នៅជាមួយប្រជាជន

16/10/2025

ក្រុមការងារគណបក្សចុះមូលដ្ឋានខេត្តកំពង់ស្ពឺ សូមគោរពអបអរសាទរយ៉ាងក្លៀវក្លាបំផុត ជូនចំពោះ ឯកឧត្តមកិត្តិសេដ្ឋាបណ្ឌិត ឆាយ ថន សមាជិកគណៈអចិន្រ្តៃយ៍ និងជាប្រធានកិត្តិយសក្រុមការងារគណបក្សចុះមូលដ្ឋានខេត្តកំពង់ស្ពឺ ក្នុងឱកាសដែល ឯកឧត្តមកិត្តិសេដ្ឋាបណ្ឌិត ត្រូវបាន ព្រះមហាក្សត្រ នៃព្រះរាជាណាចក្រកម្ពុជា ជាទីសក្ការៈដ៏ខ្ពង់ខ្ពស់បំផុត ប្រោសព្រះរាជទានតែងតាំងជា ឧត្តមប្រឹក្សាផ្ទាល់ព្រះមហាក្សត្រ មានឋានៈស្មើឧបនាយករដ្ឋមន្រ្តី។

យើងខ្ញុំទាំងអស់គ្នាសូមគោរពជូនពរ ឯកឧត្តមកិត្តិសេដ្ឋាបណ្ឌិត មានជន្មាយុយឺនយូរ សុខភាពល្អ កម្លាំងពលំមាំមួន និងប្រាជ្ញាភ្លឺថ្លាវៀងវៃក្នុងការបំពេញបេសកកម្មជូនជាតិមាតុភូមិ និងប្រជាជន ក្នុងតួនាទីដ៏ឧត្តុង្គឧត្តមនេះ បន្តទៅទៀត។

10/10/2025

ឯកឧត្តមឧបនាយករដ្ឋមន្ត្រី ហ៊ុន ម៉ានី ចាត់តំណាងនាំយកសារលិខិតរំលែកទុក្ខជូនក្រុមគ្រួសារនៃសពលោក សាង វាសនា មន្ត្រីសុខាភិបាលខេត្តកំពង់ស្ពឺ 🙏🙏🙏

នៅព្រឹកថ្ងៃទី១០ ខែតុលា ឆ្នាំ២០២៥នេះ ក្រុមការងារសម្របសម្រួលវិស័យសុខាភិបាលខេត្តកំពង់ស្ពឺរបស់ ឯកឧត្តមឧបនាយករដ្ឋមន្រ្តី ហ៊ុន ម៉ានី និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ស្ពឺ ដឹកនាំដោយ ឯកឧត្តមបណ្ឌិត ហេង សុខគង់ និងសហការី រួមជាមួយតំណាងមន្ទីរសុខាភិបាលខេត្ត និងលោកប្រធានមន្ទីរពេទ្យបង្អែកខេត្តកំពង់ស្ពឺ បាននាំយកសារលិខិតរំលែកទុក្ខ និបច្ច័យដ៏ថ្លៃថ្លារបស់ ឯកឧត្តមឧបនាយករដ្ឋមន្រ្តី ហ៊ុន ម៉ានី ទៅប្រគល់ជូនគ្រួសារនៃសពលោកគ្រូពេទ្យ សាង វាសនា មន្ត្រីបម្រើការនៅមន្ទីរពេទ្យបង្អែកខេត្តកំពង់ស្ពឺ ដែលបានទទួលមរណភាពកាលពីថ្ងៃអង្គារ ១៥កើត ខែអស្សុជ ឆ្នាំម្សាញ់ សប្តស័ក ពស.២៥៦៩ ត្រូវនឹងថ្ងៃទី៧ ខែតុលា ឆ្នាំ២០២៥ វេលាម៉ោង២១យប់ ដោយរោគាពាធ នៅអាស័យដ្ឋាននៅភូមិតារោង ឃុំរកាកោះ ស្រុកគងពិសី ខេត្តកំពង់ស្ពឺ ។

