16/06/2025
ក្រុមហ៊ុនផ្លូវល្បឿនលឿនភ្នំពេញ បានរៀបចំដំឡើងឧបករណ៍កាំរស្មីឡាស៊ែរដែលមានមុខងារជួយពញ្ញាក់ស្មារតី កាត់បន្ថយភាពនឿយហត់របស់អ្នកបើកបរ ហើយអាចជួយបង្កើនការប្រុងប្រយ័ត្នក្នុងពេលបើកបរពេលយប់ បង្ការគ្រោះថ្នាក់ចរាចរណ៍
សេចក្តីជូនដំណឹងស្តីពី ការតេស្តឧបករណ៍ឡាស៊ែរនៅលើផ្លូវល្បឿនលឿនភ្នំពេញ-ក្រុងព្រះសីហនុ
សូមជម្រាបជូនដល់សាធារណជន និងអតិថិជនទាំងអស់ដែលប្រើប្រាស់ផ្លូវល្បឿនលឿនភ្នំពេញ–ក្រុងព្រះសីហនុឲ្យបានជ្រាបថា៖
ដើម្បីលើកកម្ពស់សុវត្ថិភាពក្នុងការធ្វើដំណើរ និងបង្ការគ្រោះថ្នាក់ចរាចរណ៍ដែលបណ្ដាលមកពីភាពនឿយហត់ក្នុងការបើកបរនាពេលយប់ ក្រុមហ៊ុនផ្លូវល្បឿនលឿនភ្នំពេញ-ក្រុងព្រះសីហនុ បានរៀបចំដំឡើងឧបករណ៍កាំរស្មីឡាស៊ែរដែលមានមុខងារជួយពញ្ញាក់ស្មារតី កាត់បន្ថយភាពនឿយហត់របស់អ្នកបើកបរ ហើយអាចជួយបង្កើនការប្រុងប្រយ័ត្នក្នុងពេលបើកបរពេលយប់។ ឧបករណ៍នេះ បញ្ចេញកាំរស្មីពណ៌បៃតងនាពេលរាត្រី ក្នុងមុំប្រហែល ៤៥ ដឺក្រេទៅខាងលើ ផ្ទុយទិសដៅចរាចរណ៍របស់យានយន្ត និងអាចបាញ់ពន្លឺក្នុងចម្ងាយប្រហែល ៤ ដល់ ៥ គីឡូម៉ែត្រ។ គួរបញ្ជាក់ផងដែរថាការតម្លើងឧបករណ៍នេះមិនបង្កផលប៉ះពាល់ដល់អ្នកបើកបរឡើយ មិនតែប៉ុណ្ណោះថែមទាំងអាចជួយបង្កើនសោភ័ណភាពតាមដងផ្លូវអោយកាន់តែល្អប្រសើរជាងមុន។
ក្រុមហ៊ុនផ្លូវល្បឿនលឿនភ្នំពេញ–ក្រុងព្រះសីហនុនឺងចាប់ផ្ដើមតេស្តឧបករណ៍កាំរស្មីឡាស៊ែរនៅថ្ងៃទី១៩ ខែមិថុនា ឆ្នាំ២០២៥ តាមផ្លូវល្បឿនលឿន ត្រង់គីឡូម៉ែត្រលេខ K77+990, K113+700 និង K115+750 ជាកំណាត់ផ្លូវដែលអ្នកបើកបរងាយនឹងប្រឈមមុខនឹងបញ្ហាដូចដែលបានរៀបរាប់ខាងលើ។
អាស្រ័យហេតុដូចបានជម្រាបជូនខាងលើ សូមសាធារណជន និងអតិថិជនទាំងអស់ មេត្តាជ្រាបជាដំណឹង និងសូមកុំមានក្ដីព្រួយបារម្ភពីផលប៉ះពាល់ណាមួយពីការតម្លើងឧបករណ៍នេះ៕
