https://www.mangomedia.net/app.html

MGO News, https://maps. app. goo. gl/qoFbaUbnmq8o3q8F 7, Phnom Penh (2025)

Q: What is the address?

Https://maps. App. Goo. Gl/qoFbaUbnmq8o3q8F 7

28/02/2023

ឱសថព្យាបាលជំងឺផ្ដាសាយបក្សី H5N1 ចំនួន ៣ពាន់ដូស ដែលជាជំនួយរបស់អង្គការWHO ត្រូវបានបញ្ជូនមកដល់កម្ពុជាហើយ
--------------
រាជធានីភ្នំពេញ៖ ឱសថព្យាបាលជំងឺផ្ដាសាយបក្សី H5N1 ដែលជាជំនួយរបស់អង្គការសុខភាពពិភពលោក (WHO) ត្រូវបានបញ្ជូនមកដល់ប្រទេសកម្ពុជា នៅល្ងាចថ្ងៃទី២៧ ខែកុម្ភៈ ឆ្នាំ២០២២៣នេះ។ ការផ្ដល់ជំនួយវេជ្ជសាស្ត្ររបស់ អង្គការសុខភាពពិភពលោក បានធ្វើឡើងបន្ទាប់ពីប្រទេសកម្ពុជា បានរកឃើញ ករណីផ្ដាសាយបក្សី H5N1 ដោយមានកុមារីម្នាក់បានស្លាប់ នៅក្នុងខេត្តព្រៃវែង។

លោកស្រី យក់ សម្បត្តិ រដ្ឋលេខាធិការក្រសួងសុខាភិបាល បានបញ្ជាក់ឲ្យដឹងថា ការដឹកជញ្ជូនមកដល់នៃឱសថព្យាបាលជំងឺផ្ដាសាយបក្សីនេះ ត្រូវបានទទួលដោយក្រុមការងារនាយកដ្ឋានប្រយុទ្ធប្រឆាំងជំងឺឆ្លង នៃក្រសួងសុខាភិបាល។ លោកស្រីបានបញ្ជាក់បន្ថែមទៀតថា ឱសថទាំងនេះ នឹងត្រូវបញ្ជូនបែងចែកសហគមន៍ដែលមានការសង្ស័យពាក់ព័ន្ធទៅនឹងជំងឺផ្ដាសាយបក្សី ដូចជាស្រុកស៊ីធរកណ្ដាល ខេត្តព្រៃវែងជាដើម។

ទោះជាយ៉ាងនេះក្តី ក្រោយការតាមដានយ៉ាងយកចិត្តទុកដាក់ របស់ក្រសួងសុខាភិបាល ទៅលើករណីជំងឺផ្ដាសាយបក្សីនៅខេត្តព្រៃវែង លោកស្រីបានបញ្ជាក់ថា ស្ថានភាពជំងឺផ្ដាសាយបក្សីនេះ មិនមានសភាពគួរឲ្យព្រួយបារម្ភនោះទេ។

សូមបញ្ជាក់ថា កាលពីថ្ងៃទី២២ ខែកុម្ភៈ កន្លងទៅនេះ មានកុមារីម្នាក់បានស្លាប់បាត់បង់ជីវិត បន្ទាប់ពីការធ្វើរោគវិនិច្ឆ័យឃើញថា កើតជំងឺផ្តាសាយបក្សី H5N1។ ជំងឺផ្តាសាយបក្សី H5N1 មួយករណីនេះ កើតលេីកុមារីអាយុ ១១ឆ្នាំ ៦ខែ រស់នៅភូមិរលាំង ឃុំរំលេច ស្រុកស៊ីធរកណ្តាល ខេត្តព្រៃវែង។

ក្រោយករណីនេះ ក្រុមការឆ្លើយតបបន្ទាន់របស់ក្រសួងសុខាភិបាល បានរកឃើញមនុស្ស ១២នាក់ ដែលបានប៉ះពាល់ជាមួយកុមារីកើតជំងឺផ្តាសាយបក្សី H5N1 នៅក្នុងខេត្តព្រៃវែង។ ក្នុងនោះអ្នកប៉ះពាល់ ៤នាក់ បានចាប់ផ្តើមចេញរោគសញ្ញា៕

ប្រភព៖ freshnews
--------------
#ពត៌មាន

28/02/2023

ដឹងមូលហេតុហើយ! ករណីអគ្គិភ័យឆេះផ្ទះជាន់ទី២ ផ្អើលសង្កាត់មនោរម្យ
-------------
រាជធានីភ្នំពេញ ៖ ផ្ទះល្វែងជាន់ទី២ ត្រូវបានអណ្តាតភ្លើងឆាបឆេះក្រហមឆ្អៅចេញពីក្នុងផ្ទះ បង្កការភ្ញាក់ផ្អើលប្រជាពលរដ្ឋ និងរថយន្តពន្លត់អគ្គីភ័យចេញអន្តរាគមន៍ភ្លាមៗផងដែរ កាលពីវេលាម៉ោងនិង៤៥នាទីយប់ ថ្ងៃទី២៧ ខែកុម្ភៈ ឆ្នាំ២០២៣ នៅចំណុចផ្លូវ១៣៤ កែងផ្លូវលេខ១០៩ ផ្ទះជាន់ទី២ សង្កាត់មនោរម្យ ខណ្ឌ៧មករា ។

យោងតាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុ គេបានប្រទះឃើញផ្សែងហ៊ុយខ្លាំង ហើយភ្លាមៗនោះអណ្តាតភ្លើងពណ៌ក្រហមឆ្អៅបានឆាបឆេះយ៉ាងសន្ធោសន្ធៅចេញពីបន្ទប់ជាន់ទី២នៃផ្ទះកើតហេតុខាងលើ ត្រូវបានប្រជាពលរដ្ឋនាំគ្នាជួយពន្លត់ជាបឋម និងរាយការណ៍ទៅសមត្ថកិច្ចមូលដ្ឋាន ដើម្បីសុំជំនួយពីរថយន្តពន្លត់អគ្គីភ័យផងដែរ។

លោកវរសេនីយ៍ឯក ព្រហ្ម យ៉ន នាយការិយាល័យបង្ការពន្លត់អគ្គិភ័យនិងសង្គ្រោះ នៃស្នងការដ្ឋាននគរបាលរាជធានីភ្នំពេញ បានឱ្យដឹងថា ពេលទទួលបានដំណឹងភ្លាមៗលោកបានបញ្ចេញរថយន្តគ្រប់គោលដៅដើម្បីចេញជួយអន្តរាគមន៍ តែទោះជាយ៉ាងណាអណ្ដាតភ្លើងបានឆាបឆេះសម្ភារៈខាងក្នុងផ្ទះទាំងស្រុងទៅហើយ ទើបពន្លត់រលត់ជាស្ថាពរ ។

នៅក្នុងហេតុការណ៍ខាងលើនេះដែរ ទំហំនៃការខូចខាត ទីតាំងផ្ទះខាងលើជាប្រភេទសំណង់ ថ្មបេតុង ទំហំ៤ម៉ែត្រការ៉េx១២ម៉ែត្រ ត្រូវបានអគ្គិភ័យឆាបឆេះបំផ្លាញអស់សម្ភារៈទាំងស្រុង។ ចំពោះរថយន្តពន្លត់អគ្គិភ័យទៅដល់ទីតាំងកើតហេតុមានចំនួន០៨គ្រឿង នឹងប្រើប្រាស់រថយន្តពន្លត់អស់ ០៤គ្រឿងស្មើរនឹង ១៦ម៉ែត្រគូប ទើបរលត់ជាស្ថាពរ ។ ក្នុងប្រតិបតិ្តការពន្លត់អគ្គិភ័យនេះដែរ រថយន្ដជួយចេញអន្តរាគមន៏ រួមមានរថយន្តសាលាខណ្ឌ៧មករាចំនួន១គ្រឿង ប្រើប្រាស់ទឹកអស់ចំនួន១ឡាន ស្មើនឹង៤ម៉ែត្រគូប រថយន្តអូឡាំព្យាចំនួន២គ្រឿងប្រើប្រាស់ទឹកអស់ចំនួន២គ្រឿង ស្មើនឹង៨ម៉ែត្រគូប ។

គួរបញ្ជាក់ផងដែរថា នៅពេលភ្នាក់ងារអន្តរាគមន៍យករថយន្តមកដល់ទីតាំងកើតហេតុ បែរជាជួបឧបសគ្គដ៏ធំនោះគឺ សំបុកខ្សែកាបអុបទិច ដូចសំបុកពីងពាង ទាក់ពេញដងជណ្តើររថយន្តពន្លត់អគ្គិភ័យ ធ្វើឲ្យពិបាកដល់មន្ត្រីជំនាញ ព្រមទាំងខាតបង់ពេលវេលាអន្តរាគមន៍ផងដែរ។

មន្ត្រីជំនាញបានឲ្យដឹងថា ករណីខាងលើនេះ បណ្តាលមកពីឆ្លងចរន្តអគ្គិសនី ឆេះខូចខាតទ្រព្យសម្បត្តិអស់ទាំងស្រុង និងពុំបានរាលដាលដល់ផ្ទះជិតខាង ព្រមទាំងមិនបង្កអោយនរណាម្នាក់រងរបួសនោះទេ៕

ប្រភព koh santepheap daily
-------------
#ពត៌មាន

28/02/2023

ចាប់ពីថ្ងៃទី១ ដល់ថ្ងៃទី៧ ខែមីនា អាកាសធាតុអាចនឹងក្តៅហើយស្ងួត ករណីបើមានភ្លៀង ក៏ស្ថិតក្នុងកម្រិតខ្សោយដោយអន្លើតែប៉ុណ្ណោះ
-------------
រាជធានីភ្នំពេញ៖ យោងតាមការចុះផ្សាយរបស់ ក្រសួងធនធានទឹក និងឧតុនិយម នៅថ្ងៃទី២៨ ខែកុម្ភៈ ឆ្នាំ២០២៣ បានចេញសេចក្ដីជូនដំណឹង ស្ដីពីស្ថានភាពធាតុអាកាស ចាប់ពីថ្ងៃទី០១ ដល់ថ្ងៃទី០៧ ខែមីនា ឆ្នាំ២០២៣ បានឱ្យជ្រាបថា៖

