06/06/2026
ក្រោមក្រសែភ្នែកអាស៊ាន៖ ក្រុមសង្កេតការណ៍
AOT ចុះពិនិត្យការទន្ទ្រានខុសច្បាប់របស់យោធាថៃនៅខេត្តពោធិ៍សាត់
______________
អ្នកនាំពាក្យក្រសួងការពារជាតិកម្ពុជា បានប្រកាសថា នៅថ្ងៃទី៦ ខែមិថុនា ឆ្នាំ២០២៦ នេះ ក្រុមអ្នកសង្កេតការណ៍អាស៊ាន (AOT) ដឹកនាំដោយភាគីហ្វីលីពីន បានចុះទៅពិនិត្យផ្ទាល់នៅតំបន់ច្រកជ័យជំនះ ឃុំថ្មដា ស្រុកវាលវែង ខេត្តពោធិ៍សាត់ ដើម្បីវាយតម្លៃស្ថានភាពព្រំដែន ក្រោយបទឈប់បាញ់ចូលជាធរមាន។
ការចុះពិនិត្យនេះ ធ្វើឡើងបន្ទាប់ពីដែនដីអធិបតេយ្យរបស់កម្ពុជានៅតំបន់នោះ រងការវាយប្រហារ រាយបន្លាលួស និងដាក់ទូកុងតឺន័រកាន់កាប់ដោយខុសច្បាប់ពីសំណាក់យោធាថៃ ដែលបង្កឱ្យប្រជាពលរដ្ឋខ្មែរជាច្រើនគ្រួសារ មិនទាន់អាចវិលត្រឡប់ទៅផ្ទះសម្បែងវិញបាន។
ជំហរគន្លឹះរបស់កម្ពុជាជម្រុញឱ្យគណៈកម្មការចម្រុះព្រំដែនគោក (JBC) កម្ពុជា-ថៃ ចាប់ផ្តើមវាស់វែងខ័ណ្ឌសីមាឱ្យបានឆាប់បំផុត ដើម្បីអនុញ្ញាតឱ្យប្រជាពលរដ្ឋវិលត្រឡប់ទៅរស់នៅវិញដោយសុវត្ថិភាព។ ជាមួយគ្នានេះ កម្ពុជាប្រកាសដាច់ខាតមិនទទួលស្គាល់ការកែប្រែខ្សែព្រំដែនតាមរយៈការប្រើប្រាស់កម្លាំងយោធា ឬការទាមទារទឹកដីជាឯកតោភាគីពីសំណាក់ប្រទេសថៃឡើយ។
ទោះជាយ៉ាងណា កម្ពុជានៅតែបន្តប្តេជ្ញាចិត្តយ៉ាងម៉ឺងម៉ាត់ក្នុងការគោរពកិច្ចព្រមព្រៀងសន្តិភាព និងលទ្ធផលនៃកិច្ចប្រជុំព្រំដែនទូទៅ (GBC) ដើម្បីស្តារស្ថានការណ៍ឡើងវិញ និងរក្សាសន្តិភាពយូរអង្វែងរវាងប្រទេសទាំងពីរ៕
