https://www.facebook.com/104449622140653/

𝐏𝐨𝐬𝐭𝐍𝐞𝐰𝐬24𝐡, Phnom Penh, Cambodia, Phsardépo 1, Phnom Penh (2025)

03/10/2025

⭕️ប្រមុខយោធាហ្វីលីពីន អះអាងថា បានទាត់ចោលការអំពាវនាវឱ្យទម្លាក់ប្រធានាធិបតី Ferdinand Marcos Jr ពីអំណាច
(ម៉ានីល)៖ នាថ្ងៃសុក្រ ទី៣ ខែតុលា ប្រមុខយោធានៃប្រទេសហ្វីលីពីន បានអះអាងថា រូបលោកបានច្រានចោល ការអំពាវនាវចង់ឱ្យកងកម្លាំងប្រដាប់អាវុធផ្តួលរំលំប្រធានាធិបតី លោក Ferdinand Marcos Jr ខណៈដែលទីក្រុងម៉ានីល ត្រូវបានអង្រួនដោយការធ្វើបាតុកម្មយ៉ាងកក្រើកតាមដងផ្លូវកាលពីខែកញ្ញាកន្លងទៅ ប្រឆាំងនឹងអំពើពុករលួយនៅក្នុងរដ្ឋាភិបាល។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

លោកឧត្តមសេនីយ៍ Romeo Brawner បានឱ្យដឹងថា អតីតមន្រ្តីចូលនិវត្តន៍មួយចំនួនក្នុងជួរយោធាហ្វីលីពីន បានព្យាយាមទាក់ទងមករូបលោក ព្រមទាំងមន្រ្តីយោធាវ័យក្មេងៗ ប៉ុន្តែការអំពាវនាវរបស់ពួកគេ ត្រូវបានបដិសេធចោល។ ការអំពាវនាវបែបនេះ គឺកើតមានក្រោយបាតុកម្មទ្រង់ទ្រាយធំ បានផ្ទុះឡើងនៅរដ្ឋធានីម៉ានីល កាលពីថ្ងៃទី២១ ខែកញ្ញា ក្នុងគោលដៅប្រឆាំងអំពើពុករលួយ ផ្តើមចេញពីគម្រោងហេដ្ឋារចនាសម្ព័ន្ធគ្រប់គ្រងទឹកជំនន់ ដែលភាគច្រើនមិនលេចចេញជារូបរាង និងចំណាយលុយប្រជាជនរាប់ពាន់លានដុល្លារ។

បើតាមលោក Brawner អំឡុងបាតុកម្មកាលពីខែមុននោះ ក្រុមបាតុករបាននាំគ្នាអំពាវនាវឱ្យកងកម្លាំងប្រដាប់អាវុធហ្វីលីពីន ដកការគាំទ្រពីលោកប្រធានាធិបតី និងធ្វើអន្តរាគមន៍។ លោក Brawner បាននិយាយយ៉ាងដូច្នេះថា «មានមន្រ្តីយោធាចូលនិវត្តន៍មួយចំនួន បានព្យាយាមទាក់ទងមកកាន់មន្រ្តីយោធាក្មេងៗ មកកាន់ក្រុមមេបញ្ជាការ និងសូម្បីមកកាន់ខ្ញុំផ្ទាល់តែម្តង ហើយចង់បញ្ចុះបញ្ចូលពួកយើង ឱ្យធ្វើអន្តរាគមន៍»។

លោកឧត្តមសេនីយ៍បានបន្តទៀតថា «ពួកគេបានស្នើចង់ឱ្យមានរដ្ឋប្រហារ និងរដ្ឋាភិបាលយោធា ដើម្បីរិះរកមធ្យោបាយកំណត់សង្គមហ្វីលីពីនសាជាថ្មីឡើងវិញ ឬក៏ដកការគាំទ្ររបស់យើង ចេញពីលោកប្រធានាធិបតី ពោលគឺមានការស្នើចង់ឱ្យធ្វើអន្តរាគមន៍យោធា ក្នុងទម្រង់ច្រើនផ្សេងៗគ្នា»។ យ៉ាងណាមិញ លោក Brawner បានអះអាងថា រូបលោកបានប្រាប់ទៅ ក្រុមមន្រ្តីចូលនិវត្តន៍ទាំងនោះវិញថា ស្ថាប័នយោធាប្រកាន់ជំហររឹងមាំ ក្នុងការគាំទ្ររដ្ឋធម្មនុញ្ញរបស់ប្រទេស ហើយលោកក៏បានជូនដំណឹងដល់លោក Marcos អំពីផែនការនេះផងដែរ។