ទ្រនុងសម្ពាធខ្ពស់ (ចិន) និងខ្យល់មូសុងឦសាន ក្នុងកម្រិតខ្សោយ បន្តមានឥទ្ធិពលមកលើព្រះរាជាណាចក្រកម្ពុជា រហូតដល់សប្តាហ៍ទី១ ខែមីនា។ ស្ថានភាពបែបនេះនឹងធ្វើឲ្យ៖

១៖ តំបន់ទំនាបកណ្តាល
– សីតុណ្ហភាពអប្បបរមា មានពី ២១-២៣ °C
– សីតុណ្ហភាពអតិបរមា មានពី ៣៣-៣៥ °C
– ធាតុអាកាសក្តៅហើយស្ងួត។ ក្នុងករណីបើមានភ្លៀង ក៏ស្ថិតក្នុងកម្រិតពីខ្សោយទៅតិចតួចដោយអន្លើតែប៉ុណ្ណោះ។

២៖ តំបន់ខ្ពង់រាប
– សីតុណ្ហភាពអប្បបរមា មានពី ២០-២២ °C
– សីតុណ្ហភាពអតិបរមា មានពី ៣៣-៣៥ °C
– ធាតុអាកាសត្រជាក់នៅពេលព្រឹក។

៣៖ តំបន់មាត់សមុទ្រ
– សីតុណ្ហភាពអប្បបរមា មានពី ២១-២៣ °C
– សីតុណ្ហភាពអតិបរមា មានពី ៣១-៣៣ °C
– ក្នុងករណីបើមានភ្លៀង ក៏ស្ថិតក្នុងកម្រិតពីខ្សោយទៅតិចតួច ដោយអន្លើតែប៉ុណ្ណោះ៕

ប្រភព៖ ក្រសួងធនធានទឹក និងឧតុនិយម/Ministry of Water Resources and Meteorology
-------------
#ពត៌មាន

27/02/2023

«សាច់កក» លើទីផ្សារប្រទេសកម្ពុជា ត្រូវបាននាំចូលខុសច្បាប់ជាច្រើនតាមប្រទេសវៀតណាម
---------------
រាជធាណីភ្នំពេញ៖ យោងតាមការចុះផ្សាយរបស់ សមាគមអ្នកចិញ្ចឹមសត្វកម្ពុជា នៅថ្ងៃទី២៦ ខែកុម្ភៈ ឆ្នាំ២០២៣ បានឱ្យដឹងថា ស្ថានភាពសាច់កក លើទីផ្សារប្រទេសកម្ពុជា នាំចូលពីប្រទេសប្រេស៊ីល «សាច់គោ» និង«ក្របី»មកពីប្រទេសឥណ្ឌា ត្រូវបានដឹកតាមកប៉ាល់តាមប្រទេសវៀតណាម បច្ចុប្បន្ននេះមានការនាំចូលខុសច្បាប់ច្រើនតាមប្រទេសវៀតណាមហើយបានចែកចាយលើទីផ្សារគ្រប់រូបភាព។

សមាគមអ្នកចិញ្ចឹមសត្វកម្ពុជា បានឱ្យដឹងបន្តទៀតថា៖ អ្នកលក់សាច់ និងអ្នកចែកចាយសាច់បានយកសាច់មកបន្ទន់ រួចដាក់លាយជាមួយសាច់ក្នុងស្រុកដើម្បីបន្លំភែ្នកអ្នកទិញពេលនោះអ្នកទិញមិនដឹងថាសាច់នោះជាសាច់កកទេ ពេលមកដល់ផ្ទះពួកគាត់ចាប់ផ្តើមលាងទឹក នឹងដាក់ចូលទូកកឡើងវិញ ពេលនោះសាច់ខូចគុណភាពភាគច្រើន ប៉ុន្តែអ្នកទទួលទានមិនសូវបានដឹងរឿងនេះទេ។

គុណវិបត្តិរបស់សាច់កក ពេលវាទន់ហើយមិនអាចយកទៅបង្កកឡើងវិញទេដោយវាបាត់គុណភាព សម្រាប់សាច់កកអាចរក្សាទុកបានប្រហែល១ ឆ្នាំ និង៦ខែ ដោយគេដាក់សាធាតុមួយចំនួនដើម្បីរក្សាគុណភាព និងពណ៌របស់សាច់ នៅពេលសាច់កកជិតផុតថ្ងៃកំណត់ត្រូវបានគេលក់ធូៗថ្លៃមកប្រទេសក្រីក្រ។

តាមពិតប្រជាជនយើងមិនចូលចិត្តសាច់កកទេ ប៉ុន្តែមិនមានព័ត៌មានគ្រប់គ្រាន់ សព្វថ្ងៃអ្នករស់នៅទីក្រុងភ្នំពេញទទួលទានសាច់កកច្រើនជាងគេ ប្រសិនបើបងប្អូនប្រើសាច់កក គួរកុំយកវាទៅកកឡើងវិញ ៕

ប្រភព៖ សមាគមអ្នកចិញ្ចឹមសត្វកម្ពុជា Cambodia Livestock Raisers Association
---------------
#ពត៌មាន

