមន្ត្រីរាជការសាលាស្រុក កងកម្លាំងទាំងបីថ្នាក់ស្រុក ក្រុមប្រឹក្សាឃុំ មេភូមិ លោកគ្រូ អ្នកគ្រូ សិស្សានុសិស្ស និងអ៊ុំពូមីង បងប្អូនប្រជាពលរដ្ឋ សរុបចំនួនប្រមាណ ៧.០០០អង្គ/រូប។

ប្រភព ៖ រដ្ឋបាលខេត្តព្រៃវែង

25/08/2025

ព្រឹកថ្ងៃទី២៤ ខែសីហា ឆ្នាំ២០២៥ លោក យូសុះ សូឡៃម៉ាន អភិបាលរងខេត្តព្រះសីហនុ អញ្ជើញបើកវិញ្ញាសាប្រឡងជ្រើសរើសមន្ត្រីពន្ធនាគារខេត្តព្រះសីហនុ នៅវិទ្យាល័យចំណេះដឹងទូទៅ និងបច្ចេកទេសក្រុងព្រះសីហនុ។
តាមគណៈកម្មការប្រឡងជ្រើសរើសមន្ត្រីពន្ធនាគារខេត្តព្រះសីហនុ បានឱ្យដឹងថា បេក្ខជនដែលបានដាក់ពាក្យប្រឡងមន្ត្រីពន្ធនាគារមានចំនួន ១៤៤នាក់ ស្រី ៥៧នាក់ ក្នុងនោះមកពីខេត្តកោះកុងចំនួន ២០នាក់ ចំពោះវិញ្ញាសាមានរយៈពេល ២ម៉ោង ក្នុងនោះចំណេះដឹងទូទៅ ៣០ភាគរយ និងពាក់ព័ន្ធពន្ធនាគារ ៧០ភាគរយ។
ក្នុងឱកាសនោះ លោក យូសុះ សូឡៃម៉ាន អភិបាលរងខេត្ត មានប្រសាសន៍ថា វិញ្ញាសាប្រឡងនាពេលនេះ គឺត្រឹមត្រូវមិនមានការរហែកនោះទេ ដូច្នេះសូមឱ្យបេក្ខជនទាំងអស់ត្រូវខិតខំបញ្ចេញនូវសមត្ថភាពរបស់ខ្លួនក្នុងការប្រឡងឱ្យទទួលបានលទ្ធផលល្អគ្រប់ៗគ្នា ព្រោះការប្រឡងនេះទៀតសោត ប្រសិនបើយើងចេះ យើងនឹងប្រឡងជាប់ជាក់ជាមិនខាន៕

ប្រភព ៖ រដ្ឋបាលខេត្តព្រះសីហនុ

25/08/2025

ឯកឧត្ដម ថង សាវុន អភិបាល នៃគណៈអភិបាលខេត្ត អញ្ជេីញចុះសួរសុខទុក្ខកងស្ថាបនាផ្លូវថ្នល់លេខ៧១៨ ចំណុះបញ្ជាការដ្ឋានវិស្វកម្មអគ្គបញ្ជាការ ដែលកំពុងស្ថាបនាផ្លូវតាមក្រវ៉ាត់ព្រំដែន ក្នុងភូមិសាស្រ្តខេត្តមណ្ឌលគិរី និងកងកំលាំងតាមប៉ុស្តិ៍ព្រំដែន
នៅរសៀលថ្ងៃអាទិត្យ ១កើត ខែភទ្របទ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី២៤ ខែសីហា ឆ្នាំ២០២៥ ឯកឧត្ដម ថងសាវុន សែនមនោរម្យ អភិបាល នៃគណៈអភិបាលខេត្ត អមដំណើរដោយមេបញ្ជាការតំបន់ប្រតិបត្តិការសឹករងខេត្ត ស្នងការនគបាលខេត្ត និងលោកអភិបាលស្រុកពេជ្រាដាបានអញ្ជេីញចុះសួរសុខទុក្ខនិងនាំយកសម្ភារៈ រួមមាន អង្ករ ត្រីខ មី ទឹកសុទ្ធ ទឹកត្រី ទឹកស៊ីអ៉ីវ ឆៃពៅ និងថវិកាមួយចំនួន ជូនកងស្ថាបនាផ្លូវថ្នល់លេខ៧១៨ចំណុះបញ្ជាការដ្ឋានវិស្វកម្មអគ្គបញ្ជាការ ដែលកំពុងស្ថាបនាផ្លូវតាមក្រវ៉ាត់ព្រំដែន ក្នុងភូមិសាស្រ្តខេត្តមណ្ឌលគិរី ប៉ុស្តិ៍សង្កេតការណ៍ អូរណាវ ចំណុះអនុសេនាតូចលេខ២ និងប៉ុស្តិ៍នគរបាលការពារព្រំដែនគោកប៊ូស្រា ចំណុះវរៈសេនាតូចការពារព្រំដែនគោកលេខ ៣០៣ ។

