Hotnews ASIA, #B ផ្លូវលំ ភូមិ ក្រោលគោ សង្កាត់ គីឡូម៉ែត្រលេខ៦ ខណ្ឌ ឬស្សីកែវ ភ្នំពេញ, Phnom Penh (2025)

16/05/2025

ឧត្តមមន្ត្រីអាស៊ានកម្ពុជា អញ្ជើញចូលរួមកិច្ចប្រជុំឧត្តមមន្រ្តីអាស៊ាន-កូរ៉េលើកទី២៩ នៅទីក្រុងបាងកក

ភ្នំពេញ៖ នៅថ្ងៃទី១៦ ខែឧសភា ឆ្នាំ ២០២៥ ឯកឧត្តម គង់ ភោគ រដ្ឋលេខាធិការនៃក្រសួងការបរទេស និងសហប្រតិបត្តិការអន្តរជាតិ និងជាឧត្តមមន្ត្រីអាស៊ានរបស់កម្ពុជា បានអញ្ជើញចូលរួមកិច្ចប្រជុំឧត្តមមន្រ្តីអាស៊ាន-សាធារណរដ្ឋកូរ៉េលើកទី២៩ នៅទីក្រុងបាងកក ប្រទេសថៃ។

អាស៊ាន និងសាធារណរដ្ឋកូរ៉េបានគូសបញ្ជាក់អំពីទំនាក់ទំនងដ៏រឹងមាំ និងបានអះអាងសារជាថ្មីនូវការប្តេជ្ញាចិត្ត ក្នុងការពង្រីកកិច្ចសហប្រតិបត្តិការលើវិស័យសំខាន់ៗដែលផ្តល់ផលប្រយោជន៍ទៅវិញទៅមក រួមមានពាណិជ្ជកម្ម និងការវិនិយោគ សហគ្រាសធុនតូច និងមធ្យម និងសហគ្រាសចាប់ផ្តើមថ្មី វិទ្យាសាស្ត្រ បច្ចេកវិទ្យា និងនវានុវត្តន៍ សុខាភិបាល ការអប់រំ វប្បធម៌ ការផ្លាស់ប្តូររវាងប្រជាជន និងប្រជាជន ការប្រែប្រួលអាកាសធាតុ និងការគ្រប់គ្រងគ្រោះមហន្តរាយ និងបរិស្ថាន។

ភាគីទាំងពីរក៏បានផ្លាស់ប្តូរយោបល់លើបញ្ហាតំបន់ និងអន្តរជាតិដែលជាផលប្រយោជន៍ និងកង្វល់រួមផងដែរ៕

16/05/2025

រដ្ឋមន្ត្រីទេសចរណ៍ ស្នើមន្ទីរទេសចរណ៍ខេត្តរតនគិរី ត្រូវសហការជាមួយបណ្តាអ្នកសារព័ត៌មាន និងអ្នកផលិតមាតិកាផ្សព្វផ្សាយតំបន់ទេសចរណ៍ជំរុញការផ្សព្វផ្សាយតំបន់ទេសចរណ៍ខេត្តរតនគិរី ឱ្យទូលំទូលាយបន្ថែមទៀត

ភ្នំពេញ៖ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ រួមជាមួយឯកឧត្តម ញ៉ែម សំអឿន អភិបាលនៃគណៈអភិបាលខេត្តរតនគិរី បានអញ្ជើញជួបសំណេះសំណាលជាមួយថ្នាក់ដឹកនាំ និងមន្រ្តីនៅមន្ទីរទេសចរណ៍ ព្រមទាំងអ៊ុំពូមីង បងប្អូនប្រធានសហគមន៍ទេសចរណ៍នៅក្នុងខេត្តរតនគិរី ដោយមានការអញ្ជើញចូលរួមពីថ្នាក់ដឹកនាំក្រសួង ដើម្បីជំរុញយុទ្ធនាការទេសចរណ៍ក្នុងរដូវកាលបៃតង (Green Season) ក្នុងគោលដៅទាក់ទាញភ្ញៀវទេសចរឱ្យមានកំណើនបន្ថែមទៀត តាមរយៈកិច្ចសហការយ៉ាងជិតស្និទ្ធរវាងក្រសួងទេសចរណ៍ ក្រសួង ស្ថាប័នពាក់ព័ន្ធ រដ្ឋបាលថ្នាក់ក្រោមជាតិ និងវិស័យឯកជន ជាពិសេសមន្ទីរទេសចរណ៍ខេត្តរតនគិរី ក្នុងនោះរួមគ្នាដាក់ចេញនូវយុទ្ធសាស្ត្រក្នុងការបញ្ចុះតម្លៃកញ្ចប់ទស្សនកិច្ចនៅតាមគោលដៅទេសចរណ៍ បញ្ចុះតម្លៃការស្នាក់នៅតាមសណ្ឋាគារ ភោជនីយដ្ឋាន រមណីយដ្ឋានទេសចរណ៍ និងមធ្យោបាយធ្វើដំណើរដឹកជញ្ជូន ព្រមទាំងការរួមគ្នាបង្កើតព្រឹត្តិការណ៍ទេសចរណ៍នានានៅតាមបណ្តាសក្តានុពលទេសចរណ៍ខេត្តរតនគិរីឱ្យបានច្រើន ប្រកបដោយភាពច្នៃប្រឌិត និងមានអត្តសញ្ញាណជាខ្មែរ នៅក្នុងរដូវកាលបៃតងនេះ។

ក្នុងពិធីដ៏ពិសេសនេះ ឯកឧត្តមរដ្ឋមន្ត្រី ក៏បានស្តាប់នូវរបាយការណ៍សង្ខេបអំពីវឌ្ឍនភាពការងារ ព្រមទាំងបានណែនាំអំពីរបៀបរបបការងារ និងការបំពេញភារកិច្ចដោយឈរលើស្មារតីសាមគ្គីភាព ឯកភាពផ្ទៃក្នុង និងកិច្ចសហប្រតិបត្តិការល្អ។ មន្ទីរទេសចរណ៍ខេត្តរតនគិរី ត្រូវយកចិត្តទុកដាក់ក្នុងការពង្រឹងសមត្ថភាពអង្គភាព ពង្រឹងមូលធនមនុស្ស ស្វែងយល់អំពីលិខិតបទដ្ឋានគតិយុត្តក្នុងវិស័យទេសចរណ៍ និងបន្តថែរក្សាបរិយាកាសដុខដុមនីយកម្មនៅក្នុងអង្គភាព។