គួរបញ្ជាក់ថា កាលពីឆ្នាំ១៩៨៦ យោធាហ្វីលីពីនបានដកការគាំទ្រចេញពីឪពុកលោក Marcos Jr គឺមេដឹកនាំផ្តាច់ការលោក Ferdinand Marcos Sr ក្រោយកាន់អំណាចរយៈពេល២០ឆ្នាំ ហើយប្រការនោះ បាននាំឱ្យមានការបះបោរពីសំណាក់ប្រជាជនយ៉ាងកក្រើក ដែលទីបំផុតបានបង្ខំឱ្យគ្រួសារត្រកូល Marcos និរទេសខ្លួនទៅកាន់ទឹកដីសហរដ្ឋអាមេរិក។ យ៉ាងណាមិញ សកម្មភាពរបស់យោធានាពេលនោះ ក្រោយមកបានបើកផ្លូវឱ្យមានការប៉ុនប៉ងធ្វើរដ្ឋប្រហារយោធាយ៉ាងបង្ហូរឈាមជាបន្តបន្ទាប់ ដែលបានធ្វើឱ្យរង្គោះរង្គើលទ្ធិប្រជាធិបតេយ្យទើបស្តារឡើងវិញរបស់ហ្វីលីពីន ក្រោមការដឹកនាំនៃគូបដិបក្ខរបស់លោក Marcos Sr គឺលោក Corazon Aquino នៅចន្លោះឆ្នាំ១៩៨៦-១៩៩១៕

03/10/2025

⭕️បញ្ជូនមេខ្លោងចិនតៃវ៉ាន់ នៃក្រុមឆបោកតាមប្រព័ន្ធបច្ចេកវិទ្យាទៅតុលាការ ក្រោយបង្ក្រាបចាប់បាន២៤នាក់

(ភ្នំពេញ)៖ សមត្ថកិច្ចជំនាញ នៃគណៈបញ្ជាការដឹកនាំស្រាវជ្រាវ ស៊ើបអង្កេត និងបង្ក្រាបបទល្មើសគ្រប់ប្រភេទ នៃក្រសួងមហាផ្ទៃ នៅរសៀលថ្ងៃទី០៣ ខែតុលា ឆ្នាំ២០២៥ បានបញ្ជូនមេខ្លោង នៃក្រុមឆបោកតាមប្រព័ន្ធបច្ចេកវិទ្យា ដែលត្រូវបានបង្ក្រាបកាលពីថ្ងៃទី២៩ ខែកញ្ញា ទៅសាលាដំបូងរាជធានីភ្នំពេញ ដើម្បីចាត់ការបន្ត។

សូមបញ្ជាក់ថា កាលពីថ្ងៃទី២៩ ខែកញ្ញា សមត្ថកិច្ចជំនាញ នៃអគ្គស្នងការដ្ឋាននគរបាលជាតិ បានបើកប្រតិបត្តិការបង្ក្រាប ទីតាំងលួចលាក់ធ្វើសកម្មភាព ឆបោកតាមប្រព័ន្ធបច្ចេកវិទ្យា នៅរាជធានីភ្នំពេញ ចំនួន៣ទីតាំង ដែលជាបណ្តាញឆបោកតាមប្រព័ន្ធបច្ចេកវិទ្យា មានអង្គការចាត់តាំង។ ជាលទ្ធផល កម្លាំងសមត្ថកិច្ចបានឃាត់ខ្លួនជនបរទេសសរុបចំនួន ២៤នាក់ (ស្រី០២នាក់) មាន០៣សញ្ជាតិ ព្រមទាំងដកហូតនូវ វត្ថុតាងប្រព្រឹត្តបទល្មើសមួយចំនួន។

ករណីនេះ សមត្ថកិច្ចបានធ្វើការស៊ើបអង្កេតឈានទៅកំណត់បានមេខ្លោងឈ្មោះ WANG SHENG YU ភេទប្រុស ចិនតៃវ៉ាន់ ដែលជាក្បាលម៉ាស៊ីនដឹកនាំក្រុម ដោយលួចលាក់ប្រើទឹកដីកម្ពុជាធ្វើសកម្មភាព ឆបោកជនរងគ្រោះនៅសហរដ្ឋអាមេរិកតាមប្រព័ន្ធបច្ចេកវិទ្យា។

