03/06/2026
អភិបាលខណ្ឌសែនសុខ បន្តដឹកនាំកម្លាំងអាជ្ញាធរមានសមត្ថកិច្ចចម្រុះ ចុះពិនិត្យរដ្ឋបាលនៅក្នុង «ខុនដូរពិភពថ្មីសែនសុខ» ឃាត់ខ្លួនជនជាតិចិន៣នាក់ និងវត្ថុតាងមួយចំនួន ដែលសង្ស័យប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (Online Scam) និងគ្មានលិខិតឆ្លងដែន
(ភ្នំពេញ)៖ ក្រោមការដឹកនាំរបស់ លោក ឃួង ស្រេង អភិបាល និងជាប្រធានគណៈបញ្ជាការឯកភាពរដ្ឋបាលរាជធានីភ្នំពេញ, លោក ចេង មុនីរ៉ា អភិបាល និងជាប្រធានគណៈបញ្ជាការឯកភាពរដ្ឋបាលខណ្ឌសែនសុខ បានបន្តដឹកនាំកម្លាំងអាជ្ញាធរមានសមត្ថកិច្ចចម្រុះ ចុះត្រួតពិនិត្យរដ្ឋបាលនៅក្នុងអគារខុនដូរមួយកន្លែង ដោយបានរកឃើញសង្ស័យពាក់ព័ន្ធបទល្មើសឆបោកតាមប្រព័ន្ធបច្ចេកវិទ្យា (Online Scam) និងឈានដល់ការឃាត់ខ្លួនជនជាតិចិន ចំនួន៣នាក់ គ្មានលិខិតឆ្លងដែន និងវត្ថុតាងមួយចំនួន។
ប្រតិបត្តិការបន្តសកម្មភាពចុះពិនិត្យរដ្ឋបាល និងឈានដល់ការឃាត់ខ្លួនជនជាតិចិន៣នាក់ ដែលសង្ស័យជាប់ពាក់ព័ន្ធប្រព្រឹត្តបទល្មើសឆបោកខាងលើនេះ បានអនុវត្តឡើងជាបន្តបន្ទាប់ ក្នុងគោលបំណងគ្រប់គ្រងការស្នាក់នៅរបស់ជនបរទេស និងការស្រាវជ្រាវស្វែងរកដើម្បីបង្ក្រាប និងបោសសម្អាតការឆបោកតាមប្រព័ន្ធបច្ចេកវិទ្យា (Online Scam) នៅក្នុង «ខុនដូរពិភពថ្មីសែនសុខ» ដែលមាន៨អាគារ សរុប១៧៨៩បន្ទប់ ក្នុងភូមិសំរោងទាវ សង្កាត់ក្រាំងធ្នង់ ខណ្ឌសែនសុខ នាថ្ងៃទី០៣ ខែមិថុនា ឆ្នាំ២០២៦នេះ។
បើតាមលោក ចេង មុនីរ៉ា បានឱ្យដឹងថា ជាលទ្ធផលនៃកិច្ចប្រតិបត្តិការនេះ កម្លាំងគណៈបញ្ជាការឯកភាពរដ្ឋបាលខណ្ឌ បានត្រួតពិនិត្យជាក់ស្ដែងរកឃើញជនបរទេសស្នាក់នៅ ចំនួន៣១បន្ទប់ ស្មើនឹង៣៧នាក់ ស្រី២នាក់ និងមាន៥សញ្ជាតិរួមមាន៖ ជនជាតិចិន៣០នាក់ ស្រី១នាក់, ជនជាតិកូរេខាងត្បូង៤នាក់ ស្រី១នាក់, ជនជាតិអាមេរិក១នាក់, ជនជាតិបារាំង១នាក់, ជនជាតិអាឡឺម៉ង់១នាក់ ដោយមានលិខិតឆ្លងដែន និងទិដ្ឋាការត្រឹមត្រូវ និងមិនមានសង្ស័យជាប់ពាក់ព័ន្ធបទល្មើស (Online Scam) ឡើយ។
លោកអភិបាល និងជាប្រធានគណៈបញ្ជាការឯកភាពរដ្ឋបាលខណ្ឌសែនសុខ បានឱ្យដឹងទៀតថា ដោយឡែកនៅអគារទី៥ ជាន់ទី១២ បន្ទប់លេខ១២០១ បានរកឃើញជនជាតិចិន ចំនួន៣នាក់ ស្នាក់នៅដោយខុសច្បាប់ (គ្មានលិខិតឆ្លងដែន) និងយោងតាមការធ្វើកោសល្យវិច្ច័យរបស់មន្ត្រីការិយាល័យប្រឆាំងបទល្មើសបច្ចេកវិទ្យាសន្និដ្ឋាន ថាជាប់ពាក់ព័ន្ធករណីសង្ស័យប្រព្រឹត្តអំពើឆបោកតាមប្រព័ន្ធបច្ចេកវិទ្យា (Online Scam) ដោយដកហូតសម្ភារវត្ថុតាងមួយចំនួន ដូចជា កុំព្យូទ័រយួរដៃ LAPTOP ៣គ្រឿង, ទូរស័ព្ទដៃ៣គ្រឿង ព្រមទាំងបានប្រគល់ជូនស្នងការដ្ឋាននគរបាលរាជធានីភ្នំពេញ ដើម្បីចាត់ការបន្ត និងសម្រេច «បិទឃ្លុំបន្ទប់លេខ១២០១ ជាន់ទី១២ នៃអគារទី៥ ជាបណ្ដោះអាសន្ន» បន្ទាប់ទទួលបានគោលការណ៍ដឹកនាំពី ប្រធានគណៈបញ្ជាការឯកភាពរដ្ឋបាលរាជនីភ្នំពេញ និងលោក សេង រិទ្ធិ ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ ដើម្បីអនុវត្តនីតិវីធីបន្ដ៕