ប្រភព ៖ រដ្ឋបាលខេត្តមណ្ឌលគិរី

25/08/2025

ដាក់អាវភ្លៀងតាមខ្លួនផង! កម្ពុជាទទួលឥទ្ធិពលតិចតួចពីព្យុះទី ១៣ ឈ្មោះ «កាជិគី» អាចមានភ្លៀងធ្លាក់ផ្គររន្ទះ ខ្យល់កន្ត្រាក់ ស្ទើរគ្រប់ខេត្តក្រុង

សូមគោរពជម្រាបជូនអំពីស្ថានភាពធាតុអាកាសនៅព្រះរាជាណាចក្រកម្ពុជា សម្រាប់ថ្ងៃទី២៥ ខែសីហា ឆ្នាំ២០២៥៖
ព្យុះទី១៣ឈ្មោះ កាជិគី (Kajiki) T2513 ក្នុងឆ្នាំ២០២៥ បានវិវត្តទៅជាព្យុះសង្ឃរាដែលមានឥទ្ធិពលលើសមុទ្រអានដាមម៉ែន ឈូងសមុទ្រថៃ អាងទន្លេមេគង្គ លើរបបខ្យល់មូសុងនិរតី និងព្រះរាជាណាចក្រកម្ពុជា។ គន្លងផ្លូវដើររបស់ព្យុះសង្ឃរា កាជិគី នេះ ពុំមានឥទ្ធិពលខ្លាំងមកលើព្រះរាជាណាចក្រកម្ពុជានោះទេ។