27/02/2023

ក្រសួងសុខាភិបាល បានរកឃើញអ្នកជាប់ពាក់ព័ន្ធនឹងជំងឺផ្តាសាយបក្សីH5N1 នៅខេត្តព្រៃវែង កើនដល់ ១៦នាក់
---------------
រាជធានីភ្នំពេញ៖ យោងតាមការចុះផ្សាយរបស់BTV Cambodia បានឱ្យដឹងថា គិតត្រឹមព្រឹកថ្ងៃទី២៧ ខែកុម្ភៈនេះ ក្រសួងសុខាភិបាល បានរកឃើញអ្នកជាប់ពាក់ព័ន្ធនឹងជំងឺផ្តាសាយបក្សី នៅខេត្តព្រៃវែង កើនដល់១៦នាក់ ក្នុងនោះជាប់ពាក់ព័ន្ធនឹងកុមារីដែលស្លាប់បាត់បង់អាយុជីវិតដោយសារជំងឺនេះចំនួន១២នាក់ និងឪពុកមានផ្ទុកជំងឺផ្តាសាយបក្សី ជាប់ពាក់ព័ន្ធចំនួន៤នាក់។

យ៉ាងណាក្តី អ្នកជាប់ពាក់ព័ន្ធទាំងនោះ ក្រសួងសុខាភិបាលមិនបានរកឃើញមាន ផ្ទុកជំងឺផ្តាសាយបក្សីនោះទេ។ នេះបើតាមប្រសាសន៍លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល ផ្តល់បទសម្ភាសន៍ជាមួយអ្នកសារព័ត៌មាននៅព្រឹកថ្ងៃទី២៧ ខែកុម្ភៈនេះ ៕

ប្រភព៖ BTV Cambodia
---------------
#ពត៌មាន

27/02/2023

កីឡាជឺជីតស៊ូកម្ពុជា ដណ្ដើមបានមេដាយ ៣គ្រឿង ពីការប្រកួតជើងឯកអាស៊ី នៅថៃ
----------------
រាជធានីភ្នំពេញ៖ នៅថ្ងៃទី២៧ ខែកុម្ភៈ ឆ្នាំ២០២៣ យោងតាមការចុះផ្សាយរបស់ Cambodia 2023 បានឱ្យដឹងថា បើកឆាកការប្រកួតកីឡាជឺជីតស៊ូជ្រើសរើសជើងឯកអាស៊ី លើកទី៧ ឆ្នាំ២០២៣ នៅប្រទេសថៃ ក្រុមអត្តពលិកកីឡាជឺជីតស៊ូកម្ពុជា ដណ្ដើមបានមេដាយ ៣គ្រឿង រួមមានមេដាយប្រាក់ ២ និងសំរឹទ្ធ ១ កាលពីថ្ងៃទី២៥ ខែកុម្ភៈ ឆ្នាំ២០២៣ ម្សិលមិញ។

លោក សៀន សុភក្ដ្រ អគ្គលេខាធិការសហព័ន្ធកីឡាជឺជីតស៊ូកម្ពុជា បានឱ្យដឹងថា ព្រឹត្តិការណ៍ប្រចាំឆ្នាំនេះ មានអត្តពលិកចូលរួមសរុបជាង ៥០០នាក់ មកពី ៣០ប្រទេសក្នុងទ្វីបអាស៊ី ក្នុងនោះក៏មានវត្តមានកីឡាករ-កីឡាការិនីចំនួន ១៨នាក់ផងដែរ ។ ការប្រកួតនឹងធ្វើឡើង ៤ថ្ងៃ ពីថ្ងៃទី២៥-២៨ ខែកុម្ភៈនេះ។

យ៉ាងណាមិញ សម្រាប់ការប្រកួតបើកឆាក កាលពីថ្ងៃសៅរ៍ ម្សិលមិញ ក្រុមកីឡាករ កីឡការិនីជឺជីតស៊ូរបស់កម្ពុជា បានចាប់ផ្តើមជាមួយការដណ្តើមបានជ័យជម្នះដ៏គួរឱ្យកត់សម្គាល់ គឺការឈ្នះបានមេដាយចំនួន៣គ្រឿងជូនជាតិ ដោយក្នុងនោះកីឡាករ សរ សុផានុត និងកីឡាការិនី ទឹន សុវណ្ណលីនណា បានរួមគ្នា ដណ្តើមយកមេដាយប្រាក់ ក្នុងការប្រកួតវិញ្ញាសាគូបុរស-នារី (Show Mixed)។

យ៉ាងណាមិញ សម្រាប់ការប្រកួតបើកឆាក កាលពីថ្ងៃសៅរ៍ ម្សិលមិញ ក្រុមកីឡាករ កីឡការិនីជឺជីតស៊ូរបស់កម្ពុជា បានចាប់ផ្តើមជាមួយការដណ្តើមបានជ័យជម្នះដ៏គួរឱ្យកត់សម្គាល់ គឺការឈ្នះបានមេដាយចំនួន៣គ្រឿងជូនជាតិ ដោយក្នុងនោះកីឡាករ សរ សុផានុត និងកីឡាការិនី ទឹន សុវណ្ណលីនណា បានរួមគ្នា ដណ្តើមយកមេដាយប្រាក់ ក្នុងការប្រកួតវិញ្ញាសាគូបុរស-នារី (Show Mixed)។