ក្នុងឱកាសនោះតំណាង ឯកឧត្តមឧបនាយករដ្ឋមន្ត្រី ហ៊ុន ម៉ានី សូមចូលរួមរំលែកទុក្ខដ៏ក្រៀមក្រំបំផុតនេះជាមួយក្រុមគ្រួសារនៃសព និងសូមបួងសួងជូនដួងវិញ្ញាណក្ខន្ធលោកគ្រូពេទ្យ សាង វាសនា បានទៅសោយសុខក្នុងឋានសុគតិភពកុំបីឃ្លៀងឃ្លាតឡើយ ។

10/10/2025

នាថ្ងៃទី១០ ខែតុលា ឆ្នាំ២០២៥ ឯកឧត្តម សុខ សង្វារ តំណាងដ៏ខ្ពង់ខ្ពស់ ឯកឧត្តម ហ៊ុន ម៉ានី ប្រធានក្រុមការងាររាជរដ្ឋាភិបាលចុះជួយខេត្តកំពង់ស្ពឺ បានដឹកនាំក្រុមការងារ នាំ​យកនូវយក​ថវិកា​ឧបត្ថម្ភ​របស់ ឯកឧត្តម ហ៊ុន ម៉ានី និងមានកន្រ្តក​ផ្លែឈើរួម​ជាមួយ​នឹងនំស្រួយលីលី មកសួរសុខទុក្ខអ្នកគ្រូ រុន សុខឡេង គ្រូបង្រៀននៅអនុវិទ្យាល័យអង្គពពេល ឃុំពោធិអង្គ្រង ស្រុកបសេដ្ឋ ខេត្តកំពង់ស្ពឺ បានវះកាត់កូននៅក្រៅស្បូនដែលទើបតែមានផ្ទៃពោះមួយខែ និងកំពុងសម្រាកព្យាបាលនៅមន្ទីរពេទ្យកាល់ម៉ែត។

07/10/2025

នាថ្ងៃទី៦ ខែតុលា ឆ្នាំ២០២៥ ឯកឧត្ដម លី ណាវុឌ្ឍ និងក្រុមការងាររាជរដ្ឋាភិបាលទទួលបន្ទុកវិស័យអប់រំ ព្រមទាំងប្រធានការិយាល័យស្រុក មេឃុំ ក្រុមប្រឹក្សា លោកនាយក នាយករង លោកគ្រូ-អ្នកគ្រូ និងប្អូនៗសិស្សានុសិស្ស បានចូលរួម និងរៀបចំកម្មវិធីចំនួនពីរ ទី១៖ ពាំនាំថវិកាឧបត្ថម្ភជូនវិទ្យាល័យចំនួន៤ និងទី២៖ ចុះសួរសុខទុក្ខអ្នកគ្រូដែលទើបឆ្លងទន្លេរួចចំនួន៣នាក់។

+កម្មវិធីទី១៖
១-វិទ្យាល័យ ហ៊ុនសែន ជ្រៃហូរព្នៅ មានសិស្សជាប់បាក់ឌុប ៩៣.៥០% ទទួលបានថវិកា ៥លានរៀល
២-វិទ្យាល័យព្រះឧត្តម សានមុនី ជង្រុក មានសិស្សជាប់បាក់ឌុប ៧៩.២២% ទទួលបានថវិកា ២លានរៀល
៣-វិទ្យាល័យ ទ័ពមានជ័យ មានសិស្សជាប់បាក់ឌុប ៩៣.៨៥% ទទួលបានថវិកា ៥លានរៀល
៤-វិទ្យាល័យ ព្រះបិតាឯករាជ្យ មានសិស្សជាប់បាក់ឌុប ៩០.៣៨% ទទួលបានថវិកា ៣លានរៀល