ជាមួយគ្នានេះដែរ ឯកឧត្តមរដ្ឋមន្ត្រី ក៏បានកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់មន្ទីរទេសចរណ៍ខេត្តរតនគិរី ប្រកបដោយទំនួលខុសត្រូវខ្ពស់ និងក្នុងស្មារតីចូលរួមលើកស្ទួយសក្តានុពលទេសចរណ៍ នៅខេត្តរតនគិរី តួយ៉ាង ឯកឧត្តមរដ្ឋមន្ត្រី ក៏បានស្នើឱ្យមន្ទីរទេសចរណ៍ខេត្តរតនគិរី ត្រូវសហការជាមួយបណ្តាអ្នកសារព័ត៌មាន និងក្រុមអ្នកផលិតមាតិកាផ្សព្វផ្សាយតំបន់ទេសចរណ៍ក្នុងទិសដៅជំរុញការផ្សព្វផ្សាយតំបន់ទេសចរណ៍ខេត្តរតនគិរីឱ្យទូលំទូលាយបន្ថែមទៀត ជាពិសេសត្រូវផ្តល់កិច្ចសហការជាមួយអាជ្ញាធរពាក់ព័ន្ធ ដើម្បីលើកផ្លាករមណីយដ្ឋានទេសចរណ៍នៅក្នុងខេត្តរបស់ខ្លួន៕

16/05/2025

កម្មវិធីជិះកង់អង្គរ លើកទី៣ ដើម្បីរអង្គាសថវិកាជូនមន្ទីរពេទ្យជ័យវរ្ម័នទី៧ (គន្ធបុប្ផាទី៣) នឹងរៀបចំនៅថ្ងៃទី១ ខែមិថុនា

ភ្នំពេញ៖ ក្រសួងយុត្តិធម៌ បានចេញសេចក្ដីជូនដំណឹងស្ដីពីកម្មវិធីជិះកង់អង្គរ លើកទី៣ ដើម្បីរអង្គាសថវិកាជូនមន្ទីរពេទ្យជ័យវរ្ម័នទី៧ (គន្ធបុប្ផាទី៣) នឹងរៀបចំនៅថ្ងៃទី១ ខែមិថុនា ឆ្នាំ២០២៥ វេលាម៉ោង ៦:០០នាទីព្រឹក។

ឯកឧត្តម កើត រិទ្ធិ ឧបនាយរដ្ឋមន្ត្រី រដ្ឋមន្ត្រីក្រសួងយុត្តិធម៌ នឹងដឹកនាំកម្មវិធីនេះ ដើម្បីរៃអង្គាសថវិកាដោយស្ម័គ្រចិត្តរបស់មន្ត្រីរាជការ និងអ្នកវិជ្ជាជីវៈក្នុងវិស័យយុត្តិធម៌ ព្រមទាំងសប្បុរសជននានា សម្រាប់គាំទ្រដល់កិច្ចដំណើរការរបស់មន្ទីរពេទ្យជ័យវរ្ម័នទី៧ (គន្ធបុប្ផាទី៣)៕

16/05/2025

កម្ពុជា នឹងធ្វេីជាម្ចាស់ផ្ទះដឹកនាំកិច្ចប្រជុំគណៈកម្មាធិការគ្រប់គ្រងគ្រោះមហន្តរាយអាស៊ានលើកទី៤៦ និងកិច្ចប្រជុំពាក់ព័ន្ធ ចាប់ពីថ្ងៃទី២០-២៣ ខែឧសភា នៅខេត្តសៀមរាប

ភ្នំពេញ៖ គណៈកម្មាធិការគ្រប់គ្រងគ្រោះមហន្តរាយ ចេញសេចក្តីប្រកាសព័ត៌មានស្តីពីការធ្វេីជាម្ចាស់ផ្ទះដឹកនាំកិច្ចប្រជុំគណៈកម្មាធិការគ្រប់គ្រងគ្រោះមហន្តរាយអាស៊ានលើកទី៤៦ និងកិច្ចប្រជុំពាក់ព័ន្ធ ចាប់ពីថ្ងៃទី២០ ដល់ថ្ងៃទី២៣ ខែឧសភា ឆ្នាំ២០២៥ នៅខេត្តសៀមរាប។

16/05/2025

ទេសរដ្ឋមន្រ្តី លី ធុជ វាយតម្លៃខ្ពស់ចំពោះទំនាក់ទំនងការទូតរវាងកម្ពុជា-ស៊ីប រយៈពេល២៥ឆ្នាំ ដោយបានប្រែក្លាយទៅជាផលប្រយោជន៍ជាក់ស្តែងសម្រាប់ប្រជាពលរដ្ឋនៃប្រទេសទាំងពីរ

ភ្នំពេញ៖ នៅថ្ងៃទី១៦ ខែឧសភា ឆ្នាំ២០២៥ តាងនាមឱ្យរាជរដ្ឋាភិបាលកម្ពុជា ឯកឧត្តមបណ្ឌិត លី ធុជ ទេសរដ្ឋមន្រ្តី អនុប្រធានទី១ អាជ្ញាធរមីន បានអញ្ជើញជាភ្ញៀវកិត្តិយសក្នុងពិធីរលឹកខួបអនុស្សាវរីយ៍លើកទី២៥ នៃការបង្កើតទំនាក់ទំនងការទូតផ្លូវការរវាងព្រះរាជាណាចក្រកម្ពុជា និងសាធារណរដ្ឋស៊ីប ដែលការប្រារព្ធនេះ បានបង្ហាញពីស្មារតីនៃមិត្តភាព និងកិច្ចសហប្រតិបត្តិការនៃទំនាក់ទំនងរវាងប្រទេសទាំងពីរ ចាប់តាំងពីការបង្កើតឡើងក្នុងឆ្នាំ ២០០០ ក៏ដូចជាបង្ហាញពីការប្តេជ្ញាចិត្តរួមក្នុងការពង្រីកទំនាក់ទំនង និងការផ្លាស់ប្តូរវប្បធម៌។

ក្នុងពិធីនោះ ឯកឧត្តមទេសរដ្ឋមន្រ្តី លី ធុជ បានវាយតម្លៃខ្ពស់ចំពោះទំនាក់ទំនងការទូតជាផ្លូវការរវាងកម្ពុជា-ស៊ីប រយៈពេល២៥ឆ្នាំ ដែលទំនាក់ទំនងការទូតនេះ បានប្រែក្លាយទៅជាផលប្រយោជន៍ជាក់ស្តែងសម្រាប់ប្រជាពលរដ្ឋនៃប្រទេសទាំងពីរ។

ឯកឧត្តមក៏បានថ្លែងអរគុណចំពោះការគាំទ្ររបស់សាធារណរដ្ឋស៊ីប ក្នុងក្របខ័ណ្ឌសហភាពអឺរ៉ុប សម្រាប់កិច្ចខិតខំប្រឹងប្រែងមនុស្សធម៌ រួមទាំងសកម្មភាពមីន ដែលបានរួមចំណែកដល់ការស្តារ និងការអភិវឌ្ឍរបស់កម្ពុជា ផងដែរ។

ឯកឧត្តមទេសរដ្ឋមន្រ្តី លី ធុជ បានគូសបញ្ជាក់ទៀតថា រាជរដ្ឋាភិបាលកម្ពុជា ក្រោមការដឹកនាំប្រកបដោយទស្សនវិស័យរបស់ សម្តេចធិបតី ហ៊ុន ម៉ាណែត នាយករដ្ឋមន្រ្តី នៅតែបន្តការប្តេជ្ញាចិត្តក្នុងការពង្រឹង និងពង្រីកទំនាក់ទំនងទ្វេភាគីជាមួយសាធារណរដ្ឋស៊ីប ក្នុងការបង្កើនកិច្ចសហប្រតិបត្តិការលើ វិស័យពាណិជ្ជកម្ម ការវិនិយោគ ទេសចរណ៍ ការអប់រំ និងការផ្លាស់ប្តូរវប្បធម៌ ជាដើម។