ផ្អែកតាមតាមការស៊ើបអង្កេតរបស់ជំនាញប្រឆាំងការសម្អាតប្រាក់ នៃអគ្គស្នងការដ្ឋាននគរបាលជាតិ កំណត់បានជនសង្ស័យជាមេខ្លោងបានប្រើប្រាស់ប្រព័ន្ធហិរញ្ញវត្ថុឌីជីថល (Crypto Currency) របស់ក្រុមហ៊ុន BITPIE (PRO) ដែលមានមូលដ្ឋាននៅប្រទេសអូស្ត្រាលី សម្រាប់បង្វែរផល នៃបទល្មើសឆបោក ដែលក្រុមជនល្មើសទទួលបានពីជនរងគ្រោះ ព្រមទាំងបានទប់ស្កាត់ និងគ្រប់គ្រងការផ្ទេរប្រាក់ចេញរបស់ជនសង្ស័យសរុបចំនួន ៥២,៣៦៣ USDT។

សមត្ថកិច្ចក៏បានរកឃើញ ជនសង្ស័យជាមេខ្លោង បានធ្វើសកម្មភាពបង្វិលរូបិយបណ្ណឌីជីថលដែលគ្មានប្រភពរបស់បក្ខពួកខ្លួននៅកោះតៃវ៉ាន់ ទៅតាមបណ្តាញ រូបិយបណ្ណឌីជីថលផ្សេងៗ ដែលមានមូលដ្ឋាននៅក្រៅប្រទេស សរុបប្រមាណជាង ១០លាន USTD។ ពាក់ព័ន្ធនឹងការសកម្មភាពលាងសម្អាតប្រាក់នេះ សមត្ថកិច្ចជំនាញនឹងធ្វើការចែករំលែកព័ត៌មានជាមួយ ប្រទេសជាដៃគូ កិច្ចសហប្រតិបត្តិការជាប់ពាក់ព័ន្ធ៕

03/10/2025

⭕️ចក្រភពអង់គ្លេស ប្តេជ្ញាបង្រ្កាបសកម្មភាពប្រឆាំងជាតិសាសន៍ បន្ទាប់ពីករណីវាយប្រហារនៅឯវិហារជនជាតិជ្វីហ្វ

(MANCHESTER, England)៖ រដ្ឋាភិបាលចក្រភពអង់គ្លេស បានប្តេជ្ញាថានឹងបង្កើនកិច្ចខិតខំប្រឹងប្រែងទ្វេដង ដើម្បីដោះស្រាយបញ្ហាប្រឆាំងនឹងជាតិសាសន៍ ខណៈសហគមន៍ជ្វីហ្វ ទើបតែជួបប្រទះហេតុការណ៍វាយប្រហារសម្លាប់មនុស្សពីរនាក់ ក្នុងថ្ងៃបុណ្យសាសនារបស់ជនជាតិជ្វីហ្វ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃសុក្រ ទី៣ ខែតុលា ឆ្នាំ ២០២៥។

រដ្ឋមន្ត្រីមហាផ្ទៃ លោកស្រី Shabana Mahmood និយាយថា លោកស្រីយល់ពីបញ្ហាផ្លូវចិត្តរបស់ភាគីទាំងអស់ ពាក់ព័ន្ធនឹងសង្រ្គាមហ្កាហ្សា ប៉ុន្តែវាជារឿងសំខាន់ ដែលមិនគួរឱ្យមានភាពតានតឹង នៅតាមដងផ្លូវរបស់ចក្រភអង់គ្លេស។ លោកស្រី គូសបញ្ជាក់យ៉ាងដូច្នេះថា «យើងនឹងធ្វើអ្វីគ្រប់យ៉ាង ដើម្បីរក្សាសុវត្ថិភាពសហគមន៍ជ្វីហ្វ។ ប្រជាជននឹងបានឃើញ វត្តមានប៉ូលិសច្រើនជាងមុន នៅគ្រប់មជ្ឈដ្ឋានសហគមន៍ ជាចម្បងនៅតាមទីតាំងជួបជុំ និងកន្លែងផ្សេងទៀត»។

