22/05/2026
បង្ក្រាប ក្រុមក្លែងបន្លំជានគរបាល ៨នាក់ ករណីចាប់ជំរិត នៅក្រុងព្រះសីហនុ
(ភ្នំពេញ)៖ កម្លាំងនាយកដ្ឋាននគរបាលព្រហ្មទណ្ឌ បានបើកប្រតិបត្តិការស្រាវជ្រាវ និងបង្ក្រាបករណីចាប់ជំរិតទារប្រាក់ ដោយក្រុមជនសង្ស័យក្លែងបន្លំជានគរបាល ប្រព្រឹត្តដោយជនជាតិចិន និងមីយ៉ាន់ម៉ា នៅក្រុងព្រះសីហនុ ដោយឃាត់ខ្លួនជនដៃដល់បានចំនួន៨នាក់។
ប្រតិបត្តិការនេះធ្វើឡើង បន្ទាប់ពីនៅថ្ងៃទី១១ ខែឧសភា ឆ្នាំ២០២៦ កម្លាំងនាយកដ្ឋាននគរបាលព្រហ្មទណ្ឌ បានទទួលពាក្យបណ្តឹងពីឈ្មោះ TANG CAIYOU ភេទប្រុស អាយុ៣២ឆ្នាំ ជនជាតិចិន ដែលបានអះអាងថា កាលពីថ្ងៃទី៩ ខែឧសភា ឆ្នាំ២០២៦ វេលាម៉ោង០០៖៣០នាទី រំលងអាធ្រាត្រ ខ្លួនត្រូវបានជនមិនស្គាល់អត្តសញ្ញាណមួយក្រុម មានគ្នា៣នាក់ ជាជនជាតិខ្មែរ និងចិន ធ្វើសកម្មភាពបង្ខាំង និងជំរិតទារប្រាក់អស់ចំនួន១២,០០០ដុល្លារអាមេរិក និង៨១,០០០USDT។ ក្រោយធ្វើសកម្មភាពរួច ក្រុមជនសង្ស័យបានដឹកជនរងគ្រោះទៅទម្លាក់ចោលក្បែរអាកាសយានដ្ឋានអន្តរជាតិភ្នំពេញ ពោធិ៍ចិនតុង។
ក្រោយទទួលបានពាក្យបណ្តឹង ដោយអនុវត្តតាមបទបញ្ជារបស់លោកឧត្តមសេនីយ៍ឯក ង៉េង ជួន ប្រធាននាយកដ្ឋាននគរបាលព្រហ្មទណ្ឌ កម្លាំងជំនាញដឹកនាំដោយលោកឧត្តមសេនីយ៍ត្រី ហ៊ុន មុន្នីរ័ត្ន វរសេនីយ៍ឯក ហែម បូណា និងវរសេនីយ៍ឯក ឆាន់ គីមលី អនុប្រធាននាយកដ្ឋាន បានបើកការស្រាវជ្រាវយ៉ាងយកចិត្តទុកដាក់។
តាមការស្រាវជ្រាវ សមត្ថកិច្ចបានរកឃើញថា បន្ទាប់ពីធ្វើសកម្មភាពរួច ក្រុមជនសង្ស័យបានយករថយន្តប្រព្រឹត្តបទល្មើសទៅផ្លុងចោល នៅចំណុចភូមិ១ សង្កាត់៣ ក្រុងព្រះសីហនុ រួចបន្តឡើងជិះរថយន្តតាក់ស៊ីម៉ាក Toyota Prius មួយគ្រឿង។ លុះដល់ថ្ងៃទី១៤ ខែឧសភា ឆ្នាំ២០២៦ វេលាម៉ោង១៩៖០០នាទី កម្លាំងជំនាញបានអញ្ជើញម្ចាស់រថយន្តតាក់ស៊ីមកសាកសួរ និងប្រមូលព័ត៌មានបន្ថែម។
បន្ទាប់មក នៅថ្ងៃទី១៥ ខែឧសភា ឆ្នាំ២០២៦ កម្លាំងជំនាញនៃនាយកដ្ឋាននគរបាលព្រហ្មទណ្ឌ សហការជាមួយស្នងការដ្ឋាននគរបាលខេត្តព្រះសីហនុ បានចុះប្រតិបត្តិការឃាត់ខ្លួនជនសង្ស័យជាបន្តបន្ទាប់ចំនួន៨នាក់ រួមមានជនជាតិចិន និងមីយ៉ាន់ម៉ា។
បច្ចុប្បន្ន ជនសង្ស័យទាំង៨នាក់ ត្រូវបានបញ្ជូនមកកាន់នាយកដ្ឋាននគរបាលព្រហ្មទណ្ឌ ដើម្បីបន្តនីតិវិធីសាកសួរ និងចាត់ការតាមផ្លូវច្បាប់៕សហការី
