26/08/2026
តំណាងអយ្យការសម្រេចចោទប្រកាន់ស្ត្រីដែលជេរប្រមាថប្រជាពលរដ្ឋខេត្តពោធិ៍សាត់ ពីបទ «ញុះញង់ឱ្យមានការរើសអើង»
ខេត្តពោធិ៍សាត់៖ តំណាងអយ្យការអមសាលាដំបូងខេត្តពោធិ៍សាត់ នៅថ្ងៃទី២៦ ខែសីហា ឆ្នាំ២០២៦ នេះ បានចេញសេចក្តីប្រកាសព័ត៌មានផ្លូវការស្តីពីការសម្រេចចោទប្រកាន់ស្ត្រីម្នាក់ ពីបទ «ញុះញង់ឱ្យមានការរើសអើង» បន្ទាប់ពីស្ត្រីរូបនោះបានប្រើប្រាស់បណ្តាញសង្គម ជេរប្រមាថប្រជាពលរដ្ឋរស់នៅក្នុងខេត្តពោធិ៍សាត់យ៉ាងធ្ងន់ធ្ងរ។
យោងតាមប្រភពដដែល ជនត្រូវចោទមានឈ្មោះ ភី យ៉ាងរី ភេទស្រី អាយុ ២៥ឆ្នាំ មានទីលំនៅបច្ចុប្បន្ននៅភូមិប្រជាធម្មខាងកើត សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ។
ដើមហេតុនៃករណីនេះ គឺផ្តើមចេញពីជម្លោះពាក់ព័ន្ធនឹងការបាត់ប្រេងរថយន្ត ដែលបានបណ្តាលឱ្យស្ត្រីរូបនេះប្រើប្រាស់គណនីហ្វេសប៊ុកចំនួនពីរ គឺ «អាយ៉ា ទឹកត្នោតជូរ» និង «អាយ៉ា ឡាំយ៉ង» ដើម្បីឡាយ (Live) និងបង្ហោះវីដេអូជេរប្រមាថដេញដោលដល់ប្រជាពលរដ្ឋខេត្តពោធិ៍សាត់ទាំងមូល ដែលទង្វើនេះបានបង្កើតឱ្យមានការស្អប់ខ្ពើម និងរើសអើងជាសាធារណៈ រហូតឈានដល់ការចំណាត់ការតាមផ្លូវច្បាប់ពីសំណាក់អាជ្ញាធរមានសមត្ថកិច្ច។