ឯកឧត្តមបន្តទៀតថា កម្ពុជា សូមស្វាគមន៍ចំពោះធុរកិច្ច និងពលរដ្ឋនៃប្រទេសស៊ីប ក្នុងការស្វែងរកឱកាសនៅកម្ពុជា និងលើកទឹកចិត្តឱ្យប្រជាជនកម្ពុជានិងស៊ីប បង្កើតនូវទំនាក់ទំនងរវាងគ្នាកាន់តែជិតស្និទ្ធ ក្នុងអំឡុងពេលដែលកម្ពុជាទទួលបាននូវសុខសន្តិភាព ស្ថិរភាព និងការអភិវឌ្ឍលើគ្រប់វិស័យ ក្រោមការដឹកនាំរបស់ សម្តេចធិបតី នាយករដ្ឋមន្រ្តី ផងដែរ។

ជាមួយគ្នានេះ ក្នុងនាមកម្ពុជាជាសមាជិកអាស៊ាន ឯកឧត្តមទេសរដ្ឋមន្រ្តី បានបញ្ជាក់ថា កម្ពុជាក៏បានស្វែងរកការពង្រឹងទំនាក់ទំនងរវាងប្លុកតំបន់អាស៊ាន និងសហភាពអឺរ៉ុប ដេីម្បីបង្កើតឱកាសសម្រាប់ការសន្ទនាប្រកបដោយអត្ថន័យ និងកិច្ចសហប្រតិបត្តិការលើបញ្ហាប្រឈមនានាក្នុងតំបន់ និងពិភពលោក៕

16/05/2025

លោកជំទាវ ម៉ែន នារីសោភ័គ ជួបសំណេះសំណាលជាមួយស្ត្រីមានផ្ទៃពោះ-ស្រ្តីមានកូនតូច ៣០នាក់ និងអ្នកផ្ទុកមេរោគអេដស៍ ៣០នាក់ រស់នៅក្រុងសៀមរាប

ភ្នំពេញ៖ ក្នុងឱកាសបំពេញការងារនៅខេត្តសៀមរាប លោកជំទាវ ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា និងជាអនុប្រធានអចិន្ត្រៃយ៍ក្រុមការងារឥស្សរជនឆ្នើមថ្នាក់ជាតិ បានអញ្ជើញជួបសំណេះសំណាលជាមួយស្ត្រីមានផ្ទៃពោះ-ស្រ្តីមានកូនតូច ៣០នាក់ និងអ្នកផ្ទុកមេរោគអេដស៍ ៣០នាក់ រស់នៅសង្កាត់ស្រង៉ែ ក្រុងសៀមរាប ដែលពិធីនេះរៀបចំនៅស្នាក់ការសាខាកាកបាទក្រហមកម្ពុជា ខេត្តសៀមរាប។

លោកជំទាវ ទុយ ជិ ប្រាក់សោភ័ណ អនុប្រធានគណៈកម្មាធិការសាខា និងជាអនុប្រធានក្រុមការងារឥស្សរជនឆ្នើមថ្នាក់ជាតិ សាខាខេត្តសៀមរាប បានថ្លែងស្វាគមន៍គណៈប្រតិភូ នៃក្រុមការងារឥស្សរជនឆ្នើមថ្នាក់ជាតិ ព្រមទាំងបានរំលឹកដល់ស្រ្តីមានផ្ទៃពោះ ស្រ្តីមានកូនតូច និងអ្នកផ្ទុកមេរោគអេដស៍ ដែលបានចូលរួមពិធី សូមត្រងត្រាប់ប្រសាសន៍ផ្សព្វផ្សាយ លើកកម្ពស់ការយល់ដឹង ក្រោមប្រធានបទ “ជំងឺមិនឆ្លង និងការមានផ្ទៃពោះ” ដើម្បីស្វែងយល់ដឹងបន្ថែម និងជួយជំរុញផ្សព្វផ្សាយបន្តដល់ប្រជាពលរដ្ឋក្នុងសហគមន៍របស់យើង។

ក្នុងឱកាសជំនួបនោះ លោកជំទាវ ម៉ែន នារីសោភ័គ អនុប្រធានអចិន្ត្រៃយ៍ក្រុមការងារឥស្សរជនឆ្នើមថ្នាក់ជាតិ បាននាំមកជូននូវប្រសាសន៍សាកសួរសុខទុក្ខ និងការយកចិត្តទុកដាក់ខ្ពស់ ពីសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងជាឥស្សរជនឆ្នើមថ្នាក់ជាតិ នៃវេទិកាភាពជាអ្នកដឹកនាំប្រចាំតំបន់អាស៊ី-ប៉ាស៊ីហ្វិក ឆ្លើយតបមេរោគអេដស៍/ជំងឺអេដស៍ និងការអភិវឌ្ឍនៅកម្ពុជា។

លោកជំទាវក៏បានសម្តែងនូវការអាណិត អាសូរ ចំពោះបងប្អូនទាំងអស់ដោយបានបញ្ជាក់ថា នេះគឺជាបញ្ហាមួយធ្វើឱ្យយើងទាំងអស់គ្នា រួមសហការគ្នាដោះស្រាយ ដើមី្បឈានទៅគ្រប់គ្រងឱ្យបាន នូវការឆ្លងរាលដាលនៃជំងឺអេដស៍។

លោកជំទាវក៏បានធ្វើការលើកទឹកចិត្តដល់បងប្អូនទាំងអស់កុំឱ្យអស់ក្តីសង្ឃឹម ព្រោះជំងឺអេដស៍នាពេលបច្ចុប្បន្ន យើងមានថ្នាំព្យាបាលបាន បងប្អូនត្រូវគោរពឱ្យបានតាមការណែនាំរបស់គ្រូពេទ្យ និងថែរក្សាសុខភាពខ្លួន នោះយើងនឹងអាចរស់រានដូចមនុស្សទូទៅដែរ។ ជាក់ស្តែង ព្រឹត្តិការណ៍ ម=ម ដែលប្រារព្ធធ្វើឡើងនៅមុខប្រាសាទអង្គរវត្ត កាលពីម្សិលម៉ិញនេះ បានឆ្លុះបញ្ចាំងពីអត្ថន័យ ម=ម គឺ (មិនអាចរាប់មេរោគអេដស៍ក្នុងឈាម ស្មើនឹង មិនអាចចម្លងមេរោគអេដស៍ទៅអ្នកដទៃ)។ អ្នករស់នៅជាមួយមេរោគអេដស៍ ដែលលេបថ្នាំបានត្រឹមត្រូវ ទៀងទាត់ និងជាប់លាប់ នឹងសម្រេចបាន (ម = ម), នោះគឺ មានន័យថា៖
-អ្នកមិនអាចចម្លងមេរោគអេដស៍ទៅអ្នកដទៃ!
-អ្នកអាចមានគ្រួសារ មានកូនដូចមនុស្សធម្មតា!
-អ្នកមានសុខភាពល្អ អាចប្រឆាំងបានទៅនឹងជំងឺផ្សេងៗ!
-អ្នកនឹងមានទំនុកចិត្តលើខ្លួនឯង និងកាត់បន្ថយការរើសអើងលើខ្លួនឯង។