គួរបញ្ជាក់ថា កាលពីថ្ងៃព្រហស្បតិ៍ មានហេតុការណ៍បើករថយន្តចូលទៅក្នុងតំបន់ថ្មើរជើង ហើយបន្ទាប់មកអ្នកបើករថយន្ត បានធ្វើសកម្មភាពចាក់ទៅលើមនុស្ស នៅខាងក្រៅវិហារ Heaton Park Hebrew Congregation ទីក្រុង Manchester ភាគខាងជើងប្រទេសអង់គ្លេស។ ជនរងគ្រោះពីរនាក់បានស្លាប់ ហើយជនសង្ស័យគឺជាជនជាតិអង់គ្លេស អាយុ ៣៥ឆ្នាំ និងត្រូវបានប៉ូលិសបាញ់សម្លាប់ភ្លាមៗ នៅកន្លែងកើតហេតុ៕

03/10/2025

⭕️ក្រុមលេខា RBC រវាងយោធភូមិភាគទី៤ ភាគីកម្ពុជា និងយោធភូមិភាគទី២ របស់ភាគីថៃ បើកកិច្ចប្រជុំ នៅមាត់ច្រកអន្តរជាតិអូរស្មាច់
(ឧត្តរមានជ័យ)៖ ក្រុមលេខា គណៈកម្មាធិការព្រំដែនថ្នាក់យោធភូមិភាគកម្ពុជា-ថៃ (RBC) រវាងយោធភូមិភាគទី៤ ភាគីកម្ពុជា និងយោធភូមិភាគទី២ របស់ភាគីថៃ នៅព្រឹកថ្ងៃទី០៣ ខែតុលា ឆ្នាំ២០២៥នេះ បានបើកកិច្ចប្រជុំ នៅសាលប្រជុំក្រុមទំនាក់ទំនងកម្ពុជា-ថៃ នាមាត់ច្រកអន្តរជាតិអូរស្មាច់ ខេត្តឧត្តរមានជ័យ។

ភាគីកម្ពុជាមានចំនួន០៧នាក់ ដឹកនាំដោយលោក ឧត្តមសេនីយ៍ត្រី និត ណារុង នាយសេនាធិការរង យោធភូមិភាគទី៤ និងភាគីថៃចំនួន០៨នាក់ ដឹកនាំដោយលោក ឧត្តមសេនីយ៍ត្រី កាំផាក់ណាក វ៉ាផាន់ស៊ុ នាយសេនាធិការ យោធភូមិភាគទី២ ប្រធានក្រុមលេខា៕

03/10/2025

⭕️ក្រុមអ្នកសង្កេតការណ៍អន្តរកាល (IOT) ចុះពិនិត្យទីតាំងជាក់ស្តែង នៅភូមិចក់ពួក ឃុំស្លក្រាម ស្រុកស្វាយចេក ខេត្តបន្ទាយមានជ័យ

(បន្ទាយមានជ័យ)៖ នៅព្រឹកថ្ងៃសុក្រ ទី៣ ខែតុលា ឆ្នាំ២០២៥នេះ ក្រសួងការពារជាតិកម្ពុជា បានសម្របសម្រួលជូនក្រុមអ្នកសង្កេតការណ៍អន្តរកាល (IOT) អញ្ជើញចុះពិនិត្យទីតាំងជាក់ស្តែង នៅភូមិចក់ពួក ឃុំស្លក្រាម ស្រុកស្វាយចេក ខេត្តបន្ទាយមានជ័យ ដើម្បីសង្កេតការណ៍ ផ្ទៀងផ្ទាត់ និងរាយការណ៍ នៅស្ថានភាពព្រំដែន ក្រោយបទឈប់បាញ់ចូលជាធរមាន។ នេះបើតាមការបញ្ជាក់របស់ លោកស្រី ឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិ នៃព្រះរាជាណាចក្រកម្ពុជា នៅព្រឹកនេះ៕