ទន្ទឹមជាមួយលទ្ធផលនេះដែរ សហព័ន្ធកីឡាជឺជីតស៊ូកម្ពុជា ក៏បានថ្លែងអំណរគុណសម្តេចពិជ័យសេនា ទៀ បាញ់ ឧបនាយករដ្ឋមន្ដ្រី រដ្ឋមន្ដ្រីក្រសួងការពារជាតិ និងជាប្រធានគណៈកម្មាធិការជាតិ CAMSOC ដែលបានអនុញ្ញាតជាគោលការណ៍ឱ្យប្រតិភូកីឡាជឺជីតស៊ូកម្ពុជា ចូលរួមប្រកួតកីឡាជឺជីតស៊ូជ្រើសរើសជើងឯកអាស៊ី លើកទី៧ ឆ្នាំ២០២៣ នៅប្រទេសថៃ ដើម្បីជាឱកាសពង្រឹងសមត្ថភាព ត្រៀមការប្រកួតកីឡាស៊ីហ្គេម លើកទី៣២ នៅកម្ពុជា នាពេលឆាប់ៗខាងមុខនេះផងដែរ៕

ប្រភព៖ Cambodia 2023
----------------
#ពត៌មាន

27/02/2023

ព្រឹកនេះ សម្តេចតេជោ ហ៊ុន សែន នឹងអញ្ជើញជាអធិបតីប្រគល់សញ្ញាបត្រ ដល់គរុនិស្សិតបច្ចេកទេស និងនិស្សិតជាង ៥ពាន់នាក់
-------------
រាជធានីភ្នំពេញ៖ យោងតាមការចុះផ្សាយរបស់ ក្រសួងព័ត៌មាន បានឱ្យដឹងថា នៅព្រឹកថ្ងៃចន្ទ ទី២៧ ខែកុម្ភៈ ឆ្នាំ២០២៣នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នឹងអញ្ជើញជាអធិបតីក្នុងពិធីប្រគល់សញ្ញាបត្រដល់និស្សិតបច្ចេកវិទ្យា និង គរុនិស្សិតបច្ចេកទេស ជ័យលាភី នៃវិទ្យាស្ថានជាតិបណ្តុះបណ្តាលបច្ចេកទេស សរុប ចំនួន ៥.៤៥០ នៅមណ្ឌលសន្និបាត និងពិព័រណ៍អន្តរជាតិជ្រោយចង្វារ។

គរុនិស្សិតបច្ចេកទេសរួមមានកម្រិតមូលដ្ឋាន កម្រិតឧត្តម និងនិស្សិតបច្ចេកវិទ្យាសរុបចំនួន ៥,៤៥០នាក់ ស្រី ៤២៧នាក់។ ក្នុងនោះគរុនិស្សិត និងនិស្សិតមានពិការភាពចំនួន ៩នាក់ជាបុរស និងនិស្សិតអាហារូបករណ៍សម្តេចតេជោនាយករដ្ឋមន្ត្រីចំនួន២៩នាក់ ក្នុងចំណោម ១៧០នាក់ ៕

ប្រភព៖ ក្រសួងព័ត៌មាន
-------------
#ពត៌មាន

25/02/2023

អគ្គិភ័យ ឆាបឆេះបន្ទប់ស្នាក់នៅមួយកន្លែង ស្ថិតនៅអគារ Prince សង្កាត់ទន្លេបាសាក់ ខណ្ឌចំការមន
-------------
រាជធានីភ្នំពេញ៖ (ព័ត៌មានបន្ទាន់) នៅថ្ងៃទី២៥ ខែកុម្ភៈ ឆ្នាំ២០២៣ យោងតាមការចុះផ្សាយរបស់ នាយកដ្ឋាននគរបាលបង្ការពន្លត់អគ្គិភ័យនិងសង្គ្រោះ នៃអគ្គស្នងការដ្ឋាននគរបាលជាតិ នៅមុននេះបន្តិច បានឱ្យដឹងថា ខណៈពេលនេះមានករណីឆេះបន្ទប់ស្នាក់នៅមួយកន្លែងដែលស្ថិតនៅអគារ Prince សង្កាត់ទន្លេបាសាក់ ខណ្ឌចំការមន រាជធានីភ្នំពេញ នៅវេលាម៉ោង ១៣៖៥០នាទី។ ព័ត៌មានលម្អិតក្រុមការងារ និងផ្សាយបន្ត។

ប្រភព៖ នាយកដ្ឋាននគរបាលបង្ការពន្លត់អគ្គិភ័យនិងសង្គ្រោះ នៃអគ្គស្នងការដ្ឋាននគរបាលជាតិ
-------------
#ពត៌មាន

25/02/2023

ក្រសួងសាធារណការបង្ហាញពីភាពចាំបាច់នៅតាមបណ្តាយផ្លូវចេញពីភ្នំពេញទៅខេត្តតម្រូវឱ្យមានបង្គោលគីឡូម៉ែត្រ
-------------
រាជធានីភ្នំពេញ ៖ ក្រសួងសាធារណការ និងដឹកជញ្ជូនបានប្រកាសនៅថ្ងៃទី២៤ ខែកុម្ភៈនេះថា បង្គោលគីឡូម៉ែត្រ (សម្រាប់ចន្លោះ១គ.ម) ត្រូវបានដាក់ក្នុងចន្លោះ១គីឡូម៉ែត្រមួយបង្គោលសម្រាប់ផ្តល់ដំណឹងដល់អ្នកប្រើប្រាស់ផ្លូវ អំពីចម្ងាយផ្លូវទៅតំបន់សំខាន់ៗខាងមុខ។

