21/05/2025
វ៉ៃសម្លាប់ កប់សពនិងប្លុងឡានចោលក្នុងព្រៃ
ខេត្តបន្ទាយមានជ័យ ៖ បុរសម្នាក់ បានដឹកគោចេញទៅឃ្វាល នៅព្រៃមួយកន្លែង លុះទៅដល់ ប្រទះឃើញមានរថយន្តទំនើប ១គ្រឿង ចតចោលនៅក្នុងព្រៃ ព្រមទាំងមានស្នាមជីកដីកប់ថ្មីៗនៅក្បែរនោះ ក៏ប្រញាប់រាយការណ៍ប្រាប់សមត្ថកិច្ច ចុះទៅពិនិត្យនិងជីកកាយដីមើល ស្រាប់តែប្រទះឃើញសាកសពបុរសម្នាក់ ត្រូវបានសម្លាប់កប់ក្នុងដី នៅក្នុងព្រៃ។
ករណីប្រទះឃើញសាកសពនេះ បានកើតមានការភ្ញាក់ផ្អើលឡើង កាលពីថ្ងៃទី២០ ខែឧសភា ឆ្នាំ២០២៥ នៅត្រង់ចំណុចព្រៃព្រិច ស្ថិតក្នុងភូមិបឹងស្នោ ឃុំស្លក្រាម ស្រុកស្វាយចេក។
តាមប្រភពពីប្រជាពលរដ្ឋដែលប្រទះឃើញហេតុការណ៍ បានឱ្យដឹងថា មុនពេលកើតហេតុ គាត់បានទៅឃ្វាលគោក្នុងព្រៃព្រិច ត្រង់ចំណុចខាងលើ ដូចសព្វដង ស្រាប់តែទៅដល់ ប្រទះឃើញរថយន្តទំនើប ១គ្រឿង ម៉ាក Lexus ពណ៌ខ្មៅ ពាក់ស្លាកលេខ កម្ពុជា ST-1001 ត្រូវបានប្លុងចោលនៅកណ្តាលព្រៃ។ ដោយមានការសង្ស័យ គាត់ក៏បានដើរទៅក្បែររថយន្ត រកមើល មិនឃើញមានមនុស្ស តែឃើញស្នាមជីកដីកប់ថ្មីៗ ក្បែរដំបូកក្នុងព្រៃ ស្ថិតនៅចម្ងាយមិនឆ្ងាយប៉ុន្មានពីរថយន្ត។ ដោយមានការសង្ស័យ គាត់បានរាយការណ៍ជូនអាជ្ញាធរមូលដ្ឋាន និងសមត្ថកិច្ចជំនាញ ចុះមកពិនិត្យភ្លាមៗ។
បន្ទាប់ពីទទួលបានព័ត៌មានខាងលើ កម្លាំងសមត្ថកិច្ចនគរបាលជំនាញ កម្លាំងកងរាជអាវុធហត្ថ និងកម្លាំងយោធាការពារព្រំដែនលេខ៥០៣ ព្រមទាំងអាជ្ញាធរមូលដ្ឋាន សរុបប្រមាណជាង២០នាក់ បានចុះទៅដល់ទីតាំងកើតហេតុ ដើម្បីពិនិត្យ និងជីកកកាយដីនោះចេញ ស្រាប់តែប្រទះឃើញសាកសពបុរសម្នាក់ ត្រូវបានជនមិនស្គាល់មុខ យកមកកប់ចោលក្បែររថយន្តទំនើប។
ក្រោយកើតហេតុ សមត្ថកិច្ចបានកាយយកសាកសពជនរងគ្រោះ ឡើងមកពិនិត្យនិងធ្វើកោសល្យវិច័យ រួចបញ្ជាក់ថា សាកសពជនរងគ្រោះ មានសម្បុរស និងមានសាក់ពេញខ្លួន (សង្ស័យថាជាជនជាតិចិន) តែយ៉ាងណា សមត្ថកិច្ចនៅមិនទាន់អាចកំណត់អត្តសញ្ញាណជនរងគ្រោះបាននៅឡើយ។
តាមការសន្និដ្ឋានក្រៅផ្លូវការ ករណីនេះ អាចជាករណីឃាតកម្ម សម្លាប់ហើយដឹកតាមរថយន្តទំនើប យកមកកប់ចោលកណ្តាលព្រៃ។
ក្រោយសមត្ថកិច្ចកាយសពយកមកពិនិត្យនិងធ្វើកោសលវិច្ឆ័យរួចរាល់ ក៏បានដឹកសាកសពបុរសរងគ្រោះ ទៅតម្កល់ទុកនៅវត្តអូរបីជាន់។ ចំណែករថយន្តទំនើបដែលប្លុងចោល ត្រូវបានសមត្ថកិច្ចជំនាញ យកមករក្សាទុក ដើម្បីស្រាវជ្រាវបន្តតាមនីតិវិធី៕
(ប្រភព ៖ សារព័ត៌មាន នគរធំ)