03/10/2025

⭕️ឧត្តមសេនីយ៍ទោ សេង ធារិន ចាត់វិធានការបង្រ្កាបបទលើ្មសដឹកលៀសខុសច្បាប់ ចំនួន៣០តោន ក្នុងខេត្តកំពង់ធំ
(កំពង់ធំ)៖ នៅថ្ងៃទី៣ ខែតុលា ឆ្នាំ២០២៥ វេលាម៉ោង២៖៣០នាទីយប់ លោកឧត្តមសេនីយ៍ទោ សេង ធារិន ប្រធានគណៈបញ្ជាការដឹកនាំបង្រ្កាបបទលើ្មសនេសាទលើផ្ទៃបឹងទន្លេសាប បានចាត់តាំងកម្លាំងអង្គភាព ចំណុះយោធភូមិភាគទី៥ ដឹកនាំដោយវរសេនីយ៍ទោ ស វិបុល សហការជាមួយកម្លាំងតំបន់ប្រតិបត្តិការសឹករងកំពង់ឆ្នាំង និងកម្លាំងការិយាល័យទី២ កងទ័ពជើងគោក ចុះប្រតិបត្តិការបង្រ្កាបការជួយដូរ និងដឹកលៀសដោយខុសច្បាប់ ចំនួន៣០តោន ស្ថិតនៅក្នុងភូមិសាស្រ្តស្រុកស្ទោង ខេត្តកំពង់ធំ។

ប្រតិបត្តិការបង្ក្រាបនេះ បានឃាត់រថយន្តសរុបចំនួន៣គ្រឿង រួមមាន៖ រថយន្តFUSU ចំណុះ៥តោន ផ្ទុកលៀសចំនួន ១៥តោន, រថយន្តកូរ៉េចំណុះ៥តោន ផ្ទុកលៀសចំនួន១០តោន, រថយន្តកែឆ្នៃ ផ្ទុកលៀសចំនួន៥តោន និងអ្នកបើកបររថយន្តចំនួន៣នាក់ បញ្ជូនទៅមន្រ្តីជំនាញកងរាជអាវុធហត្ថខេត្តកំពង់ធំ កសាងសំណុំរឿងបញ្ជូនទៅតុលាការ ដើម្បីចាត់វិធានការតាមផ្លូវច្បាប់។ ដោយឡែកលៀសដែលឃាត់បាន ប្រគល់ជូនមន្រ្តីជំនាញ និងកងទ័ពបានដឹកជញ្ជូនយកទៅចាក់ចូលក្នុងបឹងទន្លេសាបវិញ។

លោកឧត្តមសេនីយ៍ទោ សេង ធារិន បានបញ្ជាក់ថា ទោះបីកងទ័ពជាប់ដៃការពារបូរណៈភាពទឹកដី ពីការឈ្លានពានពីប្រទេសជិតខាងយ៉ាងណាក្តី តែដៃម្ខាងការពារទឹកដី និងដៃម្ខាងបន្តការពារធនធានធម្មជាតិ លើផ្ទៃបឹងទន្លេសាប ដោយបន្តបង្រ្កាបបទលើ្មសផ្សេងៗ ដូចជា ឆក់ក្តៅ ត្រជាក់ ដាក់របាំងស្បៃ លបបណរ៉ាវ ក្នុងតំបន់ព្រៃលិចទឹក និងការនេសាទដោយឧបករណ៍ខុសច្បាប់ជលផលផ្សេងៗទៀតជារៀងរាល់ថ្ងៃ ដោយពុំមានការលើកលែង និងចាត់វិធានការយ៉ាងម៉ឹងម៉ាត់បំផុត ដើម្បីធានាបាននូវការការពារធនធានធម្មជាតិ ជីវចម្រុះ លើផ្ទៃបឹងទន្លេសាប ដែលជាប្រភពធនធានមច្ឆាជាតិ ក្នុងការរួមចំណែកជួយផ្គត់ផ្គង់នូវជីវភាពរស់នៅប្រចាំថ្ងៃរបស់ប្រជាពលរដ្ឋខ្មែរមួយចំណែក និងផលប្រយោជន៍សេដ្ឋកិច្ចជាតិផងដែរ។

សូមជម្រាបថា សកម្មភាពទាំងនេះតែងតែកើតមានឡើងជាបន្ដបន្ទាប់ ខណៈមន្ដ្រីជំនាញជលផលហាក់បណ្ដែតបណ្ដោយឲ្យក្រុមឈ្មួយប្រព្រឹត្តបទល្មើសតាមអំពើចិត្ត ដោយមិនមានខ្វាយខ្វល់ក្នុងការចាត់វិធានការបង្ក្រាបឡើយ៕

03/10/2025

⭕️ជនជាតិថៃ២នាក់ត្រូវបានចាប់ខ្លួន បន្ទាប់ពីបាញ់បោះសេរីក្នុងក្រុងប៉ោយប៉ែត ខេត្តបន្ទាយមានជ័យ