ប្រភព ៖ ក្រសួងធនធានទឹក និងឧតុនិយម/Ministry of Water Resources and Meteorology

25/08/2025

ឯកឧត្តម គួចចំរើន/KuochChamroeun ជំរុញដល់ក្រុមការងារបច្ចេកទេសសាងសង់ប្រព័ន្ធលូទឹកភ្លៀង ពន្លឿនការសាងសង់ឱ្យរួចរាល់មុនការប្រឡងសញ្ញាបត្រមធ្យមសិក្សាទុតិយភូមិ នាពេលខាងមុខនេះ ដើម្បីជួយរំដោះទឹកភ្លៀង មិនឱ្យលិចនៅមណ្ឌលប្រឡង ដែលតែងតែរងការជនលិចជារៀងរាល់ឆ្នាំ!
ខេត្តកណ្តាល៖ ក្នុងឱកាសចុះត្រួតពិនិត្យវឌ្ឍនភាពគម្រោងដាក់លូ រំដោះទឹកភ្លៀង នៅតាមបណ្តោយផ្លូវលេខ១០៨ និងផ្លូវជាតិលេខ២១A ស្ថិតនៅក្រុងតាខ្មៅ ខេត្តកណ្ដាល នាព្រឹកថ្ងៃទី២៤ ខែសីហា ឆ្នាំ២០២៥ ឯកឧត្តម គួច ចំរើន អភិបាល នៃគណៈអភិបាលខេត្តកណ្ដាល ណែនាំដល់ក្រុមការងារបច្ចេកទេសសាងសង់ប្រព័ន្ធលូ ពន្លឿនការសាងសង់ឱ្យរួចរាល់មុនការប្រឡងសញ្ញាបត្រមធ្យមសិក្សាទុតិយភូមិ ដែលនឹងប្រព្រឹត្តទៅនៅថ្ងៃទី២៨ ខែសីហា ឆ្នាំ២០២៥នេះ ដើម្បីជួយរំដោះទឹកភ្លៀង មិនឱ្យលិចនៅមណ្ឌលប្រឡង ដែលបង្កឱ្យមានការលំបាក ប៉ះពាល់ដល់អារម្មណ៍ របស់សិស្សានុសិស្សដែលត្រូវមកប្រលង។
ឯកឧត្តមអភិបាលខេត្តកណ្ដាល បន្តថា៖ ជារៀងរាល់ឆ្នាំក្នុងតំបន់នេះ នារដូវវស្សាម្ដងៗ តែងតែរងនូវការជន់លិចដោយជំនន់ទឹកភ្លៀង ពិសេសវិទ្យាល័យ ហ៊ុន សែន តាខ្មៅ និងវិទ្យាល័យ ហ៊ុន សែន សេរីភាព ដែលជាមណ្ឌលប្រលងសញ្ញាបត្រមធ្យមទុតិយភូមិ ដែលតែងតែរងការជនលិច និងបង្កផលវិបាកដល់សិស្សានុសិស្សពេលប្រឡង ពិសេសបានធ្វើឱ្យប្រជាពលរដ្ឋនៅតំបន់នេះជួបការលំបាកក្នុងការធ្វើដំណើរ ខូចខាតសម្ភារៈពេលទឹកជន់លិច និងពេលមានភ្លៀងខ្លាំងម្ដងៗ ដូច្នេះក្រុមការងារបច្ចេកទេសដែលកំពុងអនុវត្តគម្រោង ក្នុងការសាងសង់ប្រព័ន្ធរំដោះទឹកភ្លៀង សូមពន្លឿនការសាងសង់ឱ្យបានលឿននឹងត្រូវរួចរាល់មុនការប្រលងសញ្ញាបត្រមធ្យមសិក្សាទុតិយភូមិនៅឆ្នាំនេះ ប្រកបដោយស្តង់ដារបច្ចេកទេស ដើម្បីធានាឱ្យប្រព័ន្ធលូរំដោះទឹកនេះ បានរំដោះទឹកភ្លៀងបញ្ជៀសការជន់លិច កាត់បន្ថយការលំបាករបស់សិស្សានុសិស្ស និងប្រជាពលរដ្ឋនៅតំបន់នេះផងដែរ។
ជាមួយគ្នានេះដែរ ឯកឧត្តមអភិបាលខេត្តកណ្ដាល បានសូមការយោគយល់អធ្យាស្រ័យពីប្រជាពលរដ្ឋនៅក្នុងក្រុងតាខ្មៅ ក៏ដូចជាប្រជាពលរដ្ឋដែលធ្វើដំណើរឆ្លងកាត់ ក្នុងដំឡុងពេលអនុវត្តគម្រោង ដែលធ្វើឱ្យប៉ះពាល់ដល់ការធ្វើដំណើរ ការប្រកបរបរចិញ្ចឹមជីវិត បង្ករការរំខានដល់ការរស់នៅ ប៉ុន្តែពេលគម្រោងនេះអនុវត្តរួចរាល់ តំបន់នេះអាចនឹងជៀសផុតការជន់លិចដោយទឹកភ្លៀង ដែលតែងតែលិចជារៀងរាល់ឆ្នាំ។
តាមការបញ្ជាក់របស់ក្រុមការងារអនុវត្តគម្រោងលូរំដោះទឹកភ្លៀងនេះ មានប្រវែង៧៩០ម៉ែត្រ ដោយបានដាក់លូជ្រុងទំហំ ២ម៉ែត្រ x២ម៉ែត្រ ដែលមានសមត្ថភាពអាចរំដោះទឹកភ្លៀងបានពី ៥០០០ម៉ែត្រគូប ទៅ៦០០០ម៉ែត្រគូប ក្នុង១ម៉ោង ហើយនៅពេលគម្រោងនេះអនុវត្តរួច តំបន់នេះនឹងលែងមានការជន់លិចដោយជំនន់ទឹកភ្លៀងទៀតហើយ។

ប្រភព ៖ រដ្ឋបាលខេត្តកណ្តាល

ILoveCambodia

25/08/2025

25/08/2025

25/08/2025

25/08/2025

25/08/2025

25/08/2025

25/08/2025

25/08/2025

25/08/2025

25/08/2025

25/08/2025

25/08/2025

Address

Website

Alerts

Contact The Business

Shortcuts

Share