លោកជំទាវ អនុប្រធានអចិន្ត្រៃយ៍ក្រុមការងារឥស្សរជនឆ្នើមថ្នាក់ជាតិ បានដាស់តឿនក្រើនរំលឹក ដល់អ្នកចូលរួមទាំងអស់ ត្រូវបន្តស្វែងយល់ពីការបង្ការមេរោគអេដស៍ និងការពារខ្លួន កុំឱ្យឆ្លងមេរោគនេះជាដាច់ខាត ត្រូវប្រុងប្រយ័ត្ន និងចងចាំថាការការពារ គឺចាប់ផ្តើមពីខ្លួនឯងផ្ទាល់។ ទន្ទឹមនឹងនេះ យើងក៏ត្រូវប្រុងប្រយ័ត្នពីជំងឺមិនឆ្លងនានាដូចជាជំងឺមហារីក ជំងឺទឹកនោមផ្អែម ជំងឺលើសឈាម ជំងឺរលាកផ្លូវដង្ហើមរ៉ាំរៃជាដើម ដែលជាបញ្ហាប្រឈមរបស់យើងទាំងអស់គ្នា។ ដូច្នេះយើងត្រូវទប់ស្កាត់ និងជៀសវាងឱ្យបានជំងឺទាំងអស់នេះ តាមរយៈការបរិភោគអាហារ មិនប្រៃពេក មិនផ្អែមពេក និងខ្លាញ់ពេកជាដើម។

សូមបញ្ជាក់ថា ជាមួយនឹងចំណេះដឹងខាងលើនេះ ស្ត្រីមានកូនតូច ស្ត្រីមានផ្ទៃពោះ និងអ្នកផ្ទុកមេរោគអេដស៍ទាំង៦០គ្រួសារ ក៏ទទួលបានអំណោយដែលមាន អង្ករ, មី, ឃីត, ត្រីខ និងថវិកាមួយចំនួនជួយសម្រាលដល់ការលំបាកផងដែរ។ បន្ទាប់ពីកម្មវិធីខាងលើ ក្រុមការងារកាកបាទក្រហមកម្ពុជា និងក្រុមការងារឥស្សរជនឆ្នើមថ្នាក់ជាតិ ក៏បានបន្តចុះសួរសុខទុក្ខគ្រួសារអ្នករស់នៅជាមួយមេរោគអេដស៍ និងអ្នកមានកូនតូចចំនួន ៦គ្រួសារ ដល់ខ្នងផ្ទះ ព្រមទាំងបានឧបត្ថម្ភអំណោយដល់គ្រួសារទាំងនោះផងដែរ៕

16/05/2025

ការប្រារព្វទិវាជាតិនៃការចងចាំ ២០ឧសភា ធ្វើឡើងដើម្បីរំលឹកឱ្យក្មេងជំនាន់ក្រោយ បានដឹងនិងយល់ឱ្យបានច្បាស់ ពីរបបដ៏សាហាវយង់ឃ្នងរបស់ពួកប្រល័យពូជសាសន៍ ប៉ុល ពត

ភ្នំពេញ៖ ទិវាជាតិនៃការចងចាំ នឹងត្រូវប្រារព្វធ្វើឡើងដូចរៀងរាល់ឆ្នាំ នៅមជ្ឈមណ្ឌលឧក្រិដ្ឋកម្មប្រល័យពូជសាសន៍ជើងឯក សង្កាត់ ជើងឯកខណ្ឌដង្កោ នាថ្ងៃ២០ឧសភា ក្រោមអធិបតីភាពឯកឧត្ដម ឃួង ស្រេង អភិបាលរាជធានីភ្នំពេញ ដែលត្រូវអានសារលិខិតរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ។

តាមការបញ្ជាក់ឱ្យដឹងពី លោក កើត ឆែ អភិបាលរងរាជធានីភ្នំពេញ ក្នុងកិច្ចប្រជុំពិភាក្សា ជាលើកទី៣ ជុំវិញការរៀបចំទិវាចងចាំថ្ងៃ២០ឧសភា នារសៀលថ្ងៃទី១៦ឧសភានេះ នៅសាលារាជធានីភ្នំពេញ បានលេីកឡើ ងថា សម្តេចធិបតី ហ៊ុន ម៉ាណែត បានប្រគល់ការប្រារព្វទិវាជាតិ នៃការចងចាំនេះ មកឱ្យរដ្ឋបាលរាជធានីភ្នំពេញ ជាអ្នកចាត់ចែងនិងរៀបចំ នោះគឺ លោក ឃួង ស្រេង អភិបាលរាជធានីភ្នំពេញ នឹងអញ្ជើញជាអធិបតីភាព ដូចដែលបានធ្វើឡើងរាល់ឆ្នាំ គ្រាន់តែការប្រារព្វទិវាធ្វើឡើង ក្នុងកម្រិតមួយធំជាង និងអធឹកអធមជាងឆ្នាំមុនៗ។

បន្ថែមលេីនេះ ឯកឧត្ដម ឃួង ស្រេង នឹងត្រូវអានសារលិខិតរបស់សម្តេចធិបតី ហ៊ុន ម៉ាណែត នាយករដ្ឋមន្ត្រី ក្នុងឱកាសប្រារព្វទិវាជាតិ នៃការចងចាំ២០ឧសភានេះ។ ចំណែកការរៀបចំឈុតឆាកសម្តែង និងការរៀបចំតាមបែបសាសនា គឺនៅរក្សាដូចបណ្តាឆ្នាំមុនៗដដែរ។

គួរបញ្ជាក់ថា ការប្រារព្វទិវាជាតិ នៃការចងចាំ ថ្ងៃ២០ឧសភា ធ្វើឡើងដើម្បីរំលឹកឱ្យក្មេងជំនាន់ក្រោយ បានដឹងនិងយល់ឱ្យបានច្បាស់ ពីរបបដ៏សាហាវយង់ឃ្នងរបស់ពួកប្រល័យពូជសាសន៍ ប៉ុល ពត ដែលបានប្រព្រឹត្តមកលើប្រជាជនកម្ពុជាអស់រយៈពេល៣ឆ្នាំ ៨ខែ និង២០ថ្ងៃ ដោយបានកាប់ សម្លាប់ប្រជាជនកម្ពុជាអស់ ជាង៣លាននាក់ និងដើម្បីរួមគ្នារក្សាសន្តិភាព ឱ្យបានគង់វង់នៅកម្ពុជា ពិសេសគឺការពារឱ្យ បាននូវរបបដ៏សាហាវយង់ឃ្នងនេះ កុំឱ្យវិលត្រឡប់មកលើប្រទេសកម្ពុជាជាថ្មីម្តងទៀត៕

16/05/2025

រដ្ឋមន្ត្រីក្រសួងសន្តិសុខសាធារណៈវៀតណាម ប្ដេជ្ញាពង្រឹង និងពង្រីកកិច្ចសហប្រតិបត្តិការ ជាមួយក្រសួងមហាផ្ទៃកម្ពុជាឱ្យកាន់តែល្អប្រសើរថែមទៀត

