26/04/2025
មជ្ឈមណ្ឌលអប់រំកែប្រែជនវិបត្តិសង្គម !
« អប់រំ ណែនាំមនុស្សឲ្យដើរតាមផ្លូវល្អត្រឹមត្រូវ »
ដោយមើលឃើញពីបញ្ហាក្នុងសង្គម ដែលកំពុងប្រឈមដូចជា ៖
- អំពើហិង្សាក្នុងគ្រួសារ
- សីលធម៌ក្នុងសង្គមធ្លាក់ចុះ
- ចោរលួច ចោរប្លន់
- អ្នកញៀនគ្រឿងញៀន
- អ្នកជួញដូរគ្រឿងញៀន
- ជនល្មើលមុខដដែលៗ
- ការជួញដូរមនុស្ស
- អ្នកសុំទាន ជនអនាថា
- មន្ត្រីទំនើង
- ក្មេងទំនើង...។ល។
មូលហេតុមកពីកត្តាដូចខាងក្រោម ៖
- ខ្វះការអប់រំ ណែនាំ ទូន្មាន ឲ្យឱវាទ
- ខ្វះការយល់ដឹង ខ្វះចំណេះ (អវិជ្ជា)
- ខ្វះការងារធ្វើ មិនដឹងរកស៊ីមុខរបរអ្វី
- ខ្វះការជួយតម្រង់ទិស និងលើកទឹកចិត្ត
- ខ្វះការជួយជ្រោមជ្រែង ឧបត្ថម្ភ គាំពារ
- ខ្វះការគ្រប់គ្រង ឃ្លាំមើល ឬ តាមដាន
- សប្បាយភ្លើតភ្លើន វង្វេងស្មារតី ដើរចូលផ្លូវអាក្រក់
មណ្ឌលអប់រំកែប្រែជនវិបត្តិសង្គម បង្កើតឡើងដើម្បីកាត់បន្ថយ ឬ លុបបំបាត់មនុស្សប្រព្រឹត្តអំពើអាក្រក់ ខុសច្បាប់ ឬ ខុសធម៌ ក្រោមគោលការណ៍ ៖
- អប់រំ ណែនាំមនុស្សឲ្យដើរតាមផ្លូវល្អត្រឹមត្រូវ
- ជួយមនុស្សឲ្យចេះជួយខ្លួនឯង
- ណែនាំមនុស្សឲ្យចេះជួយគ្នាទៅវិញទៅមក ជួយសង្គមជាតិ និង ជួយទ្រទ្រង់ព្រះពុទ្ធសាសនា ។
និយាយរួម មណ្ឌលកែប្រែនេះគឺជាគុកសម្រាប់ដាក់អ្នកទោស ឬ អ្នកប្រព្រឹត្តខុសច្បាប់ ដោយមានការអប់រំ ណែនាំទាំងផ្លូវលោក និង ផ្លូវធម៌ ដើម្បីឲ្យមនុស្សដែលបានធ្វើអាក្រក់ ឬ បានប្រព្រឹត្តខុសច្បាប់ឲ្យយល់ដឹងអំពីច្បាប់វិន័យក្នុងសង្គម បុណ្យបាបក្នុងផ្លូវព្រះធម៌ ហើយដើរតាមផ្លូវល្អត្រឹមត្រូវវិញ ។
តាមរយៈសកម្មភាពដូចខាងក្រោម ៖
- អប់រំ ណែនាំ ទូន្មាន ឲ្យឱវាទ ទាំងផ្លូវលោក និង ផ្លូវព្រះធម៌ ។
- បណ្តុះបណ្តាលចំណេះ ជំនាញ វិជ្ជាជីវៈ ស្របតាមតម្រូវការទីផ្សារការងារ ឬ មុខរបរជាក់ស្តែង ។
- លើកទឹកចិត្ត និង តម្រង់ទិស ក្នុងការប្រកបរបរអាជីវកម្ម ឬ ការងារផ្សេងៗ (ក្រោយរួចទោស) ។
