28/08/2026
រថយន្ត Honggi CZS PHEV កែដាក់ SELA8888 បែកកង់បុកបុករះ យានចំនួន៤ ផ្អើលក្រុងសិរីសោភ័ណ្ឌ និងមានមនុស្សរងរបួសធ្ងន់ស្រាលជាច្រើននាក់ នៅលើផ្លូវជាតិលេខ៥
ខេត្តបន្ទាយមានជ័យ៖ មានការភ្ញាក់ផ្អើលយ៉ាងខ្លាំងបាន នៅលើដងផ្លូវជាតិលេខ៥ ដោយសារហេតុការណ៍គ្រោះថ្នាក់ចរាចរណ៍មួយដ៏គួរឱ្យរន្ធត់បំផុតមួយ ដែលគេសង្ស័យថាបានបង្កឡើងដោយសាររថយន្តទំនើបម៉ាក Honggi CZS PHEV កែដាក់ SELA8888 ស៊េរីឆ្នាំ២០២៥ ពណ៌ខ្មៅ ពាក់ផ្លាកលេខ បាត់ដំបង 2G-8888 បើកបរក្នុងល្បឿន ស្រាប់តែបែកកង់មុខ បាត់ម្ចាស់ការជ្រុលចង្កូតបុករះពេញទំហឹងជាបន្តបន្ទាប់ បង្កជាមហន្តរាយ នៅវេលាម៉ោង ១១ និង២០នាទីព្រឹក ថ្ងៃទី២៨ ខែសីហា ឆ្នាំ២០២៦ ត្រង់ចំណុចភូមិសែសិន សង្កាត់អូរអំបិល ក្រុងសិរីសោភ័ណ្ឌ ខេត្តបន្ទាយមានជ័យ។
ប្រភពព័ត៌មានពីកន្លែងកើតហេតុផ្ទាល់បានឱ្យដឹងថា មុនពេលកើតហេតុ រថយន្តបង្កម៉ាក Honggi CZS PHEV កែដាក់ SELA8888 ដែលធ្វើដំណើរទិសដៅពីត្បូងទៅជើងក្នុងល្បឿនយ៉ាងលឿនដូចហោះ ពេលជួបគ្រោះអកុសលបែកកង់មុខភ្លាម ក៏លែងអាចគ្រប់គ្រងដៃចង្កូតបាន ដោយបានជ្រុលទៅបុករះផ្ទប់យ៉ាងសន្ធោសន្ធៅជាមួយយានយន្តរបស់អ្នកដំណើរតាមដងផ្លូវជាបន្តបន្ទាប់៖
១. រថយន្តម៉ាក Toyota Prius hybrid ពណ៌ខ្មៅ ស៊េរីឆ្នាំ២០១០ ពាក់ផ្លាកលេខ ភ្នំពេញ 2BV-8106 ត្រូវបានបុកផ្ទប់យ៉ាងដំណំ។
២. ម៉ូតូម៉ាក Suzuki Viva ពាក់ផ្លាកលេខ រដ្ឋ12 1-7561 ដែលជិះដោយមន្ត្រីមន្ទីរសុខាភិបាល ត្រូវរងការប៉ះទង្គិចចំពេញទំហឹង។
៣. រថយន្តម៉ាក Suzuki Smash Revo ពណ៌ខ្មៅ ស៊េរីឆ្នាំ២០១៧ ពាក់ផ្លាកលេខ បន្ទាយមានជ័យ 3E-3877 របស់អ្នកបម្រើការងារជាមន្ត្រីចរាចរណ៍ក្រុងប៉ោយប៉ែត ក៏ត្រូវរងការខូចខាតយ៉ាងធ្ងន់ធ្ងរ និងខ្ទេចផ្នែកខាងមុខ។
៤. រថយន្ត Toyota Hilux Revo ពណ៌ខ្មៅ។
ប្រភពបានបន្តថា កម្លាំងបុកប្រៀបបីដូចជាការរន្ទះនេះ បានធ្វើឱ្យជនរងគ្រោះជាច្រើននាក់រងរបួសធ្ងន់ធ្ងរស្រាល ត្រូវបានក្រុមគ្រូពេទ្យសង្គ្រោះបន្ទាន់ដឹកបញ្ជូនទៅសង្គ្រោះនៅឯមន្ទីរពេទ្យភ្លាមៗផងដែរ។
ប្រភពបានបញ្ជាក់ថា ក្រោយពេលកើតហេតុភ្លាមៗ សមត្ថកិច្ចជំនាញចរាចរណ៍នៃស្នងការដ្ឋានខេត្តបន្ទាយមានជ័យ បានចុះអន្តរាគមន៍ដល់ទីតាំងផ្ទាល់ ដើម្បីវាស់វែង រៀបចំសណ្ដាប់ធ្នាប់ និងស្រាវជ្រាវប្រមូលភស្តុតាង ចាត់ការតាមនីតិវិធីច្បាប់បន្តទៀត៕