(ក្រុងប៉ោយប៉ែត)៖ នៅវេលាម៉ោង០០ និង៤១នាទីរំលងអធ្រាតឈានចូល ថ្ងៃទី០៣ ខែតុលា ឆ្នាំ២០២៥ កម្លាំងមូលដ្ឋានកងរាជអាវុធហត្ថក្រុងប៉ោយប៉ែត សហការណ៍ជាមួយក្រុមល្បាតព្រំដែន ចុះល្បាតតាមព្រំដែនក្នុងភូមិសាស្ត្រក្រុងប៉ោយប៉ែត ដល់ចំណុចដីវាលមុខបុរីស្តារហ្គោល ស្ថិតក្នុងភូមិព្រៃព្រិច សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ ក៏បានប្រទះឃើញករណីបាញ់បោះសេរី និងប្រើប្រាស់អាវុធដោយខុសច្បាប់ប្រព្រឹត្តដោយជនសង្ស័យចំនួន០២នាក់ ភ្លាមនោះកម្លាំងបានធ្វើការឃាត់ខ្លួនជនសង្ស័យទាំង២នាក់ ដែលជាជនជាតិថៃ រួមទាំងអាវុធខ្លី ដែលជាវត្ថុតាង និងនាំទៅកាន់មូលដ្ឋានកងរាជអាវុធហត្ថក្រុងប៉ោយប៉ែត ដើម្បីធ្វើការសួរនាំ។

កងរាជអាវុធហត្ថបានឱ្យដឹងថា ជនសង្ស័យមានឈ្មោះ ផាចារាក់ ខៅផូ ( PATCHARA KHAOPHO ) ភេទប្រុស អាយុ២៧ឆ្នាំ ជាជនជាតិថៃ ជាម្ចាស់អាវុធ។ ឈ្មោះ ឡាំភុម រ៉ាត់តាណាក់កែវមន្នី (RAMPUM RATTANAKAEWMANEE) ភេទប្រុស អាយុ២២ឆ្នាំ ជាជនជាតិថៃ ពួកគេទាំង២ស្នាក់នៅម្ដុំវត្តជាយដែន ស្ថិតក្នុងភូមិព្រៃព្រិច សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ។ ពេលឃាត់ខ្លួនកងរាជអាវុធហត្ថបានរកឃើញ និងដកហូតវត្ថុតាងជាអាវុធខ្លីម៉ាក ស៉ិចសាយអឺ (SIG SAUER) ពណ៌ខ្មៅ លេខតួ 66A986594 ចំនួន១ដើម បង់ចំនួន១ គ្រាប់ចំនួន១០គ្រាប់ និងសំបកគ្រាប់បាញ់រួចចំនួន៤គ្រាប់។

បច្ចុប្បន្នជនសង្ស័យទាំង២នាក់ កំពុងសួរនាំនៅមូលដ្ឋានកងរាជអាវុធហត្ថក្រុងប៉ោយប៉ែត ដើម្បីកសាងសំណុំរឿងតាមនីតិវិធី៕

03/10/2025

⭕️ថៃ៖ ភ្លៀង និងខ្យល់កន្ត្រាក់ ធ្វើឱ្យដើមឈើជាច្រើនដើមរលំសង្កត់ផ្ទះ និងរថយន្ដជាច្រើនគ្រឿង ក្នុងទីក្រុងបាងកក

(បាងកក)៖ ខ្យល់បក់ខ្លាំង លាយឡំជាមួយភ្លៀងផងនោះបានធ្វើឱ្យដើមឈើធំជាច្រើនដួលរលំក្នុងទីក្រុងបាងកក និងតំបន់ជុំវិញរាជធានីនៃប្រទេសថៃ នៅព្រឹកថ្ងៃសុក្រ ទី៣ ខែតុលា ដោយបង្កការខូចខាតដល់រថយន្ដ និងផ្ទះសម្បែងមួយចំនួន។ នេះបើតាមការចេញផ្សាយដោយកាសែតថៃ Khaosod។

នៅម៉ោង ៥៖៣០នាទីព្រឹក ថ្ងៃទី៣ ខែតុលា ដើមឈើធំមួយដើមបានរលំសង្កត់ផ្ទះ និងរថយន្ដមួយចំនួន នៅក្នុងស្រុក Chatuchak ហើយបង្កការរំខានដល់ការធ្វើចរាចរណ៍។ ដោយឡែក នៅស្រុក Soi Ramkhamhaeng Hua Mak និង Bang Kapi មានដើមឈើ៣ដើមបានបាក់រលំសង្កត់រថយន្ដជាច្រើនគ្រឿង។ តែមិនមានសេចក្ដីរាយការណ៍ពីជនរងគ្រោះណាម្នាក់ នោះទេ ខណៈអាជ្ញាធរកំពុងដោះស្រាយនៅកន្លែងកើតហេតុ។