ក្រសួងសាធារណការបានបន្តថា ចំណុចលេខ១ ៖ លេខ299 ដែលមានបញ្ជាក់នៅលើផ្ទៃក្រហមនេះមានន័យថាជាបង្គោលគីឡូម៉ែត្រទី 299 ឬបានចម្ងាយប្រវែង 299 គីឡូម៉ែត្រ ដោយរាប់ពីចំណុចចាប់ផ្តើមចេញរាជធានីភ្នំពេញ (ទីតាំងវត្តភ្នំ)។
ចំណុចលេខ២៖ លេខ 5 ដែលមានបញ្ជាក់ក្នុងទ្រង់ទ្រាយរាងដូចនេះ គឺប្រើប្រាស់សម្រាប់កំណត់ប្រភេទផ្លូវជាតិ ដែលនេះមានន័យថា បង្គោលសញ្ញានេះស្ថិតលើផ្លូវជាតិលេខ5។

ចំណុចលេខ៣៖ កកោះ (Kor Koh) 50km ដែលមានបញ្ជាក់នៅលើផ្ទៃពណ៌-ស នេះ បានន័យថានៅចម្ងាយ 50km ទៀតអ្នកនឹងធ្វើដំណើរទៅដល់ឃុំកកោះ ក្នុងស្រុកមោងឫស្សី ខេត្តបាត់ដំបង។

ប្រជាពលរដ្ឋគ្រប់រូបចូលរួមគោរពច្បាប់ចរាចរណ៍ឱ្យបានខ្ជាប់ខ្ជួន ពិសេសត្រូវមានការអធ្យាស្រ័យខ្ពស់រវាងគ្នា និងគ្នា ដើម្បីឱ្យការធ្វើដំណើររបស់បងប្អូន ទទួលបានភាពងាយស្រួល និងមានសុខសុវត្ថិភាព។

ក្រសួងសាធារណការ និងដឹកជញ្ជូន សូមស្នើសុំការចូលរួមពីបងប្អូនប្រជាពលរដ្ឋ ក្នុងការរាយការណ៍តាមរយៈកម្មវិធីថែទាំផ្លូវ (ROAD CARE Mobile App) ក្នុងករណីផ្លូវថ្នល់ត្រូវការជួសជុលថែទាំ ឬមានជង្ហុកសំបុកមាន់ ដើម្បីអាចឱ្យមន្ត្រីជំនាញ ឬមន្ត្រីពាក់ព័ន្ធធ្វើការត្រួតពិនិត្យ និងចាត់វិធានការបានទាន់ពេលវេលា៕

ប្រភព koh santepheap daily
-------------
#ពត៌មាន

25/02/2023

ដំណឹងល្អ! កម្ពុជា ត្រូវបានដកចេញពី «បញ្ជីប្រផេះ» នៃក្រុមប្រទេសដែលមានហានិភ័យខាងលាងលុយកខ្វក់
------------
រាជធានីភ្នំពេញ៖ នៅថ្ងៃទី២៤ ខែកុម្ភៈ ឆ្នាំ២០២៣ បានឱ្យដឹងថា អង្គការឃ្លាំមើលការលាងលុយ និងឧក្រិដ្ឋកម្មហិរញ្ញវត្ថុអន្តរជាតិ (FATF) ដែលមានមូលដ្ឋាននៅទីក្រុងប៉ារីស បានប្រកាសជាផ្លូវការ ក្នុងការដកប្រទេសកម្ពុជាចេញពី «បញ្ជីប្រផេះ» នៃក្រុមប្រទេសដែលមានហានិភ័យខាងលាងលុយកខ្វក់។

ប្រទេសកម្ពុជា ធ្លាប់ត្រូវបាន អង្គការ FATF ដាក់ឲ្យស្ថិតក្នុង «បញ្ជីប្រផេះ» នៃក្រុមប្រទេសដែលមានហានិភ័យខាងលាងលុយកខ្វក់ រយៈពេល៤ឆ្នាំជាប់ៗគ្នា ចាប់តាំងពីឆ្នាំ២០១៩ មក។

ការសម្រេចដកកម្ពុជាចេញពី «បញ្ជីប្រផេះ» នៃក្រុមប្រទេសដែលមានហានិភ័យខាងលាងលុយកខ្វក់នេះ បានធ្វើឡើងនៅក្នុង មហាសន្និបាត FATF នៅថ្ងៃទី២៤ ខែកុម្ភៈ ឆ្នាំ២០២៣ នៅទីក្រុងប៉ារីស ប្រទេសបារាំង និងត្រូវបានរៀបចំសន្និសីទកាសែត ប្រកាសជាផ្លូវការ នៅម៉ោង១០យប់ ម៉ោងនៅប្រទេសកម្ពុជា។