- តាមដានសកម្មភាពនានារបស់បុគ្គលម្នាក់ៗ ក្រោយពេលចាកចេញពីមណ្ឌលកែប្រែ ។
អ្នកដែលត្រូវចូលមកក្នុងមណ្ឌលកែប្រែនេះ មានដូចខាងក្រោម ៖
- អ្នកទោសដែលបានប្រព្រឹត្តខុសច្បាប់
- ចោរលួច, ចោរប្លន់
- អ្នកញៀនថ្នាំ (គ្រឿងញៀន)
- អ្នកជួញដូរគ្រឿងញៀន
- អ្នកប្រើអំពើហិង្សាក្នុងគ្រួសារ
- ក្មេងទំនើង ដើរបង្ករឿង...។ល។
« ដឹងខុសចេះកែខ្លួន នឹងមានសង្ឃឹមទៅថ្ងៃមុខ ! »
« ការគ្រប់គ្រង »
រដ្ឋាភិបាលសហការជាមួយមូលនិធិជួយជនក្រីក្រនិងព្រះពុទ្ធសាសនា ដោយមណ្ឌលអប់រំកែប្រែនេះត្រូវបាន បែងចែកកិច្ចការជា៣ផ្នែកគឺ ៖
១. ផ្នែកពន្ធនាគារ (ផ្នែកគុក ឬ ផ្នែកឃុំឃាំង) គឺរដ្ឋាភិបាលជាអ្នកគ្រប់គ្រង ៖
- ទោសកម្រិតធ្ងន់ (ទោសឧក្រិដ្ឋ)
- ទោសកម្រិតស្រាល (អ្នកញៀនថ្នាំឬគ្រឿងញៀន អ្នកប្រើហិង្សា ចោរលួច...។ល។)
២. ផ្នែកអប់រំនិងបណ្តុះបណ្តាល គឺមូលនិធិជួយជនក្រីក្រជាអ្នកទទួលបន្ទុក ។
៣. ផ្នែកអភិវឌ្ឍតំបន់កសិកម្មទំនើប គឺមូលនិធិជួយជនក្រីក្រជាអ្នកគ្រប់គ្រង ។
- ចំពោះកិច្ចការអប់រំនិងបណ្តុះបណ្តាលចំណេះដឹង ជំនាញ វិជ្ជាជីវៈ គឺមានការងារឲ្យអ្នកទោសធ្វើដើម្បីអនុវត្តជាក់ស្តែងផង និង រកប្រាក់ចំណូលពីការងារនេះផង ដោយមិនចាំបាច់ចំណាយប្រាក់ខែ ដើម្បីបង្កើតជាមូលនិធិសម្រាប់ទុកជួយពួកគាត់វិញ ក្រោយពេលចេញពីមណ្ឌលកែប្រែ និង សម្រាប់ជួយប្រជាជនក្រីក្រ (អ្នកក្រខ្សត់គ្មានទីពឹង) ។
- ចំពោះអ្នកដែលបានប្រព្រឹត្តខុសច្រើនដងមិនចេះកែខ្លួន គឺមិនឲ្យចេញវិញទេ ទុកឲ្យធ្វើការដើម្បីរកលុយសម្រាប់ជួយអ្នកក្រ ។
ការអប់រំណែនាំខាងផ្លូវធម៌ ៖
- អប់រំឲ្យយល់ដឹងអំពីព្រះធម៌ (អំពើល្អ អំពើអាក្រក់ បុណ្យបាប...)
- អប់រំណែនាំអំពី សុភាវធម៌ក្នុងសង្គម (សុជីវធម៌ សីលធម៌ និង គុណធម៌)
- អប់រំឲ្យយល់ដឹងអំពីច្បាប់ចរាចរណ៍ ការគោរពសិទ្ធិគ្នា និង ច្បាប់ផ្សេងៗទៀត ។
ការបណ្តុះបណ្តាលចំណេះ ជំនាញ វិជ្ជាជីវៈ មានដូចខាងក្រោម ៖
- ជំនាញកសិកម្ម (ស្រូវ បន្លែ ផ្លែឈើ ចិញ្ចឹមសត្វ...)