ចំណែក នៅស្រុក Pak Kret ខេត្ត Nonthaburi ដើមឈើដ៏ធំមួយដើមក៏បានរលំសង្កត់យានយន្ដជាច្រើនគ្រឿងផងដែរ បន្ទាប់ពីមានព្យុះភ្លៀងលាយឡំជាមួយខ្យល់បកយ៉ាងខ្លាំង៕

03/10/2025

សូមទស្សនារូបភាពមួយចំនួនបង្ហាញពីសកម្មភាពរស់នៅរបស់ប្រជាពលរដ្ឋនៅក្នុងភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។ ផ្ទះសម្បែង ដីស្រែចម្ការរបស់ប្រជាពលរដ្ឋមួយចំនួន ក្នុងភូមិព្រៃចាន់ ត្រូវបានកងទ័ពថៃ រាយបន្លាលួសព័ទ្ធយកតាំងពីថ្ងៃទី១៣ ខែសីហា ឆ្នាំ២០២៥។ ទង្វើនេះ ជារំលោភបំពានមកលើអធិបតេយ្យ និងបូរណភាពទឹកដីកម្ពុជា ដោយបំពានច្បាប់អន្តរជាតិ និងកិច្ចព្រមព្រៀងដែលថៃ បានធ្វើជាមួយកម្ពុជា។

បើទោះបីជាយ៉ាងណា រហូតមកដល់ព្រឹកថ្ងៃសុក្រ ទី៣ ខែតុលា ឆ្នាំ២០២៥នេះ កងទ័ព ឬអាជ្ញាធរថៃ មិនមានធ្វើសកម្មភាពថ្មីទន្ទ្រាននៅភូមិព្រៃចាន់នោះឡើយ។ ប្រជាពលរដ្ឋខ្មែរបន្តរស់នៅក្នុងភូមិឋាននេះជាធម្មតា តែក៏បន្តត្រៀមខ្លួនជាប់ជាប្រចាំរារាំងសកម្មភាពរបស់ថៃ បើពួកគេបន្តសកម្មភាពទន្ទ្រាន។

03/10/2025

ថ្ងៃនេះជា ថ្ងៃទី៦៦ហើយ ដែលវីរកងទ័ពកម្ពុជាចំនួន ១៨រូប ត្រូវបានចាប់ខ្លួន និងដាក់ឱ្យស្ថិតក្រោមការឃុំគ្រងរបស់យោធាថៃ។

កម្ពុជាសូមអំពាវនាវឱ្យភាគីថៃ ដោះលែងពួកគាត់ត្រឡប់មកវិញឱ្យបានឆាប់រហ័សជាទីបំផុត ដើម្បីឱ្យពួកគាត់អាចវិលត្រឡប់មកជួបជុំក្រុមគ្រួសាររបស់ពួកគាត់ និងប្រកបដោយសុខសុវត្ថិភាព ស្របតាមច្បាប់មនុស្សធម៌អន្តរជាតិ។

សូមបញ្ជាក់ថា រាជរដ្ឋាភិបាលកម្ពុជា បាននឹងកំពុងធ្វើការយ៉ាងសស្រាក់សស្រាំឥតឈប់ឈរ នូវគ្រប់យន្តការដោះស្រាយទាំងអស់លើករណីនេះ ដើម្បីឱ្យភាគីថៃ ដោះលែងកងកម្លាំងរបស់យើងទាំង១៨នាក់នោះ វិលត្រលប់មកវិញឱ្យបានឆាប់រហ័សជាទីបំផុត និងដោយសុខសុវត្ថិភាព។

រាជរដ្ឋាភិបាល ក្រសួងការពារជាតិ និងកងយោធពលខេមរភូមិន្ទ មិនដែលបោះបង់កងកម្លាំងរបស់យើងណាម្នាក់ចោលនោះឡើយ ទោះក្នុងកាលៈទេសៈណាក៏ដោយ។