+កម្មវិធីទី២៖
១. អ្នកគ្រូ ឈៀង ស្រីនីត បង្រៀននៅសាលាបឋមសិក្សាជ្រៃហូរព្នៅ ឃុំវាល ស្រុកគងពិសី ខេត្តកំពង់ស្ពឺ បានសម្រាលកូនប្រុស ឈ្មោះ សល់ សុបញ្ញារាជ (ជាកូនទី១ សម្រាលដោយវះកាត់) នៅថ្ងៃទី១៥ ខែកញ្ញា ឆ្នាំ២០២៥។ អ្នកគ្រូមានសុខភាពល្អ ទាំងម្ដាយ និងកូន។ បច្ចុប្បន្នអ្នកគ្រូកំពុងសម្រាកលំហែមាតុភាពនៅគេហដ្ឋាន។

២. អ្នកគ្រូ ផាន់ សោភា បង្រៀននៅសាលាបឋមសិក្សា២៤កញ្ញា ឃុំពោធិអង្គ្រង ស្រុកបសេដ្ឋ ខេត្តកំពង់ស្ពឺ បានសម្រាលកូនប្រុស ឈ្មោះ នីម សៅសុខខា (ជាកូនទី៥) នៅថ្ងៃទី២២ ខែកញ្ញា ឆ្នាំ២០២៥។ អ្នកគ្រូមានសុខភាពល្អ ទាំងម្ដាយ និងកូន។ បច្ចុប្បន្នអ្នកគ្រូកំពុងសម្រាកលំហែមាតុភាពនៅគេហដ្ឋាន។

៣. អ្នកគ្រូ ជឹម សុខរ៉ាន់ បង្រៀននៅសាលាបឋមសិក្សា ព្រះខែថ្មី ឃុំទួលសាលា ស្រុកបសេដ្ឋ ខេត្តកំពង់ស្ពឺ បានសម្រាលកូនស្រី ឈ្មោះ កាន់ ចន្ទបញ្ញាវត្តី (ជាកូនទី៣) នៅថ្ងៃទី២៩ ខែកញ្ញា ឆ្នាំ២០២៥។ អ្នកគ្រូមានសុខភាពល្អ ទាំងម្ដាយ និងកូន។ បច្ចុប្បន្នអ្នកគ្រូកំពុងសម្រាកលំហែមាតុភាពនៅគេហដ្ឋាន។

ក្នុងដំណើរចុះសួរសុខទុក្ខនេះ ឯកឧត្ដម និងក្រុមការងារក៏បានពាំនាំនូវការផ្តាំផ្ញើសួរសុខទុក្ខពីបងប្រធាន និងវត្ថុអនុស្សាវរីយ៍ជាឃិតទារកប៉ាម៉ានីដ៏ស្រស់ស្អាត និងនំ១កញ្ចប់ជូនដល់អ្នកគ្រូដែលកំពុងសម្រាកលំហែមាតុភាពនៅគេហដ្ឋានផងដែរ។

05/10/2025

លោក អ៊ុង រដ្ឋា តំណាងឯកឧត្តម ហ៊ុន ម៉ានី ប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ស្ពឺ បានអញ្ជើញចូលរួមបុណ្យសពប្អូនប្រុស ផាន រ៉ាយុដែលបានរងគ្រោះក្នុងឧបទ្ទវហេតុ នៅភូមិព្រៃស្រូល ឃុំពោធិ៍អង្រ្គង ស្រុកបសេដ្ឋ។ ក្នុងបរិយាកាសដ៏សែនក្រៀមក្រំនេះ ឯកឧត្តម ហ៊ុន ម៉ានី តាមរយៈក្រុមការងារសូមនាំយកការរំលែកទុក្ខ ប្រកបដោយក្តីសោលស្តាយជូនដល់ក្រុមគ្រួសារនៃសព។

04/10/2025

ព្រឹកថ្ងៃទី៤ ខែតុលា ឆ្នាំ២០២៥
លោក​ អៀង​ គីមលាង​ តំណាងក្រុមការងារចិញ្ចឹមចលនាគ្រូបង្រៀន
បានដឹកនាំក្រុមកាងារចុះសួរសុខទុក្ខអ្នកគ្រូ ចំនួន០២រូប ដែលកំពុងសម្រាកលំហែមាតុភាពតាមគេហដ្ឋាន ៖

