08/10/2025
រដ្ឋាភិបាលជប៉ុនបានផ្តល់ឥណទានសម្បទានប្រាក់យ៉េនដល់កម្ពុជាចំនួន ៤៤ ៤៣៧លានយ៉េន ស្មើប្រមាណ ២៩៦,២លានដុល្លារអាម៉េរិក សម្រាប់អនុវត្តគម្រោងពង្រីកប្រព័ន្ធផ្គត់ផ្គង់ទឹកស្អាត និងគម្រោងពង្រីកប្រព័ន្ធខ្សែបញ្ជូន និងចែកចាយអគ្គិសនីក្នុងក្រុងភ្នំពេញ។ យោងតាមសេចក្តីប្រកាសព័ត៌មានរបស់ក្រសួងការបរទេស។
លោក ប្រាក់ សុខុន ឧបនាយករដ្ឋមន្ត្រី និងជារដ្ឋមន្ត្រីការបរទេស និងសហប្រតិបត្តិការអន្តរជាតិ និង លោក UENO Atsushi ឯកអគ្គរាជទូតវិសាមញ្ញ និងពេញសមត្ថភាពជប៉ុន ប្រចាំកម្ពុជា នៅថ្ងៃទី៨ ខែតុលា ឆ្នាំ២០២៥ បានចុះហត្ថលេខាលើលិខិតប្ដូរសារ និងឯកសារពាក់ព័ន្ធស្តីពីការផ្តល់ឥណទានសម្បទានប្រាក់យ៉េនរបស់រដ្ឋាភិបាលជប៉ុនក្រោមជំនួយអភិវឌ្ឍន៍ផ្លូវការ សម្រាប់គម្រោងចំនួន២ ដែលមានទឹកប្រាក់ចំនួន ៤៤ ៤៣៧លានយ៉េន (ប្រមាណ ២៩៦,២ លានដុល្លារអាម៉េរិក)។
យោងតាមសេចក្ដីប្រកាសព័ត៌មានរបស់ក្រសួងការបរទេស ជប៉ុនបានផ្ដល់ឥណទានសម្បទានជាទឹកប្រាក់ក្នុងចំនួន ២១ ៥២៦លានយ៉េន ឬប្រមាណ ១៤៣,៥ លានដុល្លារអាមេរិក សម្រាប់អនុវត្តគម្រោងពង្រីកប្រព័ន្ធផ្គត់ផ្គង់ទឹកស្អាតនិរោធ និងបានផ្ដល់ឥណទានសម្បទានក្នុងទឹកប្រាក់ចំនួន ២២ ៩១១លានយ៉េន ឬប្រមាណ ១៥២,៧លានដុល្លារអាម៉េរិក សម្រាប់អនុវត្តគម្រោងពង្រីកប្រព័ន្ធខ្សែបញ្ជូន និងចែកចាយអគ្គិសនីដំណាក់កាលទី៣ ក្នុងភូមិសាស្ត្ររាជធានីភ្នំពេញ។ (រូបភាព៖ ក្រសួងការបរទេស)
