25/09/2025
ខេត្តព្រះសីហនុ -នៅព្រឹកថ្ងៃទី២៥ ខែកញ្ញា ឆ្នាំ២០២៥ ក្រសួងព័ត៌មានបានបើកវគ្គបណ្តុះបណ្តាលស្តីពី «ការពង្រឹងសមត្ថភាពព័ត៌មាន និងការគ្រប់គ្រងសាធារណមតិ»មានរយៈពេល២ថ្ងៃ ២៥-២៦ នៅសាលាក្រុងព្រះសីហនុ។
វគ្គនេះរៀបចំឡើងក្រោមអធិបតីភាពដ៏ខ្ពង់ខ្ពស់របស់ ឯកឧត្តម ឆាយ សុផល រដ្ឋលេខាធិការក្រសួងព័ត៌មាន និងមានការអញ្ជើញចូលរួមពី លោក ឡុង ឌីម៉ង់ អភិបាលរងខេត្តព្រះសីហនុ, ឯកឧត្តម ទេព អាស្នារិទ្ធិ អនុរដ្ឋលេខាធិការ និងជាអ្នកនាំពាក្យក្រសួងព័ត៌មាន, និង ឯកឧត្តម អ៊ុក គឹមសេង អនុរដ្ឋលេខាធិការក្រសួងព័ត៌មាន
លោក ខៀវ សាវុន ប្រធានស្តីទីមន្ទីរព័ត៌មាន ខេត្តព្រះសីហនុ បានអានរបាយការណ៍បូកសរុបលទ្ធផលការងារ និងគោលបំណងនៃវគ្គបណ្តុះបណ្តាលនេះ ក្នុងនោះផងដែរ
លោក ឡុង ឌីម៉ង់ អភិបាលរងខេត្ត បានថ្លែងមតិស្វាគមន៍បើកវគ្គបណ្តុះបណ្តាល ដោយបានសង្កត់ធ្ងន់ពីសារៈសំខាន់នៃការផ្សព្វផ្សាយព័ត៌មានពិត និងការទប់ស្កាត់ព័ត៌មានក្លែងក្លាយ ដែលជាបញ្ហាប្រឈមក្នុងយុគសម័យឌីជីថល។
ឯកឧត្តម បណ្ឌិត ឆាយ សុផល រដ្ឋលេខាធិការក្រសួងព័ត៌មាន បានថ្លែងមតិចូលរួម ដោយបានផ្តល់អនុសាសន៍ និងលើកទឹកចិត្តដល់អ្នកសារព័ត៌មានទាំងអស់ ឲ្យបន្តខិតខំប្រឹងប្រែងដើម្បីកសាងជំនឿទុកចិត្តពីសាធារណជន តាមរយៈការបំពេញការងារប្រកបដោយវិជ្ជាជីវៈ និងក្រមសីលធម៌ខ្ពស់។
វគ្គបណ្តុះបណ្តាលនេះមានគោលបំណងពង្រឹងសមត្ថភាពមន្ត្រីព័ត៌មាន និងអ្នកសារព័ត៌មាននៅខេត្តព្រះសីហនុ ឲ្យកាន់តែមានជំនាញច្បាស់លាស់ក្នុងការគ្រប់គ្រងព័ត៌មាន និងរួមចំណែកដល់ការអភិវឌ្ឍសង្គម។