- សិប្បកម្ម (សង្ហារឹម ចម្លាក់ គំនូរ តម្បាញ...)
- កាត់ដេរ, ចុងភៅ, បង្អែម, ឆុងកាហ្វេ...
- ជំនាញបច្ចេកទេស (អគ្គិសនី, ជួសជុលទូរស័ព្ទ...)
- បច្ចេកវិទ្យាព័ត៌មាន (IT: Computer, Internet...)
- ភាសាខ្មែរ , ភាសាបរទេស
- ការគ្រប់គ្រងអាជីវកម្ម
- និង ជំនាញផ្សេងៗទៀត ...។ល។
ក្រោយពីបានបញ្ចប់វគ្គបណ្តុះបណ្តាលដោយជោគជ័យ នឹងមានចេញលិខិតបញ្ជាក់ការសិក្សាជូន ។
ទំហំផ្ទៃដីសម្រាប់មណ្ឌលអប់រំកែប្រែនេះគឺ ត្រូវការផ្ទៃដីទំហំប្រហែលពី 300 ទៅ 500 ហិកតា ឬ ធំជាងនេះក៏បាន ដោយបែងចែកជាច្រើនផ្នែក ទៅតាមតម្រូវការជាក់ស្តែង ។
ដោយប្រើគោលការណ៍នេះ រដ្ឋាភិបាលអាចដោះស្រាយបញ្ហាមួយចំនួនក្នុងសង្គម និង ទទួលបានអត្ថប្រយោជន៍ដូចខាងក្រោម ៖
- អប់រំ ណែនាំមនុស្សឲ្យដើរតាមផ្លូវល្អត្រឹមត្រូវ
- អាចដោះស្រាយបញ្ហាសិទ្ធិមនុស្សនៅក្នុងពន្ធនាគារ
- ពង្រឹងសីលធម៌ សណ្តាប់ធ្នាប់ របៀបរៀបរយក្នុងសង្គម
- លុបបំបាត់ជនប្រព្រឹត្តល្មើសច្បាប់
- លុបបំបាត់ចោរលួច ចោរប្លន់
- លុបបំបាត់អ្នកញៀនគ្រឿងញៀន
- លុបបំបាត់អំពើហិង្សាក្នុងគ្រួសារ
- លុបបំបាត់ក្មេងទំនើងក្នុងសង្គម
- លុបបំបាត់អ្នកសុំទាន និង ជនអនាថា ជាដើម ។ល។
រដ្ឋាភិបាល និង មូលនិធិជួយជនក្រីក្រ ចំណាយដើមទុនពីដំបូង តែទទួលបានប្រាក់ចំណូលមកវិញរាល់ខែ ដោយមិនខ្ជះខ្ជាយថវិកាជាតិ ព្រោះចំណូលពីរបរកសិកម្ម សិប្បកម្ម និងការបណ្តុះបណ្តាលជំនាញវិជ្ជាជីវៈនៅក្នុងតំបន់នេះអាចជួយទ្រទ្រង់អង្គភាពបាន ហើយអាចបង្កើតជាមូលនិធិសម្រាប់ជួយជនក្រីក្រ និង ចាស់ជរាបានទៀត ។
** នៅពេលដែលប្រជាជនមានការយល់ដឹងច្រើន មានចំណេះ ជំនាញ អាចពឹងលើខ្លួនឯងបាន លែងប្រព្រឹត្តខុសច្បាប់ មណ្ឌលអប់រំកែប្រែនេះនឹងត្រូវប្រែក្លាយទៅជាតំបន់អភិវឌ្ឍន៍វិញ ។
សង្ឃឹមថា គោលការណ៍នេះនឹងត្រូវបានយកទៅពិចារណាតាមការគួរ ។
#ច្រេះសង្គម
#មជ្ឈមណ្ឌលអប់រំកែប្រែជនវិបត្តិសង្គម
