07/06/2026
ទីផ្សាររូបិយប័ណ្ណគ្រីបតូខាតបង់ធ្ងន់ករហូតដល់ទៅជិត ២ ទ្រីលានដុល្លារ ខណៈ Bitcoin ធ្លាក់ថ្លៃជាង ៥០%
========================
លុយរហូតដល់ទៅជិត ២ ទ្រីលានដុល្លារ បានជ្រុះបាត់ពីទីផ្សាររូបិយប័ណ្ណឌីជីថល ឬ គ្រីបតូ គិតចាប់តាំងពីទីផ្សារគ្រីបតូ ហក់ឡើងដល់កម្រិតកំពូលរបស់ខ្លួនកាលពីអំឡុងខែតុលា ឆ្នាំ២០២៥ ខណៈដែល Bitcoin និងទ្រព្យសកម្មឌីជីថលផ្សេងៗទៀតបន្តធ្លាក់ចុះខ្លាំង ដែលធ្វើឱ្យប៉ះពាល់ដល់ទំនុកចិត្តរបស់វិនិយោគិន និងបង្កការព្រួយបារម្ភថ្មីៗកាន់តែខ្លាំងអំពីអនាគតរបស់វិស័យនេះ។ នេះបើយោងតាមការចុះផ្សាយរបស់គេហទំព័រ Newsweek កាលពីថ្ងៃទី៥ ខែមិថុនា ឆ្នាំ២០២៦។
Bitcoin ដែលជារូបិយប័ណ្ណគ្រីបតូធំជាងគេបំផុតរបស់ពិភពលោក បានដាំក្បាលចុះរហូតដល់ទៅជាង ៥០% ពីកម្រិតខ្ពស់បំផុតរបស់ខ្លួនប្រមាណ ១២៦,០០០ ដុល្លារ ដោយធ្លាក់ចុះមកនៅត្រឹមប្រមាណ ៦០,០០០០ ដុល្លារ ក្នុងមួយកាក់។ តម្លៃទីផ្សាររបស់ Bitcoin បានធ្លាក់ចុះពីប្រមាណ ២,៥ ទ្រីលានដុល្លារ មកត្រឹម ១,២ ទ្រីលានដុល្លារ។
ការធ្លាក់ចុះនេះបានរីករាលដាលពាសពេញឧស្សាហកម្មរូបិយប័ណ្ណគ្រីបតូ ដោយរូបិយប័ណ្ណគ្រីបតូសំខាន់ៗដូចជា “អេសឺរៀម” (Ethereum) ក៏ទទួលរងការខាតបង់យ៉ាងធ្ងន់ធ្ងរផងដែរ។ ជារួម តម្លៃសរុបនៃទីផ្សាររូបិយប័ណ្ណគ្រីបតូបានធ្លាក់ចុះពីប្រមាណ ៤,២ ទ្រីលានដុល្លារ មកនៅត្រឹម ២,១ ទ្រីលានដុល្លារ។
ក្រុមអ្នកវិភាគនិយាយថា ការសម្រុកលក់ចេញគ្រីបតូកំពុងត្រូវបានជំរុញដោយសារកត្តារួមផ្សំជាច្រើនរួមមាន ស្ថាប័នវិនិយោគសម្រុកលក់ចេញដើម្បីប្រមូលលុយ ភាពមិនប្រាកដប្រជាកាន់តែខ្លាំងឡើងនៅក្នុងវិស័យរូបិយប័ណ្ណគ្រីបតូ និងការដែលវិនិយោគិនងាកទៅវិនិយហោគលើភាគហ៊ុនដែលទាក់ទងនឹងបច្ចេកវិទ្យា AI ដែលកំពុងរីកចម្រើនខ្លាំង និងភាគហ៊ុនទទូទៅផងដែរ។
ចំណាប់អារម្មណ៍នៅលើទីផ្សារគ្រីបតូនៅតែខ្សោយ ហើយវិនិយោគិនជាច្រើនរំពឹងថា ទីផ្សារគ្រីបតូនឹងមានការប្រែប្រួលជាបន្តបន្ទាប់នៅប៉ុន្មានខែខាងមុខ។ សូមបញ្ជាក់ថា ដោយសាមានហានិភ័យខ្ពស់ខ្លាំង រូបិយប័ណ្ណគ្រីបតូមិនត្រូវបានអនុញ្ញាតជាផ្លូវការឱ្យធ្វើប្រតិបត្តិការជួញដូរនោះឡើយ ក្នុងនោះរួមទាំងកម្ពុជា យើងផងដែរ៕