១. អ្នកគ្រូ សើ ម៉ានេ បង្រៀនថ្នាក់ទី៦ សាលាបឋមសិក្សារលាំងឈូក នៅភូមិគោករំលិច ឃុំកាហែង ស្រុកសំរោងទង

២. អ្នកគ្រូ ស៊ូ កញ្ញា បង្រៀនថ្នាក់ទី២ សាលាបឋមសិក្សាអង្គព្នាត នៅភូមិថ្មី ឃុំតាំងក្រូច ស្រុកសំរោងទង ដោយបាននាំយកកញ្ចប់សម្រាប់ទារក (Kit) ប៉ាម៉ានី និងនំស្រួយលីលី ដែលបង្ហាញពីក្តីស្រឡាញ់ និងការយកចិត្តទុកដាក់ចំពោះទារក និងកុមារ ពីសំណាក់ ឯកឧត្តម ហ៊ុន ម៉ានី។

01/10/2025

នាព្រឹកថ្ងៃទី០១ ខែតុលា ឆ្នាំ២០២៥នេះ ឯកឧត្តម ហ៊ុន ម៉ានី ឧបនាយករដ្ឋមន្រ្តី រដ្ឋមន្រ្តីក្រសួងមុខងារសាធារណៈ និងជាប្រធានក្រុមការងាររាជរដ្ឋាភិបាលចុះជួយខេត្តកំពង់ស្ពឺ បានអញ្ជើញជួបសំណេះសំណាល និងប្រគល់រង្វាន់ជូនដល់ប្អូនៗសិស្សនិទ្ទេសA ចំនួន ៧៩នាក់ក្នុងខេត្តកំពង់ស្ពឺ និងលោកគ្រូអ្នកគ្រូស្ម័គ្រចិត្តដែលបានចូលរួមបង្រៀនវគ្គបំប៉នប្រឡងថ្នាក់ទី១២ ដែលបានប្រព្រឹត្តទៅនៅសាលមហោស្រព បណ្ណាល័យកំពង់ស្ពឺ។ អញ្ជើញមានវត្តមានក្នុងអង្គពិធីរួមមាន ឯកឧត្តមអ្នកតំណាងរាស្រ្ត សមាជិកក្រុមការងាររាជរដ្ឋាភិបាល អភិបាលខេត្ត ប្រធានស.ស.យ.ក. ខេត្ត និងក្រុង/ស្រុកទាំង៩ លោកនាយក លោកគ្រូ អ្នកគ្រូ និងសិស្សានុសិស្ស សរុបប្រមាណ ២៣០ នាក់។

ឯកឧត្តមបណ្ឌិត ជាម ចន្ទសោភ័ណ អភិបាល នៃគណៈអភិបាលខេត្តកំពង់ស្ពឺបានថ្លែងអំណរគុណជូនចំពោះឯកឧត្តម ហ៊ុន ម៉ានី ដែលតែងគិតគូរដល់ប្អូនជាសិស្សានុសិស្សក្នុងខេត្តកំពង់ស្ពឺ ទាំងក្នុងដំណាក់កាលត្រៀមប្រឡង តាមរយៈការរៀបចំវគ្គបំប៉ន សម្រាប់ប្អូនៗរៀងរាល់ថ្ងៃ សៅរ៍ អាទិត្យ។ ឯកឧត្តមបានសង្កត់ធ្ងន់ថាជោគជ័យរបស់ប្អូនពិតជាមិនអាចកាត់ចេញពីឯកឧត្តម ហ៊ុន ម៉ានីបានទេ។

