19/06/2023
តើទុរេនវៀតណាមមានអ្វីពិសេសទើបបានជាប្រទេសចិនកុម្ម៉ង់ទិញច្រើនម៉្លេះ?
ប្រទេសវៀតណាមកំពុងតែត្រូវប៉ាន់សម្បើមណាស់ពីការនាំចេញផ្លែទុរេនទៅប្រទេសចិន។ គ្រាន់តែរយៈពេល៥ខែចុងក្រោយនេះ, ទំហំនាំចេញនៃទុរេនវៀតណាមកើនឡើងដល់ជាង៥រយលានដុល្លារ។ បានសេចក្ដីថាកើនឡើងលើសពី១៨ដង បើប្រៀបធៀបជាមួយរយៈពេលដូចគ្នាកាលពីឆ្នាំ២០២២។ យោងតាមការបញ្ជាក់ពីអគ្គនាយកដ្ឋានគយវៀតណាម, នៅអំឡុងពេលនោះ (ចាប់ពីដើមខែមករាដល់ចុងខែឧសភា) ទំហំនៃការនាំចេញបន្លែ-ផ្លែឈើពីវៀតណាមទៅក្រៅប្រទេសគិតជាទឹកប្រាក់២,០៣ពាន់លានដុល្លារ។ ចំនួននេះកើនឡើង៤៣% បើប្រៀបធៀបជាមួយរយៈពេលដូចគ្នាកាលពីឆ្នាំ២០២២។នៅក្នុងចំណោមទំនិញរបស់វៀតណាមដែលនាំចេញនោះ, គេឃើញថាផ្លែទុរេនបានចូលរួមចំណែកយ៉ាងសំខាន់។ កាលពីខែឧសភា, វៀតណាមអាចនាំចេញផ្លែទុរេននៅក្នុងបរិមាណខ្ពស់ផ្ដាច់គេមិនធ្លាប់មាននៅក្នុងប្រវត្តិសាស្ត្ររបស់ខ្លួន ជាមួយនឹងទំហំសាច់ប្រាក់៣៣២លានដុល្លារ។ ចំនួននេះច្រើនជាងទំហំនាំចេញទុរេនកាលពីខែមេសារហូតដល់ដប់ដង។រយៈពេល៥ខែចាប់ពីដើមខែមករា ដល់ចុងខែឧសភា ឆ្នាំ២០២៣, វៀតណាមអាចនាំចេញទុរេនគិតជាទឹកប្រាក់៥០៣លាន និង៤សែនដុល្លារ (៥០៣,៤)។ ចំនួននេះលើសរយៈពេលដូចគ្នាកាលពីឆ្នាំ២០២២រហូតដល់១៨ដង។ ឃើញថាកំណើននាំចេញនេះច្រើនអស់ទាស់តែម្ដង។ អីចឹងហើយបានជាអ្នកវិភាគយល់ឃើញថាវៀតណាមអាចនឹងក្លាយជាមហាអំណាចសេដ្ឋកិច្ចនៅអាស៊ីអាគ្នេយ៍។ នៅក្នុងចំណោមទីផ្សារធំៗដែលគេចាត់ទុកជាម៉ូយដុំរបស់វៀតណាម, គ្មានប្រទេសណាអាចប្រៀបផ្ទឹមជាមួយចិនទេ។ ប្រទេសចិនគឺជាទីផ្សារធំជាងគេរបស់វៀតណាមជាមួយនឹងទំហំទឹកប្រាក់៤៧៧លានដុល្លារ។ជាការពិត, ប្រទេសចិនមិនមែនចេះតែបើកឱ្យទំនិញពីខាងក្រៅចូលដោយសេរីនោះទេ។ ប្រទេសចិនបានដាក់លក្ខខណ្ឌកំណត់ភូតគាមអនាម័យ, ស្តង់ដារផលិតផល និងលក្ខខណ្ឌដទៃទៀត។ ដូច្នេះ លទ្ធភាពនៃការនាំទំនិញរបស់វៀតណាមចូលប្រទេសចិនបាននេះហើយដែលបញ្ជាក់ថាវៀតណាមអាចបំពេញបានគ្រប់លក្ខខណ្ឌកំណត់របស់ចិន ទាំងសុវត្ថិភាពចំណីអាហារ និងភូតគាមអនាម័យ។សព្វថ្ងៃនេះ, ប្រទេសវៀតណាមមានកសិដ្ឋានខ្នាតធំចំនួន២៩៣កន្លែង និងមានសិប្បកម្មអាជីពសម្រាប់វេចខ្ចប់ផ្លែទុរេនស្របតាមស្តង់ដារអន្តរជាតិចំនួន១១៥កន្លែង ដែលទទួលបានអាជ្ញាប័ណ្ណពីក្រសួងមានសមត្ថកិច្ចដើម្បីនាំចេញទៅប្រទេសចិន។ ចាប់ពីខែឧសភា, ទុរេនវៀតណាមឈានចូលដល់រដូវប្រមូលផល (harvest season) ដែលជាហេតុធ្វើឱ្យវៀតណាមកាន់តែសម្បូរទុរេនសម្រាប់នាំចេញ និងទទួលបានប្រាក់ចំណូលយ៉ាងច្រើនសន្ធឹកសន្ធាប់។