ភ្នំពេញ៖ នៅរសៀល ថ្ងៃទី១៦ ខែឧសភា ឆ្នាំ២០២៥, សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានអនុញ្ញាតឱ្យ ឯកឧត្តម លឿង តាមខ្វាង រដ្ឋមន្ត្រីក្រសួងសន្ដិសុខសាធារណៈវៀតណាម ចូលជួបសម្តែងការគួរសម និងពិភាក្សាការងារ នៅវិមានសន្តិភាព។

ក្នុងឱកាសនៃជំនួប, ឯកឧត្តមនាយឧត្តមសេនីយ៍ លឿង តាមខ្វាង បានគោរពថ្លែងអំណរគុណយ៉ាងជ្រាលជ្រៅចំពោះសម្ដេចបវរធិបតី ដែលបានអនុញ្ញាតឱ្យរូបឯកឧត្តម និងគណៈប្រតិភូ ចូលជួបសម្ដែងការគួរសម។

ឯកឧត្តមរដ្ឋមន្ត្រីបានសម្ដែងនូវការអបអរសាទរចំពោះការអភិវឌ្ឍរីកចម្រើនលើគ្រប់វិស័យរបស់កម្ពុជា និងបានបង្ហាញដោយសុទិដ្ឋិនិយមថា ក្រោមការដឹកនាំដ៏ឈ្លាសវៃរបស់សម្ដេចបវរធិបតី និងក្រោមម្លប់ដ៏ត្រជាក់នៃអង្គព្រះមហាក្សត្រ ព្រះករុណា ព្រះបាទសម្តេច ព្រះបរមនាថ នរោត្តម សីហមុនី កម្ពុជានឹងសម្រេចបាននូវសមិទ្ធផលថ្មីៗបន្ថែមទៀតជូនជាតិ និងប្រជាជនកម្ពុជា។

ជាមួយគ្នានេះ ឯកឧត្តមបានសម្ដែងនូវក្ដីសោមនស្សចំពោះភាពរីកចម្រើននៃចំណងមិត្តភាព, ទំនាក់ទំនង និងកិច្ចសហប្រតិបត្តិការរវាងវៀតណាម និង កម្ពុជា, ជាពិសេសកិច្ចសហប្រតិបត្តិការរវាងក្រសួងសន្តិសុខសាធារណៈវៀតណាម និងក្រសួងមហាផ្ទៃកម្ពុជា ដែលជាសសរស្តម ្ភ នៃកិច្ចសហប្រតិបត្តិការរវាងប្រទេសទាំងពីរ ក្នុងការរួមគ្នាទប់ស្កាត់ និងបង្ក្រាបបទល្មើសនានា ដូចជាការជួញដូរមនុស្ស, បទល្មើសតាមប្រព័ន្ធបច្ចេកវិទ្យា និងបទល្មើសគ្រឿងញៀនជាដើម។

បន្ថែមលើនេះឯកឧត្តមរដ្ឋមន្ត្រីបានគូសបញ្ជាក់ពីការប្ដេជ្ញាចិត្តថា ក្រសួងសន្តិសុខសាធារណៈវៀតណាម នឹងបន្តពង្រឹង និង ពង្រីកកិច្ចសហប្រតិបត្តិការជាមួយក្រសួងមហាផ្ទៃកម្ពុជា ឱ្យកាន់តែល្អប្រសើរថែមទៀត ដើម្បីរួមចំណែកដល់ការថែរក្សាសន្តិសុខ, ស្ថិរភាព និង ដើម្បីជាប្រយោជន៍សម្រាប់ប្រជាជន និងប្រទេសទាំងពីរ។

ជាការឆ្លើយតប, សម្ដេចបវរធិបតី បានស្វាគមន៍ និងអរគុណឯកឧត្តមរដ្ឋមន្ត្រី និងគណៈប្រតិភូ ដែលបានអញ្ជើញចូលរួមក្នុងពិធីអបអរសាទរខួបអនុស្សាវរីយ៍លើកទី ៨០ ថ្ងៃកំណើតកងកម្លាំងនគរបាលជាតិកម្ពុជា ១៦ ឧសភា ១៩៤៥ - ១៦ ឧសភា ២០២៥។

សម្ដេចបវរធិបតីបានសម្ដែងនូវការពេញចិត្តចំពោះទំនាក់ទំនង និងកិច្ចសហប្រតិបត្តិការដ៏ល្អប្រសើររវាងក្រសួងសន្តិសុខសាធារណៈវៀតណាម និង ក្រសួង មហា ផ្ទៃ កម្ពុជា ដែលត្រូវបានពង្រឹង និង ពង្រីក ជាប់ជាប្រចាំ។

សម្ដេចបវរធិបតីបានថ្លែងអំណរគុណដល់ក្រសួងសន្តិសុខសាធារណៈវៀតណាម ដែលបានចូលរួមចំណែកដល់ការកសាង ធនធាន មនុស្សកម្ពុជា តាមរយៈ ការ បណ្តុះបណ្តាល និង ពង្រឹង សមត្ថភាពដល់ សិក្ខាកាមកម្ពុជា ជាបន្តបន្ទាប់។

ជាមួយគ្នានេះ សម្ដេចបវរធិបតីបានជំរុញលើកទឹកចិត្តដល់ក្រសួងទាំងពីរបន្តប្រពៃណីនៃកិច្ចសហប្រតិបត្តិការឱ្យកាន់តែជិតស្និទ្ធថែមទៀត ជាពិសេស កិច្ចសហការលើការងារបណ្ដុះបណ្ដាល, ការថែរក្សាសន្តិសុខ, ស្ថិរភាព និងការទប់ស្កាត់ ក៏ដូចជាការបង្ក្រាបបទល្មើសនានា ដើម្បីរួមចំណែកលើកកម្ពស់បន្ថែមទៀត ដល់ទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ៕

16/05/2025

សម្តេចធិបតី និងលោកជំទាវបណ្ឌិត ឧបត្ថម្ភរាល់ការចំណាយទាំងអស់ក្នុងការវះកាត់ អ៊ំប្រុស អ៊ំស្រី ដែលមានបញ្ហាភ្នែកឡើងបាយ និង កន្ទុយថ្លែនបណ្តាលឱ្យភ្នែកស្រវាំងមេីលមិនឃេីញច្បាស់

