28/05/2025
អ្នកនាំពាក្យកងទ័ពជើងគោកកម្ពុជា៖ មន្រ្តីកម្ពុជា-ថៃ ជួបចរចាគ្នា ក្រោយផ្ទុះអាវុធមួយប្រាវ ក្នុងតំបន់មុំ៣---ថ្លែងប្រាប់សារព័ត៌មានក្នុងស្រុក ដោយខ្លី នៅរសៀលថ្ងៃទី២៨ ខែឧសភានេះ លោកឧត្តមសេនីយ៍ទោ ម៉ៅ ផល្លា អ្នកនាំពាក្យកងទ័ពជើងគោកកម្ពុជា បានឱ្យដឹងថា ក្រោយការផ្ទុះអាវុធ ក្នុងតំបន់មុំ៣នៅព្រឹកមិញនេះ មន្រ្តីកម្ពុជា-ថៃបានជួបចរចាគ្នាហើយ។ អ្នកនាំពាក្យកងទ័ពជើងគោកកម្ពុជា ក៏បានបញ្ជាក់ដែរថា លោកមិនទាន់ទទួលបានព័ត៌មានស្ដីពីការស្លាប់ទាហានខ្មែរដោយសារការផ្ទុះអាវុធនេះនៅឡើយទេ។ ប៉ុន្តែយ៉ាងណាមិញ, លោកឧត្តមសេនីយ៍ទោ ម៉ៅ ផល្លា ក៏បានអំពាវនាវឱ្យប្រជាពលរដ្ឋខ្មែរ មានការស្ងប់ចិត្ត ត្បិតភាគីកម្ពុជា-ថៃ កំពុងជួបចរចាគ្នាលើបញ្ហានេះហើយ។ គួរជម្រាបជូនថា «មុំបី» ជាតំបន់ចម្រុះព្រំប្រទល់នៃប្រទេសកម្ពុជា ថៃ និងឡាវ មានទីតាំងស្ថិតនៅលើភ្នំដងរែក ខេត្តព្រះវិហារ(កម្ពុជា) ខេត្តអ៊ូប៊ុន(ថៃ) និងខេត្តចំប៉ាសាក់ (ឡាវ)។