នៅក្នុងសេចក្តីប្រកាសបានបញ្ជាក់យ៉ាងដូច្នេះថា៖ «យុត្តាធិការក្រោមការបង្កើនការត្រួតពិនិត្យ កំពុងដំណើរការយ៉ាងសកម្មជាមួយ FATF ដើម្បីដោះស្រាយការខ្វះខាតខាងយុទ្ធសាស្ត្រ នៅក្នុងរដ្ឋាភិបាលរបស់ពួកគេ ក្នុងការប្រយុទ្ធប្រឆាំង នឹងការលាងលុយ ហិរញ្ញប្បទានភេរវកម្ម និងហិរញ្ញប្បទានដែលចូលរួមចំណែកដល់ការរីកសាយអាវុធនុយក្លេអ៊ែរ។ ប្រទេសថ្មីៗដែលស្ថិតនៅក្រោមកម្មវត្ថុ នៃការបង្កើនការត្រួតពិនិត្យ រួមមានអាហ្វ្រិកខាងត្បូង និងនីហ្សេរីយ៉ា។ ប្រទេសម៉ារ៉ុក និងកម្ពុជា លែងជាកម្មវត្ថុនៃការត្រួតពិនិត្យបន្ថែមទៀតដោយ FATF ទៀតហើយ»។

ការប្រកាសដកចេញពីបញ្ជីប្រផេះជាផ្លូវការនេះ បានធ្វើឡើងបន្ទាប់ពីមាន សេចក្តីសម្រេចចិត្តរបស់ក្រុមការងារ ICRG របស់ FATF ក្នុងការដកកម្ពុជាពីបញ្ជីប្រផេះ នាថ្ងៃទី២០ ខែកុម្ភៈ ឆ្នាំ២០២៣។ ក្នុងកិច្ចប្រជុំ ICRG នាថ្ងៃទី២០ ខែកុម្ភៈ ឆ្នាំ២០២២ មិនមានសមាជិកណាជំទាស់ការដកកម្ពុជាចេញពីបញ្ជីប្រផេះនោះទេ។ ផ្ទុយទៅវិញកម្ពុជាទទួលបានការគាំទ្រពីសមាជិករបស់ FATF ចំនួន១៨ រួមមានស្ថាប័នអន្តរជាតិ២៖ APG និង EU Commission និងប្រទេសសមាជិកចំនួន១៦ទៀត ដូចជា៖ អូស្ត្រាលី ដាណឺម៉ាក ហ្វាំងឡង់ ឥណ្ឌា អាមេរិក អាល្លឺម៉ង់ ចិន រុស្ស៉ី អ៉ីតាលី ជប៉ុន ម៉ាឡេស៊ី នូវែលហ្សេឡង់ ព័រទុយហ្កាល់ អង់គ្លេស កូរ៉េខាងត្បូង និងសិង្ហបុរីជាដើម។

ថ្នាក់ដឹកនាំរាជរដ្ឋាភិបាលកម្ពុជា បានបង្ហាញការប្តេជ្ញាចិត្តជាបន្តបន្ទាប់ ចំពោះការប្រយុទ្ធប្រឆាំងការសម្អាតប្រាក់ និងហិរញ្ញប្បទានភេរវកម្ម និងហិរញ្ញប្បទានដល់ការរីកសាយភាយអាវុធមហាប្រល័យ ៕

ប្រភព khmernote
------------
#ពត៌មាន

25/02/2023

តោះមកដឹងពីប្រាក់រង្វាន់លើកទឹកចិត្ដរបស់រាជរដ្ឋាភិបាល សម្រាប់ជ័យលាភីមេដាយ នៃប្រកួតកីឡាស៊ីហ្គេម២០២៣
--------------
រាជធានីភ្នំពេញ៖ យោងតាមការចុះផ្សាយរបស់ Cambodia 2023 បានឱ្យដឹងថា នៅថ្ងៃទី២៤ ខែកុម្ភៈ ឆ្នាំ២០២៣ នេះ គឺនៅសល់តែ70 ថ្ងៃទៀតប៉ុនោះ នឹងឈានដល់ព្រឹត្តិការណ៍ស៊ីហ្គេមលើកទី៣២ (32nd SEA Games) និងអាស៊ានប៉ារ៉ាហ្គេមលើកទី១២ (12th ASEAN Para Games) ដែលកម្ពុជាធ្វើជាម្ចាស់ផ្ទះក្នុងឆ្នាំ២០២៣នេះ។ ក្នុងនោះ រដ្ឋាភិបាលកម្ពុជា នឹងផ្តល់ប្រាក់រង្វាន់លើកទឹកចិត្តសម្រាប់អត្តពលិកកម្ពុជា ដែលទទួលបានមេដាយណាមួយពីព្រឹត្តិការណ៍ស៊ីហ្គេម និងប៉ារ៉ាហ្គេម ឆ្នាំ២០២៣ផងដែរ។

ប្រាក់រង្វាន់លើកទឹកចិត្ដរបស់រាជរដ្ឋាភិបាល សម្រាប់ជ័យលាភីមេដាយ នៃការប្រកួតកីឡាស៊ីហ្គេម និងអាស៊ានប៉ារ៉ាហ្គេមរួមមាន៖
-មេដាយមាស ៤០លានរៀល
-មេដាយប្រាក់ ៣០លានរៀល
-មេដាយសំរឹទ្ធ ១៦លានរៀល ។

សូមបញ្ជាក់ផងដែរថា មេដាយដែលកម្ពុជាត្រៀមសម្រាប់ការប្រកួតស៊ីហ្គេម អាស៊ានប៉ារ៉ាហ្គេម ២០២៣នេះសរុបមានចំនួន៦០០មេដាយ ដែលរួមមាន មេដាយមាស មេដាយប្រាក់ មេដាយសំរិទ្ធ និងមានមេដាយសម្រាប់ទុកជាអនុស្សាវរីយ៍សម្រាប់ជូនប្រតិភូ ថ្នាក់ដឹកនាំ ក៏ដូចម្ចាស់ជំនួយដែលបានឧបត្ថម្ភគាំទ្រដល់ការប្រកួតនេះផងដែរ ៕
ប្រភព៖ Cambodia 2023
--------------
#ពត៌មាន