ភ្នំពេញ៖ ដោយក្តីមេត្តាករុណាដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត ព្រមទាំងលោកជំទាវបណ្ឌិត ពេជ ចន្ទមុន្នី បានអនុញ្ញាតអោយក្រុមការងារគ្រូពេទ្យស្ម័គ្រចិត្តរបស់សម្តេចមហាបវរធិបតី ហ៊ុន ម៉ាណែត ព្រមទាំងលោកជំទាវបណ្ឌិត ពេជ ចន្ទមុន្នី ក្នុងនាមសមាគមគ្រូពេទ្យស្ម័គ្រចិត្តយុវជនសម្តេចតេជោ TYDA បាន នាំអ៊ំប្រុស អ៊ំស្រី ដែលមានបញ្ហាភ្នែកឡើងបាយ និង កន្ទុយថ្លែនបណ្តាលអោយភ្នែកស្រវាំងមេីលមិនឃេីញច្បាស់មកពីសង្កាត់ទន្លេបាសាក់ ខណ្ឌចំការមន មកទទួលការព្យាបាលវះកាត់ភ្នែកឡេីងបាយនៅមន្ទីរពេទ្យព្រះអង្គឌួង បច្ចុប្បន្នទទួលការពិនិត្យវះកាត់ព្យាបាលដោយល្អិតល្អន់ និងជោគជ័យ ដោយក្រុមគ្រូពេទ្យឯកទេសរបស់សម្តេចបវរ និងលោកជំទាវបណ្ឌិត។

សម្តេចបវរធិបតី និងលោកជំទាវបណ្ឌិត ក៏បានជួយឧបត្ថម្ភនូវរាល់ការចំណាយទាំងអស់ក្នុងការវះកាត់ ព្យាបាល ស្នាក់នៅ ធ្វេីដំណេីរជូនដល់អ៊ំប្រុស អ៊ំស្រី និងក្រុមគ្រួសារផងដែរ។

ទឹកចិត្តដ៏មហាសប្បុរសនេះធ្វើឱ្យ អ៊ំប្រុស អ៊ំស្រី និងក្រុមគ្រួសារមានក្តីរីករាយជាពន់ពេក និងគោរពថ្លែងអំណរគុណជូនចំពោះ សម្តេចធិបតី និងលោកជំទាវបណ្ឌិតជាអនេក៕

16/05/2025

កម្ពុជា-ប្រ៊ុយណេ ប្តេជ្ញាធ្វើការជាមួយគ្នាដើម្បីលើកកម្ពស់កិច្ចសហប្រតិបត្តិការរវាងកងទ័ពប្រទេសទាំងពីរ

ភ្នំពេញ៖ ឯកឧត្តម នាយឧត្តមសេនីយ៍ វង្ស ពិសេន អគ្គមេបញ្ជាការ នៃកងយោធពលខេមរភូមិន្ទ នៅរសៀលថ្ងៃទី១៦ ខែឧសភា ឆ្នាំ២០២៥ បានអនុញ្ញាតឲ្យលោក វរសេនីយ៍ទោ ជីនដីអូវ៉ាន់នី អាប់ប៊ុល រ៉ាម៉ាន (DON GIOVANNI ABDUL RAHMAN ) នាយការិយាល័យសេនានុព័ន្ធប្រ៊ុយណេប្រចាំកម្ពុជា ដែលមាននិវេសនដ្ឋាននៅសាធារណរដ្ឋសង្គមនិយមវៀតណាម ចូលជួបសម្តែងការគួរសម នៅអគ្គបញ្ជាការដ្ឋាន។

នៅក្នុងជំនួបនោះ ឯកឧត្តម នាយឧត្តមសេនីយ៍ វង្ស ពិសេន បានស្វាគមន៍ចំពោះលោកវរសេនីយ៍ទោ ជីន ដីអូវ៉ាន់នី នាយការិយាល័យសេនានុព័ន្ធយោធាប្រ៊ុយណេ អបអរសាទរដល់ថ្ងៃកំណើតរបស់កងទ័ពភូមិន្ទប្រ៊ុយណេដែលនឹងប្រារព្ធធ្វើនាថ្ងៃទី៣១ ខែឧសភា ខាងមុខ។ ហើយតាមរយៈជំនួបនេះ គឺជាឱកាសល្អដើម្បីពិភាក្សាផ្លាស់ប្តូរទស្សនៈ ការពង្រឹងពង្រីកទំនាក់ទំនង និងលើកកម្ពស់កិច្ចសហប្រតិបត្តិការទ្វេភាគីឱ្យកាន់តែល្អប្រសើរផងដែរ។

ឯកឧត្តម អគ្គមេបញ្ជាការ បានថ្លែងអំណរគុណដល់រាជរដ្ឋាភិបាលនៃប្រទេសប្រ៊ុយណេដែលបានបញ្ជូនកងកម្លាំងមកកម្ពុជាកាលពីអំឡុងឆ្នាំ១៩៩២-១៩៩៣ ដើម្បីចូលរួមជាអ្នកសង្កេតការណ៍ក្រោមឆ័ត្រអង្គការសហប្រជាជាតិ ដែលនេះគឺជាបដិភាគមួយរបស់ប្រ៊ុយណេក្នុងការជួយកសាងសន្តិភាពសម្រាប់កម្ពុជា ក្នុងនាមជាមិត្តរួមតំបន់។

ឯកឧត្តម បញ្ជាក់ថា ទំនាក់ទំនងការទូតផ្លូវការរវាងកម្ពុជា-ប្រ៊ុយណេបានចាប់ផ្តើមតាំងពីឆ្នាំ១៩៩២ ដែលមកដល់បច្ចុប្បន្នមានរយៈពេល៣៣ឆ្នាំ ហើយរយៈពេលជាង៣ទសវត្សរ៍មកនេះ ប្រទេសទាំងពីរតែងបានកសាងទំនាក់ទំនងល្អៗយ៉ាងច្រើន ទាំងក្នុងលក្ខណៈជាទ្វេភាគី ក៏ដូចជាពហុភាគី ទាំងក្នុងក្របខ័ណ្ឌអាស៊ាន និងក្របខ័ណ្ឌអង្គការសហប្រជាជាតិ។

ឯកឧត្តម បានវាយតម្លៃខ្ពស់ចំពោះកិច្ចសហប្រតិបត្តិការយោធាកម្ពុជា-ប្រ៊ុយណេ ទោះបីពុំទាន់បានចុះអនុស្សរណៈយោគយល់ស្តីពីកិច្ចសហប្រតិបត្តិការវិស័យការពារជាតិប្រទេសទាំងពីរក៏ពិតមែន ប៉ុន្តែក្រុមការងារភាគីទាំងពីរកំពុងជំរុញពន្លឿនកិច្ចការនេះឱ្យបានឆាប់។ ក្រៅពីនេះ កងទ័ពប្រ៊ុយណេក៏នៅបានផ្តល់អាហារូបករណ៍ដល់វគ្គបណ្តុះបណ្តាលវគ្គបញ្ជាការសេនាធិការផងដែរ។

ឯកឧត្តម ជឿជាក់ថា កងទ័ពប្រទេសទាំងពីរនឹងបន្តពង្រឹងពង្រីកកិច្ចសហប្រតិបត្តិការកាន់តែទូលំទូលាយ តាមរយៈការបណ្តុះបណ្តាល ផ្លាស់ប្តូរទស្សនកិច្ចគ្រប់កម្រិត ផ្លាស់ប្តូរព័ត៌មានទប់ស្កាត់អំពើភេរវកម្ម ការប្រយុទ្ធប្រឆាំងឧក្រិដ្ឋកម្មឆ្លងដែន ការងារមនុស្សធម៌ សង្គ្រោះគ្រោះមហន្តរាយ និងការបង្កើនកិច្ចសហប្រតិបត្តិការរវាងប្រភេទទ័ពជាដើម។