ជាមួយនិងការចូលរួមអបអរសាទរចំពោះលទ្ធផលគាប់ប្រសើររបស់ក្មួយៗ ឯកឧត្តម ហ៊ុន ម៉ានី បានលើកឡើងថា នេះក៏ជាការលើកកម្ពស់មុខមាត់របស់ខេត្តកំពង់ស្ពឺយេីងផងដែរ។ ឯកឧត្តមក៏បានផ្តាំផ្ញេីឱ្យក្មួយៗដឹងគុណដល់ ឪពុកម្តាយ ដែលបានជួយទំនុកបម្រុងក្នុងការរៀនសូត្រ និងលោកគ្រូអ្នកគ្រូចំពោះការណែនាំ បង្ហាត់បង្រៀន ទើបខ្លួនមានឱកាសទទួលបានជោគជ័យដូចពេលនេះ។ ហេីយជាចុងក្រោយ លោកបានស្នេីសុំថា ក្រោយពេលក្មួយៗទទួលបានជោគជ័យហេីយ កុំភ្លេចត្រឡប់មកចែករំលែកទៅកាន់អ្នកដទៃ ជាពិសេសអ្នកជំនាន់ក្រោយបន្ថែមទៀត។

សូមបញ្ជាក់ថាសិស្សដែលទទួលបាននិទ្ទេសAក៏ទទួលបានកុំព្យូទ័រយួរដៃពីឯកឧត្តម ហ៊ុន ម៉ានី ម្នាក់មួយគ្រឿង។ ចាប់ផ្តើមពីឆ្នាំនេះផងដែរ ឯកឧត្តមបានប្រកាសថាវិទ្យាល័យដែលអត្រាសិស្សជាប់ខ្ពស់ជាងគេទាំងប្រាំនឹងទទួលបានថវិកា ចំនួន ១០លានរៀល អត្រាជាប់ចាប់ពី៩០%ឡេីង ទទួលបាន ៥លាន រៀល ពី ៨០% ដល់ ៨៩.៩៩% ៣លាន រៀល និងវិទ្យាល័យដែលមានអត្រាជាប់កៀក៨០% ក៏នឹងទទួលបានថវិកាចំនួន ២លានរៀលផងដែរ។ ដោយឡែកចាប់ពីឆ្នាំបន្ទាប់តទៅ សិស្សនិទ្ទេស លំដាប់ខ្ពស់ជាងគេ ៣នាក់ដំបូងនឹងទទួលបានមធ្យោបាយធ្វេីដំណេីរម្នាក់ ១គ្រឿងផងដែរ។

28/09/2025

ឯកឧត្តម ហ៊ុន ម៉ានី អញ្ជើញប្រកាសក្រុមការងារគណបក្សចុះមូលដ្ឋាន និងបញ្ចូលសមាជិកថ្មី គណបក្សប្រជាជនកម្ពុជា នៃឃុំវាល ស្រុកគងពិសី ខេត្តកំពង់ស្ពឺ ចំនួន ៥៣៥នាក់
_________________________

ឯកឧត្តម ហ៊ុន ម៉ានី សមាជិកគណៈអចិន្រ្តៃយ៍គណៈកម្មាធិការកណ្តាល និងជាប្រធានក្រុមការងារគណបក្សចុះមូលដ្ឋានខេត្តកំពង់ស្ពឺ អញ្ជើញជាអធិបតីក្នុងពិធីប្រកាសបញ្ចូលសមាជិកថ្មី គណបក្សប្រជាជនកម្ពុជា ឃុំឃុំវាល និងប្រកាសក្រុមការងារគណបក្សចុះមូលដ្ឋានឃុំវាល ស្រុកគងពិសី ខេត្តកំពង់ស្ពឺ នាព្រឹកថ្ងៃទី ២៨ ខែ កញ្ញា ឆ្នាំ ២០២៥។ អញ្ជើញមានវត្តមាននាឱកាសនេះរួមមាន ឯកឧត្តម លោកជំទាវ លោក លោកស្រី ក្រុមការងារគណបក្សចុះមូលដ្ឋានស្រុក គណៈកម្មាធិការគណបក្សស្រុក ឃុំវាល និងសមាជិកថ្មីសរុប ៥៣៥ នាក់។