24/02/2023

នាយករងវិទ្យាល័យម្នាក់ នៅស្រុកកំពង់ត្រឡាច ពាក់ព័ន្ធចែកចាយរូបភាពមិនសមរម្យ ត្រូវបានសមត្ថកិច្ចឃាត់ខ្លួន
----------------
ខេត្តកំពង់ឆ្នាំង៖ នាយករងវិទ្យាល័យម្នាក់ នៅស្រុកកំពង់ត្រឡាច ខេត្តកំពង់ឆ្នាំង ត្រូវបានកម្លាំងស្នងការដ្ឋាននគរបាលខេត្តកំពង់ឆ្នាំងចាប់ខ្លួន និងបញ្ជូនទៅសាលាដំបូងខេត្ត ដើម្បីចាត់ការតាមផ្លូវច្បាប់ ពាក់ព័ន្ធករណីចែកចាយរូបភាពអាសអាភាស និងហិង្សា។

លោក ស្រី សុដា នាយការិយាល័យប្រឆាំងការជួញដូរមនុស្ស និងការពារអនីតិជន នៃស្នងការដ្ឋាននគរបាលខេត្តកំពង់ឆ្នាំង បានឲ្យដឹងនៅព្រឹកថ្ងៃទី២៤ ខែកុម្ភៈ ឆ្នាំ២០២៣នេះថា ការចាប់ខ្លួននាយករងវិទ្យាល័យរូបនេះ ធ្វើឡើងបន្ទាប់ពីសមត្ថកិច្ចទទួលបានពាក្យបណ្ដឹងថា ឈ្មោះ ង៉ែត សុខខេង អាយុ៤០ឆ្នាំ បានរំលោភកូនស្រីរបស់ខ្លួនដែលទើបមានអាយុ១៥ឆ្នាំ កាលពីថ្ងៃទី១៦ ខែកុម្ភៈ ឆ្នាំ២០២៣។

លោកបន្ដថា បន្ទាប់ពីស្រាវជ្រាវ កាលពីថ្ងៃទី២១ ខែកុម្ភៈ ឆ្នាំ២០២៣ សមត្ថកិច្ចក៏បានកោះហៅជនសង្ស័យ មកធ្វើការសាកសួរនៅអធិការដ្ឋាននគរបាលស្រុកកំពង់ត្រឡាច និងដោយមានការសម្របសម្រួលពីលោកព្រះរាជអាជ្ញា អមសាលាដំបូងខេត្តកំពង់ឆ្នាំង ជនសង្ស័យត្រូវបានបញ្ជូនខ្លួនមកកាន់ស្នងការដ្ឋាននគរបាលខេត្តកំពង់ឆ្នាំង ដើម្បីធ្វើការសាកសួរបន្ត និងបានកសាងសំណុំរឿងបញ្ជូន ទៅកាន់សាលាដំបូងខេត្តកំពង់ឆ្នាំងនៅថ្ងៃទី២២ ខែកុម្ភៈ ឆ្នាំ២០២៣។

រហូតមកដល់ថ្ងៃទី២៣ ខែកុម្ភៈ ឆ្នាំ២០២៣ លោក នូ ដារ៉ា ចៅក្រមស៉ើបសួរ នៃសាលាដំបូងខេត្តកំពង់ឆ្នាំង បានចេញដីកាបង្គាប់ឲ្យឃុំខ្លួនឈ្មោះ ង៉េត សុខខេង ចំនួនពីរបទល្មើស រួមមាន បទផលិត ចែកចាយរូបភាព និងសម្ភារៈអាសអាភាស នៃកុមារ តាមមាត្រា៤១ នៃច្បាប់ស្ដីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ និងបទហិង្សាដោយចេតនា តាមមាត្រា២១៧ ប្រព្រឹត្តនៅភូមិសាលាលេខ៥ ឃុំអូឬស្សី ស្រុកកំពង់ត្រឡាច ខេត្តកំពង់ឆ្នាំង កាលពីថ្ងៃទី១៦ ខែកុម្ភៈឆ្នាំ២០២៣ និងអំឡុងឆ្នាំ២០២២។

ប៉ុន្ដែទោះជាយ៉ាងណា នាយករងវិទ្យាល័យរូបនេះ នៅចំពោះមុខសមត្ថកិច្ចមិនទាន់សារភាពកំហុសរបស់ខ្លួននោះទេ ដែលទំនងបញ្ជាក់ថា ខ្លួនមិនបានប្រព្រឹត្តដូចការចោទប្រកាន់ឡើយ៕
ប្រភព khmernote
----------------
#ពត៌មាន

MGO News

28/02/2023

28/02/2023

28/02/2023

27/02/2023

27/02/2023

27/02/2023

27/02/2023

25/02/2023

25/02/2023

25/02/2023

25/02/2023

24/02/2023

Address

Telephone

Website

Alerts

Contact The Business

Shortcuts

Share

Category