ជាកិច្ចឆ្លើយតប វរសេនីយ៍ទោ ជីន ដីអូវ៉ាន់នី បានថ្លែងអំណរគុណចំពោះឯកឧត្តមអគ្គមេបញ្ជាការនៃកងយោធពលខេមរភូមិន្ទ ដែលបានអនុញ្ញាតឱ្យរូបលោកបានមកបំពេញទស្សនកិច្ចនៅកម្ពុជានាឱកាសនេះ និងបានគាំទ្រចំពោះប្រសាសន៍លើកឡើងនេះរបស់ឯកឧត្តមអគ្គមេបញ្ជាការ នៅក្នុងកិច្ចខិតខំធ្វើឲ្យទំនាក់ទំនងកាន់តែល្អប្រសើររវាងកងទ័ពប្រទេសទាំងពីរ។

ទាក់ទងដល់វគ្គបណ្ដុះបណ្ដាល លោកវរសេនីយ៍ទោ ជីន ដីអូវ៉ាន់នី បានបញ្ជាក់អះអាងថា ប្រទេសប្រ៊ុយណេនៅតែបន្តជួយដល់ការបណ្ដុះបណ្ដាលធនធានមនុស្សក្នុងកងយោធពលខេមរភូមិន្ទ ដោយលោកវរសេនីយ៍ទោ ជឿជាក់ថា ក្រោយកិច្ចព្រមព្រៀងអនុស្សរណៈយោគយល់នៃប្រទេសទាំងពីរបានរួចរាល់ ប្រ៊ុយណេនឹងពង្រីកបន្ថែមទៀតនូវការជួយបណ្ដុះបណ្ដាលនេះ៕

16/05/2025

កំពុងស្វែងរកការងារមែនទេ? គិតត្រឹមថ្ងៃទី១៦ ខែឧសភានេះមានការងាររហូតដល់ទៅចំនួន ៦៤ ០៧៤ កន្លែង កំពុងរង់ចាំអ្នក!

ភ្នំពេញ៖ កំពុងស្វែងរកការងារមែនទេ? គិតត្រឹមថ្ងៃទី១៦ ខែឧសភា ឆ្នាំ២០២៥នេះ យើងមានការងាររហូតដល់ទៅចំនួន ៦៤ ០៧៤ កន្លែង កំពុងរង់ចាំអ្នក។

សូមបងប្អូន យុវជន សិស្ស និស្សិត មេត្តាទាក់ទង ទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្ដុះបណ្ដាលវិជ្ជាជីវៈ តាមរយៈទូរស័ព្ទ 1297 ឬ 1286 ឬ តេឡេក្រាម 016 786 655 ឬ CoolApp លេខ 077 23 23 78 ដើម្បីចុះឈ្មោះ និងសម្ភាសភ្លាមៗ៕

16/05/2025

ស្អែកនេះ! កងទ័ពកម្ពុជា-ចិន ជាង ២០០០នាក់ រួមជាមួយនឹងយុទ្ធោបករណ៍យោធាទំនើបៗ នឹងចូលរួមលើទីលាន ដើម្បីបើកសមយុទ្ធនាគមាស ឆ្នាំ២០២៥

ភ្នំពេញ៖ បើតាមការគ្រោងទុកនៅព្រឹកថ្ងៃទី១៧ ខែឧសភា ឆ្នាំ២០២៥ស្អែកនេះ កងយោធពលខេមរភូមិន្ទ និងកងទ័ពរំដោះប្រជាជនចិនជាង ២០០០នាក់ រួមជាមួយនឹងយុទ្ធោបករណ៍យោធាទំនើបៗ នឹងចូលរួមលើទីលាន ដើម្បីបើកសមយុទ្ធនាគមាស ឆ្នាំ២០២៥ លើប្រធានបទ «ប្រតិបត្តិការប្រឆាំងភេរវកម្មរួមគ្នា និងការងារសង្គ្រោះមនុស្សធម៌»។

សមយុទ្ធនាគមាសនេះ គឺធ្វើឡើងក្នុងគោលបំណងអភិវឌ្ឍន៍ឱ្យកាន់តែស៊ីជម្រៅ នូវទំនាក់ទំនងដៃគូកិច្ចសហប្រតិបត្តិការ យុទ្ធសាស្ត្រគ្រប់ជ្រុងជ្រោយ ក៏ដូចជា ការផ្លាស់ប្ដូរបទពិសោធន៍ពីគ្នាទៅវិញទៅមក ការពង្រឹងទស្សនៈសន្តិសុខ ដែលមានលក្ខណៈរួមគ្នា និងការលើកកម្ពស់សមត្ថភាពប្រយុទ្ធជាក់ស្ដែងរវាងកងទ័ពប្រទេសទាំងពីរ នៅក្នុងការប្រយុទ្ធប្រឆាំងអំពើភេរវកម្ម
សមយុទ្ធនាគមាសឆ្នាំនេះ ត្រូវចែកចេញជា២ផ្នែក ដោយទី១៖ សមយុទ្ធលើគោកនិងអាកាស នៅមជ្ឈមណ្ឌលហ្វឹកហ្វឺនកងរាជអាវុធហត្ថ (ភ្នំជុំសែនរីករាយ) ខេត្តកំពង់ឆ្នាំង និងទី២៖ សមយុទ្ធសមុទ្រនិងអាកាស នៅលើផ្ទៃសមុទ្រនិងដែនអាកាសកម្ពុជា ក្នុងតំបន់ខេត្តព្រះសីហនុ ដោយមានកម្លាំងទ័ពកម្ពុជា-ចិន សរុបជាង ២ពាន់នាក់ចូលរួម ព្រមទាំងមានការប្រើប្រាស់សព្វាវុធ គ្រឿងបំពាក់កាន់តែទំនើប ក្នុងនោះក៏មានការប្រើប្រាស់បញ្ញាសិប្បនិម្មិត (AI) ដែលជាឆ្លើយតបទៅនឹងការធ្វើទំនើបកម្មរបស់កងយោធពលខេមរភូមិន្ទ នៃព្រះរាជាណាចក្រកម្ពុជា ស្របតាមស្ថានភាពវិវឌ្ឍន៍នាពេលបច្ចុប្បន្ន។

ជាមួយគ្នានេះដែរ ដើម្បីធានាឱ្យដំណើរការនៃការបើកសមយុទ្ធនាគមាស ប្រព្រឹត្តដោយរលូន, នាយឧត្តមសេនីយ៍ ឥត សារ៉ាត់ អគ្គមេបញ្ជាការរង នាយសេនាធិការចម្រុះនៃកងយោធពលខេមរភូមិន្ទ និងជាប្រធានគណៈកម្មការដឹកនាំធ្វើលំហាត់ និងសមយុទ្ធ រវាងកងយោធពលខេមរភូមិន្ទ ជាមួយកងទ័ពបណ្ដាប្រទេសជាមិត្ត និងចាត់តាំងសមយុទ្ធនានាក្នុងកងយោធពលខេមរភូមិន្ទ រួមជាមួយឧត្តមសេនីយ៍ទោ លី ក្វាងយុន ឧបការី នាយសេនាធិការ តំបន់ភូមិភាគខាងត្បូង កងទ័ពរំដោះប្រជាជនចិន និងក្រុមការងារជំនាញភាគីកងទ័ពប្រទេសទាំងពីរជាច្រើនរូប បានអញ្ជើញចុះទៅពិនិត្យមើលការប្រុងប្រៀបរៀបចំ មុនពិធីបើកប្រតិបត្តិការសមយុទ្ធរួមគ្នាលើដីគោក និងអាកាស ដែលគ្រោងនឹងធ្វើពិធីបើកប្រតិបត្តិការសមយុទ្ធជាផ្លូវការ នៅព្រឹកថ្ងៃទី១៧ ខែឧសភា ឆ្នាំ២០២៥ស្អែកនេះ។