នាឱកាសនោះ ឯកឧត្តមបានលើកយកពីស្ថានភាពបញ្ហាព្រំដែនដែលកំពុងបន្តតានតឹង ជាពិសេសក្រោយមានការរំលោភបទឈប់បាញ់ពីភាគីម្ខាងទៀតកាលពីម្សិលមិញ។ ឯកឧត្តមបានចែករំលែកទស្សនៈផ្ទាល់ខ្លួនថាពាក្យ «អរគុណសន្តិភាព» ត្រូវបានមនុស្សមួយចំនួនយកលេងសើច និងចាត់ទុកជាពាក្យសាមញ្ញ ក៏ប៉ុន្តែក្នុងកាលៈទេសៈនេះ ពួកគេបានយល់ហើយថាវាមិនសាមញ្ញនោះទេ។ ទន្ទឹមនឹងនេះ ឯកឧត្តមបានរំលេចបន្ថែមពី សារៈសំខាន់នៃសន្តិភាព ក្នុងការផ្សាភ្ជាប់យុវជនជំនាន់មុន ដែលជាសាក្សីរស់ និងការអភិវឌ្ឍនាពេលបច្ចុប្បន្ន។ តាមរយៈសុខសន្តិភាព យើងទទួលបានការវិនិយោគទុនឥតឈប់ឈរ និងផ្តល់ជាបរិយាកាសដ៏សម្បូរបែបសម្រាប់ការអភិវឌ្ឍខ្លួនដល់កូនចៅជំនាន់ក្រោយ។

ឯកឧត្តមបានបន្តថា ក្នុងស្ថានភាពបច្ចុប្បន្ន យើងឃើញយ៉ាងច្បាស់ថា រាជរដ្ឋាភិបាលដឹកនាំដោយគណបក្សប្រជាជនកម្ពុជា បានដោះស្រាយជម្លោះដោយសន្តិវិធី គ្រប់គ្រងស្ថានការណ៍ និងគិតគូរដល់វីរកងទ័ព បងប្អូនជនភៀសសឹកបានដិតដល់ជាទីបំផុត។ ឯកឧត្តមបានបន្ថែមថា បើទោះគណបក្សប្រជាជនមិនល្អឥតខ្ចោះ តែអាចពឹងពាក់ និងជួយគ្នាបានគ្រប់កាលៈទេសៈ ហើយគណបក្សប្រជាជននឹងខិតខំបន្តក្នុងការថែរក្សា និងធានាឲ្យបាននូវផលប្រយោជន៍ជូនប្រជាជន និងប្រទេសជាតិ។

27/09/2025

កាលពីព្រឹកថ្ងៃទី២៧ ខែកញ្ញា ឆ្នាំ២០២៥ ឯកឧត្តម ហ៊ុន ម៉ានី សមាជិកគណៈអចិន្រ្តៃយ៍ គណៈកម្មាធិការកណ្តាល និងជាប្រធានក្រុមការងារគណបក្សប្រជាជនកម្ពុជាចុះមូលដ្ឋានខេត្តកំពង់ស្ពឺ បានដឹកនាំកិច្ចប្រជុំប្រចាំខែកញ្ញា និងលើកទិសដៅភារកិច្ច ខែតុលា របស់គណបក្សខេត្តកំពង់ស្ពឺ ដែលបានប្រព្រឹត្តទៅនៅសាលប្រជុំ ស្នាក់ការគណបក្សខេត្ត។ មានវត្តមានក្នុងកិច្ចប្រជុំរួមមាន ឯកឧត្តមកិត្តិសេដ្ឋាបណ្ឌិត ឆាយ ថន ប្រធានកិត្តិយសក្រុមការងារគណបក្សចុះជួយខេត្ត ឯកឧត្តម អនុប្រធានទី១ អនុប្រធាន សមាជិក សមាជិកា ក្រុមការងារចុះជួយខេត្ត ក្រុង-ស្រុក ឃុំ-សង្កាត់ ប្រធានគណៈកម្មាធិការបក្សខេត្ត និងថ្នាក់ដឹកនាំគណបក្សមូលដ្ឋានគ្រប់ជាន់ថ្នាក់ សរុបប្រមាណ ៣០០ នាក់។