02/10/2025

⭕️ព្រលានយន្តហោះទីក្រុងហាណូយ រងការជន់លិចខ្លាំង ដោយសារតែព្យុះទីហ្វុង Bualoi
(ហាណូយ)៖ ព្យុះទីហ្វុង Bualoi ដែលបានវាយប្រហារវៀតណាម កាលពីដើមសប្តាហ៍នេះ បានបណ្តាលឱ្យមានការជន់លិចនៅពាសពេញតំបន់ចន្លោះភាគកណ្តាលនិងភាគខាងជើងប្រទេសមួយនេះ រួមមានទាំងនៅរដ្ឋធានីហាណូយ។

នៅទីក្រុងហាណូយ ផ្លូវជាច្រើនត្រូវបានជន់លិចដូចជាទន្លេ ខណៈសូម្បីតែអាកាសយានដ្ឋានអន្តរជាតិប្រចាំរដ្ឋធានីមួយនេះ គឺ Noi Bai International Airport ក៏ត្រូវបានទឹកលិចធ្ងន់ធ្ងរផងដែរ ជាហេតុនាំជើងហោះហើររាប់សិប ត្រូវបានផ្អាក ឬពន្យារពេល។

នាថ្ងៃព្រហស្បតិ៍ ទី២ ខែតុលានេះ អាជ្ញាធរវៀតណាម បានចេញរបាយការណ៍ថា ការខូចខាតទ្រព្យសម្បត្តិដែលបង្កឡើងដោយព្យុះ Bualoi មានទំហំខ្ទង់១១.៥ទ្រីលានដុល្លារ ឬ៤៣៥.៨០លានដុល្លារ កើនឡើងពីការព្យាករក្នុងរបាយការណ៍ កាលពីថ្ងៃពុធ ដែលមានទំហំ៣០៣លានដុល្លារ។ រីឯតួលេខមនុស្សស្លាប់គឺ៣៦នាក់ និងបាត់ខ្លួន២១នាក់៕

02/10/2025

⭕️សហរដ្ឋអាមេរិក៖ អគារខ្ពស់មួយក្នុងទីក្រុងញូវយ៉ក ដួលរលំមួយផ្នែក តែមិនមានអ្នករបួស

(ញូវយ៉ក)៖ ផ្នែកមួយនៃអគារផ្ទះល្វែងកម្ពស់ខ្ពស់ នៅក្នុងទីក្រុងញូវយ៉កនៃសហរដ្ឋអាមេរិក បានដួលរលំ កាលពីថ្ងៃពុធ ថ្ងៃទី១ ខែតុលា ដោយបន្សល់ទុកនូវគំនរកម្ទេចកម្ទីថ្ម ប៉ុន្តែមិនបណ្តាលឱ្យមានអ្នករងរបួសនោះទេ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន AP។

នាយកដ្ឋានពន្លត់អគ្គិភ័យក្រុង មិនទទួលបានរបាយការណ៍អំពីអ្នករងរបួសទេ ហើយកំពុងឆ្លើយតបទៅនឹងករណីផ្ទុះហ្គាស ដែលបណ្តាលឱ្យបាក់បំពង់បញ្ចេញផ្សែងនៃអគារកម្ពស់ ២០ជាន់ ក្នុងសង្កាត់ Bronx។ អភិបាលក្រុងញូវយ៉ក លោក Eric Adams និយាយថា ក្រុមមន្ត្រីនៅបន្តធ្វើការវាយតម្លៃលើផលប៉ះពាល់ទាំងស្រុង។ នាយកដ្ឋានប៉ូលិសក្រុងញូវយ៉ក បាននិយាយឱ្យដឹងថា នៅពេលទៅដល់កន្លែងកើតហេតុ អគារ Mitchel Houses ក្រុមមន្រ្តីសង្កេតឃើញ ផ្នែកមួយនៃអគារបានដួលរលំ។

គួរបញ្ជាក់ថា បំពង់បញ្ចេញផ្សែងពីអគារ នៅក្នុងទីក្រុងញូវយ៉ក ត្រូវបានប្រើប្រាស់សម្រាប់បញ្ចេញសំរាមចោល ដែលត្រូវបានដុតនៅក្នុងនោះតែម្តង៕

𝐏𝐨𝐬𝐭𝐍𝐞𝐰𝐬24𝐡

03/10/2025

03/10/2025

03/10/2025

03/10/2025

03/10/2025

03/10/2025

03/10/2025

03/10/2025

03/10/2025

03/10/2025

02/10/2025

02/10/2025

Address

Website

Alerts

Contact The Business

Shortcuts

Share

Category