ខណៈពិធីបើកសមយុទ្ធជាផ្លូវការនឹងធ្វើឡើងក្រោមអធិបតីភាពនាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ និងឧត្តមសេនីយ៍ទោ លី ក្វាងយុន ឧបការី នាយសេនាធិការ តំបន់ភូមិភាគខាងត្បូង កងទ័ពរំដោះប្រជាជនចិន នៅឯទីលាននៃមជ្ឈមណ្ឌលហ្វឹកហ្វឺនកងរាជអាវុធហត្ថភ្នំជុំសែនរីករាយ ក្នុងស្រុកសាមគ្គីមានជ័យ ខេត្តកំពង់ឆ្នាំង។

បើតាមឧត្តមសេនីយ៍ទោ ប៉ែន សុក្រឹតវិទ្យា នាយកទីចាត់ការហ្វឹកហ្វិន អគ្គបញ្ជាការដ្ឋាន នៃកងយោធពលខេមរភូមិន្ទ ប្រធានក្រុមការងារដឹកនាំសមយុទ្ធភាគីកងទ័ពកម្ពុជា បានបញ្ជាក់ថា ប្រតិបត្តិការសមយុទ្ធរួមគ្នា កម្ពុជា-ចិន លើកទី៧ លើដីគោក និងអាកាស នឹងប្រព្រឹត្តទៅចាប់ពីថ្ងៃទី១៤ រហូតដល់ថ្ងៃទី២៨ ខែឧសភា ២០២៥ នៅមជ្ឈមណ្ឌលហ្វឹកហ្វឺនកងរាជអាវុធហត្ថភ្នំជុំសែនរីករាយ ក្នុងភូមិសាស្ត្រស្រុកសាមគ្គីមានជ័យ ខេត្តកំពង់ឆ្នាំង។ រីឯសមយុទ្ធកងទ័ពជើងទឹក និងអាកាសកម្ពុជា-ចិន និងប្រព្រឹត្តទៅចាប់ពីថ្ងៃទី១៤ ដល់ថ្ងៃទី២៦ ខែឧសភា ឆ្នាំ២០២៥ នៅលើផ្ទៃសមុទ្ររបស់ព្រះរាជាណាចក្រកម្ពុជា ក្នុងភូមិសាស្ត្រខេត្តព្រះសីហនុ។

គួររំលឹកថាកងយោធពលខេមរភូមិន្ទ និងកងទ័ពព្រំដោះប្រជាជនចិន នៅរៀងរាល់ឆ្នាំតែងតែរៀបចំធ្វើសមយុទ្ធរួមគ្នា នាគមាសប្រចាំឆ្នាំ។

ដោយឡែកសម្រាប់ឆ្នាំ២០២៥នេះ, បើតាមការបញ្ជាក់របស់ នាយឧត្តមសេនីយ៍ ឥត សារ៉ាត់ បានបញ្ជាក់ច្បាស់ថា សម្រាប់ឆ្នាំនេះ ប្រតិបត្តិការសមយុទ្ធមិត្តភាពកម្ពុជា-ចិន មានកម្លាំងកងទ័ពភាគីប្រទេសទាំងពីរចូលរួមក្នុងសមយុទ្ធនេះ មានរហូតដល់ទៅជាង ២,០០០នាក់ ។ ក្នុងនោះភាគីកងទ័ពរំដោះប្រជាជនចិន មានរហូត ៨៤៥នាក់ឯណោះ។ ដោយឡែកសពា្វវុធ និងគ្រឿងបំពាក់យុទ្ធោបករណ៍សម្រាប់បម្រើឱ្យសកម្មភាពប្រតិបត្តិការសមយុទ្ធវិញ ភាគីកងទ័ពកម្ពុជា ប្រើប្រាស់កាំភ្លើងធំ, កាំភ្លើងត្បាល់, រថពាសដែក, រថយន្តសង្គ្រោះ, រថយន្តដឹកជញ្ជូនទ័ពចល័ត, នាវាល្បាតលើលំហសមុទ្រ, ឧត្ថម្ភាគចក្រ និងអាវុធធុនធ្ងន់ ធនស្រាលមួយចំនួនធំទៀត។

រីឯភាគីកងទ័ពរំដោះប្រជាជនចិន ប្រើប្រាស់កាំភ្លើងធំប្រតិកម្មចល័តលើរថយន្ត, កាំភ្លើងក្បាល, យន្តយុទ្ធកង់កៅស៊ូ, រថពាសដែកកង់ច្រវ៉ាក់, រថយន្តដឹកនាំបញ្ជា ស៊ី៥ (C5), គ្រឿងយន្តគ្មានមនុស្សបើក, មនុស្សយន្តប្រភេទវះកាត់, ឆ្កែយន្ត, ឧត្ថម្ភាគចក្រ, នាវាចម្បាំង, នាវាបុកឡើងគោក, ដ្រូនស៊ើបការ, ដ្រូនវាយលុក, អាវុធធុនធ្ងន់ ធនស្រាល និងបរិក្ខារស៊ើបការណ៍, បរិក្ខារសុខាភិបាលវេជ្ជសាស្ត្រ, សម្ភារៈបំផ្ទុះ និងគ្រាប់រំសេវមួយចំនួនធំទៀត។
តាមរយៈការធ្វើសមយុទ្ធរួមគ្នា នាគមាសប្រចាំឆ្នាំកម្ពុជា-ចិន លើកទី៧ នេះផងដែរ ក៏ដើម្បីឱ្យកិច្ចសហប្រតិបត្តិការរវាងកងទ័ពប្រទេសទាំងពីរ កាន់តែប្រសើរឡើងពិសេសការផ្លាស់ប្ដូរបទពិសោធន៍ ការបង្កើនសមត្ថភាពលើប្រតិបត្តិការប្រើប្រាស់កម្លាំង មធ្យោបាយកងទ័ព ដើម្បីទប់ទល់ទៅហ្នឹងបញ្ហាប្រឈមនានានៅក្នុងតំបន់ និងនៅលើសកលលោក៕

Hotnews ASIA

16/05/2025

16/05/2025

16/05/2025

16/05/2025

16/05/2025

16/05/2025

16/05/2025

16/05/2025

16/05/2025

16/05/2025

16/05/2025

16/05/2025

Address

Telephone

Website

Alerts

Contact The Business

Shortcuts

Share

Category