កិច្ចប្រជុំបានស្តាប់របាយការណ៍សភាពការណ៍ទូទៅរបស់ខេត្ត ព្រមទាំងបានពិនិត្យ និងវាយតម្លៃលើវឌ្ឍនភាពនៃការអនុវត្តកម្មវិធីនយោបាយ លិខិតបទដ្ឋាន និងសេចក្តីណែនាំនានារបស់ថ្នាក់កណ្តាលរបស់គណបក្សខេត្តក្នុងខែកញ្ញាកន្លងទៅ។
ថ្លែងទៅកាន់មន្រ្តីគណបក្សដែលមានវត្តមានក្នុងកិច្ចប្រជុំ ឯកឧត្តម ហ៊ុន ម៉ានី បានផ្តល់អនុសាសន៍ណែនាំជូនដល់ក្រុមការងារគណបក្ស និងគណៈកម្មាធិការបក្សមូលដ្ឋានគ្រប់ជាន់ថ្នាក់ ត្រូវបន្តយកចិត្តទុកដាក់ក្នុងការពង្រឹងសមាជិកគណបក្សប្រកបដោយប្រសិទ្ធភាពខ្ពស់។ ក្នុងនោះ សូមក្រុមការងារខិតខំអំពាវនាវដល់សមាជិក សមាជិកាគណបក្សឱ្យបន្តគាំទ្រ និងជឿជាក់លើការដឹកនាំរបស់រាជរដ្ឋាភិបាល ក្រោមការដឹកនាំរបស់សម្តេចធិបតី ក្នុងការដោះស្រាយបញ្ហាព្រំដែន កម្ពុជា-ថៃ។ ដោយឡែក ចំពោះបងប្អូនពលករដែលទើបត្រលប់មកពីប្រទេសថៃ ក្រុមការងារត្រូវបន្តយកចិត្តទុកដាក់ដល់សុខទុក្ខរបស់ពួកគាត់ ជាពិសេស ជួយស្វែងរកឱកាសការងារដល់ពួកគាត់។ អនុវត្តតាមការណែនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណចក្រកម្ពុជា ក្រុមការងារត្រូវចូលរួមអនុវត្តការងារសម្រួលធ្វើអត្តសញ្ញាណបណ្ណ ជូនបងប្អូនដែលអត្តសញ្ញាណបណ្ណអស់សុពលភាព និងអ្នកដែលមិនទាន់មាន ឱ្យបានឆាប់រហ័ស។

បន្ថែមពីលើនេះ ឯកឧត្តមក៏បានចង្អុលណែនាំឱ្យក្រុមការងារទាំងអស់បន្តយកចិត្តទុកដាក់ដល់តម្រូវការប្រចាំរបស់បងប្អូនប្រជាពលរដ្ឋក្នុងខេត្ត ជាពិសេសការត្រៀមជួយសង្រ្គោះបងប្អូន ទ្រព្យសម្បត្តិ និងសត្វពាហនៈពីហានិភ័យ គ្រោះទឹកជំនន់ និងគ្រោះមហន្តរាយផ្សេងៗ ក៏ដូចជាបន្តពង្រឹងការអនុវត្តនយោបាយ ភូមិ-ឃុំមានសុវត្ថិភាព ដែលសុខទុក្ខរបស់ពួកគាត់គឺជាស្នូលនៃបេសកកម្មរបស់គណបក្សយើង។

នៅចុងបញ្ចប់ ថ្លែងអំណរគុណជូនចំពោះក្រុមការងារទាំងអស់ ដែលបានបន្តចុះសួរសុខទុក្ខ និងឧបត្ថម្ភដល់ក្រុមគ្រួសារកងទ័ពនៅតាមមូលដ្ឋានរៀងៗខ្លួន ដែលបានបង្ហាញពីការយកចិត្តទុកដាក់របស់គណបក្សដល់វីរកងទ័ពជួរមុខ ទាំងសុខទុក្ខផ្ទាល់ខ្លួនផង ក៏ដូចជាក្រុមគ្រួសាររបស់ពួកគាត់ផងដែរ។

27/09/2025

23/09/2025