03/01/2020
ការអានសៀវភៅមិនមែនដើម្បីមានទ្រឹស្ដីកាន់តែច្រើននោះទេ ប៉ុន្តែដើម្បីជួយជីវិតរបស់យើងកាន់តែច្រើន ជាពិសេសបើកគំនិតរបស់យើងអោយធំជាងមុន។ បើអ្នកអានកាន់តែច្រើន គឺកាន់តែល្អ ប៉ុន្តែបើអ្នកមិនធ្លាប់ឬអានសៀវភៅមិនដែរចប់ អ្នកអាចសាកល្បងអានមួយខែ មួយក្បាលវាអាចជួយអ្នកដូចជា៖
១).ធ្វើអោយយើងសម្លឹងឃើញវែងឆ្ងាយ ៖
ការអានសៀវភៅមួយខែមួយក្បាល អាចជួយយើងអោយពូកែគិត ពូកែសម្លឹងឃើញនូវអ្វីដែលមនុស្សទូទៅមើលមិនឃើញ ជាពិសេសគឺឱកាសសម្រាប់អនាគត។
២).បង្កើតភាពឆ្លាតវៃផ្នែកអារម្មណ៍៖
ភាពឆ្លាតវៃផ្នែកអារម្មណ៍គឺ ជាការចេះប្រើប្រាស់និងគ្រប់គ្រងអារម្មណ៍របស់ខ្លួនអោយត្រូវតាមស្ថានភាព។ អានកាន់ច្រើន គំនិតរបស់យើងបើកកាន់តែច្រើនអំពីរបៀបដែលមនុស្សគ្រប់គ្រងអារម្មណ៍របស់ខ្លួន។ បើយោងតាមលោក ដានីអែល ហ្គោលម៉ែន( Daniel Goleman ) ដែលជាអ្នកនិពន្ធសៀវភៅ ភាពឆ្លាតវៃផ្នែកអារម្មណ៍ បានបញ្ចាក់ថា ភាពឆ្លាតផ្នែកអារម្មណ៏គឺសំខាន់ជាងការវាស់វែងនៃគំនិតប្រាជ្ញាទៅទៀត។
៣).ធ្វើអោយយើងស្គាល់ខ្លួនឯង ហើយនិងអ្វីដែលជុំវិញខ្លួនយើងប្រសើរជាងមុន៖
សៀវភៅមួយក្បាលប្រហែលជាមិនអាចជួយអ្នកបានទេ ប៉ុន្តែបើអ្នកអានមួយខែមួយក្បាល វានឹងសន្សុំអោយអ្នករហូតដល់អ្នកមើលឃើញខ្លួនឯង និងសង្គមជុំវិញប្លែកខុសពីធម្មតា។ វាមានន័យថាអ្នកអាចស្គាល់ខ្លួនឯង និងសង្គមខាងក្រៅបានប្រសើរជាងមុន។
៤). ជួយយើងអោយចេះរៀបចំផែនការទូទៅ៖
យើងត្រូវរៀបចំផែនការ ទាំងផែនការផ្ទាល់ខ្លួន ផែនការការសិក្សា ផែនការគ្រួសារ និងផែនការងារជាដើម។ នៅពេលរៀបចំផែនការ យើងប្រហែលជាអស់គំនិត មិនដឹងត្រូវធ្វើយ៉ាងដូចម្ដេច ប៉ុន្តែក្រោយអ្នកអានសៀវភៅរួចហើយ វាអាចជាជំនួយដល់អ្នក ដោយផ្ដល់អោយអ្នកនូវគំនិតបន្ថែមថ្មីៗ។
៥). បង្កើនភាពរឹងមាំ និងមិនងាយចុះចាញ់និងឧបសគ្គ
ភាគច្រើននៃសៀវភៅ ជាពិសេសសៀវភៅរឿងតស៊ូជាដើម វាជួយយើងអោយមានផ្នត់គំនិតថ្មីមួយថាខ្លួនយើងអាចធ្វើបាន ដោយគ្រាន់តែស៊ូទ្រាំយកឈ្នះលើបញ្ហា ព្រោះយើងជឿថា បើគេអាចធ្វើបាន យើងក៏អាចធ្វើបានដូចគ្នា។
៦). ជំរុញទឹកចិត្តយើង
មានមនុស្សជាច្រើនដែលជួបបញ្ហាពិបាកដោះស្រាយក្នុងជីវិត ហើយបន្ទាប់ពីជោគជ័យ ក៏មានគំនិតក្នុងការសរសេរសៀវភៅដើម្បីជំរុញចិត្តមនុស្សដែលកំពុងតែជួបបញ្ហាពិបាកដោះស្រាយដូចខ្លួនកាលពីមុនដែរ។ ដូច្នេះបើយើងស្វែងរក ក្នុងការអានសៀវភៅរបស់ពួកគាត់ អ្នកអាចនិងទទួលបាននូវការជម្រុញចិត្តដើម្បីជម្នះលើបញ្ហាដែលអ្នកកំពុងជួប។
៧).ផ្ដល់អោយយើងនូវគំនិត និងចំណេះដឹងថ្មីៗ
គំនិត និងចំណេះជាច្រើនដែលយើងមិនដែលដឹងនៅលើពិភពលោក។ បើអ្នកចំណាយពេលអានសៀវភៅត្រឹមតែមួយក្បាលក្នុងមួយខែ វាអាចជួយអ្នកអោយទទួលបាននូវគំនិត និងចំណេះដឹងថ្មីៗ ដែលមនុស្សភាគច្រើនដែលមិនបានអាន គឺមិនបានដឹង។
